Yuhanãw 15

Yesu wɩ̀-i Ɛrsɛ̃ tuhuhorgǝgu

Gɩ̀ furũũgɩ nã, Yesuẃ juo taa cãwaadũũm mã́ã̀ nǝ̃ wù duunãtaaba wà: «Mǝ̃n-lǝ mã́ã-i ɛrsɛ̃ tuhuhorgǝgu nǝ̃ mǝ̃̀ Tǝ wɩ̀-i gɩ̀ tiiw.

2 Mǝ̃̀ nɔ̃́ǹɲã min mãã ɲã̀ sǝ̃n ŋmǝ̃ǝ̃, wù ji bǝr-ɲã ǹ-nǝ̃nǝ̃ǝ̃.

Nǝ̃ ɲã̀ã́ mãã ɲã̀ ŋmǝ̃ǝ̃, wù ji jã ǹ-tii ɲã̀-lǝ ɲã̀ mĩɛ̃ga nã, ǹ-mǝ̃gaa-ɲã, ɲã́ ba ɲã̀ ŋmǝ̃ǝ̃ dugudugu.

3 Mǝ̃n kállá-ɲã́ã̀ nǝ̃ gàá mãã, gà cíé ɲí ba yiyalɩmmã nã ǹ-tã.

4 Bláà ɲĩ̀ĩ ɲǝ̃gãr mǝ̃̀ nã nã́ã́ mǝ̃n mãã mã̀ã ɲǝ̃gãr ɲì nã gùú tammã.

Ɲi fǝ̃́ǝ̃lã́ wà nũɔ̃gɩ síì gbǝ̃ǝ̃ ǹ-ŋmǝ̃ǝ̃ nǝ̃ gɩ̀ hla nã́ã́ gɩ sáa ɲǝ̃gãr gɩ̀ tuugɩ nã!

Ɲimãã cɔ̃mmã́ nǝ̃ nnĩĩ-i, ɲi-ń ba ɲì sáa ɲǝ̃gãr mǝ̃n nã, ɲi síì gbǝ̃ǝ̃ ǹ-ce cɔ̃m ǹ-hã Dũnnũw.

5 Mǝ̃n-lǝ mã́ã-i ɛrsɛ̃ tuugu, nǝ̃ ɲimãã ba gɩ̀ nɔ̃́ǹɲã.

Mǝ̃n ba mǝ̃̀ sɩriɛ, ɲi síì gbǝ̃ǝ̃ ǹ-ce cɔ̃m.

Wùú nǝ̃n ɲǝ̃gãr mǝ̃̀ nã, nǝ̃ mã́ã yo mǝ̃́ ɲǝ̃gãr wù nã, gɩ̀ tiiẁ ji gbǝ̃ǝ̃ ǹ-ce cɔ̃ncin ǹ-hã Dũnnũw.

6 Wùú nǝ̃n ba wù sáa ɲǝ̃gãr mǝ̃̀ nã, bà fa ǹ-hiil gɩ̀ tiiẁ cɩnkaaraagu ǹ-ga nǝ̃nǝ̃ǝ̃ wù nã, wú juo ba nã́ã́ nũɔ̃guu mãã bàa bǝr-gǝ ǹ-fuulǝǝ gɩ̀ nã ǹ-ga nǝ̃nǝ̃ǝ̃, gɩ́ kuul, bá tuu-gǝ, ǹ-kãã nǝ̃ǝ̃ ǹ-dii-gǝ dǝ̃ǝ̃mã nã.

7 Nǝ̃ ɲi-ń ɲǝ̃gãr mǝ̃̀ nã, nǝ̃ mǝ̃̀ cãwandɩ́ ba ɲì hiɛga nã, kuu wo kuu mãã ɲì caa-gǝ, círǝ̃̀ǝ̃ gɩ̀ nã, ɲi ji da-gǝ.

8 Ɲi-ń ba ɲì ce cɔ̃ncin ɲì hã mǝ̃̀ Tǝw, ɲi pɩgaa wà mã́ã duunãtaa-i nǝ̃-ɲã́ã̀, gɩ̀-lǝ gɩ̀ nã, ɲi pɩgaa cwaaba nǝ̃ wù yuuntasǝ'n gbɩgbaam-i.

9 Mǝ̃̀ cɔ̃mmã̀ dwállá mǝ̃̀ Tǝw nã gùú tammã mãã, ɲimãã yo ɲì cɔ̃mmã̀ dwállá mǝ̃̀ nã nnĩĩ-i.

Bláà dìí kusuugɩ nã-i.

10 Mǝ̃̀ kárrá gùú hlũũ'n nǝ̃ǝ̃yaga nã ǹ-hã-ɲã́ã̀, ɲi-ń ba ɲì wáà-ga, ɲì cɔ̃mmã̀ ji dwal mǝ̃̀ nã, nã́ã́ mǝ̃n mãã mǝ̃̀ wáà mǝ̃̀ Tǝw kárrá dìí nã ǹ-hã-m, nǝ̃ mǝ̃̀ cɔ̃mmã́ ba mã̀ã dwal wù nã nĩĩgu mãã.»

11 Yesuẃ nãã fǝ̃ǝ̃ ǹ-waa wà: «Ɲi-ń da mǝ̃̀ wáalá cãwanĩɛ̃ gáà nǝ̃-ɲã́ã̀, mǝ̃̀ caa gùú dudwalɩmmãã mãã mǝ̃n nã, mã́ ba ɲì nã, nǝ̃ ɲì dudwalɩmmã́ da ǹ-ba dudwalɩmmã gbɩla.

12 «Mǝ̃̀ mãã mǝ̃̀ kra mǝ̃̀ hlũũ'n nǝ̃ǝ̃lɩ nã mǝ̃̀ hã-ɲã́ã̀, dɩ̀-i nnĩĩ: ɲì cɔ̃mmãã mãã mã̀ã dwal mǝ̃n nã gùú tammãã mãã, yáalà ɲì ɲĩɛ̃ cɔ̃mmã́ dwal ɲì ɲĩɛ̃ nã nĩĩgɩ-i.

13 Curow-ń hũɔ̃ ǹ-hã-ba nǝ̃ wù yuugu wù jambliɛ'n cɔ̃mmã nã, wù jambliɛ báàbà cɔ̃mmã̀ síì dwal curodiɛ nã ǹ-ɲǝ̃ǝ̃-yǝ.

14 Mǝ̃n kárrá dìí nã mãã ǹ-hã-ɲã́ã̀, ɲi-ń wáà dɩ̀ hlũũgu, ɲi ba mǝ̃̀ jambliɛ-i.

15 Mǝ̃̀ sǝ̃n ne ɲi ba mããcieraa hlo, mǝ̃̀ be-ɲã́ã̀ mǝ̃̀ jambliɛ-i.

Hamã nã-i?

Mããcierẁ sǝ̃n fǝ̃ǝ̃ wù yuuntii'n mããcem'n tam.

Nǝ̃ ɲimãã-lǝ, mǝ̃̀ Tǝw pɩ́gará-m nǝ̃ mã̀ã́ mã̀ min mãã, mǝ̃̀ pɩ́gará mã̀ min ǹ-ja-ɲã́ã̀.

16 Gɩ̀ sáa ce nã́ã́ ɲimãã níé ǹ-hiil mã́ã̀, mǝ̃n-lǝ mã́ã níé ǹ-hiil-ɲã́ã̀, ǹ-tĩɛ̃-ɲã́ã̀, mǝ̃́ wa ɲi ga ba ɲì ce cɔ̃ncin, mã̀ã́ mãã mã̀ ji hǝ̃ǝ̃sǝ, ǹ-hã Dũnnũw.

Gɩ̀-lǝ gɩ̀ nã, ɲi-ń cirǝ̃ǝ̃ kuu wo kuu nã mǝ̃̀ Tǝw saa mã́ã nũɔ̃'n drɔ, wù ji hã-ɲã́ã̀ nǝ̃-gǝ.

17 Mǝ̃̀ mãã mǝ̃̀ kra dìí nã mǝ̃̀ hã-ɲã́ã̀, dɩ̀-i nnĩĩ: Yáalà ɲì ɲĩɛ̃ cɔ̃mmã́ dwal ɲì ɲĩɛ̃ nã.

Bàá nǝ̃n hṹɔ̃lã́ Yesu cɔ̃mmã, bà cɔ̃mmã bla cuu cwaaba nã

18 «Ɲi-ń ji da ɲì cɔ̃mmã̀ã bla cuu cwaaba nã, fǝ̃́ǝ̃lã́ wà mã́ã cɔ̃m dĩ́ɛ̃lã́ ǹ-bla bà nã, nǝ̃ ba ji da bá hi ɲimãã.

19 Gɩ nã́ã̀ ce nã́ã́ ɲí nǝ̃ sùɔ́gɩ̀ dɩn-i nǝ̃-ba, ɲì cɔ̃mmã̀ yáá mã̀ ji dwal bà nã, wà bàá bluu-i nǝ̃-ɲã́ã̀.

Nǝ̃ mǝ̃̀ níé ǹ-hiil ɲimãã, ǹ-hiil-ɲã́ã̀ bà sǝ̃ǝ̃nã; ɲi mãã ɲì sǝ nǝ̃-ba, gùú cíé ɲì cɔ̃mmã́ bla bà nã.

20 Kã́nnã̀ dɩ̀ nã, mǝ̃̀ wáalá-dǝ nǝ̃-ɲã́ã̀ mǝ̃́ wa mããcierẁ sǝ̃n maa wù yuuntiiw.

Ba-ń ba bàa cuɔl-m, bà ji cuɔl-ɲã́ã̀.

Ba-ń ba bàa nɔ̃ ǹ-hã-m, bà ji nɔ̃ ǹ-hã ɲimãã yo.

21 Bà ji ce-ɲã́ã̀ nǝ̃ dɩ̀-lǝ dɩ̀ min mã́ã̀ cɔ̃m nã-i.

Hamã nã-ì?

Bà sǝ̃n fǝ̃ǝ̃ gùú tii nǝ̃n tĩ́ɛ̃lã́-m.

22 Gɩ nã́ã̀ ce nã́ã́ mǝ̃̀ sáa juo tu bà nã nǝ̃ cɔ̃m, bà sáá bà ji da diiyuɔrɔdǝ.

Nǝ̃ dɩ̀ híí gùú sùɔ́guu mãã kuɔkuɔgu, bà síì gbǝ̃ǝ̃ ǹ-waa wà ba sáa fǝ̃ǝ̃ nã̀ã ce sǝ.

23 Mǝ̃̀ cɔ̃mmã-ń bla gùú tii nã, mǝ̃̀ Tǝ yo, wù cɔ̃mmã́ nǝ̃ mã̀ã bla gɩ̀ tii nã.

24 Gɩ nã́ã̀ ce nã́ã́ mǝ̃ sáa ce cɔ̃nnurommãã mãã curo'n sáa hi ǹ-ce-mã ǹ-da bà sǝ̃ǝ̃nã, ba nã́ã̀ bà sáa da diiyuɔrɔdǝ.

Nǝ̃ kuɔkuɔ-lǝ, bà díɛ́ mǝ̃̀ gaaciega, nǝ̃ mã́ã̀ nǝ̃ mǝ̃̀ Tǝ cɔ̃mmã́ hla nã̀ã bla bà nã.

25 Ɲi sáa da!

Dìí nǝ̃n yállá bà hlũũgɩ nã, dìí súulǝ́ nnĩĩ.

Bà yállá wà mǝ̃̀ cɔ̃mmã blárá bà nã nǝ̃ǝ̃nĩĩ.

26 «Mǝ̃̀ mãã mǝ̃̀ ga tĩɛ̃ gùú pyannãtii mãã ǹ-ji hã-ɲã́ã̀, wù ga hlǝ mǝ̃̀ Tǝw nãã-i, ǹ-jo ɲì nãã, wɩ̀-i Dũnnũ Yuflǝw mãã wù ja cwaaba nǝ̃ sulammã.

Wu-ń jo, wù ji pɩgaa mǝ̃̀ cɔ̃mmã ǹ-ja cwaaba.

27 Nǝ̃ ɲimãã yo, yi mãã yì yáá nǝ̃-ɲã́ã̀ yì min gɩ̀ dul'n bǝ̃ǝ̃gu dìi, ɲi fǝ̃́ǝ̃lã́ mã̀ã́ mãã mǝ̃̀ cɔ̃mmã nã, bláà ɲì waa-dǝ ɲì ja cwaaba.»