Mãtiyew 23

Curo'n báa ce Musa hlũũ'n yuntaa'n tammã

(Markaw 12.38-39 ; Lukaw 11.43, 46 ; 20.45-46)

Gɩ̀ furũũgɩ nã, Yesuẃ waa nǝ̃ cocindi nǝ̃ wù duunãtaaba wà:

2 «Musaẁ wáalá yí ba yì wáà gùú hlũsǝri mãã, Musa hlũũ'n yuntaaba nǝ̃ Farisĩɛ̃baa pɩ́garà cwaaba nǝ̃-dǝ.

3 Gɩ̀ sùɔ́gɩ nã, ɲi saa ɲi ba ɲì nɔ̃ ɲì hã-ba, nǝ̃ ba-ń waa dìí mãã, bláà ɲì ce-dǝ, nǝ̃ ɲi báa tuu bà-lǝ bà gaaciega; bà mãã bà waa dìí mãã, bà sǝ̃n wáà dɩ̀ hlũũgu.

4 Bà vaa tuuyadɩsiɛgaa mãã gà tuumã ca, bà hã cwaaba, nǝ̃ bàá nǝ̃ bà hla, bà sǝ̃n ver ǹ-saaraa fiyãã yo wà ba dii nãkruɔ bà nã.

5 Bà ce bà cɔ̃mmã min cwaaba da ǹ-ba bà da-ba.

Ɲi sáa da, bà-lǝ ba-ń ce bá ce bà tafoba^a bɩnǝ̃ǝ̃ ǹ-maa cwaa'n dɩgaliɛ bɩgaaba.

Nǝ̃ bà mãã bà ce gùú ɲĩĩnǝ̃ǝ̃biigaa mãã bà ɲǝ̃gãr bà piɛ bà kuulaadiibapɩpuɔlaba'n nɔ̃nɲã nã, bà-lǝ bà yagà yáá gàa danãã ǹ-maa cwaa'n dɩgaliɛ yaga.

6 Ba-ń kã paarjuwuusɔnɲã nã yindagǝ nã Yahudyaba tɩgim'n donɲã nã, yiganã yiɛ'n wanjirammã̀ dwal bà nã.

7 Nǝ̃ ba-ń ba cɔ̃ncesɔsiɛga nã, bà caa bá ba bà kuganãã bà fyãn-ba nã̀ã ba bà be-ba wà Kaltaa.

8 Ɲimãã, bláá ya bá ba bà be-ɲã́ã̀ kaltaa, ɲì min, ɲí nǝ̃ cwansǝ nã-i, ɲi nǝ̃ Kaltiiw dɩndɩn-i.

9 Bláá be curo cuuw nã wà Tɩtii.

Ɲi nǝ̃ tiiyǝw dɩndɩn-i, wɩ̀-i ɲì Tǝ Drɔ-Dũnnũw.

10 Bláá ya bá ba bà be-ɲã́ã̀ wà yuntaa; ɲì nǝ̃ yuuntiiw dɩndɩn-i, wɩ̀-i Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo.

11 Wùú mãã ɲì yuugɩ nã, wù sáalá wú ce wù hla nã́ã́ ɲì mããcier-i.

12 Ɲi sáa da: yíi nǝ̃n yuguraa ǹ hla nã, Dũnnũẁ hɩr-n-i.

Yíi nǝ̃n hɩr ǹ hla, Dũnnũẁ yuguraa ǹ nã-i.

Curo'n báa ce Musa hlũũ'n yuntaaba nǝ̃ Farisĩɛ̃ba tammã

(Markaw 12.40 ; Lukaw 11.39-52 ; 20.45-47)

13 «Musa hlũũ'n yuntaa ɲimãã nǝ̃ Farisĩɛ̃ ɲimãã, kusunɲãhǝ̃nhãltaa ɲimãã; hujãncɔ̃mmã̀ ji hi-ɲã́ã̀!

Ɲi suu Dũnnũ yuuntasǝ'n hlũũgɩ nã nǝ̃ cwaaba, nǝ̃ ɲimãã nǝ̃ ɲì hla ɲi sǝ̃n jãn dɩ̀ nã, bàá mãã bà caa bá jãn dɩ̀ nã yo, ɲí síì ya bá jãn.

14 «[Musa hlũũ'n yuntaa ɲimãã nǝ̃ Farisĩɛ̃ ɲimãã, kusunɲãhǝ̃nhǝ̃ltaa ɲimãã; hujãncɔ̃mmã̀ ji hi-ɲã́ã̀!

Ɲimãã-lǝ ɲimãã vúulà ɲì hũɔ̃ blakuucanãã'n nãkruɔɲinɲã min, nã̀ã ba ɲi-ń ce ɲí ba ɲì cirǝ̃ǝ̃ Dũnnũw nã ɲì sǝ̃n hiraa, cwaabá da ǹ-waa wà ɲi nǝ̃ ɲĩ̀ĩ sũɔ̃l.

Ɲimãã-lǝ ɲimãã ga ywar cicuɔgu, ǹ-ɲǝ̃ǝ̃ cwaa'n dɩgaliɛw.]

15 «Musa hlũũ'n yuntaa ɲimãã, nǝ̃ Farisĩɛ̃ ɲimãã, kusunɲãhǝ̃nhãltaa ɲimãã; hujãncɔ̃mmã̀ ji hi-ɲã́ã̀!

Ɲi-ń ce ɲí ba ɲì waaraa cuu yanɲã min nã, ɲì caa cwaaba ɲì dii-ba ɲì hlũũgɩ nã.

Nǝ̃ ɲi mãã ɲi-ń ce bá jãn ǹ-tã, ɲi juo ce bá ba bà saa nǝ̃ jahãlmãw fuwɔ ǹ-ga juo maa ɲimãã.

16 «Ɲimãã mãã yɩrnǝ̃ǝ̃ba, ɲi mãã suro wà ɲi pɩgaa badaba-i nǝ̃ hlũũ.

Hujãncɔ̃mmã̀ ji hi-ɲã́ã̀!

Ɲi-ń ce ɲi ba ɲì waa wà: “Curow-ń waasǝ Dũnnũ bũũduugu, wà gɩ́ sǝ nǝ̃ kuu, nǝ̃ wà gùú tii nǝ̃n fǝ̃ǝ̃ nã̀ã waasǝ sãnãw mãã Dũnnũ bũũduugɩ nã wà wu wáasǝ́-yǝ dìí yuugɩ nã mãã, gɩ saa wú ce-dǝ.”

17 Baahãrããba nǝ̃ yɩrnǝ̃ǝ̃ ɲimãã mãã nnĩĩ!

Sãnãw nǝ̃ Dũnnũ bũũduugu hagu búɔlà hagu nã-ì?

Dũnnũ bũũduuguu mãã gɩ̀ cíé sãnãẃ kra wù dǝ ǹ-hã Dũnnũw, gùú sǝ-ì?

18 «Ɲi-ń ce ɲí ba ɲì waa wà curow-ń waasǝ siijãnkuugu, wà gɩ́ sǝ nǝ̃ kuu, nǝ̃ wà gùú tii nǝ̃n fǝ̃ǝ̃ nã̀ã waasǝ ɲinɲãã mãã bà bũũ Dũnnũw nǝ̃-ɲã, wà wu wáasǝ́-yǝ dìí yuugɩ nã mãã, gɩ saa wú ce-dǝ.

19 Yɩrnǝ̃ǝ̃ ɲimãã mãã nnĩĩ!

Siijãnkuugu nǝ̃ kuuguu mãã bà bũũ Dũnnũw nǝ̃-gǝ hagu búɔlà hagu nã-ì?

Siijãnkuuguu sáa ce bà mãã bà bũũ Dũnnũẁ nǝ̃ gùú kuugu, gɩ́ kra gɩ̀ dǝ ǹ-hã Dũnnũw-ì?

20 «Wùú nǝ̃n waasǝ siijãnkuugu, gɩ́ nǝ̃ nã́ã́ wu wáasǝ́-gǝ nã̀ã waasǝ ɲinɲã min mãã gɩ̀ drɔ-i.

21 Wùú nǝ̃n waasǝ Dũnnũ bũũduugu, gɩ́ nǝ̃ nã́ã́ wu wáasǝ́ Dũnnũw nã mãã gɩ̀ nã-i.

22 Wùú nǝ̃n waasǝ drɔkuɔli, gɩ̀ nǝ̃ nã́ã́ gɩ̀ tiiẁ wáasǝrá Dũnnũ yuuntasǝ'n guujirakuu-i, nǝ̃ Dũnnũw mãã wù jiraa gɩ nã.

23 «Musa hlũũ'n yuntaa ɲimãã nǝ̃ Farisĩɛ̃ ɲimãã, kusunɲãhǝ̃nhãltaa ɲimãã; hujãncɔ̃mmã̀ ji hi-ɲã́ã̀!

Ɲi-ń ce ɲí ba ɲì hiil ɲì nãnkuɔ yugupɩpɩrãn'n jagaw, nǝ̃ dìí mãã nũɔ̃sǝn dǝlli Dũnnũ hlũũgɩ nã, ɲi sǝ̃n ce-dǝ.

Sũɔ̃lɩmmã, hujãndi, nǝ̃ yalntasǝri, ɲi yáá ɲì saa ɲí ba ɲì ce gà-i haasǝ nã̀ã fǝ̃ǝ̃ ǹ-ji piɛ gà dɩgaliɛw.

24 Ɲimãã mãã yɩrnǝ̃ǝ̃ba, ɲi mãã suro wà ɲi pɩgaa badaba-i nǝ̃ hlũũ.

Ɲi-ń ce ɲí hyen hũnɲũɔ̃mã ǹ-hiil cũɔ̃blɩw dɩnw, nǝ̃ ɲi mãã ɲì hĩĩ gùu, gɩ ba gùu hi ɲũgɔ̃mĩĩw.

25 «Musa hlũũ'n yuntaa ɲimãã nǝ̃ Farisĩɛ̃ ɲimãã, kusunɲãhǝ̃nhãltaa ɲimãã; hujãncɔ̃mmã̀ ji hi-ɲã́ã̀!

Ɲi-ń ce ɲí saar guuɲũɔ̃kuugu, nǝ̃ juciraagu, ɲã̀ furũũɲã́ ba yalla, nǝ̃ ɲã̀ kusunɲã́ ba ɲã̀ã yu nǝ̃ ɲì ŋmãl'n ɲinɲã nǝ̃ ɲì yisɩnã cɔ̃mbɩblammã.

26 Farisĩɛ̃ yɩrnǝ̃ǝ̃ ɲimãã, sáarà guuɲũɔ̃kuu'n kusuugɩ-i haasǝ, gɩ̀-lǝ gɩ̀ nã, gɩ̀ furũũgɩ̀ ga juo ba yalla.

27 «Musa hlũũ'n yuntaa ɲimãã nǝ̃ Farisĩɛ̃ ɲimãã, kusunɲãhǝ̃nhãltaa ɲimãã; hujãncɔ̃mmã̀ ji hi-ɲã́ã̀!

Ɲi nǝ̃ nã́ã́ fuurunɲãã mãã bàa tĩĩ ɲã̀ furũnɲã nǝ̃ plammã ɲã́ ba ɲã̀ fa, nǝ̃ ɲã̀ kusunɲã yu nǝ̃ kukuunɲã nǝ̃ dɩgaa'n plaaga min.

28 Ɲimãã yo cwaaba-ń ba bà da-ɲã́ã̀, bà ba bà wa cosũɔ̃lba-i nǝ̃-ɲã́ã̀, nǝ̃ yàá kusunɲãhǝ̃nhãltaa-i nǝ̃ gaabɩbliɛntaa dɩndɩn-i nǝ̃-ɲã́ã̀.

29 «Musa hlũũ'n yuntaa ɲimãã nǝ̃ Farisĩɛ̃ ɲimãã, kusunɲãhǝ̃nhãltaa ɲimãã; hujãncɔ̃mmã̀ ji hi-ɲã́ã̀!

Ɲi sórrá ǹ-ba ɲì mã ɲì mǝ̃gaa Dũnnũ tanhiilaa'n pĩɛ̃ndiitãnflaga nã̀ã ba ɲì tuɔluɔ cosũɔ̃lba'n fuurunɲã nã,

30 nã̀ã ba ɲì waa wà: “Gɩ nã́ã̀ ce nã́ã́ yi yáá dìɛ yì tǝvũnvãnãã'n bǝ̃ǝ̃gu, yi sáá yì ji gbǝ nǝ̃-ba Dũnnũ tanhiilaa'n kukwo'n cɔ̃mmã nã.”

31 Gɩ̀ sùɔ́gɩ nã, ɲi pɩ́gará ǹ-ja ɲì hla wà bàá nǝ̃n kúó Dũnnũ tanhiilaaba, wà bàá furũntaa-i nǝ̃-ɲã́ã̀.

32 Gɩ̀ sáalá!

Váalà ɲì hla ɲí faal ɲì tǝvũnvãnãã'n mããcemmã.

33 Cobɩbliɛ ɲimãã, dɛbɛrtaa ɲimãã mãã nnĩĩ!

Jahãlmã sugollii mãã dɩ̀ ga duruu ɲì drɔ, ɲi ga tar dɩ̀ nã tam hãmã-i?

34 Níyà, gùú cíé mǝ̃̀ ji tĩɛ̃ Dũnnũ tanhiilaaba ǹ-hã-ɲã́ã̀, nǝ̃ cɔ̃nfǝ̃ǝ̃rǝ̃ǝ̃ba ǹ-pya Musa hlũũ'n yuntaahuhoraaba nã.

Ba-ń jo, ɲi ji ko badaaba, nã̀ã gbǝ badaaba danɲã nã, nã̀ã mũũ badaaba nǝ̃ cãnbiiga Yahudyaba tɩgim'n donɲã nã, nã̀ã ba ɲì waaraa ɲì duu bà nã, ɲì ga cuɔl-ba lǝ wo lǝ nã mãã bà ji kã dɩ̀ nã.

35 Gɩ̀ sùɔ́gɩ nã, cosũɔ̃lbaba min mãã bà twammã tṹnṹũ ɲũũrũũgu, ǹ-du nã Abɛl cosũɔ̃lyǝ nã, ǹ-ji hi Barasii bíɛ́ Jakarɩjaw nã mãã ɲi^b kúó-yǝ gùú sùɔ́guu mãã Dũnnũ bũũduuguu nǝ̃ siijãnsuɔ'n sǝ̃ǝ̃gɩ nã, Dũnnũẁ ga yugu-ɲã́ã̀ nǝ̃ gà-lǝ gà min.

36 Yáalà mǝ̃́ waa sulammã nǝ̃-ɲã́ã̀: Dũnnũẁ ga yugu kuɔkuɔtaa ɲimãã nǝ̃ cɔ̃m mã́ã̀ min.

Yesuẁ kaal Serusalɛm cɔ̃mmã nã

(Lukaw 13.34-35)

37 «Serusalɛmtaa, Serusalɛmtaa, ɲimãã mãã ɲì ko Dũnnũ tanhiilaaba, nǝ̃ Dũnnũw-ń tĩɛ̃ curo ɲì nãã, ɲí juo nǝ̃ǝ̃ ǹ-ko gɩ̀ tii nǝ̃ tɩntrãga.

Mǝ̃̀ wáalá mǝ̃́ tɩgii-ɲã́ã̀ ǹ-gbãlãã, nã́ã́ kunɲũw mãã wù dii wù biiba wù tãmpɩrãnɲã taara gùú tuugu, ɲi sáa hũɔ̃.

38 Níyà, Dũnnũẁ ji pyar wù nãkruɔgu ɲì suɔgu drɔ.

39 Nã̀ã wa, mǝ̃̀ waa nǝ̃-ɲã́ã̀, ɲi síì da-m hlo, fuwɔ gùú bǝ̃ǝ̃guu mãã ɲi-ń ji ba ɲì waa wà wùú mãã wù jo Yitii Dũnnũ yiirɩ nã nnĩĩ, Dũnnũẃ piɛ wù nãkrɔfɩnfaagu wù drɔ.»