Yuhanãw 11

Lasaar kuugu

1-2 Yesu jambladiɛ yáá dàa Betani lǝri bà be-yǝ Lasaar, wù yáá wùu duruu hlɔmmã nã.

Wù tǝ̃ǝ̃ba yáá bà hǝ̃ǝ̃l-i: bà yáá bà be wuudĩɛ̃lw Marta, nã̀ã ba bà be wudiɛẁ Mariyam.

Gɩ̀-lǝ gùú Mariyamẁ yáá wùu tũn latɩkolo nɔ̃mmã Yitii Yesu vyanɲã nã, nã̀ã hu-ɲã nǝ̃ wù yukwaasǝri.

3 Lasaar tǝ̃ǝ̃ báà, bá tĩɛ̃ curoẃ kãã waa nǝ̃ Yesuw, wà wù wùú mãã wù cɔ̃mmã̀ dwal wù nã, wú nàa wù jaa.

4 Yesuẁ gáa nɔ̃ cãwan díɛ̀ wú waa wà: «Hlɔm mã́ã̀, mã̀ sáa jo Lasaar hla'n kúúcɔ̃m nã sǝ, nǝ̃ mã̀ júó mã̀ ji pɩgaa cwaa-i nǝ̃ Dũnnũ gbɩgbaamã.

Gɩ̀-lǝ gɩ̀ nã, bà ji ba bà bũũ wù Bíɛ́w.»

5 Sulammã nã, Martaw, nǝ̃ wù nãndiɛw, nǝ̃ Lasaarw, bà cɔ̃mmã̀ yáá mã̀ã dwal Yesuw nã.

6 Nǝ̃ bà gáa tu nǝ̃-yǝ wà Lasaarw sɩraa hinnǝ̃, wú ya bãnɲã hǝ̃ǝ̃lɲã́ ta,

7 nã̀ã fǝ̃ǝ̃ ǹ-waa nǝ̃ wù duunãtaaba wà: «Yáà yí ver yí kã Suude yiɛgu.»

8 Wù duunãtaabá waa nǝ̃-yǝ wà: «Kaltii, Yahudyabà sáá bà caa bá nǝ̃ǝ̃ ǹ-ko-n nǝ̃ tɩntrãga gùú sùɔ́guu sǝ-ì?

Kuuluuẁ sáa ji hi ǹ-tuu jal, ń wa yín ver ǹ kã gùú sùɔ́gɩ-i hlo!»

9 Yesuẃ taa cãwaadũũm mã́ã̀ nǝ̃-ba wà: «Liɛraa nũɔ̃sɔ̃ nǝ̃ bà hǝ̃ǝ̃l sǝ dìɛ bǝ̃ǝ̃nãgu-ì?

Nǝ̃-ń ba ǹ wáà bǝ̃ǝ̃nãgu, ǹ mãã gbɩgbaamã nã, ǹ ba ǹ daraa-i, ǹ sǝ̃n juu ǹ hla.

10 Nǝ̃ nǝ̃-n ba ǹ wáà yisuɔgu, gbɩgbaamãã mãã mã̀ sɩraa sǝ, ǹ ba ǹ juu ǹ hla-i.»

11 Wù gáa waa dɩ̀-lǝ, wú waa wà: «Yì jambla Lasaarẁ gáa duɔsǝ, nǝ̃ mǝ̃̀ ji kãã pĩĩ-yǝ duɔsǝmmã nã.»

12 Wù duunãtaabá waa nǝ̃-yǝ wà: «Kaltii, wu-ń ba wù gáa ba wù duɔsǝ, saluugɩ ga jãn wù nã.»

13 Yesuẁ yáá wù caa wú waa Lasaar kúúcɔ̃mmã-i nǝ̃-ba nnĩĩ nã, nǝ̃ bà sáa fǝ̃ǝ̃ dɩ̀ tam.

Bà-lǝ bá wa fíí wu waa nǝ̃ǝ̃nĩĩduɔsǝm'n cɔ̃m-i.

14 Gɩ̀-i wú waa dɩ́ kaalaa nǝ̃-ba wà: «Lasaarẁ kúú.»

15 Nã̀ã waa nǝ̃-ba wà: «Mǝ̃̀ mãã mǝ̃̀ sáa ba dàa nǝ̃ wú ku, gɩ̀ dwállá mǝ̃̀ nã ǹ-car ɲimãã cɔ̃mmã nã-i hamã nã-ì?

Díɛ́dii ji pɛ ɲì nã, ɲí hũɔ̃ mǝ̃̀ cɔ̃mmã huhorɩmmã nã.

Sórrà, yí kã wù nãã.»

16 Wù duunãtiidiɛẁ yáá dàa bà be-yǝ Tumasɩ, badaabá be-yǝ wà pɩplãmba.

Wù-lǝ wú waa nǝ̃ wù nãduunãtaadaba wà: «Yáà hãmĩĩ yo, yí kã yí ta, gɩ-ń ba kúú-i yo, yí ku yì min.»

Yesu wɩ̀-i nũmǝ̃nãsǝntiiw

17 Yesuẁ gáa kãã hi, wú nɔ̃ wà Lasaar diim'n bãnɲã nnǝ̃ǝ̃nã wɩ̀-i nnĩĩ.

18 Betani lǝrii nǝ̃ Serusalɛm halɩmmã̀ yáá nã́ã́ culoba siɛl-i,

19 gùú yáá gùu ce Yahudya cin bá hlǝ ǹ-kã bà ga ce Martabà tǝ̃ǝ̃ blanfyãnuugu.

20 Martaẁ gáa nɔ̃ wà Yesuw nàa wù jo, wú suro ǹ-ba wù jǝ̃ǝ̃lǝ̃ǝ̃-yǝ, nǝ̃ Mariyamẃ ba dàa jirammã nã duugɩ nã.

21 Wù gáa hi, wú waa nǝ̃ Yesuw wà: «Yitii, n nã́ã̀ ba dìɛ, mǝ̃̀ tǝ̃ǝ̃ nã́ã̀ wù sáa ku.

22 Nǝ̃ mǝ̃n fǝ̃́ǝ̃lã́ wà yín mãã gùú sùɔ́gu nnĩĩ, nǝ̃-ń cirǝ̃ǝ̃ cɔ̃m wo cɔ̃m nã Dũnnũw saa, wù hã-n nǝ̃ mã-i.»

23 Yesuẃ waa nǝ̃-yǝ wà: «Ǹ tǝ̃ǝ̃ ji suro kuugɩ nã.»

24 Martaẃ waa nǝ̃-yǝ wà: «Mǝ̃̀ fǝ̃́ǝ̃lã́ wà yufaalgǝgɩ nã, cugutaa'n pĩĩmã nã, Dũnnũẃ ga pĩĩ-yǝ.»

25 Yesuẃ waa nǝ̃ Martaw wà: «Mã́ã-i cugutaa'n pĩĩmã, mã́ã-i nũmǝ̃nãsǝri.

Wùú nǝ̃n hũɔ̃ mǝ̃̀ cɔ̃mmã, halle wu-ń ku, gɩ̀ tiiẁ da fɩraa nũmǝ̃nãsǝri-i.

26 Curo wo curo mãã nũmǝ̃nãw, nã̀ã ba yà hũɔ̃ ǹ-cu mǝ̃n nã, gɩ̀ tiiẁ sɩga ku ǹ-da.

Marta, nã́ã́ n hṹɔ̃lã́ dǝ-ì?»

27 Martaẃ waa nǝ̃-yǝ wà: «Ũwũũ Yitii, mǝ̃̀ hṹɔ̃lã́-dǝ wà Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo cuuw nã, wà yíi-i.

Yíǹ-lǝ yíi-i Dũnnũ Bíɛ́w.»

28 Martaẁ gáa waa dɩ̀-lǝ, wú ta ǹ-kũũ.

Wù gáa hi, wú kãã be Mariyamw ǹ-ŋmã ǹ-waa nǝ̃-yǝ wà: «Kaltiiẁ júó; wú nàa wù be-n.»

29 Mariyamẁ gáa nɔ̃ dɩ̀-lǝ, wú tĩĩ ǹ-suro ǹ-ba wù kã Yesuw nãã.

30 Yesuẁ sáa wùu hi ǹ-jãn lǝ'n kusuugu yugo, Martaẁ yáá wùu kãã da-yǝ gùú sùɔ́guu mãã, wù yáá dàa yugo yugo gùú sùɔ́gɩ dɩngɩ nã-i.

31 Yahudyabaa mãã bà yáá dàa duugɩ nã nǝ̃ Mariyamw, bà yu wù dɔ̃mmã nã, bà-lǝ bà gáa da yà diɛ ǹ-hlǝ nnĩĩ nã, bàá yo, bá suro ǹ-ba bà duu wù nã.

Bà yáá bà ne wà fíí wu kã wù tǝ̃ǝ̃ pĩɛ̃ndiitãnfierɩ nã-i wù ga ba wù kaal.

32 Wù hillɩ nã, wù gáa ne ǹ-da Yesuw, wú kãã duruu wù vyanɲã nã, nã̀ã waa nǝ̃-yǝ wà: «Yitii, yín nã́ã̀ ba dìɛ, mǝ̃̀ tǝ̃ǝ̃ nã́ã̀ wù sáa ku.»

33 Nã̀ã paa ǹ-ba wù kaal.

Gùú Yahudyabaa nǝ̃n yáá bàa duu wù nã ǹ-kã, bàá yo, bá kã bá ba bà kaalaa bà min.

Yesuẃ gáa da bà kaalaa nnĩĩ nã, gɩ́ ca wù nã ǹ-car, wù hiɛ yo, gá gaala nã.

34 Wú yugu-ba wà: «Ɲi díilá-yǝ haa-ì?»

Bá siɛ-yǝ wà: «Yitii, ji ta yi ga pɩgaa-n nǝ̃ gɩ̀ sùɔ́gu.»

35 Yesuẃ nǝ̃ wù hla wú kaal.

36 Yahudyabá ba bà waa nǝ̃ bà ɲĩɛ̃ wà: «Ɲi sáa da?

Mǝ̃ǝ̃lǝ̃ǝ̃tii'n cɔ̃mmã̀ yáá mã̀ dwal wù nã dɛ!»

37 Badaabá ba bà waa wà: «Wù-lǝ wùú cúgurǝ́ yɩrnĩĩ yinɲã?

Nǝ̃ bii cíé wù sáa ɲǝ̃ǝ̃ Lasaarw nǝ̃ kúúgu?»

38 Cɔ̃m mã́ã̀mã́ ver ǹ-ca Yesuw nã hlo, wú kã pĩɛ̃ndiitãnfierɩ nã, dɩ̀ yáá tɩntalɩm'n fuu nã-i, nǝ̃ bá ce vatãndi ǹ-suu dɩ̀ nũɔ̃gu.

Gɩ̀-i,

39 wú waa nǝ̃-ba wà: «Vṹũlã̀ ɲi cugur vatãndɩ́ hal!»

Mǝ̃ǝ̃lǝ̃ǝ̃tii'n tǝ̃ǝ̃ Martaẃ waa wà: «Yitii, wù bãnɲã nnǝ̃ǝ̃ɲã-i nnĩĩ pĩɛ̃ndiitãnfer'n kusuugɩ nã; wù dúú nã ǹ-ba wù hɔ̃.»

40 Yesuẃ waa nǝ̃-yǝ wà: «Marta, mǝ̃n sáa waa nǝ̃-n mǝ̃́ wa nǝ̃-n hũɔ̃ mǝ̃̀ cɔ̃mmã, n ji da Dũnnũ yuuntasǝ'n fãngããgɩ-ì?»

41 Vatãndɩ́^a cugur ǹ-hal pĩɛ̃ndiitãnfer'n nũɔ̃gɩ nã.

Yesuẃ fǝ̃ǝ̃ ǹ-haar wù yuugu drɔguu nã̀ã waa wà: «Tɩtii, ǹ mãã ǹ hṹɔ̃lã́ ǹ-nɔ̃ mǝ̃̀ cirǝ̃mmã, mǝ̃̀ dũũ kwayaw ǹ-hã-n, gɩ̀ cɔ̃mmã nã.

42 Mǝ̃̀ fǝ̃́ǝ̃lã́ wà yíi nṹwã̀ mǝ̃̀ cirǝ̃mmã bǝ̃ǝ̃ wo bǝ̃ǝ̃, nǝ̃ mǝ̃̀ waa dɩ̀-lǝ ń da ǹ ce cocindii mãã dìi caliɛ mǝ̃̀ nã níɛ́, bá da ǹ-hũɔ̃ wà yíi tĩ́ɛ̃lã́-m.»

43 Wù gáa waa dɩ̀-lǝ wú haar wù yalli ǹ-waa wà: «Lasaar, suro ń hlǝ ń jo níɛ́ nã!»

44 Mǝ̃ǝ̃lǝ̃ǝ̃tiiẃ hlǝ ǹ-jo; wù vyanɲãã nǝ̃ wù nãkrɔnɲã̀ã fuɔ nǝ̃ pĩɛ̃ndiikuulaaw, nǝ̃ bá ce pĩɛ̃ndiikuulaayiɛdagǝ ǹ-fuɔ wù yuugu.

Yesuẃ waa wà: «Fɩ́rrǝ̀-yǝ nǝ̃ ɲí nǝ̃nǝ̃ǝ̃ wú maar!»

Bà caa bá ko Yesuw

(Mãtiyew 26.1-5 ; Markaw 14.1-2 ; Lukaw 22.1-2)

45 Yahudyabaa mãã bà yáá bàa kã blanfyãnuugu Mariyambà kuugɩ nã, bà gáa da Yesu mããcem mã́ã̀, bà cindɩ́ hũɔ̃ wù cɔ̃mmã.

46 Nǝ̃ badaa-lǝ bá hla nã̀ã ver ǹ-kãã taa Yesu diicerǝ díɛ̀ ǹ-ja Farisĩɛ̃ba.

47 Yahudyaba puruɔntaa'n yuntaaba nǝ̃ Farisĩɛ̃baa bá be ǹ-tɩgii Yahudyaba vũnvãnãã'n sugojarriɛ'n kuruugu, nã̀ã waa nǝ̃-ba wà: «Biɛ wáà jáa ba wù ce cɔ̃ncin mã̀ã́ mãã mã̀ pɩgaa Dũnnũ fãngããgu ǹ-car, ɲi wa yi ce hamã-i?

48 Yi-ń fǝ̃ǝ̃ nã̀ã ya wú ba dɩ̀ nã, cwaaba min bà ji hũɔ̃ wù cɔ̃mmã.

Gɩ̀ tammã Wurɔm fãngãtaabà ga jo ǹ-ji mũũ yì Dũnnũ bũũsuɔgu nã̀ã bǝ̃ǝ̃lǝ̃ǝ̃ Yahudyaba nã.»

49 Wudiɛ yáá dàa bà sǝ̃ǝ̃nã bà be-yǝ Kayifɩ.

Wùú yáá Yahudyaba puruɔntaa'n yuuntigǝ̃ngãw gɩ̀-lǝ gɩ̀ blɩri.

Wù-lǝ wú waa wà: «Ɲi sáa blǝ dɩ̀ yigagu dɛ!

50 Ɲi sáa fǝ̃ǝ̃ wà curo dɩnw-ń ku ǹ-kor wù yiɛntaaba, wà gɩ̀-lǝ gɩ búɔlá nã ɲì saa ǹ-ɲǝ̃ǝ̃ wù yiɛntaaba min guumã-i!»

51 Kayifɩẁ mãã wù yáá Yahudyaba puruɔntaa'n yuuntigǝ̃ngãw, gùú yáá gùu ce Dũnnũẃ dii cãwan díɛ̀ wù nũɔ̃gɩ nã, ǹ-waa wà Yesu-lǝ wùú sáalà wú ku Isɩrayɛl bluu'n cɔ̃mmã nã.

52 Nǝ̃ wù síì ku Isɩrayɛl bluu'n cɔ̃m nã dɩn sǝ, wù ji ku ǹ-da ǹ-ce Dũnnũ tãnkuuraabaa mãã bà písɩrĩ́ɛ̃ ǹ-ba cuu yanɲã min nã, bá tɩgii ǹ-ba kuugɩ dɩngu.

53 Gùú yuugɩ dɩngu dàa, Yahudyaba yuntaabá sa ǹ-hiraa dɩ̀ nã, wà fuwɔ bà-lǝ bá ko Yesuw.

54 Gùú cíé Yesuẃ juo ba wù sǝ̃n hũɔ̃ wù jãn wù hlǝ Yahudyaba tɩgim'n sɔsǝrɩ nã.

Yesubá kãã hlǝ gɩ̀ sùɔ́gɩ nã nǝ̃ wù duunãtaaba, ǹ-kã lǝdarǝ nã, bà be-dǝ wà Efrayim, dɩ̀ sáa hal nǝ̃ jerkwaari, ǹ-kãã jiraa dàa gùú sùɔ́gu.

55 Yahudyabà paaruuguu mãã bà be-gǝ wà Ta-n-maa paaruugu, gɩ̀ jáa piɛ nã, cocindɩ́ hlǝ liɛ'n dɩgaliɛ nã ǹ-jo Serusalɛmgu, bà ji per bà hla nã, ǹ-vaa nǝ̃ bà hlũũgɩ̀ kárrá dìí nã mãã, nǝ̃ paaruugɩ́ ji da gɩ́ hi.

56 Cwaabà gáa jo nnĩĩ nã, bá ba bà caa Yesuw bà sáa da-yǝ.

Bá kãã tɩgii Dũnnũ bũũsuɔgɩ nã ǹ-ba bà yugu bà ɲĩɛ̃ wà: «Ɲimãã saa, ɲi ne wà wu ga jo paaruu gúɔ̀ nã-ì?»

57 Yàá Yahudyaba puruɔntaa'n yuntaaba nǝ̃ Farisĩɛ̃bà yáá bàa waa nǝ̃ cwaaba, wà gùú tii nǝ̃n fǝ̃ǝ̃ Yesuẁ mãã gùú sùɔ́gu, wú juo waa nǝ̃-ba, bá da ǹ-kãã blǝ-yǝ.