Mãtiyew 4

Sɩtãnẁ wa wú vuuraa ǹ-blǝ Yesuw

Gɩ̀ furũũgɩ nã, Dũnnũ Yuflǝẃ juo ta Yesu yigagɩ nã ǹ-kã nǝ̃-yǝ jerkwaarɩ nã, tiilǝtiiẃ da ǹ-kãã wa wú dǝ̃ǝ̃-yǝ.

2 Wù gáa dii sũũw bãn gwaahǝ̃ǝ̃l nǝ̃ yisɔsǝ gwaahǝ̃ǝ̃l kusuugɩ nã, nũmmã́ kãã jaa-yǝ.

3 Sɩtãn Dǝ̃ǝ̃tiiẃ kuganãã wù nã ǹ-waa nǝ̃-yǝ wà: «Nǝ̃-ń ba Dũnnũ Bíɛ́ nǝ̃n ba, ce tɩntrã gáàgá cin burbiiga yí ne!»

4 Gɩ̀-i, Yesuẃ siɛ-yǝ wà: «Dɩ̀ yállá wà wuur'n dɩndɩn sǝ̃n val curow.

Nǝ̃ kuu wo kuu mãã gɩ̀ hlǝ Dũnnũ nũɔ̃gɩ nã, gùú hlã́ã̀-yǝ nǝ̃ nũmǝ̃nãsǝri.»

5 Gɩ̀-i, tiilǝtiiẃ fǝ̃ǝ̃ ǹ-tuu ǹ-ta nǝ̃-yǝ gùú lǝrii mãã dìi kra dɩ̀ dǝ ǹ-hã Dũnnũw, dìí mãã Serusalɛmgu, ǹ-kãã piɛ-yǝ Dũnnũ bũũduu'n yuugɩ nã,

6 nã̀ã waa nǝ̃-yǝ wà: «Nǝ̃-ń ba Dũnnũ Bíɛ́ nǝ̃n ba, sãl níɛ́ nã yí ne!

Nã̀ã wa dɩ̀ yállá wà Dũnnũw ji ce wù mɛlɛgɛbá jã ǹ-blǝ-n bà nãkrɔnɲã nã, ǹ viɛgɩ báa da ǹ-juu tɩntãn yo.»

7 Yesuẃ siɛ-yǝ wà: «Dɩ̀ yállá wà curo'n báa dǝ̃ǝ̃ Yitii Dũnnũw ǹ-ne.»

8 Tiilǝtiiẃ fǝ̃ǝ̃ ǹ-ver ǹ-tuu ǹ-ta nǝ̃-yǝ tãnũdɩdaalaadagǝ drɔ hlo velvel gɩ̀ nã, ǹ-kãã pɩgaa-yǝ nǝ̃ cuu wáà yuuntasǝrɩ min nǝ̃ wù kusunɲããfɩnfanɲã min,

9 nã̀ã waa wà: «Nǝ̃-ń kuulǝǝ ǹ-bũũ-m, ǹ díɛ́ kuu wo kuu mãã nnĩĩ, mǝ̃̀ hã-n nǝ̃-gǝ-i.»

10 Gɩ̀-i, Yesuẃ fǝ̃ǝ̃ ǹ-siɛ-yǝ wà: «Sɩtãn, ta ń ba ǹ hal mǝ̃̀ nãã!

Dɩ̀ yállá wà: “Ǹ saa ń kuulǝǝ ǹ-bũũ Yitii Dũnnũ dɩndɩn-i, nã̀ã ba ǹ nɔ̃ ǹ-hã-yǝ.”»

11 Gùú nã-i, tiilǝtiiẃ fǝ̃ǝ̃ da-yǝ nǝ̃ wú ba.

Wù gáa ya wú ba nnĩĩ nã, mɛlɛgɛdaabá juo ba bà pɛ wù nã.

Yesu mããcem'n dulli Galile yiɛgu

(Markaw 1.14-15 ; Lukaw 4.14-15)

12 Yesuẁ jáa nɔ̃ gùú bǝ̃ǝ̃guu mãã wà ba blǝ́rá Yuhanãw ǹ-dii-yǝ kasoduugɩ nã, wú ver ǹ-kã Galile yiɛgu.

13 Nǝ̃ wù sáa ba dàa Nasarɛtɩ lǝri, wú kãã jiraa Kapɛrnã lǝri, Galile yiɛ'n lwaakɩnkandi tuɔra.

Sùɔ́ gúɔ̀, Sabulɔ̃ bá nǝ̃ Nɛfɩtaliw bà-lǝ bàá hlɔ̃m-i.

14 Dɩ̀-lǝ dɩ̀ cíé ǹ-da ǹ-ce Dũnnũw tanhiil Esayi cãwanĩɛ̃gá suu.

15 Esayiẁ yáá wùu waa wà: «Sabulɔ̃ yiɛntaaba nǝ̃ Nɛfɩtali yiɛntaaba, bàá mãã lwaakɩnkan'n nũɔ̃gɩ nã ǹ-ga maar, bàá mãã Surdɛ̃ huɔlɩmmã nã, nǝ̃ Galile yiɛgu, bàá mãã bà sǝ Yahudyaba, bá nǝ̃ sùɔ́gɩ-i:

16 gùú cwaabaa nǝ̃n yáá bàa jiraa dudũũmã nã, bà díɛ́ korɩm'n gbɩgbaamã.

Nǝ̃ bàá mãã bà yáá bàa jiraa kúúdũdũũmã nã, gbɩgbaamã hílláa bà nã.»

17 Ǹ-tuu gɩ̀-lǝ gɩ̀ bǝ̃ǝ̃gu, Yesuẃ du nã ǹ-ba wù waa Dũnnũ cãwandi wù ja cwaaba wà: «Nǝ̃́nǝ̃̀ǝ̃ ɲì gaacĩɛ̃yaga nã nǝ̃ ɲí tuu ɲí tu, Dũnnũ yuuntasǝrɩ̀ híí ǹ-tã!»

Yesuẁ be tɩtoblǝraadaba

(Markaw 1.16-20 ; Lukaw 5.1-11)

18 Yuudagǝ, Yesuẁ gáa ba wù pɛ̃ Galile yiɛ'n lwaakɩnkan'n nũɔ̃gu, wú da tɩtoblǝraadaba bà nǝ̃ǝ̃ jirãnɲã.

Bà yáá cwaaba hǝ̃ǝ̃l-i; Simɔ̃ mãã bà be-yǝ wà Piɛr, bá nǝ̃ wù hǝ̃ǝ̃ Ãndrew.

19 Yesuẃ waa nǝ̃-ba wà: «Bláà ɲì duu mǝ̃̀ nã, mǝ̃̀ ji ce ɲí ba ɲì caa cwaa-i.»

20 Bá fǝ̃ǝ̃ ǹ-paa ǹ-nǝ̃nǝ̃ǝ̃ bà jirãnɲã nã, nã̀ã ba bà duu wù nã.

21 Bà gáa ba bà kã yigagɩ nã hlo, ǹ-ver ǹ-da wudiɛ nǝ̃ wù hǝ̃ǝ̃w.

Sebede byavũnvũɔ̃ Yakubaẁ yáá, bá nǝ̃ wù hǝ̃ǝ̃ Yuhanãw, ǹ-pya bà tǝ Sebede nã, viigǝgu kusunã, bà mǝ̃gaa bà jirãnɲã.

Yesuẃ be pũmpɩriiba.

22 Bá fǝ̃ǝ̃ ǹ-paa ǹ-nǝ̃nǝ̃ǝ̃ bà viigǝgɩ nã ǹ-hã bà tǝw nã̀ã ba bà duu wù nã.

Yesuẁ waa Dũnnũ cãwandi nã̀ã ba wù suro hlɔnããba

23 Gɩ̀-lǝ gɩ̀ nã, Yesuẁ gáa ba wù waaraa Galile yiɛgɩ min nã, wú ba wù kal cwaaba Yahudyaba tɩgim'n donɲã nã, wù waa Dũnnũ yuuntasǝ'n cɔ̃ndudwalɩmmã wù ja cwaaba, nã̀ã ba wù buɔ cwaa'n hlɔm'n plaaga min nǝ̃ bà ɲããjiranɲã min.

24 Siirii yiɛntaaba min, bà gáa juo nɔ̃ wù yiirɩ nã.

Bá fǝ̃ǝ̃ ǹ-jo nǝ̃ bà min mãã bà yáá bà ywar bà cãnkũɔ̃mã nã wù nãã.

Bà sǝ̃ǝ̃nã, tãntɔ̃nããntaabà yáá dàa, sɩndiɛkũmntaaba, nǝ̃ wuulaaba, wú ba wù buɔ-ba.

25 cohuɔdaagɩ́ suro ǹ-ba gɩ̀ duu wù nã; badaabà yáá bà hlǝ Galile yiɛgu, badaaba Dekapol yiɛgu^a, badaaba Serusalɛmgu, badaaba Suude yiɛgu, badaabá ba bà hlǝ Surdɛ̃ huɔlɩmmã nã.