Yuhanãw 3

Ǹ-ver ǹ-huu ǹ-tu

Farisĩɛ̃biɛdiɛ yáá dàa, bà be-yǝ wà Nikodɛm, wù yáá Yahudyaba yuuntii-i.

2 Yisuɔdagǝ nã, wú suro ǹ-kã Yesuw nãã ǹ-kãã waa nǝ̃-yǝ wà: «Kaltii, yi fǝ̃́ǝ̃lã́ wà Dũnnũ tĩ́ɛ̃lã́-n wà ń juo kal-yáà nǝ̃ wù cãwandi; nã̀ã wa yíǹ mãã ǹ-ce gùú cɔ̃mmãã mãã ǹ-pɩgaa-yáà nnĩĩ nã, Dũnnũw-ń ba wù sǝ nǝ̃ gùú tii mãã, gɩ̀ tii síì hi mã̀ cellɩ nã.»

3 Yesuẃ waa nǝ̃-yǝ wà: «Ya mǝ̃́ waa sulammã nǝ̃-n: nǝ̃-n ba ǹ sáa ver ǹ-huu ǹ-tu, ǹ síì gbǝ̃ǝ̃ ǹ-da Dũnnũ yuuntasǝri nǝ̃ ǹ yisɩri.»

4 Nikodɛmẃ yugu-yǝ wà: «Curow mãã yà vǝ̃ǝ̃ ǹ-tã, wù ji ce danii nã̀ã gbǝ̃ǝ̃ ǹ-ver ǹ-huu ǹ-tu?

Wù ji gbǝ̃ǝ̃ ǹ-ver ǹ-jãn wù ɲũ kusuugɩ nã wú huu-yǝ hlo-ì?»

5 Yesuẃ siɛ-yǝ wà: «Ya mǝ̃́ waa sulammã nǝ̃-n: gùú tiiw-ń ba wù sáa huu hũm'n fãngããgɩ nã nǝ̃ Dũnnũ Yuflǝ fãngããgɩ nã, gɩ̀ tiiẁ síì gbǝ̃ǝ̃ ǹ-jãn Dũnnũ yuuntasǝrɩ nã.

6 Curow-ń huu-n, ǹ ba curo'n blɩ-i, nǝ̃ Dũnnũ Yuflǝw-ń huu yíi mãã, ǹ ba nǝ̃ Dũnnũ Yuflǝ nũmǝ̃nãsǝ-i.

7 Mǝ̃n mãã mǝ̃̀ wáalá nǝ̃-ɲã́ã̀ wà ɲi ver ɲí huu ɲí tu, báa ya dɩ̀-lǝ dɩ́ cu ǹ kusuugu.

8 Ǹ sáa da?

Gùú sùɔ́guu mãã gɩ-ń ba gɩ̀ dwal saluugɩ nã gɩ̀ suro-i; nǝ̃-n ji wa n fǝ̃ǝ̃, ǹ ba ǹ nɔ̃ gɩ̀ du-i; nǝ̃ ǹ síì fǝ̃ǝ̃ gɩ̀ wanhlǝm'n sùɔ́, ǹ síì fǝ̃ǝ̃ gɩ̀ wankãm'n sùɔ́ yo.

Dũnnũ Yuflǝw mãã wù huu bàá mãã, wù huu-ba nnĩĩ-i.»

9 Nikodɛmẃ yugu-yǝ wà: «Cãwan díɛ̀ dɩ̀ ji gbǝ̃ǝ̃ ǹ-ce tam hamã-i?»

10 Yesuẃ waa wà: «Ne, kaltiigǝ̃ngã yíi tuugu Isɩrayɛl yiɛgu, ǹ cíé danii nã̀ã fǝ̃ǝ̃ cãwan díɛ́dɩ́ ywar-n?

11 Ya mǝ̃́ waa sulammã nǝ̃-n: yi fǝ̃́ǝ̃lã́ mã̀ã́ mãã, yi waa mã̀-i, nǝ̃ yi díɛ́ dìí mãã nǝ̃ yì yinɲã, yi waa dɩ̀-i yì ja-ɲã́ã̀, nǝ̃ ɲí ba ɲì sǝ̃n caa ɲí hũɔ̃-dǝ.

12 Dìí mãã dɩ̀ ce dìɛ ɲũũrũũgu, mǝ̃-ń waa-dǝ, nǝ̃ ɲi sáa hũɔ̃-dǝ, dìí mãã dɩ̀ ce Dũnnũ suɔgu, mǝ̃-ń waa-dǝ, ɲi ji ce danii nã̀ã hũɔ̃-dǝ?

13 Curo'n sáa hi ǹ-yuguraa drɔkuɔlɩ nã ǹ-da, gɩ-ń ba gɩ̀ sáa wa Curonbiɛw mãã wù hlǝ́rá drɔkuɔlɩ nã ǹ-jo sǝ.

14 Musaẁ háará kwabyãr'n waalw ǹ-piɛ-yǝ dallɩ nã jerkwaarɩ nã gùú tammã, gɩ̀ saa bá haar Curonbiɛ yo gùú tammã-i,

15 ǹ-da ǹ-hã bàá mãã bà ji hũɔ̃ wù cɔ̃mmã nǝ̃ fɩraa nũmǝ̃nãsǝri.

16 «Cwaa'n cɔ̃mmã̀ mãã mã̀ dwállá Dũnnũw nã ǹ-car, gɩ̀-i, wú hã-ba nǝ̃ wù bíɛ́ kadiinw wà gùú tii nǝ̃n hũɔ̃ wù cɔ̃mmã, gɩ̀ tiiw báa ga hyã cicuɔgu, nǝ̃ wú da fɩraa nũmǝ̃nãsǝri.

17 Dũnnũẁ sáa tĩɛ̃ wù bíɛ́w wà wú juo hã cuu cwaaba nǝ̃ yuɔrɔm'n sǝ, nǝ̃ wù tĩ́ɛ̃lã́-yǝ wà wu ji ta wùú nã-i ǹ-kor-ba.

18 Gùú tii nǝ̃n hũɔ̃ Dũnnũ Bíɛ́'n cɔ̃mmã bà sɩga yugu gɩ̀ tiiw nǝ̃ cɔ̃m, nǝ̃ wùú nǝ̃n ba wù sáa hũɔ̃-mã, Dũnnũ sugollɩ̀ blǝ́rá-yǝ.

Hamã nã-ì?

Nã̀ã da wù sáa hũɔ̃ Dũnnũ kadiin cɔ̃mmã.

19 Dũnnũ sugollɩ̀ blǝ́rá-ba tam hamã-i?

Wùú mãã gbɩgbaamã, Dũnnũẁ tĩ́ɛ̃lã́ wú jo cuuw nã, nǝ̃ cwaa'n gaaciegà mãã gà blárá, bá ya dudũũmã́ dwal bà nã ǹ-ɲǝ̃ǝ̃ gbɩgbaamã.

20 Curow mãã wù ce diibɩblaari, gbɩgbaamã̀ sǝ̃n dwal wù nã, wù sǝ̃n jãn gbɩgbaamã nã ǹ-da, wù sǝ̃n caa wù cɔ̃mbɩblammã́ curuɔ,

21 nǝ̃ wùú mãã wù wáà ǹ-vaa nǝ̃ sulammã, wù jãn gbɩgbaamã nã, ǹ-da ǹ-pɩgaa wà wù gaafɩnfiɛga hlǝ́rá Dũnnũ nã-i.»

Yuhanãẁ nǝ̃nǝ̃ǝ̃ wù hã Yesuw

22 Dɩ̀-lǝ dɩ̀ furũũgɩ nã, Yesuẃ kã nǝ̃ wù duunãtaaba wà bá kãã ce bãndaɲã Suude yiɛgu.

Wù gáa kã, wú kãã ba wù ɲĩɛ̃ cwaaba gɩ̀ sùɔ́gɩ nã.

23 Yuhanã yo, wú ba gɩ̀ dǝ'n yiɛ nã, ǹ-ba wù ɲĩɛ̃.

Bà be gɩ̀ sùɔ́gu wà Enɔ̃.

Gɩ́ nàa Salimǝ̃gu tuɔra.

Hũmmã̀ yáá dàa piyɛ̃ gɩ̀ sùɔ́gɩ nã, gùú cíé Yuhanãẃ kã ǹ-ga ba wù ɲĩɛ̃ cwaabaa nǝ̃n yáá bà jo wù nãã.

24 Gɩ̀-lǝ gɩ̀ bǝ̃ǝ̃gu, bà sáá bàa hi ǹ-dii-yǝ kasoduugɩ nã yugo.

25 Yuudagǝ, wù duunãtaadaabá ba bà fa bà ɲĩɛ̃ nã nǝ̃ Yahudya biɛdiɛ wà curow mãã wù saa wú per wù hla nã gùú tammãã mãã ǹ-vaa nǝ̃ Yahudyaba Dũnnũ hlũũgu.

26 Bá kã ǹ-ga waa nǝ̃ Yuhanãw wà: «Kaltii, yíǹ wáalá gùú biɛ'n cɔ̃mmã nǝ̃ hãmĩĩ; ɲi yáá ɲì min nǝ̃ wùú mãã Surdɛ̃ huɔlɩmmã nã, wù dúú nã ǹ-ba wù ɲĩɛ̃ cwaaba, bà min bà kã wùú nãã-i.»

27 Yuhanãẃ waa nǝ̃-ba wà: «Dũnnũw-ń ba wù sáa hã-n nǝ̃ gùú mãã, ǹ síì gbǝ̃ǝ̃ ǹ-da-gǝ.

28 Ɲimãã nǝ̃ ɲì hla, ɲi nṹɔ̃́ mǝ̃̀ nũɔ̃nãcãwandi, mǝ̃̀ wáalá wà Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo, wùú sǝ mã́ã̀, nǝ̃ wù tĩ́ɛ̃lã́ mǝ̃n jo wù yiganã dɩn-i.»

29 Wù gáa waa dɩ̀-lǝ, wú taa cãwaadũũm mã́ã̀ nǝ̃-ba wà: «Ɲi-ń kã cataagǝgu, ciɛnĩĩw, blanĩĩ'n yo-i.

Nǝ̃ blanĩĩ'n jamblaẁ jiraa wù jamblaw tuɔra ǹ-ba wù nɔ̃ wù cãwandi.

Wu-ń nɔ̃ wù yallɩ nã, gɩ́ dwal wù nã dugɔ.

Mǝ̃n dudwalɩmmã́ nǝ̃ nnĩĩ-i, mã̀ jállíɛ gbɩla.

30 Gɩ̀ saa kuugɩ́ ba gɩ̀ jãn wù nã gɩ̀ piɛ nã, nǝ̃ kuugɩ́ ba gɩ̀ hlǝ mǝ̃n nã.

31 «Wùú mãã wù hlǝ́rá drɔgu ǹ-jo, wɩ̀-i cwaaba min yuugɩ nã.

Wùú mãã wu-ń huu cuuw nã níɛ́, wù ba cuu yo-i, wù ba wù waa cuu ɲin'n cɔ̃m-i.

Sulammã nã, wùú mãã wù hlǝ́rá Dũnnũ suɔgu ǹ-jo, wɩ̀-i cwaaba min yuugɩ nã.

32 Wù díɛ́ mã̀ã́ mãã, nã̀ã nɔ̃ mã̀ã́, wù waa mã̀-i, nǝ̃ curo'n sáa hũɔ̃ wù cãwandi.

33 Wùú nǝ̃n hũɔ̃ wù cãwandi, gɩ̀ tiiẁ pɩgaa wà wu ne wà Dũnnũw sṹɔ̃lã́.

34 Dũnnũẁ tĩ́ɛ̃lã́ wùú mãã wú jo, wù díilá wù Yuflǝẁ wù nã ǹ-car, wù waa Dũnnũ cɔ̃m-i.

35 Biɛnĩĩ cɔ̃mmã̀ dwal Tiiyǝw nã, gùú cíé Tiiyǝẃ dii cɔ̃mmã min wù nãkruɔgɩ nã.

36 Wùú nǝ̃n hũɔ̃ biɛnĩĩ'n cɔ̃mmã, gɩ̀ tiiẁ díɛ́ fɩraa nũmǝ̃nãsǝri, nǝ̃ wùú nǝ̃n ba wù sáa hũɔ̃-mã-lǝ, wù síì da nũmǝ̃nãsǝ díɛ̀, nǝ̃ Dũnnũ hyadũũ yo, gɩ̀ ba dìɛ wù nã-i.»