Yuhanãw 10

Yesuẁ waa tũnciir'n cɔ̃mmã

Yesuẃ juo taa cãwaadũũm mã́ã̀ nǝ̃-ba wà: «Yáalà mǝ̃́ waa sulammã nǝ̃-ɲã́ã̀: wùú nǝ̃n ya tũmãm'n dũndɔ̃llɩ́ ba, nã̀ã jãn nǝ̃ yiɛdagǝ yiɛ, ŋmãllĩĩ-i, cobal-i nǝ̃ gɩ̀ tiiw.

2 Nǝ̃, wùú nǝ̃n jãn nǝ̃ dũndɔ̃lli, wɩ̀-i wanciinw.

3 Wù mãã wu-ń kã, gbaliɛciirẃ suro ǹ-cugur dũndɔ̃lli-i ǹ-hã-yǝ.

Wú ba wù be wù tũmba bà denden, bá ba bà nɔ̃ wù yallɩ nã, nã̀ã hlǝ ǹ-ba bà duu wù nã taasǝ̃ǝ̃nǝ̃ǝ̃gu.

4 Bà mãã bà fǝ̃́ǝ̃lã́ wù yalli nnĩĩ nã, wu-ń ciɛl-ba, bà min bà hlǝ-i.

Gɩ̀-lǝ gɩ̀ nã, wù-lǝ wú ta bà yigagɩ nã, nǝ̃ bá ba bà duu wù nã.

5 Nǝ̃ nǝ̃ǝ̃nĩĩtiiw-ń jo, bà síì duu wù nã.

Bà mãã bà sǝ̃n fǝ̃ǝ̃ wù yalli nnĩĩ, wu-ń be-ba, bà ver ǹ-ta kwarɩm-i.»

6 Yesuẁ táalá cãwaadũũm mã́ã̀, bà sáa fǝ̃ǝ̃ mã̀ yuu.

Yesu wɩ̀-i dũndɔ̃lli

7 Wú ver ǹ-waa nǝ̃-ba wà: «Yáalà mǝ̃́ waa sulammã nǝ̃-ɲã́ã̀: mã́ã-i gbaliɛ dũndɔ̃lli.

8 Bà min mãã bà júó mǝ̃̀ yiganã, bà min ŋmãllãã dɩn-i, cobaliɛ'n dɩn-i, nǝ̃ tũm yo, bà sáa nɔ̃ ǹ-hã-ba.

9 Mã́ã-i dũndɔ̃lli.

Wùú nǝ̃n ta mǝ̃n nãã ǹ-jãn nǝ̃ gɩ̀ dũndɔ̃lli, gɩ̀ tiiẁ ji da korɩmmã.

Wù ji ba wù gbǝ̃ǝ̃ wù jãn nã̀ã ba wù hlǝ fiɛya.

Wù ji ba wù da wù nũɔ̃nã wuuri.

10 Ŋmãllĩĩ sǝ̃n jo mãdamã nã nã́ã́ ŋmãl sǝ, yindagǝ nã kukwoga, nǝ̃ bǝ̃ǝ̃lǝ̃mmã.

Nǝ̃ mǝ̃n júó mǝ̃̀ ji tũnũũ nũmǝ̃nãsǝrɩ nã ǹ-hã cwaaba dugɔ!

Yesu wɩ̀-i wanciinhuhoryǝw

11 «Mǝ̃n-lǝ mã́ã-i wanciinhuhoryǝw.

Wanciinhuhoryǝẁ hã-ba nǝ̃ wù yuugu wù tũm'n cɔ̃mmã nã.

12 Nǝ̃ mããcierw mãã bàa tuu-yǝ wancendɩ nã, wùú sǝ bà wanciinw!

Wu-ń da mǝ̃yɩrẁ jo, wù kwar nǝ̃ bá ba-i.

Mǝ̃yɩrẁ juo blǝ badaaba, nã̀ã buruɔ bà dɩgaliɛw nã.

13 Hamã nã-i mããcierẃ kwar?

Wù-lǝ wù jin'n cɔ̃m-i mãã gbǝ̃ǝ̃ wù nã, tũm'n cɔ̃m-lǝ, mã̀ sáa gbǝ̃ǝ̃ wù nã.

14-15 Mã́ã-i wanciinhuhoryǝw.

Mã́ã́, nǝ̃ mǝ̃̀ Tǝw, yi mãã yìi fǝ̃ǝ̃ yì ɲĩɛ̃ gùú tammã mãã, yí nǝ̃ yìi fǝ̃ǝ̃ yì ɲĩɛ̃ nĩĩgɩ-i nǝ̃ mǝ̃̀ tũm yo, nǝ̃ mǝ̃̀ hã-ba nǝ̃ mǝ̃̀ yuu yo bàá cɔ̃mmã nã-i.

16 Mǝ̃́ nǝ̃ tũmdaba yiɛdagǝ.

Mǝ̃̀ saa mǝ̃́ kã ǹ-ga cal ǹ-jo nǝ̃-ba.

Bà ga nɔ̃ mǝ̃̀ yalli, mǝ̃̀ ga juo gbǝ bà nã sùɔ́gɩ dɩngu, bá ba tũnkuruɔgɩ dɩngu, nǝ̃ wanciin yo wú ba wù dɩnẁ bà yuugɩ nã.

17 Mǝ̃n mãã mǝ̃̀ hã-ba nǝ̃ mǝ̃̀ yuugu, nã̀ã ji da ǹ-ver ǹ-hũɔ̃-gǝ, gùú cíé mǝ̃̀ cɔ̃mmã́ ba mã̀ dwal mǝ̃̀ Tǝw nã.

18 Gɩ̀ sáa ce nã́ã́ cwaa gúulà mǝ̃̀ yuugɩ nã, nǝ̃ mǝ̃n hũɔ̃ kuugu bàá cɔ̃m nã-i.

Mǝ̃n ji gbǝ̃ǝ̃ ǹ-jãn kuugɩ nã, nã̀ã ver ǹ-hlǝ gɩ̀ nã.

Mǝ̃̀ Tǝẁ kárrá dɩ̀ nã.»

19 Yesu cãwan díɛ̀dɩ cɔ̃mmã nã, Yahudyabà sáa gbǝ hlo.

20 Bà cindɩ́ ba dɩ̀ waa wà: «Biɛ wáà wù yuugɩ̀ sɩriɛ!

Tãntɔ̃nããntii-i!

Bláá nɔ̃ ɲí hã-yǝ.»

21 Badaabá wa: «Tãntɔ̃nããntii sǝ̃n wanãã nnĩĩ tammã.

Ɲimãã híí ǹ-da tãntũɔ̃ yà cugur yɩrnĩĩ'n yinɲã-ì?»

Yahudyabà hla Yesuw

22 Yɔ'n bǝ̃ǝ̃gɩ̀ jáa hi, Yahudyabá ba bà ce bà Dũnnũ bũũsuɔ'n perm'n paaruugu Serusalɛmgu.

23 Yesuẃ kã Dũnnũ bũũsuɔgɩ nã, ǹ-kãã ba wù waaraa wù ta Solmãn yanjalgǝ̃ngãw taara.

24 Yahudyabá fǝ̃ǝ̃ ǹ-kãã caliɛ wù nã, nã̀ã waa nǝ̃-yǝ wà: «Ǹ ji kaalaa ǹ cɔ̃mmã nã ǹ-ja-yáà bii bǝ̃ǝ̃-i?

Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo, ǹ-ji hã-yáà, yíi-ì?

Waa kaalammãã nǝ̃-yáà.»

25 Yesuẃ waa nǝ̃-ba wà: «Mǝ̃̀ wáalá-dǝ nǝ̃-ɲã́ã̀ ǹ-tã, nǝ̃ ɲi sáa hũɔ̃-dǝ.

Mǝ̃n mãã mǝ̃̀ ce mã̀ã́ mãã mǝ̃̀ Tǝ yiirɩ nã, mã̀-lǝ mã̀ã́ pɩ́gará mǝ̃̀ cɔ̃mmã.

26 Nǝ̃ ɲì nũɔ̃gɩ̀ mãã gɩ̀ sǝ mǝ̃n tũmãmba nã, gùú cíé ɲi sáa hũɔ̃-dǝ.

27 Mǝ̃n fǝ̃ǝ̃ mǝ̃̀ tũmba.

Bà nɔ̃ mǝ̃̀ cãwandi, nã̀ã ba bà duu mǝ̃̀ nã.

28 Mǝ̃̀ hã-ba nǝ̃ fɩraa nũmǝ̃nãsǝri.

Bà sɩga hyã cicuɔgu, nǝ̃ curo'n síì gbǝ̃ǝ̃ ǹ-gugɔr ǹ-hũɔ̃-ba mǝ̃̀ saa.

29 Mǝ̃̀ Tǝw mãã wù hlã-m nǝ̃-ba, wù fãngããgɩ̀ ta ɲinɲã min nã, gɩ̀-lǝ gɩ̀ tammã, curo'n síì gbǝ̃ǝ̃ ǹ-gugɔr ǹ-hũɔ̃ wù dɩn yo mǝ̃̀ Tǝ nãkruɔgɩ nã.

30 Mã́ã̀, nǝ̃ mǝ̃̀ Tǝw, yí nǝ̃ yìi gbǝ dɩ̀ dɩndɩ nã-i.»

31 Wù gáa waa dɩ̀-lǝ, Yahudyabá ver ǹ-biɛriɛ tɩntrãga nã wà ba nǝ̃ǝ̃-yǝ hlo.

32 Wú waa nǝ̃-ba wà: «Mǝ̃̀ cíé gùú mããfɩnfammãã mãã piyɛ̃, ǹ-pɩgaa-ɲã́ã̀ nnĩĩ, mã̀ hlǝ́rá Tiiyǝw nãã-i.

Nǝ̃ mã̀-lǝ mã̀ min sǝ̃ǝ̃nã, ɲi wa ɲí nǝ̃ǝ̃ ǹ-ko-m hamã yuunã-i gbal-lǝ?»

33 Yahudyabá siɛ-yǝ wà: «Gɩ̀ sáa ce nã́ã́ yíǹ cíé gùú mããfɩnfammãã mãã, yi wa yi nǝ̃ǝ̃-n mã̀ã́ cɔ̃m nã-i dɛ, nǝ̃ curo'n blɩ yíi, ń ba ǹ waaraa ǹ waa ǹ-jãn Dũnnũw nã, wà yíi-i Dũnnũw.»

34 Yesuẃ waa nǝ̃-ba wà: «Dɩ̀ yállá ɲì hlũũgɩ nã wà Dũnnũw wáalá wà dũnnũba-i nǝ̃-ɲã́ã̀!

Kwasǝ-iì?

35 Yi fǝ̃́ǝ̃lã́ wà dìí nǝ̃n yállá Dũnnũ cãwan'n sɛbɛba nã, wà dɩ síì gbǝ̃ǝ̃ ǹ-guu nã tamdamã nã.

Yindiɛ Dũnnũẁ hlã bàá mãã nǝ̃ wù cãwandi, wu-ń ba wù be-ba dũnnũba,

36 nǝ̃ mã́ã mãã Tiiyǝẁ níé ǹ-hiil-m, ǹ-tĩɛ̃ mǝ̃́ jo cuuw nã, bii cíé mǝ̃-ń wa Dũnnũ Bíɛ́-i nǝ̃-m, ɲi wa mǝ̃́ waa mǝ̃̀ jãn wù nã-ì?

37 Mǝ̃n ba mǝ̃̀ sǝ̃n ce mǝ̃̀ Tǝ mããcemmã, bláá hũɔ̃ mǝ̃̀ cãwandi.

38 Nǝ̃ gɩ-ń ba gùu ba wà mǝ̃ ce mã̀-i, hṹɔ̃lã̀-dǝ.

Halle ɲi-ń ba ɲì síì hũɔ̃ mǝ̃n cɔ̃mmã-i yo, mǝ̃n mãã mǝ̃̀ ce mã̀ã́ mãã, ɲi saa ɲí hũɔ̃-mã, wà Dũnnũ mããcem-i; gɩ̀-lǝ gɩ̀ nã, ɲi ji fǝ̃ǝ̃ wà mã́ã̀, nǝ̃ mǝ̃̀ Tǝw, yí nǝ̃ yìi jãn yì ɲĩɛ̃ kusunã ǹ-ba sùɔ́gɩ dɩngu.»

39 Wù gáa waa dɩ̀-lǝ, Yahudyabá ver ǹ-suro wà ba blǝ-yǝ hlo, ǹ-blǝ ǹ-tar wù nã.

40 Gɩ̀ furũũgɩ nã, Yesuẃ juo ver ǹ-kã Surdɛ̃ huɔlɩmmã nã mãã Yuhanãẁ yáá wù ɲĩɛ̃ cwaaba mã̀ nã dĩɛ̃lãmmã nã, ǹ-kãã ba dàa bãndaɲã fiyãã gɩ̀ sùɔ́gɩ nã.

41 Cocindɩ́ kãã kã wù nãã, ǹ-kãã ba bà waa wà: «Yuhanãẁ sáa ce cɔ̃m mã́ã̀ ǹ-pɩgaa-yáà.

Nǝ̃ wù wáalá kuu wo kuu biɛ wáà yiɛgu, gɩ̀ min sulam-i.»

42 Cocindɩ́ hũɔ̃ Yesu cɔ̃mmã gɩ̀ sùɔ́gɩ nã.