Lukaw 21

Blakuuciɛw mãã wù sǝ nǝ̃ kuu, wù hã Dũnnũw nǝ̃ kuudagǝ

Dũnnũ bũũsuɔgɩ nã, kuudaagɩ̀ yáá dàa ba-ń ce bá ba bà dii bà nãkruɔɲinɲã gɩ̀ kusunã, bà bũũ Dũnnũw nǝ̃-ɲã.

Yesuẁ gáa ne ǹ-da gbaalaaba dii bà ɲinɲãã gɩ̀ kusunã,

2 nã̀ã fǝ̃ǝ̃ ǹ-ne ǹ-da blakuuciɛ kuokuodiɛ, wùú yo, yà ba wù dii worbiiga hǝ̃ǝ̃lga gɩ̀ kuugɩ nã,

3 wú fǝ̃ǝ̃ ǹ-waa wà: «Mǝ̃̀ waa sulam-i nǝ̃-ɲã́ã̀, blakuuciɛ kuokuo wáà, wù díilá gùú mãã, gɩ̀ máalá cwaaba min ɲinɲã.

4 Cwa'n dɩgaliɛẁ híilá bà gugondaɲã nã-i.

Nǝ̃ wù-lǝ, nǝ̃ wù duɔbaasǝrɩ min, wù díilá wù nãkruɔgɩ min-i.»

Gàá mãã gà ji ba gà ce ɲí fǝ̃ǝ̃ wà cuu tãllɩ píɛlá nã, Yesuẁ waa gà cɔ̃mmã

(Mãtiyew 24.1-14 ; Markaw 13.1-13)

5 Cwaadaabá fǝ̃ǝ̃ ǹ-ba bà waa Dũnnũ bũũsuɔ'n faa'n cɔ̃mmã, gɩ̀ tɩntrãfɩnfiɛga, nǝ̃ gɩ̀ kusunã wariɛgaa mãã, cwaabà bṹũlã́ Dũnnũw nǝ̃-ga.

6 Yesuẃ fǝ̃ǝ̃ ǹ-waa nǝ̃-ba wà: «Ɲi mãã ɲì da kuu wo kuu mãã nnĩĩ, yuugɩ́ nàa gɩ̀ jo, bà ga juo jiilaa ǹ-baal ɲã̀ min, bà síì ya tɩntãndɩ dɩndɩ́ ba dɩdarǝ'n drɔ.»

7 Yesu duunãtaabá fǝ̃ǝ̃ ǹ-yugu-yǝ wà: «Kaltii, waa ń ja-yáà, gà ji ce bii bǝ̃ǝ̃-i?

Bii ji ce ǹ-pɩgaa-yáà wà ga ji ce?»

8 Yesuẃ siɛ-ba wà: «Mǝ̃́garà ɲí blǝ ɲì hla nã ba báa ji vuu-ɲã́ã̀.

Cocindɩ ga jo ǹ-ji tuu mǝ̃̀ yiiri ǹ-ce-dǝ bà dǝl; wùú nǝ̃n jo, wù ji waa wà: “Mǝ̃n-lǝ mã́ã-i Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo.”

Wà cuu tãl'n bǝ̃ǝ̃ yo, gɩ píɛlá nã ǹ-tã.

Bláá nɔ̃ ɲí hã-ba.

9 Ɲi-ń ji ba ɲì nɔ̃ byariɛ'n cɔ̃mmã nã, nǝ̃ cwaabà ji haar ǹ-ba bà piirǝǝ, bláá ya gbǝrsǝrɩ́ blǝ-ɲã́ã̀, gà-lǝ gàá sáalà gá ce haasǝ.

Nǝ̃ cuu-lǝ, wù síì paa ǹ-ba wù tã nnĩĩ sǝ.»

10 Nã̀ã fǝ̃ǝ̃ ǹ-waa nǝ̃-ba wà: «Codũliɛdaagà ji suro byaari nǝ̃ codũliɛdaaga, yiɛdagǝtaabà ji suro byaari nǝ̃ badaaba.

11 Ɲũũrũũgɩ̀ ji mǝ̃gaa ǹ-saaraa, nǝ̃ nũmmãã nǝ̃ hlɔnhãrãmmã̀ ji ba sɔsǝcin nã.

Ɲããpiilɩnɲã, nǝ̃ gbǝrsǝ'n ɲinɲã̀ ji ba ɲã̀-ń ce ɲã́ hlǝ drɔkuɔlɩ nã, ǹ-ba ɲã̀ pɩgaa wà cuu tãllɩ píɛlá nã.

12 Dɩ̀-lǝ dɩ-ń wa dɩ ji ce, bà ji cuɔl-ɲã́ã̀ dugɔ, nã̀ã dii-ɲã́ã̀ Yahudyaba tɩgim'n dontaa'n nãkrɔnɲã nã, bà-lǝ bá dii-ɲã́ã̀ kasoduugɩ nã.

Bà ji kã nǝ̃-ɲã́ã̀ yuntaaba nã, nǝ̃ kumãndãba yo bà nãã.

Bà ji ce-ɲã́ã̀ nǝ̃ dɩ̀-lǝ dɩ̀ min mã́ã cɔ̃mmã nã-i.

13 Dìí ji ce, ɲi fǝ̃́ǝ̃lã́ dìí mãã mǝ̃n cɔ̃mmã nã, ɲí ce dɩ̀ siɛrnãsǝri ǹ-ja gɩ̀ cwaaba.

14 Hyárrà dɩ dɩndɩ nã, ɲi báa jã ɲi mãã ɲì ga waa dìí mãã gɩ̀ sùɔ́gɩ nã ǹ-hlǝ dɩ̀ nã.

15 Mã́ã ga dii cãwandi ɲì nũɔ̃gɩ nã, gùú cãwandii mãã ɲì ɲããtaabà síì gbǝ̃ǝ̃ ǹ-car-dǝ, nã̀ã hã-ɲã́ã̀ nǝ̃ cɔ̃nfǝ̃ǝ̃gǝguu mãã, curo'n sɩga gbǝ̃ǝ̃ ǹ-kã ɲí yii.

16 Bàá nǝ̃n húulá-ɲã́ã̀, nǝ̃ ɲì ɲũũnãtaaba, nǝ̃ ɲì cwanããba, nǝ̃ ɲì jambliɛba, bà ji hlǝ ɲì furũũgɩ nã, fuwɔ ǹ-ce bá ko cwaadaba ɲì sǝ̃ǝ̃nã.

17 Ɲi cɔ̃mmã̀ ji bla cwaaba min nã, mã́ã cɔ̃mmã nã-i.

18 Dɩ̀-lǝ dɩ̀ min nã, halle ɲì yukwaasǝblɩrɩ dɩndɩn yo, dɩ̀ síì vaalaa.

19 Ɲi-ń hiraa dɩndɩn dɩ̀ nã, ɲi ga ba nũmǝ̃nãw fɩraa.

Yesuẁ waa Serusalɛm mũũm'n cɔ̃mmã

(Mãtiyew 24.15-21 ; Markaw 13.14-19)

20 «Ɲi-ń ji da sɩrǝǝsɩbàa nǝ̃ǝ̃ ǹ-caliɛ Serusalɛmgɩ nã, fǝ̃́ǝ̃lã̀ wà lǝ'n mũũmã píɛlá nã.

21 Gɩ̀-lǝ gɩ̀ nã, bàá mãã bà ga ba Suude yiɛgu, bá ba bà kwar bà maar tãnũũgɩ nã, bà ga ŋmǝ̃ǝ̃rǝ̃ǝ̃.

Bàá mãã bà ga ba lǝ'n kusuugɩ nã, bá sɔ̃ ǹ-hlǝ.

Bàá mãã bà ga ba fugasǝrɩ nã, ba báa jãn lǝ'n kusuugɩ nã hlo.

22 Dũnnũẁ ga hiil gɩ̀ lǝntaa'n wuɔlaaba bà nã gùú tammã-i, kuu wo kuu mãã gɩ̀ yállá gɩ́ da ǹ-suu.

23 Gɩ̀-lǝ gɩ̀ bãnɲã nã, gɩ̀ ywaruugɩ̀ ga dɩsɩrǝǝ cakusunǝ̃ǝ̃ba nã-i dugɔ, nǝ̃ bàá mãã bà tãnkuuraabà ŋmãsã yugo.

Sulammã nã, Dũnnũẁ ji piɛ ywaruugu gɩ̀ yiɛntaaba nã, nã̀ã ja-ba nǝ̃ wù hyadũũgu.

24 Bà ji ko badaaba nǝ̃ dãngunãba, nã̀ã blǝ badaaba ǹ-kãã dii-ba wasǝrɩ nã bàá mãã bà sǝ̃n fǝ̃ǝ̃ Dũnnũẁ, bà yiɛgu.

Dũnnũ cwaa'n ɲããtaabà ga juo bǝ̃ǝ̃lǝ̃ǝ̃ Serusalɛmgɩ nã, fuwɔ bà yunɲã ji suu.»

Yesu wɩ̀-i Curonbiɛw, wù mãã wù ga jo gùú tammã

(Mãtiyew 24.29-35 ; Markaw 13.24-31)

25 Yesuẃ fǝ̃ǝ̃ ǹ-ba wù waa wà: «Ɲindaaɲã̀ ji hlǝ bǝ̃ǝ̃gɩ nã, hiraagɩ nã, nǝ̃ ŋmĩɛ̃ga nã, ǹ-ba ɲã̀ pɩgaa wà cɔ̃ngǝ̃ngãmdaamã ji ce.

Lwaakɩnkandɩ̀ ji ba dɩ̀ mũũ nã̀ã ba dɩ̀ du tamdamã, fuwɔ cwaa'n kusunɲã́ cu, bà hiɛgá yuɔ.

26 Cwaabà ji ba ba-ń da drɔɲinɲãã mãã nǝ̃ fãngããgu ɲã̀ saaraa, nã̀ã ne dìí mãã dɩ̀ jo dɩ̀ ji hi cuuw, gbǝrsǝrɩ̀ paa ǹ-ce bá nǝ̃ǝ̃ ǹ-ku-i.

27 Gùú nã-i, bà ga da Curonbiɛẁ jo yiiluudagǝ sǝ̃ǝ̃nã, nǝ̃ fãngããgǝ̃ngããgu, nǝ̃ yuuntasǝ'n gbɩgbaamcindarǝ.

28 Ɲi-ń ji da gà-lǝ gàa du nã gà ce gùú nã, sórrà ɲí tɩgɩnǝ̃ǝ̃ ɲi ba ɲì fennãã, Dũnnũẁ sɩga hǝ̃ǝ̃sǝ nã̀ã juo kor-ɲã́ã̀.»

Figietuu'n cãwaadũũmã

29 Yesu nã̀ã fǝ̃ǝ̃ ǹ-waa cãwaadũũm mã́ã̀ nǝ̃-ba wà: «Níyà figie tuugu, nǝ̃ tubiɲin'n dɩgaliɛw ɲí ne.

30 Ɲi-ń ji da ɲã̀ pɩpɩrãnɲã caa gùú nã, ɲi fǝ̃ǝ̃ wà hufyallɩ píɛlá nã-i.

31 Gùú tammã-i, mǝ̃̀ wáalá gàá mãã, ɲi-ń ji da gà ce, ɲi saa ɲí fǝ̃ǝ̃ wà Dũnnũ yuuntasǝrɩ píɛlá nã.

32 Yáalà mǝ̃́ waa sulammã nǝ̃-ɲã́ã̀: kuɔkuɔtaa ɲimãã síì tã ǹ-baal, nã́ã́ gɩ̀ cɔ̃mmã̀ min mã sáa ce.

33 Drɔkuɔli nǝ̃ ɲũũrũũgɩ̀ ji ta ǹ-baal, nǝ̃ mǝ̃n cãwandɩ̀ ji ba.»

Yi saa yí ba nũmǝ̃nãw, ǹ-ba yì fennãã Yesu jollɩ nã

34 Yesuẃ ver ǹ-waa hlo wà: «Blǝ́rà ɲì hla nã, ɲi báa ji duu ɲããwuucindɩ nã, nǝ̃ kwãnyelaagɩ nã, nǝ̃ cuu wáà mããjãmmã nã, nã̀ã wa, yuu gúɔ̀, gɩ̀ ga juo tugulǝǝ ɲì nã-i,

35 nã́ã́ jirǝ̃ǝ̃gɩ̀ mãã gɩ̀ duruu ǹ-suu tɩtraaba nã gùú tammã.

Sulammã nã, yuu gúɔ̀, gɩ̀ ji guɔruɔ cuu cwaaba min nã nĩĩgɩ-i.

36 Bláà nũmǝ̃nãw, nǝ̃ ɲí ba ɲì mũũ sukwaga nǝ̃ Dũnnũw nã fɩraa.

Gɩ̀-lǝ gɩ̀ tammã, gùú cɔ̃mmãã mãã mã̀ ga jo, Dũnnũẁ ji hã-ɲã́ã̀ nǝ̃ fãngããgu, ɲí gbǝ̃ǝ̃ ǹ-hlǝ mã̀ nã, nǝ̃ Curonbiɛ mãã wù ga jar gùú sugolli, ɲì yunɲã ba ciirɩmmã nã dɩ̀ nã.»

37 Bǝ̃ǝ̃nãsǝri, Yesuẁ yáá wu-ń ce wú ba wù kal cwaaba Dũnnũ bũũsuɔgɩ nã.

Taagà-ń cu, wú maar, ǹ-kãã cɔ tãnũũgɩ nã mãã bà be-gǝ wà Olivie tun'n tãnũũgu.

38 Taajãlũũ'n nũɔ̃gɩ nã, cwaaba min ba-ń ce bá curuɔ, ǹ-kã Dũnnũ bũũsuɔgɩ nã, bà ga nɔ̃ wù cãwanĩɛ̃ga.