Lukaw 10

Yesuẁ tĩɛ̃ duunãtaa gwasiɛl nǝ̃ nũɔ̃sɔ̃ nǝ̃ bà hǝ̃ǝ̃lba, bá waa Dũnnũ yuuntasǝ'n cɔ̃mmã

Dɩ̀-lǝ dɩ̀ furũũgɩ nã, Yitiiẃ ne ǹ-hiil cwa gwasiɛl nǝ̃ nũɔ̃sɔ̃ nǝ̃ bà hǝ̃ǝ̃ldaba hlo.

Wù mãã wù saa wú kã gùú liɛga nã, nǝ̃ gùú sɔnɲã nã mãã, wú tĩɛ̃-ba, cwaaba hǝ̃nhǝ̃l, bá maar wù yiga nã, gɩ̀ sɔnɲã nã.

2 Nã̀ã waa nǝ̃-ba wà: «Dũmmã̀ ŋmǝ̃́ǝ̃lã́, nǝ̃ mããcieraabà sáa ɲũrũɔ̃, círǝ̃̀ǝ̃ dũmntiiw nã, wà wú tĩɛ̃ mããcieraabá kãã tɩgii-mã.

3 Máarà!

Ɲí nǝ̃ nã́ã́ tũmbiibaa mãã mǝ̃̀ tĩɛ̃-ba mǝ̃yɩrǝǝba sǝ̃ǝ̃nã gùú tuugu.

4 Curo'n báa tuu jin, curo'n báa tuu bɩgatĩɛ̃, curo'n báa tuu viɛtaagǝ.

Ɲi-ń kã, ɲi báa kã ɲi ga ba fyãncindɩ nã nǝ̃ cwaaba hlũũgɩ nã.

5 Ɲi-ń jãn gùú suɔgɩ nã, ɲí fyãn-ba haasǝ nǝ̃ ɲí waa nǝ̃-ba wà sɩsɩrãmmã́ ba bà suɔgu.

6 Curodiɛw-ń ba dàa gɩ̀ sùɔ́gɩ nã, sɩsɩrãmmã̀ dwal wù nã, ɲì fyãnuugɩ̀ ga hã-yǝ nǝ̃ sɩsɩrãmmã.

Gɩ̀ tuuntiiw-ń ba wù sɩraa, sɩsɩrãmmã̀ sɩga ba dàa.

7 Ba-ń hyar-ɲã́ã̀ gùú suɔgɩ nã, bláà dàa gùú suɔgu.

Ba-ń hã-ɲã́ã̀ nǝ̃ gùú mãã, ɲí wuu gùu.

Ba-ń hã-ɲã́ã̀ nǝ̃ gùú guuɲũɔ̃gǝguu mãã, ɲṹɔ̃lã̀ gùu.

Mããcierẁ saa nǝ̃ pãl-i.

Bláá ba ɲì hyar ɲì waaraa swanɲã nã.

8 Ɲi-ń jãn gùú lǝrii mãã nǝ̃ bá hyar-ɲã́ã̀, nã̀ã hã-ɲã́ã̀ nǝ̃ gùú mãã, wúulà gɩ̀-i.

9 Búɔlà hlɔnããbaa mãã gɩ̀ lǝrɩ nã, nǝ̃ ɲí waa nǝ̃ gɩ̀ lǝntaaba wà Dũnnũ yuuntasǝrɩ kúganã́ã bà nã.

10 Ɲi-ń jãn gùú lǝrii mãã, nǝ̃ bá hla ɲì hyarɩmmã, hlǝ́rà taasǝ̃ǝ̃nǝ̃ǝ̃gu nǝ̃ ɲí waa nǝ̃-ba wà

11 halle bà lǝ'n hlɔ̃mmãã mãã mã̀ ɲǝ̃́gãrã́ ɲì viɛtraga nã, ɲi per-mã ǹ-hã ba-i.

Nǝ̃ gɩ̀ saa bá fǝ̃ǝ̃ wà Dũnnũ yuuntasǝrɩ kúganã́ã bà nã.

12 Mǝ̃̀ waa-dǝ nǝ̃-ɲã́ã̀, Dũnnũ sugol'n yuugu, halle Sodɔm lǝntaa'n ywaruugɩ̀ sɩga hi gɩ̀ lǝntaa'n kuugu^a.

(Mãtiyew 11.20-24)

13 «Korasɛ̃ lǝntaa ɲimãã, kaaluugɩ̀ ji da-ɲã́ã̀!

Besayida lǝntaa ɲimãã yo, hujãncɔ̃mmã̀ ji hi-ɲã́ã̀!

Dũnnũẁ cíé gùú cɔ̃nnurommãã mãã ɲì lǝri, wu nã́ã̀ ba yà ce mã̀ tuugu Tiir lǝri nǝ̃ Sidɔ̃ lǝri, bà-lǝ bà yáá bà ga nǝ̃nǝ̃ǝ̃ bà gaacĩɛ̃yaga nã, nã̀ã tuu ǹ-tu, ǹ-dii bɩgatĩɛ̃ kuulanãmba, nã̀ã jãn cuugɩ nã, ǹ-jiraa ǹ-ba bà yu dɔ̃mmã.

14 Gùú cíé Dũnnũ sugol'n yuugu, Tiir lǝntaaba nǝ̃ Sidɔ̃ lǝntaa'n ywaruugɩ̀ sɩga hi ɲimãã kuugu.

15 Kapɛrnã lǝntaa ɲimãã, ɲi kãn wà Dũnnũw ga kra ɲì nã wanjiramhuhorɩm nã-i?

Gbal-i dɛ!

Wù ga juu ǹ-dii-ɲã́ã̀ cugutaa'n wanjiram'n sùɔ́ nã-i.»

16 Nã̀ã fǝ̃ǝ̃ ǹ-waa nǝ̃ wù duunãtaaba wà: «Gùú tii nǝ̃n nɔ̃ ǹ-hã-ɲã́ã̀, wù nṹɔ̃́ ǹ-hã mã́ã-i.

Gùú tii nǝ̃n hla-ɲã́ã̀, wù hlárá mã́ã-i.

Gùú tii nǝ̃n hla mã́ã̀, wùú nǝ̃n tĩ́ɛ̃lã́-m, wù hlárá wɩ̀-i.»

Cwa gwasiɛl nǝ̃ nũɔ̃sɔ̃ nǝ̃ bà hǝ̃ǝ̃l verɩmmã bà tĩɛ̃rɩ nã

17 Cwa gwasiɛl nǝ̃ nũɔ̃sɔ̃ nǝ̃ bà hǝ̃ǝ̃l báà, bá fǝ̃ǝ̃ ǹ-maar.

Bà gáa ver gùú nã, bà hiɛgá sɩrĩɛ̃, bá ba bà waa wà: «Yitii, yi-ń be ǹ yiiri, halle tãntɔ̃nãã yo, bá ba bà nɔ̃ bà hã yáà-i!»

18 Yesuẃ siɛ-ba wà: «Mǝ̃̀ yáá mǝ̃̀ da Sɩtãnẁ yà hlǝ drɔkuɔlɩ nã, ǹ-juo duruu yin dɩnw.

19 Ɲi díɛ́: mǝ̃̀ hlã-ɲã́ã̀ nǝ̃ gùú fãngããguu mãã, ɲi ji gbǝ̃ǝ̃ ǹ-wáà ǹ-ta waalaaba nǝ̃ nũmũnǝ̃ǝ̃ba drɔ.

Ɲimãã fãngããgɩ̀ ta ɲì ɲããtii Sɩtãn kuugɩ nã, kuu'n síì hi ɲì nã.

20 Tãntɔ̃nããbà mãã bà nɔ̃ bà hã-ɲã́ã̀, dìí sǝ̃n saa dɩ́ ba ɲì cɔ̃ndudwalɩmmã.

Dũnnũẁ mãã wù yállá ɲì yiriɛga wù suɔgu, nã̀ã ba wù ga ya ɲí ba nũmǝ̃nãw fɩraa wù suɔgu, dìí sáalà dɩ́ ba ɲì cɔ̃ndudwalɩmmã.»

Yesuẁ fɩrǝǝ wù tǝw nã wù ja wù duunãtaaba

(Mãtiyew 11.25-27 ; 13.16-17)

21 Gùú bǝ̃ǝ̃gɩ dɩngu dàa, Dũnnũ Yuflǝẃ dii dudwalɩmmã Yesuw nã, wú dii ǹ-waa wà: «Tɩtii!

Yíi mãã drɔtiiw nǝ̃ ɲũũrũũtiiw, mǝ̃̀ dũũ kwaya ǹ nã, ǹ mãã ǹ cĩ́ĩlã́ cɔ̃m mã́ã̀ cɔ̃nfǝ̃ǝ̃rǝ̃ǝ̃ba nã, nǝ̃ bàá nǝ̃n kállá bà nã, nã̀ã ciɛl-mã ǹ-ja baasaalaaba.

Tɩtii, gɩ̀ dwállá ǹ nã-i, ń ce-mã gɩ̀ tammã.

22 Mǝ̃̀ Tǝẁ díilá cɔ̃mmã min mã́ã nãkruɔ nã-i.

Nǝ̃ curo'n sǝ̃n fǝ̃ǝ̃ Biɛnĩĩw, nã́ã́ Tiiyǝ sǝ, nǝ̃ gɩ-ń vã ǹ-hlǝ mǝ̃n nã, nǝ̃ mǝ̃̀ mãã mǝ̃̀ caa mǝ̃́ pɩgaa-yǝ ǹ-ja wùú mãã, curo'n sǝ̃n fǝ̃ǝ̃ mǝ̃̀ Tǝ.»

23 Nã̀ã fǝ̃ǝ̃ ǹ-yiil ǹ-ba wù waa nǝ̃ wù duunãtaaba dɩn wà: «Curo wo curo, wu-ń da ɲimãã mãã ɲì da gùu, wù yuugɩ̀ dwállá.

24 Mǝ̃̀ waa-dǝ nǝ̃-ɲã́ã̀, ɲi mãã ɲì da gàá mãã nnĩĩ, Dũnnũ tanhiilaacin, nǝ̃ gɩ̀ bǝ̃ǝ̃'n yuntaacin, bà yáá bà caa bá da-ga, nǝ̃ bà sáa ji da-ga.

Ɲi mãã ɲì nɔ̃ dìí mãã, bà yáá bà caa bá nɔ̃-dǝ, nǝ̃ bà sáa ji nɔ̃-dǝ.»

Samari yiɛntabiɛ'n cɔ̃mmã

25 Gùú nã-i, Musa hlũũ'n yuuntiidiɛẃ jo wà wú juo dǝ̃ǝ̃ Yesuw ǹ-ne.

Wú juo yugu-yǝ wà: «Kaltii, waa ń ja-m, mǝ̃̀ mãã mǝ̃̀ saa mǝ̃́ ce gùú tuugu, nã̀ã ba nũmǝ̃nãw fɩraa.»

26 Yesuẃ yugu-yǝ wà: «Bà yállá danii Musa hlũũ'n sɛbɛw nã?

Dàa yíǹ kállá-gǝ danii?»

27 Biɛẃ siɛ-yǝ wà: «Bà yállá wà: “Ǹ saa ń blǝ Cuutii Dũnnũ cɔ̃mmã́ dwal ǹ nã nǝ̃ ǹ hiɛga min nã, ǹ kusuugɩ min nã, ǹ fãngããgɩ min nã, nǝ̃ ǹ kãnɩmmã min nã.

Ǹ nãcuro yo, wù cɔ̃mmã̀ saa mã́ dwal ǹ nã, nã́ã́ ǹ hla-i.”»

28 Yesuẃ fǝ̃ǝ̃ ǹ-waa nǝ̃-yǝ wà: «Ǹ fǝ̃́ǝ̃lã́!

Nǝ̃-ń ce dɩ̀-lǝ, ǹ ga ba nũmǝ̃nãw.»

29 Nǝ̃ Musa hlũũ'n yuuntiiẁ yáá wù caa wú hã wù hla nǝ̃ diidwaldǝdi, wú ver ǹ-yugu Yesuw wà: «Halii mǝ̃̀ nãcuro-lǝ?»

30 Yesuẃ ver ǹ-ba wù waa nǝ̃-yǝ wà: «Biɛdiɛẁ yáá wùu hlǝ Serusalɛmgu, wù hɩr wù kã Seriko lǝri, ǹ-kãã jal nǝ̃ cobaliɛba, bá blǝ-yǝ, ǹ-hiil wù kuulanãmba, ǹ-ɲǝ̃ǝ̃ ǹ-hũɔ̃ wù wariɛga min, nã̀ã mũũ-yǝ wu bà nã́ã́ wu ji ku-i, ǹ-nǝ̃nǝ̃ǝ̃ wù nã, nã̀ã ta.

31 Ǹ-saa nǝ̃ Yahudyaba puruɔntiidiɛẁ jo nǝ̃ gɩ̀ hlũũgu.

Wú juo da-yǝ bàa kɔsuɔ-yǝ ǹ-kra, wú yiɛl ǹ-ta nǝ̃ wú ba.

32 Levi nũɔ̃ntiidiɛ yo — bà-lǝ bàá cíyà mããcemmã Dũnnũ bũũsuɔgɩ nã — wú juo hi gɩ̀ sùɔ́gɩ nã, ǹ-da-yǝ.

Wùú yo, wú yiɛl ǹ-ta nǝ̃ wú ba.

33 Samari yiɛntabiɛdiɛẁ gáa ba wù ta gɩ̀ sùɔ́gɩ nã, wú da biɛ mãã bàa kɔsuɔ-yǝ, wù gáa ne-yǝ, wù hujãndɩ́ blǝ-yǝ ǹ-car.

34 Wú fǝ̃ǝ̃ ǹ-waa ǹ-kuganãã wù nã, ǹ-juo saar wù tapãnɲã nǝ̃ tĩɛ̃gu, nã̀ã dii nɔ̃mmã ɲã̀ nã.

Wù gáa vaa ǹ-suu ɲã̀ nã ǹ-tã, wú huɔ-yǝ ǹ-piɛ wù kǝkũmw drɔ, ǹ-kã nǝ̃-yǝ noraa'n hyarɩm'n sùɔ́gɩ nã.

Wù mãã wù hi dìí nã, wú ce-dǝ ǹ-pɛ wù nã.

35 Gɩ̀ taakaalgu, wú hiil jinɲã, ǹ-hã noraa'n suɔntiiw^b, nã̀ã waa nǝ̃-yǝ wà: “Hũɔ̃ jin ɲã́ã̀, ń hiraa nǝ̃ hlɔnĩĩ'n yuunã cɔ̃mmã.

Jin ɲã́ã̀, ɲã-ń ji yon, ń dii ǹ-suu-ɲã, nǝ̃ mǝ̃-ń ga ver, mǝ̃̀ ji pã-ɲã ǹ-hã-n.”»

36 Nǝ̃ Yesuẃ fǝ̃ǝ̃ ǹ-yugu Musa hlũũ'n Yuuntiiw wà: «Bà mṹũlã́ ǹ-kɔsuɔ wùú mãã, wù nãcuro wɩ̀-i nǝ̃ halii cwaaba siɛl báàba sǝ̃ǝ̃nã?»

37 Wú siɛ-yǝ wà: «Wùú mãã wù sṹɔ̃́ wù hujãndi, wɩ̀-i wù nãcurow.»

Gùú nã-i, Yesuẃ waa nǝ̃-yǝ wà: «Maar, n ga ba ǹ ce nĩĩgu.»

Yesuẁ kã Mariyamba nǝ̃ Marta suɔgu

38 Yesubá ba bà maar nǝ̃ wù duunãtaaba, ǹ-kãã hi lǝdarǝ.

Cijaldiɛẁ yáá dàa gɩ̀ sùɔ́gɩ nã, bà be-yǝ wà Marta.

Wú hyar Yesuẁ wù suɔgu.

39 Wù nãndiɛẁ yáá dàa, bà be-yǝ Mariyam.

Wù-lǝ wú juo jiraa Kortii tuɔra, ǹ-ba wù nɔ̃ wù cãwanĩɛ̃ga.

40 Gɩ̀-lǝ gɩ̀ nã, Marta yigagɩ̀ yáá gùu huu, wù tɩgɩnǝ̃ǝ̃ norsǝ'n ɲinɲã nã.

Wú kãã yugu Yesuw wà: «Yitii, mǝ̃̀ nãndiɛw mãã wù sǝ nǝ̃ wù pɛ mǝ̃̀ nã mããcemmã nã, gɩ̀ sǝ nǝ̃ kuu yíǹ saa-ì?

Waa nǝ̃-yǝ wú juo pɛ mǝ̃̀ nã.»

41 Kortiiẃ siɛ-yǝ wà: «Marta, Marta, cɔ̃ncindɩ́ nǝ̃ ǹ kusuugɩ nã, dìi huu ǹ yigagu.

42 Nǝ̃ cɔ̃mmã dɩn gbǝ̃́ǝ̃lã́ ǹ-ɲǝ̃ǝ̃ mã̀ min.

Mariyamẁ níé ǹ-tuu mããhuhorɩmmã-i, curo'n síì gbǝ̃ǝ̃ ǹ-ɲǝ̃ǝ̃ ǹ-hũɔ̃ mã̀ã́ mãã wù saa.»