Lukaw 6

Yesu wɩ̀-i Yahudyaba fiisaa'n yuu'n yuuntiiw

Yahudyaba fiisaa'n yuudagǝ, Yesuba nǝ̃ wù duunãtaabà yáá bà ta fugasǝdarǝ kusunã.

Wù duunãtaabá ba ba-ń ce bá ka dũm'n suugu, ǹ-hu-gǝ bà nãtraga nã, ǹ-ba bà wuu.

2 Farisĩɛ̃daabá waa nǝ̃-ba wà: «Dìí mãã dɩ̀ sǝ̃n saa dɩ́ ce fiisaa'n yuugu, danii ɲí ba ɲì ce-dǝ?»

3 Yesuẃ siɛ-ba wà: «Gùú yuuguu mãã nũmmã̀ yáá mã̀ã jaa Dawudaw, bá nǝ̃ wù bluuba, nǝ̃ wú ce dìí mãã, ɲi sáa kal gɩ̀ sùɔ́gu Dũnnũ sɛbɛw nã-ì?

4 Wù jã́nnã́ Dũnnũ bũũsuɔgɩ nã, ǹ-tuu burw mãã bà jãn Dũnnũw nǝ̃-yǝ, ǹ-wuu, nã̀ã hã wù bluubá wuu.

Gùú burw mãã curo'n sáá wù da wù wuu-yǝ, nã́ã́ Yahudyaba puruɔntaa sǝ.»

5 Yesuẃ waa nǝ̃-ba hlo wà: «Curonbiɛ wɩ̀-i fiisaa'n yuu'n yuugɩ nã.»

(Mãtiyew 12.9-14 ; Markaw 3.1-6)

6 Fiisaa'n yuudagǝ, wú kãã jãn Yahudyaba tɩgim'n duugɩ nã, ǹ-ba wù kal cwaaba.

Biɛdiɛẁ yáá dàa, wù nãdĩĩ nãkruɔgùu ku.

7 Musa hlũũ'n yuntaaba nǝ̃ Farisĩɛ̃bá ba bà dǝ̃ǝ̃-yǝ, wu-ń ba wù ji buɔ hlɔnĩĩw fiisaa'n yuugu, bá da ǹ-da yuɔrɔmmã wù nã.

8 Nǝ̃ Yesuẁ yáá wùu fǝ̃ǝ̃ bà kãnɩmmã.

Wú waa nǝ̃ biɛw mãã wù nãkruɔgùu ku wà: «Suro ń hiraa nnĩĩ, cwaa'n yigagɩ nã!»

Biɛẃ suro ǹ-hiraa.

9 Yesuẃ fǝ̃ǝ̃ ǹ-waa nǝ̃-ba wà: «Mǝ̃̀ yugu-ɲã́ã̀ ǹ-ne: hadi sáalà dɩ́ ce fiisaa'n yuugu?

Diifɩnfar-iì, dàa, diibɩblar-iì?

Ǹ hiil curo'n yuu-iì dàa, ǹ ko gɩ̀ tii-ì?»

10 Wú ciir ǹ-ne ǹ-waaraa bà yigasǝrɩ nã, nã̀ã waa nǝ̃ nãkrɔkulǝǝnãw, wà: «Fɩraa ǹ nãkruɔgɩ nã.»

Wú fɩraa gɩ̀ nã, gɩ́ paa ǹ-buɔ.

11 Musa hlũũ'n yuntaaba nǝ̃ Farisĩɛ̃ba hiɛgá dũ, bá ba bà blǝ-dǝ nǝ̃ bà ɲĩɛ̃, bà mãã bà ji ce Yesuw gùú tuugu.

Yesuẁ ne wù hiil wù tĩɛ̃taa nũɔ̃sɔ̃ nǝ̃ bà hǝ̃ǝ̃lba

(Mãtiyew 10.1-4 ; Markaw 3.13-19)

12 Gùú bãnɲã nã-i, Yesuẃ kãã ta ǹ-maar tãnũũdagǝ nã, wù ga cirǝ̃ǝ̃ Dũnnũw nã, ǹ-kãã ba Dũnnũ cirǝ̃mmã nã, fuwɔ taagà ga kaal.

13 Taagà gáa kaalaa, wú be wù duunãtaabá jo, ǹ-juo tũɔ̃l ǹ-hiil cwa nũɔ̃sɔ̃ nǝ̃ bà hǝ̃ǝ̃l bà sǝ̃ǝ̃nã, nã̀ã suu bà yiiri wà wù tĩɛ̃taa.

14 Gɩ̀ cwa nũɔ̃sɔ̃ nǝ̃ bà hǝ̃ǝ̃l yiriɛga-i nnĩĩ: Simɔ̃w, wú suu-yǝ wà Piɛr, wù hǝ̃ǝ̃ Ãndrew, Yakubaw, Yuhanãw, Filipɩw, Bartelemiiw,

15 Mãtiyew, Tumasɩw, Alfe bíɛ́ Yakubaw, nǝ̃ Simɔ̃w mãã bà be-yǝ wà Selɔtɩ^a,

16 Yakuba bíɛ́ Sudasɩw, nǝ̃ Sudasɩ Isɩkariyɔtɩw, wùú mãã wù gáa hlǝ Yesu furũũgɩ nã.

Yesuẁ buɔ hlɔnããba

(Mãtiyew 4.23-25)

17 Yesuẃ hɩr tãnũũgu nǝ̃-ba, ǹ-kãã hiraa taaragu.

Wù duunãtaabà yáá bàa tɩgii piyɛ̃ gɩ̀ sùɔ́gɩ nã, nǝ̃ cohuɔgùu hlǝ Suude yiɛgu, nǝ̃ Serusalɛmgu.

Badaabà yáá bàa hlǝ liɛgaa mãã hũm'n nũɔ̃gɩ nã, bà be-ga wà Tiir lǝri nǝ̃ Sidɔ̃ lǝri.

18 Bà yáá bàa jo bà ji nɔ̃ wù cãwandi, nǝ̃ wú buɔ bà hlɔmmã.

Tãntɔ̃nããbà yáá bà ywar gùú cwaa yo, wú ba wu-ń ce wú ba wù ɲǝ̃ǝ̃ gɩ̀ tãntɔ̃nããba.

19 Fãngããdagǝ tùú, gɩ̀ yáá gɩ̀ hlǝ Yesuw nã, gɩ̀ buɔ cwaaba, gùú yáá gùu ce cohuɔgɩ min, gɩ́ ba gɩ̀ caa gɩ́ jĩɛ̃ wù nã.

Hujãncɔ̃mmã nǝ̃ hyasɩrãgǝgu

(Mãtiyew 5.1-12)

20 Yesuẃ ciir wù yuugu, ǹ-ne wù duunãtaaba, nã̀ã fǝ̃ǝ̃ ǹ-waa wà: «Hujãncɔ̃mntaa ɲimãã, ɲì yunɲã̀ dwállá, Dũnnũ yuuntasǝrɩ́ nǝ̃ ɲì saa!

21 Nũmnãã ɲimãã, ɲì yunɲã̀ dwállá, ɲi ji wuu ǹ-ye!

Ɲimãã mãã ɲì kaalaa kuɔkuɔgu, ɲì yunɲã̀ dwállá, ɲi ji ɲã!

22 Halle ɲì cɔ̃mmã-ń bla cwaaba nã yo, nǝ̃ bá ba bà tuuraa ɲì nã, ǹ-ba bà bǝ̃ǝ̃lǝ̃ǝ̃ ɲì yiir nã, Curonbiɛ mã́ã cɔ̃mmã nã, ɲì yunɲã̀ dwállá!

23 Ɲi-ń ji da bà ce-ɲã́ã̀ gɩ̀ tammã, bláà dudwalɩmmã nã, nǝ̃ ɲì ba ɲì ce kweyi-kweyiw, Dũnnũẁ ga pã-ɲã́ã̀ dugɔ wù suɔgu.

Bà vũnvãnããbà yáá bà cuɔl Dũnnũ tanhiilaaba gùú tuugɩ-i.

24 «Nǝ̃ gbaalaa ɲimãã-lǝ, ɲi díɛ́ ɲì yuɔri ǹ-tã, hujãncɔ̃mmãã ji hi-ɲã́ã̀!

25 Kuuntaa ɲimãã, hujãncɔ̃mmã̀ ji hi-ɲã́ã̀, nũmmã̀ ji jaa-ɲã́ã̀!

Ɲimãã mãã ɲì ɲã, hujãncɔ̃mmã̀ ji hi-ɲã́ã̀, ɲì yigasǝrɩ̀ ji huu nǝ̃ ɲí kaalaa!

26 Ɲi-ń ji da cwaaba min, bà be ɲì yirfɩnfaari, ɲí fǝ̃ǝ̃ wà hujãncɔ̃mmã ji hi-ɲã́ã̀.

Ɲì vũnvãnããbà yáá bà ce Dũnnũ tanhiilaakwasǝnããba nĩĩgɩ-i.»

Yesuẁ wa yì ɲããtaa'n cɔ̃mmã́ gbǝ̃ǝ̃ yì nã

(Mãtiyew 5.38-48 ; 7.12)

27 «Nǝ̃ mǝ̃̀ waa nǝ̃ ɲimãã mãã ɲì nɔ̃ mǝ̃̀ saa: Yáalà ɲì ɲããtaa'n cɔ̃mmã́ dwal ɲì nã, nǝ̃ bàá mãã bà caa ɲì diibɩblaari, bláà ɲì ce diifɩnfaari ɲì hã-ba.

28 Bàá mãã bà pã bà nɔ̃bɩblaagu nǝ̃-ɲã́ã̀, bláà ɲì cirǝ̃ǝ̃ Dũnnũw nã wà wú piɛ wù nãkrɔfɩnfaagu bà drɔ.

Bàá mãã bà bǝ̃ǝ̃lǝ̃ǝ̃ ɲì yiirɩ nã, bláá ɲì cirǝ̃ǝ̃ Dũnnũw nã ɲì hã bàá yo.

29 Curow-ń tii ǹ tãngbǝrǝ̃ǝ̃gu, jǝ̃ǝ̃ gɩdagǝ yo ń hã-yǝ.

Curow-ń tuu ǹ kuulaadiiyǝpɩpuɔlayǝw, báa hla ǹ kuulaadiiyǝw nã.

30 Curo wo curo, wu-ń cirǝ̃ǝ̃ kuu nã ǹ saa, báa vũɔ̃-yǝ.

Curow-ń tuu ǹ nãkrɔkuugu, báa yugu gɩ̀ cɔ̃mmã wù saa.

31 Ɲi mãã ɲì caa cwaabá ce dìí mãã ǹ-hã-ɲã́ã̀, ɲimãã yo, cíyà dìí tuugɩ-i, ɲí hã-ba.

32 Ɲimãã mãã ɲì cɔ̃mmã̀ dwal bàá nã, bàá dɩndɩn nǝ̃n ba bà cɔ̃mmã̀ dwal ɲimãã yo ɲì nã, ɲi kãn wà ɲì ga da bii hlo Dũnnũw saa?

Diicĩɛ̃rntaabaa mãã bà dwal bàá nã, bàá yo, bà cɔ̃mmã̀ dwal diicĩɛ̃rǝntaaba nã!

33 Bàá mãã bà ce-ɲã́ã̀ nǝ̃ diifɩnfaari, ɲimãã yo, ɲi-ń ba ɲì ce bàá dɩndɩn nǝ̃n ba nǝ̃ diifɩnfaari, ɲi cii bii hlo Dũnnũw saa?

Diicĩɛ̃rntaa yo, bà ce nĩĩgɩ-i!

34 Ɲi-ń ba ɲì dii cãmĩɛ̃ga gùú cwaaba nã mãã, ɲĩ̀ĩ fǝ̃ǝ̃ wà ba ji gbǝ̃ǝ̃ ǹ-pã-ga ǹ-hã-ɲã́ã̀, ɲi cii bii Dũnnũw saa hlo?

Diicĩɛ̃rntaa yo, bà dii bà ɲĩɛ̃ nã, nã̀ã ba bà pã bà hã bà ɲĩɛ̃ nĩĩgɩ-i.

35 Ɲi mãã ɲì saa ɲí ce dìí mãã, dɩ̀-i nnĩĩ: yáalà ɲì ɲããtaa'n cɔ̃mmã́ dwal ɲì nã.

Cíyà-ba nǝ̃ diifɩnfaari, nǝ̃ ɲí dii-ba nã nǝ̃ cãmĩɛ̃ga, ɲi báa cii wà ba ji pã-ga ǹ-hã-ɲã́ã̀.

Dũnnũẁ ga pã-ɲã́ã̀ piyɛ̃, nã̀ã ce ɲí ba wùú Drɔ-Dũnnũ tãnkuuraaba.

Cobaliɛ yo, nǝ̃ sɩfǝ̃ǝ̃dwaarnãba, Dũnnũẁ ce diifɩnfaari bà min nã.

36 Bláà ɲì sɔ̃ hujãndi, ɲì Tǝ tammã.»

Curo'n báa da wù nãcuro'n mããdammã

(Mãtiyew 7.1-5)

37 Yesuẃ fǝ̃ǝ̃ ǹ-ba wù waa hlo wà: «Bláá da curo'n mããdam, gùú ji ce Dũnnũ yo, wù síì da ɲimãã mǝ̃gãmmã.

Bláá waa cwaa'n mããyuɔrɔmmã, gùú ji ce Dũnnũ yo, wù síì waa ɲimãã mããyuɔrɔm'n cɔ̃mmã.

Bláà ɲì ce cwaa'n dũndɔw, gùú ji ce Dũnnũ yo, wú ce ɲimãã dũndɔw.

38 Fɩ́ràa ɲì nãkrɔnɲã nã, Dũnnũ yo, wù ji pã-ɲã́ã̀.

Wu-ń wa wu hã-ɲã́ã̀, wù dii guufikuugɩ nã, nã̀ã fyãl-gǝ, gɩ́ yu, fuwɔ ǹ-ba gɩ̀ tũnũũ.

Ɲi mãã ɲì fi cwaaba nǝ̃ gùú kuuguu mãã, Dũnnũẁ ga fi ɲimãã yo, nǝ̃ gɩ̀-lǝ gɩ̀-i.»

39 Yesuẃ fǝ̃ǝ̃ ǹ-waa cãwaadũũm mã́ã̀ nǝ̃-ba wà: «Yɩrnĩĩẁ ji gbǝ̃ǝ̃ ǹ-blǝ wù nãyɩrnĩĩ'n valuugu danii?

Cwaaba hǝ̃ǝ̃lba min, bá kãã dũn fuugɩ nã-i.

40 Ǝ̃ǝ̃lãmtiiẁ síì gbǝ̃ǝ̃ ǹ-maa wù kaltiiw.

Nǝ̃ ǝ̃ǝ̃lãmtiiw mãã yà mǝ̃gaa ǹ-kaalaa, wù ba wù kaltii'n tammã-i.

41 «Yíǹ bla danii nã̀ã ba ǹ-da hiɛgǝgu ǹ nãcuro'n yisɩrɩ nã, nǝ̃ dabuorii mãã yíǹ yisɩrɩ nã ǹ ba ǹ sǝ̃n da dɩ̀-lǝ?

42 Yíi mãã ǹ sǝ̃n da dabuori ǹ hla'n yisɩrɩ nã, yíǹ ji waa nǝ̃ ǹ nãcuroẁ danii wà wú yaala ń hiil hiɛgǝguu mãã wù yisɩrɩ nã?

Kusunɲãhǝ̃nhãltii yíì!

Hiil dabuori ǹ hla'n yisɩrɩ nã haasǝ, gùú ji ce ń daraa ǹ-hiil hiɛgǝguu mãã, ǹ nãcuro'n yisɩrɩ nã.»

Tubikuuguu nǝ̃ gɩ̀ biiga

(Mãtiyew 7.16-20 ; 12.33-35)

43 Yesuẃ waa wà: «Tubikufɩnfaagɩ̀ sǝ̃n ŋmǝ̃ǝ̃ biihãrĩɛ̃ga.

Tubikuhãrãã yo, gɩ̀ sǝ̃n ŋmǝ̃ǝ̃ biifɩnfiɛga.

44 Bà fǝ̃ǝ̃ tubikuugu gɩ̀ bii nã-i: huɔtuugɩ̀ sǝ̃n ŋmǝ̃ǝ̃ plǝnɲã, curo'n sáa hi ǹ-jar fyããri jugapyɛ̃ntuugɩ nã ǹ-da.

45 Cohuhorẁ hiil cɔ̃nhuhorɩmmã, wù kusufɩnfaa nã-i.

Cobɩblayǝẁ hiil cɔ̃mbɩblammã, wù kusubɩblaa nã-i.

Nǝ̃-ń da dìí mãã dɩ̀ hlǝ curo'n nũɔ̃gɩ nã, dɩ̀-lǝ dɩ̀-i dìi yu wù kusuugu.»

Donɲã hǝ̃ǝ̃l cɔ̃mmã

(Mãtiyew 7.24-27)

46 Yesuẁ nã̀ã ver ǹ-waa wà: «Danii ɲí ba ɲì be-m: “Yitii, Yitii”, nǝ̃ mǝ̃̀ mãã mǝ̃̀ waa dìí mãã, ɲi sǝ̃n ce-dǝ?

47 Curow mãã wu-ń jo mǝ̃n nãã, ǹ-juo nɔ̃ mǝ̃̀ cãwanĩɛ̃ga, nã̀ã ba wù ce gà mããcemmã, wù mãã wù hlǝ gùú tiiw, yáalà mǝ̃́ juo pɩgaa-ɲã́ã̀ nǝ̃-yǝ:

48 wú nǝ̃ nã́ã́ curow mãã wa wú mã duugu.

Wù kuɔsǝ fuugɩ nu-i, nã̀ã fǝ̃ǝ̃ ǹ-kra gɩ̀ tuurɩ nã tɩntalɩmmãã drɔ.

Duɔgɩ̀ jáa nɔ̃, kwayulǝgǝ'n hũmmã́ juo suu gɩ̀ duugɩ nã, nǝ̃ gɩ̀ mãã gɩ̀ mãllɩ̀ fla, mã̀ sáa gbǝ̃ǝ̃ ǹ-saaraa gɩ̀ nã.

49 Nǝ̃ curo wo curo mãã wu-ń nɔ̃ mǝ̃n cãwanĩɛ̃ga, nã̀ã ba wù sǝ̃n ce mããcemmã nǝ̃-ga, wú nǝ̃ nã́ã́ curow mãã wù mlã wù duugu ɲũũrũũgu, wù sáa ka fuugu ǹ-kra gɩ̀ tuurɩ nã.

Kwaa'n hũmmã-ń jo, gɩ̀ paa ǹ-duruu ǹ-guu nã gbɩla-i.»