Lukaw 11

Yesuẁ kal wù duunãtaaba nǝ̃ Dũnnũ cirǝ̃mmã

Yuudagǝ, Yesuẁ yáá wù cirǝ̃ǝ̃ Dũnnũw nã sùɔ́dagǝ nã.

Wù gáa cirǝ̃ǝ̃ ǹ-tã, wù duunãtiidiɛẃ waa nǝ̃-yǝ wà: «Yitii, Yuhanãẁ kállá wù duunãtaaba nǝ̃ Dũnnũ cirǝ̃mmã, yíi yo, kal-yáà nǝ̃ Dũnnũ cirǝ̃mmã.»

2 Yesuẃ waa nǝ̃-ba wà: «Ɲi-ń wa ɲi cirǝ̃ǝ̃ Dũnnũw nã, gɩ̀ saa ɲí waa nnĩĩ-i: “Tɩtii, ǹ yiirɩ́ bũũ.

Ce ǹ yuuntasǝrɩ́ jo ǹ-ji ba dìɛ!

3 Ba ǹ hã-yáà nǝ̃ yì bǝ̃ǝ̃nã wuuri yuu wo yuu.

4 Hãmĩĩ mãã yì ce yì yuɔrɔtaa'n dũndɔw gùú tuugu, yíi yo, ce yì gaacĩɛ̃ya'n dũndɔw gùú tammã-i.

Báa ya kuugɩ́ vuu ǹ-dii-yáà diicĩɛ̃rǝdɩ nã.”»

5-6 Nǝ̃ Yesuẃ fǝ̃ǝ̃ ǹ-waa nǝ̃-ba wà: «Ǹ jamblaw-ń hlǝ waali, ǹ-juo hyar yíi mãã ǹ saa, nǝ̃-ń ba ǹ sǝ nǝ̃ kuu ǹ ji hĩɛ̃ ǹ-hã-yǝ, nǝ̃-ń kãã pĩĩ ǹ jambladiɛ yisɔvũnvǝ̃ǝ̃gǝgu, ǹ-cirǝ̃ǝ̃ wù nã wà wú hã-n nǝ̃ kuudagǝ n ga hã wú wuu,

7 nǝ̃ gɩ́ ba nã́ã́ ǹ jambla wáà bla duu'n kusuugɩ nã, nã̀ã waa nǝ̃-n wà: “Báa sugulǝ-m, yi jã́nnã́ ǹ-tã nǝ̃ mǝ̃̀ tãnkuuraaba, mǝ̃̀ síì gbǝ̃ǝ̃ ǹ-suro ǹ-hã-n.”

8 Nǝ̃ mǝ̃̀ waa nǝ̃-ɲã́ã̀, halle wu-ń ba wù sáa suro ǹ-hã-n jamblasǝ'n cɔ̃mmã nã yo, nǝ̃-ń dĩĩ dɩ̀ nã, ǹ mãã ǹ caa ɲã̀ã́ mãã, wù ji suro ǹ-hã-n nǝ̃ ɲã̀ min, wù yiirɩ báa ji da ǹ-bǝ̃ǝ̃lǝ̃ǝ̃.

9 Gùú cíé mǝ̃̀ waa nǝ̃-ɲã́ã̀ wà: Círǝ̃̀ǝ̃, bà ji hã-ɲã́ã̀.

Cáalà, ɲi ji da.

Bíyà, bà ji siɛ-ɲã́ã̀.

10 Ɲi sáa da, curo wo curo mãã wu-ń cirǝ̃ǝ̃, bà hã-yǝ; wùú nǝ̃n caa, wù da-i; nǝ̃ wùú nǝ̃n be, bà siɛ-yǝ.

11 Tãnkuuraantaabá nìɛ ɲì sǝ̃ǝ̃nã.

Halii biɛ ji cirǝ̃ǝ̃ tɩtrow nã wù saa, wú hã-yǝ nǝ̃ waalw tɩtro'n sùɔ́nãw?

12 Yindagǝ nã, wu-ń cirǝ̃ǝ̃ camyããrɩ nã, halii ji hã-yǝ nǝ̃ nũmũũw dɩ̀ sùɔ́nãw?

13 Ɲimãã mãã cobɩbliɛba, ɲi-ń ba ɲì fǝ̃ǝ̃ ɲì hã ɲì tãnkuuraaba nǝ̃ ɲããfɩnfanɲã, gɩ̀ ji ce dani yì Tǝ Drɔ-Dũnnũ, yíi nǝ̃n cirǝ̃ǝ̃ wù Yuflǝw nã wù saa, wú ba wù síì hã-n nǝ̃-yǝ?»

Yesu fãngããgɩ̀ ta Sɩtãn kuugɩ nã

(Mãtiyew 12.22-30 ; Markaw 3.22-27)

14 Tãntũɔ̃ẁ yáá wùu ce biɛdiɛẃ ba kũnkunĩĩw, Yesuẃ juo ba wù ɲǝ̃ǝ̃ gɩ̀ tãntũɔ̃w.

Wù jáa hlǝ wù nã, kũnkunĩĩẃ fǝ̃ǝ̃ ǹ-ba wù waa cɔ̃mmã.

Nǝ̃ cocindii nǝ̃n yáá dàa gɩ̀ sùɔ́gɩ nã, bà kusunɲã́ cu.

15 Nǝ̃ badaabà yáá dàa cwaaba sǝ̃ǝ̃nã, bà-lǝ bá waa wà: «Tãntɔ̃nãã'n yuuntiiw mãã bà be-yǝ Iblisa, wùú cíyà wú ba wù gbǝ̃ǝ̃ wù da fãngããgu wù ɲǝ̃ǝ̃ tãntɔ̃nããba.»

16 Badaabà yáá bà caa bá dǝ̃ǝ̃ Yesuw, ǹ-da ǹ-fǝ̃ǝ̃ Dũnnũw nǝ̃n ba yà tĩɛ̃-yǝ.

Bá waa nǝ̃-yǝ wà: «Ce cɔ̃mdamã́ hlǝ Dũnnũw nãã, mã̀ã́ mãã mã̀ pɩgaa wù fãngããgu yí ne.»

17 Yesuẁ mãã wù fǝ̃́ǝ̃lã́ dìí mãã bà kusunɲã nã, wú fǝ̃ǝ̃ ǹ-waa nǝ̃-ba wà: «Gùú yiɛntaabaa mãã bà gãnãã nǝ̃ bà ɲĩɛ̃, bà kuul bà yiɛ-i.

Nǝ̃ gùú suɔntaabaa mãã bà gãnãã nǝ̃ bà ɲĩɛ̃, bà mũũ bà suɔ-i.

18 Ɲi mãã wa Iblisa hlã́ã̀-m nǝ̃ fãngããgu, mǝ̃́ ba mǝ̃̀ ɲǝ̃ǝ̃ tãntɔ̃nããba, gɩ́ ba nã́ã́ Sɩtãn gã́nã̀ã nǝ̃ wù hla-i?

Gɩ̀-lǝ gɩ̀ tammã, Sɩtãn fãngããgɩ̀ ji hǝ̃ǝ̃sǝ danii?

19 Iblisa nǝ̃n ba, wù hã mã́ã̀ nǝ̃ fãngããgu, mǝ̃́ ba mǝ̃̀ ɲǝ̃ǝ̃ tãntɔ̃nããba, halii hlã́ã̀ ɲimãã-lǝ ɲì bluuba nǝ̃ bà fãngããgu, bá ba bà ɲǝ̃ǝ̃-ba?

Ɲì bluu'n gaacie gáá ji car-ɲã́ã̀.

20 Nǝ̃ Dũnnũ nǝ̃n ba wù hã mã́ã̀ nǝ̃ fãngããgu mǝ̃́ ba mǝ̃̀ ɲǝ̃ǝ̃ tãntɔ̃nããba, gɩ̀-lǝ gɩ̀ pɩgaa wà Dũnnũ yuuntasǝrɩ híí-ɲã́ã̀ ǹ-tã!

21 Ciciɛnĩĩw-ń ba wù cii wù suɔgɩ nã nǝ̃ byarceɲinɲã, kuu'n síì hi wù nãkruɔɲinɲã.

22 Nǝ̃ curodiɛw-ń ba wù ciɛ ǹ-ɲǝ̃ǝ̃ wù-lǝ, nã̀ã jo ǹ-juo gbǝ̃ǝ̃ wù nã, wù mãã wù yáá wùu piɛ wù nãkruɔgu, gùú byarceɲinɲã nã mãã, wù ɲǝ̃ǝ̃ ǹ-hũɔ̃ ɲã-i, nǝ̃ wù nãkruɔɲin yo, ǹ-yuɔ, ǹ-hã wù bluuba.

23 Gùú tii nǝ̃n ba wù sǝ nǝ̃ mã́ã̀, wù-lǝ mǝ̃̀ kuurii-i.

Wùú mãã wù sǝ̃n pɛ mǝ̃̀ nã, mǝ̃́ tɩgii, wù-lǝ, wù buruɔ gɩ̀ nã-i.»

Nǝ̃-ń ba ǹ sǝ Dũnnũ yow, ń nǝ̃ Sɩtãn yo-i

(Mãtiyew 12.43-45)

24 Yesu nã̀ã ver ǹ-waa nǝ̃-ba wà: «Tãntũɔ̃w-ń hlǝ curow nã, wù kãã ba wù vĩɛ̃ wù ta jerkwaar nã-i, wù caa fiisaa'n sùɔ́gu.

Wu-ń ba wù sáa ga da, wù ba wù waa wà wu ji ver ǹ-kã wù suɔguu mãã wù hlǝ́rá gɩ̀ nã.

25 Wù ver ǹ-kã gɩ̀ nã, ǹ-kãã da bàa per-gǝ, nã̀ã mǝ̃gaa gɩ̀ kusuugu.

26 Gɩ̀-lǝ gɩ̀ nã, wú kãã tuu tãntɔ̃nãã nɩrhǝ̃ǝ̃l, ǹ-pya wù hla nã, bàá mãã bàa bla ǹ-ɲǝ̃ǝ̃ wù-lǝ.

Bà juo jãn ǹ-jiraa duugɩ nã.

Gɩ̀-lǝ gɩ̀ nã, gɩ̀ biɛ'n cɔ̃mmã́ juo ɲirǝ̃ǝ̃ ǹ-maa dĩɛ̃lãmmã nã-i.»

Dũnnũ cãwan'n nɔ̃taa'n yuugɩ̀ dwállá

27 Yesuẁ gáa waa dɩ̀-lǝ ǹ-tã, cijaldiɛẃ dii ǹ-wanãã cocindi sǝ̃ǝ̃nã wà: «Cijalw nǝ̃n húulá-n, nã̀ã hã ń ŋmãsã, wù yuugɩ̀ dwállá.»

28 Yesuẃ fǝ̃ǝ̃ ǹ-siɛ-yǝ wà: «Ǹ wáalá sulam-i, nǝ̃ bàá mãã bà nɔ̃ Dũnnũ cãwandi, nã̀ã ba bà ce-dǝ, bàá yo, bà yunɲã̀ dwállá.»

Yesuẁ siɛ bàá mãã wà wú ce cɔ̃nnurommã bá ne

(Mãtiyew 12.38-42)

29 Cohuɔgɩ̀ gáa ba bà gɩ̀ caliɛ Yesuw nã gɩ̀ piɛ kuu, wú fǝ̃ǝ̃ ǹ-waa wà: «Kuɔkuɔtaaba blárá ǹ-car, bà caa mǝ̃́ ce cɔ̃mdamã ǹ-pɩgaa-ba.

Nǝ̃ cɔ̃m'n síì ce ǹ-pɩgaa-ba, nã́ã́ Dũnnũ tanhiil Sonasɩ cɔ̃mmã̀ cíé gùú tuugu sǝ.

30 Sonasɩ cɔ̃mmã̀ cíé gùú tuugu ǹ-pɩgaa Ninive lǝntaaba, Curonbiɛ yo, wù cɔ̃mmã̀ ji ce nĩĩgɩ-i, ǹ-pɩgaa kuɔkuɔtaaba nǝ̃ Dũnnũ fãngããgu.

31 Sugojaryuugu, Sabataa'n cijalw mãã wù yáá yuuntiiw, wù ga suro ǹ-hã kuɔkuɔtaaba nǝ̃ yuɔrɔmmã.

Wù-lǝ wù sórrá sɔhaluu gúɔ̀ nã, ǹ-ta ǹ-hlǝ liɛga min nã, wù jo wù ji nɔ̃ Isɩrayɛl yiɛ'n yuuntii Solmãn cɔ̃nfǝ̃ǝ̃gǝ'n cãwandi, nǝ̃ ɲimãã sǝ̃ǝ̃nã níɛ́ nã curodiɛ nìɛ wùú mãã wù máalá Solmãnw!»

32 Sugojaryuugu, Ninive lǝntaabà ga suro ǹ-hã kuɔkuɔtaaba nǝ̃ yuɔrɔmmã.

Bà-lǝ bà nṹɔ̃́ ǹ-hã Sonasɩw, nã̀ã nǝ̃nǝ̃ǝ̃ bà gaacĩɛ̃yaga nã, nã̀ã tuu ǹ-tu^a.

Nǝ̃ ɲimãã sǝ̃ǝ̃nã níɛ́ nã, curodiɛ nìɛ wùú mãã wù máalá Sonasɩw!

(Mãtiyew 5.15 ; 6.22-23)

33 «Curow-ń tii fitɩnw, wù sǝ̃n ŋmǝ̃ǝ̃rǝ̃ǝ̃ wù nã, yindagǝ nã wú curǝǝ cirakiigɩ nã ǹ-suu wù nã.

Wù piɛ-yǝ kuudagǝ drɔ-i, curow-ń jãn duugɩ nã, wú da wù gbɩgbaamã.

34 Curo'n yinɲã́ nǝ̃ nã́ã́ wù cãn'n lampa-i.

Wù yinɲã-ń ba ɲã̀ fa, wù cãndɩ min, dɩ̀ ba gbɩgbaamã nã-i.

Nǝ̃ ɲã̀-ń ba ɲã̀ sǝ̃n fa, wù cãndɩ min, dɩ̀ ba dudũũmã nã-i.

35 Gɩ̀-lǝ gɩ̀ tammã, blǝ ǹ hla nã, ǹ gbɩgbaamã báa ji ba dudũũmã.

36 Ǹ cãndɩ min dɩ-ń ba gbɩgbaamã nã, dudũũm'n sùɔ́'n sɩraa dɩ̀ nã, sùɔ́gɩ min gɩ̀ ba gbɩgbaamã nã-i, nã́ã́ ba tíilá lampa-i.»

Yesuẁ gãnãã nǝ̃ Farisĩɛ̃ba nǝ̃ Musa hlũũ'n Yuntaaba wà kusunɲãhǝ̃nhãltaa-i nǝ̃-ba

(Mãtiyew 23.1-36 ; Markaw 12.38-40)

37 Yesuẁ gáa wanãã ǹ-tã, Farisĩɛ̃biɛdiɛẃ jãn-yǝ, wà wú kã ba ga wuu wuuri wù suɔgu.

Wú fǝ̃ǝ̃ ǹ-kã bá ta, ǹ-kãã ba wù wuu.

38 Yesuẁ sáa saar wù nãkrɔnɲãã Farisĩɛ̃baa mãã bà saar gùú tammã, nã̀ã ba wù wuu wuuri, dɩ́ tugulǝǝ Farisĩɛ̃biɛw nã.

39 Yitiiẃ waa nǝ̃-yǝ wà: «Farisĩɛ̃ ɲimãã, ɲí nǝ̃ nĩĩgɩ-i.

Ɲi-ń ce ɲí saar guuɲũɔ̃kuugu, nǝ̃ juciraa'n furũũgɩ́ ba yalla, nǝ̃ ɲimãã hla'n kusunɲã ba ɲã̀ã yu nǝ̃ ɲì ŋmãl'n ɲinɲã, nǝ̃ gaabɩbliɛga dɩn.

40 Baahãrãã ɲimãã!

Dũnnũw mãã wù cíé taasǝ̃ǝ̃nǝ̃ǝ̃gu, ɲi-ń ce ɲí ba ɲì ce nã́ã́ wùú sáa ce kusuu-lǝ.

41 Hlã́ã̀ kokwaaba nǝ̃ ɲì kusuugɩ min, gùú ji ce ɲí ba yiyalɩmmã nã ɲì cɔ̃mmã min nã.

42 Farisĩɛ̃ ɲimãã, hujãncɔ̃mmã̀ ji hi-ɲã́ã̀!

Ɲi-ń ce ɲí ba ɲì hiil ɲì nãnkuɔ yugun'n pɩpɩrãn'n jagaw, halle tuɲũɲũgɔ̃n'n ɲin yo, nã̀ã jii Dũnnũ sũɔ̃lɩmmã, nǝ̃ wù cɔ̃m'n dwalɩmmã ǹ-kra yiɛgu.

Ɲi yáá ɲì saa ɲí ba ɲì ce dɩ̀-i haasǝ nã̀ã fǝ̃ǝ̃ ǹ-ji piɛ gà dɩgaliɛw.

43 Farisĩɛ̃ ɲimãã, hujãncɔ̃mmã̀ ji hi-ɲã́ã̀!

Yuntaa'n wanjirammãã dwállà ɲì nã Yahudyaba tɩgim'n donɲã nã.

Ɲi-ń ba cɔ̃ncesɔsiɛ yo gà nã, ɲi ba ɲì caa bá nã́ã́ ba bà fyãn ɲimãã-lǝ ɲì dǝ.

44 Hujãncɔ̃mmã̀ ji hi-ɲã́ã̀!

Ɲí nǝ̃ nã́ã́ pĩɛ̃ndiitãnflagaa mãã bà sǝ̃n da-ga, nã̀ã ba bà wáà bà ta gà drɔ, gùú tiiw-ń jĩɛ̃ ɲì nã, wù blǝ́rá nã-i.»

45 Musa hlũũ'n Yuuntiidiɛẃ waa nǝ̃ Yesuw wà: «Kaltii, nǝ̃-ń ba ǹ waa gɩ̀ tammã, gɩ́ nǝ̃ nã́ã́ n tuuraa hãmĩĩ yo, yì nã-i!»

46 Yesuẃ siɛ-yǝ wà: «Musa hlũũ'n yuntaa ɲimãã, hujãncɔ̃mmã̀ ji hi-ɲã́ã̀.

Ɲi piɛ tuuyadɩsiɛgaa mãã gà tuumã ca ɲì hã cwaaba, nǝ̃ ɲi sǝ̃n ver ǹ-saaraa fiyãã yo wa ɲi dii nãkruɔ bà nã.

47 Hujãncɔ̃mmã̀ ji hi-ɲã́ã̀!

Ɲì vũnvãnããbà nǝ̃́ǝ̃lã́ ǹ-ko Dũnnũ tanhiilaabaa mãã nǝ̃ tɩntrãga, ɲí mǝ̃gaa ɲì mã bàá pĩɛ̃ndiitãnflaga-i.

48 Ɲi-ń ba ɲì ce gɩ̀ tammã, gɩ́ nǝ̃ nã́ã́ ɲì vũnvãnããbà cíé dìí mãã, ɲi gbǝ́ǝ́ dɩ̀ nã-i.

Bà-lǝ bá nǝ̃ǝ̃ ǹ-ko Dũnnũ tanhiilaaba, ɲimãã ba ɲì vuu ɲi ce wà ɲi bũũ bũũ ba-i, ǹ-ba ɲì mã ɲì mǝ̃gaa bà pĩɛ̃ndiitãnflaga, yàá ɲí nǝ̃nǝ̃ǝ̃ Dũnnũ yal nã-i.

49 Gùú cíé Dũnnũw mãã wù fǝ̃ǝ̃ cɔ̃mmã min, wù yáá wùu waa wà wu ji tĩɛ̃ tanhiilaaba nǝ̃ tĩɛ̃taabá kã bà nãã.

Wà ba ga ko badaaba, nã̀ã cuɔl badaaba.

50 Bà kúó gùú Dũnnũ tanhiilaabaa mãã, ǹ-tuu Dũnnũẁ nǝ̃́ǝ̃lã́ cuuw gùú nã, ǹ-ji kra kuɔkuɔgu, Dũnnũẁ ji yugu kuɔkuɔtaaba nǝ̃ gà min.

51 Bà dúú cokuogɩ nã Abɛlw nã, ǹ-ga juo hi Barasii bíɛ́ Jakarɩja nã mãã bà kúó-yǝ gùú sùɔ́guu mãã Dũnnũ bũũduuguu nǝ̃ siijãnsuɔ'n sǝ̃ǝ̃gɩ nã, mǝ̃̀ waa-dǝ nǝ̃-ɲã́ã̀, Dũnnũẁ ji yugu kuɔkuɔtaaba nǝ̃-ga.

52 Musa hlũũ'n yuntaa ɲimãã, hujãncɔ̃mmã̀ ji hi-ɲã́ã̀.

Ɲi-ń ce ɲí ba ɲì ŋmǝ̃ǝ̃rǝ̃ǝ̃ Dũnnũ suɔ'n cɔ̃mmã nã nǝ̃ cwaaba, ɲi síì wáà-mã, nǝ̃ bàá mãã bà caa bá wáà-mã, ɲi síì ya bá fǝ̃ǝ̃-mã.»

53 Yesuẁ gáa hlǝ Farisĩɛ̃biɛ'n suɔgu, Musa hlũũ'n Yuntaaba, nǝ̃ Farisĩɛ̃ba hiɛgá dũ nǝ̃-yǝ dugɔ, bá ba bà yugurǝǝ wù nã, ǹ-yugurǝǝ ǹ-yugurǝǝ nǝ̃ cɔ̃ncin.

54 Ǹ-ba bà caa bá vuu ǹ-blǝ wù nũɔ̃gu.