Lukaw 7

Yesuẁ buɔ Wurɔm taa'n sɩrǝǝsɩ gundii yuuntii'n mããcierw

Yesuẁ gáa waa cãwanĩɛ̃ gáà ǹ-tã nǝ̃ cwaabaa mãã bà yáá bàa caliɛ wù nã, wú ta ǹ-maar Kapɛrnã lǝri.

2 Wurɔm sɩrǝǝsɩ gundii yuuntiidiɛẁ yáá dàa gɩ̀ sùɔ́gɩ nã.

Wù yáá nǝ̃ mããcierdiɛ, wù cɔ̃mmã̀ gbǝ̃ǝ̃ wù nã ǹ-car.

Mããcier wáà, wù yáá wù jaa, nã́ã́ wù ji ku-i.

3 Sɩrǝǝsɩba yuuntii wáà, wù gáa nɔ̃ Yesu cɔ̃mmã nã, wú tĩɛ̃ Yahudyaba vũnvãnããdaabá kã ǹ-ga cirǝ̃ǝ̃ wù nã, wà wú juo ce wù mããcierẃ buɔ.

4 Bá kã Yesuw nãã, ǹ-kãã ba bà jiɛriɛ bà waa nǝ̃-yǝ wà wú ce kukuɔya.

Bà yáá bà waa wà: «Biɛ wáà, wù saa nǝ̃ ń pɛ wù nã.

5 Yì bluu'n cɔ̃mmã̀ dwal wù nã.

Wù-lǝ wùú cíé bá mã yì tɩgim'n duugu.»

6 Gɩ̀-lǝ gɩ̀ nã, Yesuẃ kã bá ta.

Bá ba bà maar, bà gáa kã bà ga kuganãã suɔgɩ nã, Wurɔm sɩrǝǝsɩ gundii yuuntiiẃ tĩɛ̃ wù jambliɛdaabá kãã jǝ̃ǝ̃lǝ̃ǝ̃ wù nã hlũũgɩ nã, ǹ-waa nǝ̃-yǝ wà: «Yitii, báa ywar ǹ hla, yuuntii wà yíǹ sǝ̃n saa ń jãn wù suɔgu, wà halǝmblǝ-i nǝ̃ wù-lǝ ǹ-ba wù ji saa nǝ̃ dɩ̀-lǝ?

7 Gùú cíé wù sáa siɛ ǹ-kã nǝ̃ wù hla ǹ nãã.

Nǝ̃ wù wa ń waa cãwaayisɩrɩ dɩndii dɩn, wù mããcierẃ da ǹ-buɔ.

8 Nã̀ã wa wùú yo, cwaabá nìɛ wù yuugɩ nã; nǝ̃ wùú yo wú ba badaba'n yuugɩ nã.

Wu-ń waa nǝ̃ wùú mãã wà: “Kã n ga ce díɛ̀!”

Wù ta-i.

Wu-ń wa: “Jo nhlíɛ̀!”

Wù jo-i.

Wu-ń waa nǝ̃ wù mããcierw wà: “Ce díɛ̀!”

Wù ce-dǝ-i.»

9 Yesuẁ gáa nɔ̃ biɛ wáà cãwanĩɛ̃ga, gá tugulǝǝ wù nã.

Wú yiil ǹ-waa nǝ̃ cocindii mãã dɩ̀ yáá dɩ̀ duu wù nã wà: «Mǝ̃̀ waa nǝ̃-ɲã́ã̀, halle Isɩrayɛl bluuba sǝ̃ǝ̃nã yo, mǝ̃̀ sáa da curo yà cu mǝ̃̀ furũũgɩ nã nnĩĩ tammã.»

10 Tĩɛ̃taabá ver ǹ-kũũ biɛ'n suɔgu, ǹ-kãã da wù mããcierẁ yà buɔ.

Blakuuciɛdiɛ'n kadiin'n pĩĩmã

11 Gɩ̀ furũũgɩ nã, Yesuẃ juo maar Nayin lǝri.

Wù duunãtaaba, nǝ̃ cohuɔdaagɩ́ kã bá ta.

12 Wù gáa ba wù kuganãã gɩ̀ lǝ'n nũɔ̃gɩ nã, wú da bàa tuu pĩɛ̃ndarǝ, bà maar nǝ̃-dǝ.

Blakuuciɛdiɛ'n kadiin yáá wùu ku.

cohuɔdaagɩ̀ yáá gùu hlǝ lǝrɩ nã bà kã bà ga tĩɛ̃-yǝ.

13 Yitiiẁ gáa da cijal wáà, wù hujãndɩ́ blǝ-yǝ ǹ-car, wú waa nǝ̃-yǝ wà: «Báa kaal!»

14 Nã̀ã wáà ǹ-kuganãã, ǹ-kãã jĩɛ̃ pĩɛ̃n'n cĩĩnũũgɩ nã.

Pĩɛ̃ntuuraabá fǝ̃ǝ̃ ǹ-hiraa.

Yesuẃ fǝ̃ǝ̃ ǹ-waa wà: «Biɛmpɩr, mǝ̃̀ ja yíi-i, suro!»

15 Biɛmpɩrẃ nĩĩ, ǹ-suro ǹ-jiraa, nã̀ã ba wù waa cɔ̃mmã.

Yesuẃ waa nǝ̃ wù ɲũw wà: «Ǹ bíɛ́ wɩ̀-i nnĩĩ!»

16 Bà min min, bá sɔ̃ Dũnnũw nã, nã̀ã ba bà bũũ-yǝ, bà waa wà: «Dũnnũ tanhiilkɩnkandaarɩ̀ gáa juo hillaa yì nã.

Dũnnũ yo, wú jo wù ji pɛ yì nã.»

17 Yesu cɔ̃m mã́ã̀, mã́ buruɔ ǹ-jãn Suude yiɛgu, nǝ̃ gɩ̀ tuɔra liɛga min nã.

Yuhanãw mãã wù ɲĩɛ̃ cwaaba, wù tĩɛ̃ wù duunãtaaba Yesuw nãã

(Mãtiyew 11.2-6)

18-19 Yuhanã duunãtaabá kãã taa gà min ǹ-ja-yǝ.

Wú hiil cwaaba hǝ̃ǝ̃lba sǝ̃ǝ̃nã, ǹ-tĩɛ̃ bá kã Yitii Yesuw nãã, wà bá kãã yugu-yǝ ǹ-ne wà Kortiiw mãã wù saa wú jo, wù-lǝ wɩ̀-i dàa, bá cii wudiɛ-ì?

20 Bà gáa hi Yesuw nãã, bá waa nǝ̃-yǝ wà: «Yuhanãw mãã wù ɲĩɛ̃ cwaaba, wùú tĩ́ɛ̃lã́-yáà wà yí juo yugu-n ǹ-ne, wà Kortiiw mãã wù saa wú jo wà yíi-i dàa, yi saa yí cii wudiɛ-ì?»

21 Gɩ̀-lǝ gɩ̀ bǝ̃ǝ̃gu, Yesuẃ ba wù ce cocin'n hlɔmmã, nǝ̃ bà ɲããjiranɲã́ ba ɲã̀ buɔ, ǹ-ɲǝ̃ǝ̃ ǹ-hiil tãntɔ̃nããbaa mãã bà yáá cwaaba nã, nã̀ã cugur yɩrnǝ̃ǝ̃cin'n yinɲã.

22 Nã̀ã fǝ̃ǝ̃ ǹ-siɛ Yuhanã tĩɛ̃taabaa saa wà: «Ɲi nṹɔ̃́ mã̀ã́ mãã, nã̀ã da gàá mãã, kã́ã̀ ɲí ga taa-ga ɲí ja-yǝ wà: yɩrnǝ̃ǝ̃'n yinɲã́ nìɛ ɲã̀ ciɛlaa, kasarnããbá nìɛ bà wáà tǝntǝm, sǝ̃nkũnããbá ba bà buɔ, tɔ̃njǝraabá nìɛ bà nɔ̃, cugutaabá nìɛ bà nĩĩ, kokwaabá nìɛ bà nɔ̃ cɔ̃ndudwalɩmmã.

23 Wùú nǝ̃n ba wù sáa ji ver furũũ mǝ̃̀ cɔ̃mmã nã, wù yuugɩ̀ dwállá.»

Yesuẁ waa Yuhanãw mãã wù ɲĩɛ̃ cwaaba wù cɔ̃mmã

(Mãtiyew 11.7-19)

24 Yuhanã tĩɛ̃taabà gáa ta, Yesuẃ fǝ̃ǝ̃ ǹ-ba wù waa wù cɔ̃mmã nǝ̃ cocindii nǝ̃n yáá dàa wà: «Ɲi yáá ɲĩ̀ĩ kã Yuhanã nãã jerkwaarɩ nã, ɲi gáa da bii?

Gùú hĩɛ̃blɩrii mãã saluugɩ̀ yáá gɩ̀ saaraa dɩ̀ nã, dɩ̀-i dàa?

25 Gɩ̀-lǝ ɲi kã́ã́ ǹ-ga ne bii?

Kuulaafɩnfabantii-ì?

Bàá mãã bà dii kuulaafɩnfaaba, nã̀ã ba nǝ̃ ɲããfɩnfanɲã, bà-lǝ bá nǝ̃ mũɔ̃rãã'n swam-i.

26-27 Nǝ̃ gɩ̀-lǝ gɩ̀ nã, ɲi kã́ã́ ǹ-ga ne bii?

Dũnnũ tanhiil-ì?

Sulam-i, mǝ̃́ waa nǝ̃-ɲã́ã̀, ɲi díɛ́ wùú mãã, wù máalá Dũnnũ tanhiilw.

Bà yállá Yuhanã cɔ̃mmã-i wà: “Mǝ̃̀ ji tĩɛ̃ mǝ̃̀ tĩɛ̃tiiẃ ta ǹ yiga nã, wú kãã mǝ̃gaa hlũũguu ǹ-cii-n.”»

28 Yesuẃ fǝ̃ǝ̃ ǹ-waa wà: «Mǝ̃̀ waa nǝ̃-ɲã́ã̀.

Cuu wáá nã, cijal'n wuuhuuyǝdiɛ'n sɩriɛ yà maa Yuhanãw.

Nǝ̃ wùú mãã bà min wuusaalw Dũnnũ yuuntasǝ'n sùɔ́gɩ nã, wù máalá Yuhanãw.

29 Cwaaba min mãã bà yáá bà nɔ̃ wù cãwanĩɛ̃ga, halle nãnhũɔ̃rãã yo, bá hã Dũnnũw nǝ̃ sulammã, nã̀ã fǝ̃ǝ̃ ǹ-ce Yuhanãẃ ɲĩɛ̃-ba.

30 Nǝ̃ Dũnnũw mãã wù yáá wù wa wú ce dìí mãã ǹ-hã Farisĩɛ̃ba nǝ̃ Musa hlũũ'n Yuntaaba, bà sáa hũɔ̃-dǝ, bá hla bà sáa ya Yuhanãẃ ɲĩɛ̃-ba.»

31 Yesuẃ waa hlo wà: «Mǝ̃̀ ji fi kuɔkuɔtaa-lǝ nǝ̃ bii?

Bà hlǝ halii?

32 Mǝ̃̀ ji gbǝ̃ǝ̃ ǹ-fi-ba nǝ̃ tãnkuuraabaa mãã bàa jarnãã cɔ̃ncesɔsiɛga nã; nã̀ã ba bà waa nǝ̃ bà ɲĩɛ̃ wà bá húllǝ́ saa'n hlãnɲãã fyãllɩ ǹ-hã-ba, curo'n sáa sa.

Bá hyar blaa'n hlãnɲã ǹ-hã-ba, curo'n sáa kaala!

33 Gùú cíé, Yuhanãw mãã wù ɲĩɛ̃ cwaaba, wù-lǝ wú juo ba, wù sǝ̃n wuu wuuvĩĩr, wù sǝ̃n ɲũɔ̃ ɛrsɛ̃ kwãm, ɲí wa wà tãntũɔ̃-i wù nã!

34 Curonbiɛẁ gáa jo, wù wuu wuuri, nã̀ã ba wù ɲũɔ̃, ɲí waa wà: “Níyà biɛ wáà mãã, purnĩĩ-i nã̀ã ba kwãnɲũɔ̃rw.

Nãnhũɔ̃rããba nǝ̃ diicĩɛ̃rǝntaa'n jĩɛ̃-i.”

35 Cɔ̃nfǝ̃ǝ̃rẁ mãã wù ce dìí mãã, dìí pɩ́garà wù sũɔ̃lɩmmã.»

Yesuẁ jãn Farisĩɛ̃biɛ Simɔ̃ suɔgu

36 Farisĩɛ̃biɛdiɛẃ jar Yesuw, wà wú jo ba ji wuu wuuri bà min.

Yesuẃ kã biɛ wáà suɔgu.

Bá juo jiraa juwuukaagɩ nã, bà jo bà ji wuu wuuri.

37 Cijaldiɛẁ yáá dàa gɩ̀ lǝrɩ nã, wù yiirɩ̀ bǝ̃́ǝ̃lǝ̃́ǝ̃ wù gaacĩɛ̃ya'n cɔ̃mmã nã.

Wù gáa nɔ̃ wà Yesuw nãã wù kã wù ga wuu wuuri Farisĩɛ̃biɛ'n suɔgu, wú tuu latɩkolo kuufɩnfaadagǝ kusunã, bàa ce-gǝ nǝ̃ tɩntãndarǝ, bà be-dǝ wà albatɩr tɩntãn,

38 ǹ-juo hiraa Yesu vyan'n yiɛgu, ǹ-ba wù kaal, wù ɲiɲirãmmã́ ba mã̀ tũnũũ mã̀ sĩĩ Yesu vyanɲã.

Wú ce wù yukwaasǝri ǹ-hu-mã, ǹ-mǝ̃gaa ǹ-mũɔ̃sǝrãã wù vyanɲã nã, nã̀ã tũn latɩkolo ɲã̀ drɔ.

39 Farisĩɛ̃biɛw mãã wù yáá wùu jar Yesuẁ wuurɩ nã, wù gáa da dɩ̀-lǝ, wú ba wù kãn wù kusuugɩ nã wà: «Biɛ wáà nã́ã̀ ba Dũnnũ tanhiil nã́ã̀ sulammã nã, cijalw mãã wù jĩɛ̃ wù nã nnĩĩ, wu nã́ã̀ wùu fǝ̃ǝ̃ gùú cadũllii mãã: cahãrãã gúɔ̀gɩ̀ tuugu!»

40 Yesuẃ fǝ̃ǝ̃ ǹ-tuu cãwandi, ǹ-waa nǝ̃ Farisĩɛ̃biɛw wà: «Simɔ̃, cãwandɩ́ nǝ̃ mǝ̃̀ nũɔ̃ nã, mǝ̃̀ ji waa-dǝ ǹ-ja-n.»

Simɔ̃ẃ siɛ-yǝ wà: «Kaltii, yíí waa.»

41 Gùú nã-i, Yesuẃ fǝ̃ǝ̃ ǹ-waa wà: «Biɛdiɛ'n cãmĩɛ̃gà yáá cwaaba hǝ̃ǝ̃l nã.

Wuudĩɛ̃l'n yagà yáá tũndii gundii, bà hǝ̃ǝ̃lnã yagà ba gwaahǝ̃ǝ̃l nǝ̃ nũɔ̃sɔ̃.

42 Bà gáa ba bà síì gbǝ̃ǝ̃ ǹ-pã-ga, wú ne bà hujãndi, nã̀ã ce bá yaala gà pãllɩ́ ba.

Cwaaba hǝ̃ǝ̃l báá nã, wù cɔ̃mmã̀ ji dwal hawu nã-ì?»

43 Simɔ̃ẃ siɛ-yǝ wà: «Mǝ̃n wa wùú mãã wù cãmlãrɩ̀ ta nã-i.»

Gùú nã-i, Yesuẃ waa nǝ̃-yǝ wà: «Ǹ wáalá sulam-i.»

44 Yesuẃ yiil cijal'n yiɛgu, nã̀ã fǝ̃ǝ̃ ǹ-waa nǝ̃ Simɔ̃w wà: «Ǹ díɛ́ cijal wáà-ì?

Mǝ̃̀ jã́nnã́ ǹ duugɩ nã, ǹ sáa hã-m nǝ̃ hũm mǝ̃́ saar mǝ̃̀ vyanɲã.

Nǝ̃ wù-lǝ, wù sáará mǝ̃̀ vyanɲã nǝ̃ wù ɲiɲirãmmã, nã̀ã hu-ɲã nǝ̃ wù yukwaasǝri.

45 Ǹ sáa jǝ̃ǝ̃lǝ̃ǝ̃ ǹ-pɩpɩrĩɛ̃ mǝ̃̀ nã, nǝ̃ wù-lǝ, mǝ̃̀ jã́nnã́ ǹ duugu, wù sáa yaala mǝ̃̀ vyan'n mũɔ̃sǝrãmmã́ ba.

46 Ǹ sáa tũn nɔ̃mmã mǝ̃̀ yuugɩ nã, nǝ̃ wù-lǝ, wù tṹnnã́ latɩkolo mǝ̃̀ vyanɲã nã.

47 Gùú cíé mǝ̃̀ waa-dǝ ǹ-ja-n, wù gaacĩɛ̃yacin díɛ̀, dɩ̀ min, dɩ̀ pyárrá wù yuunã, gùú cíé wú blǝ mǝ̃̀ cɔ̃mmã́ dwal wù nã nĩĩgu.

Nǝ̃ gùú tiiw mãã bàa pyar gaacĩɛ̃yaga fiyãã wù yuunã, wù sǝ̃n ya mã́ dwal wù nã.»

48 Gɩ̀-lǝ gɩ̀ nã, Yesuẃ waa nǝ̃ cijalw wà: «Ǹ gaacĩɛ̃yagà pyárrá ǹ yuunã.»

49 Bà mãã bà yáá bàa jiraa juwuukaagɩ nã nǝ̃ bàá mãã, bá ba bà waa bà kusunɲã nã wà: «Halii curo'n tuu-i nǝ̃ wáà-lǝ, nǝ̃ wú ba wù siɛ wù pyar cwaa'n gaacĩɛ̃yaga bà yunɲã nã?»

50 Yesuẃ fǝ̃ǝ̃ ǹ-waa nǝ̃ cijalw wà: «Ǹ hũɔ̃mã̀ kórrá-n, maar fiɛya!»