Yuhanãw 4

Yesuẁ cirǝ̃ǝ̃ hũmmã nã Samari yiɛntacijalw saa

Yesuẁ gáa fǝ̃ǝ̃ wà ba kã́ã́ ǹ-ga waa nǝ̃ Farisĩɛ̃ba, wà wù-lǝ wu da cwaaba wù ɲĩɛ̃, bá ba wù duunãtaaba wù ɲǝ̃ǝ̃ Yuhanãw,

2-3 wú suro Suude yiɛgu ǹ-ver ǹ-ba wù maar Galile yiɛgu.

Nǝ̃ wù-lǝ wù sáá wù ɲĩɛ̃ cwaaba nǝ̃ wù hla yo, wù duunãtaa yáá bà ɲĩɛ̃-ba.

4 Wù gáa ba wù maar Galile yiɛgu, wù yáá wù saa wú ta ǹ-hlǝ yiɛdagǝ nã, nã̀ã fǝ̃ǝ̃ ǹ-jãn Galile yiɛgu, bà be gɩ̀ yiɛgu wà Samari yiɛ.

5 Wù gáa jãn Samari yiɛgu, wú kãã hi lǝdarǝ bà be-dǝ Siikar lǝ.

Fufodii, Yisefuẁ yáá wùu tuu wù tǝ Yakuba fugaguu mãã nǝ̃ sùɔ́gu, lǝ díɛ́dɩ́ nàa gùú fugagu tuɔra-i.

6 Yakuba hũnfuugɩ̀ yáá dàa gɩ̀ sùɔ́gɩ nã.

Yesuẁ gáa wáà ǹ-ywar nnĩĩ nã, wú jiraa hũnfuu gúɔ̀ nũɔ̃gɩ nã ǹ-ba wù fiisa.

Bǝ̃ǝ̃gɩ̀ yáá gùu sũɔ̃l ǹ-tã.

7 Samari yiɛntacijaldiɛ jo wù ji hu hũmmã.

Yesuẃ waa nǝ̃-yǝ wà: «Ǹ síì hã-m nǝ̃ hũmdamã mǝ̃́ ɲũɔ̃-ì?»

8 (Nǝ̃ gɩ̀-lǝ gɩ̀ bǝ̃ǝ̃gu, wù duunãtaabà yáá bàa ta lǝ'n kusuugɩ nã bà ga sǝ̃ǝ̃ wuuri.)

9 Cijalẃ waa nǝ̃ Yesuw wà: «Gɩ̀ ba danii Yahudya bíɛ́ yíǹ juo ba ǹ cirǝ̃ǝ̃ hũmmã nã Samari yiɛntacijal mã́ã saa?»

(Sulammã nã, Yahudyaba nǝ̃ Samari yiɛntaabà sáá bà kuganãã bà ɲĩɛ̃ nã cɔ̃m nã.)

10 Yesuẃ waa wà: «N nã́ã̀ ba nã̀ã fǝ̃ǝ̃ Dũnnũw mãã wù caa wú hã-n nǝ̃ gùú mãã, nã̀ã ver ǹ-fǝ̃ǝ̃ wùú mãã wù cirǝ̃ǝ̃ hũmmã nã ǹ saa, yíi nã́ã̀ nã̀ã ver ǹ-cirǝ̃ǝ̃ mã̀ nã wù saa, nǝ̃ wú hã-n nǝ̃ nũmǝ̃nãsǝ'n hũmmã.»

11 Cijalẃ waa wà: «Yitii, hũnfuu gúɔ́gɩ̀ mãã gùu nu gùú tammãã mãã nnĩĩ nã, nǝ̃ hũnnǝ̃ǝ̃kuu yo gɩ̀ sǝ ǹ saa, yíǹ ga hlǝ nǝ̃ gɩ̀-lǝ gɩ̀ nũmǝ̃nãsǝ'n hũmmã nã haa-ì?

12 Yì tǝvũnvũɔ̃ Yakuba hlã-yáà nǝ̃ hũnfuu gúɔ̀, wùú nǝ̃ wù hla wù ɲṹɔ̃lã́ gɩ̀ hũmmã, wù tãnkuuraa yo bá suro ǹ-ɲũɔ̃-mã ǹ-ga ta ǹ-ga hlǝ bà kwasǝnɲinɲã min nã.

Yíǹ ne wà n buɔ Yakubaw nã-ì?»

13 Yesuẃ siɛ-yǝ wà: «Wùú nǝ̃n ɲũɔ̃ hũm mã́ã̀, hũnɲũɔ̃sǝrɩ ji ver ǹ-blǝ-yǝ ǹ-tu,

14 nǝ̃ mǝ̃n hã gùú tii mãã nǝ̃ mǝ̃̀ hũmmã wú ɲũɔ̃, mã̀ ga ce hũnfuugu gɩ̀ tii'n kusuugɩ nã, nǝ̃ fɩraa nũmǝ̃nãsǝ yo, dɩ̀ ga ba dɩ̀ hlǝ gɩ̀ hũnfuugɩ nã.

Gɩ̀-lǝ gɩ̀ nã, hũnɲũɔ̃sǝrɩ̀ síì gbǝ̃ǝ̃ ǹ-blǝ gɩ̀ tiiw ǹ-da.»

15 Cijalẃ waa nǝ̃-yǝ wà: «Yitii, hã-m nǝ̃ hũm mã́ã̀, hũnɲũɔ̃sǝrɩ báa ji da ǹ-blǝ-m hlo, nǝ̃ mǝ̃ báa ga ver ǹ-jo níɛ́ nã hlo, wà mǝ̃ jo mǝ̃̀ ji hu hũm-i.»

16 Yesuẃ waa wà: «Kã n ga be ǹ blaẁ ɲí jo.»

17 Cijalẃ waa wà: «Blanĩĩ'n sǝ mǝ̃̀ saa.»

Yesuẃ waa wà: «Ǹ wáalá sulam-i;

18 ǹ járrá nǝ̃ bibyanããba ndii ǹ-ta ǹ-tã.

Nǝ̃ ǹ mãã dìɛ nǝ̃ wùú mãã kuɔkuɔgu, ǹ bla sǝ.

Ǹ sáa bǝr kwasǝri.»

19 Wù gáa waa dɩ̀-lǝ, cijalẃ waa wà: «Yitii, mǝ̃n díɛ́-n gùú tammãã mãã, Dũnnũ tanhiil-i nǝ̃-n.»

20 Nã̀ã waa wà: «Ya mǝ̃́ yugu-n nǝ̃ cɔ̃mmã dɩn: Samari vũnvãnããbà sórrá ǹ-bũũ Dũnnũw tãnũũ gúɔ́ nã-i, nǝ̃ Yahudya ɲimãã wa Dũnnũ bũũsuɔgɩ nàa Serusalɛm-i.

Haba dǝl dwállà-ba?»

21 Yesuẃ siɛ-yǝ wà: «Cijal yíí, hũɔ̃ mǝ̃̀ cɔ̃mmã: yuugɩ́ nàa yuu nã, ɲi síì ba ɲì bũũ Tiiyǝw tãnũũ gúɔ́ nã, ɲi síì ba ɲì bũũ-yǝ Serusalɛm yo.

22 Samari yiɛntaa ɲimãã, ɲi mãã ɲì bũũ wùú mãã, ɲi sǝ̃n fǝ̃ǝ̃-yǝ, nǝ̃ Yahudya hãmĩĩ-lǝ, korɩmmã̀ hlǝ hãmĩĩ nãã-i, gùú cíé yí ba yì fǝ̃ǝ̃ yi mãã yì bũũ wùú mãã.

23 Yuudaagɩ́ nàa gɩ̀ jo, gɩ̀ yuugɩ̀ híí yo sã.

Bàá mãã bà bũũ yì Tiiyǝw huhorɩmmã nã, wù Yuflǝẁ ji ce bá ba bà bũũ-yǝ sulammã nã nã́ã́ wù mãã gùú tammã.

Yì Tiiyǝẁ caa bá ba bà bũũ-yǝ nnĩĩ-i.

24 Dũnnũw, curo'n sǝ̃n da-yǝ nǝ̃ wù yisɩri.

Bàá mãã bà bũũ-yǝ, wù Yuflǝẁ saa wú ce bá ba bà bũũ-yǝ sulammã nã nã́ã́ wù mãã gùú tammã.»

25 Cijalẃ waa wà: «Mǝ̃̀ fǝ̃́ǝ̃lã́ mǝ̃́ wa Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo, wà wu ga jo, wù-lǝ wɩ̀-i Kɩrsaw.

Wu-ń jo, wù ji waa dɩ̀ yigagɩ min ǹ-ja yì min.»

26 Yesuẃ siɛ-yǝ wà: «Ǹ mãã ǹ waa gùú tii'n cɔ̃mmãã mãã, wù-lǝ wùú wáalà cɔ̃mmã nǝ̃-n nnĩĩ.»

27 Wù bla wù waa dɩ̀-lǝ gùú bǝ̃ǝ̃gu, wù duunãtaaba juo ba bà hiraa.

Bà gáa juo da wù waa cɔ̃mmã nǝ̃ cijalw, dɩ́ tugulǝǝ bà nã, nǝ̃ curo'n sáa siɛ ǹ-yugu-yǝ wà: «Bii cíé ń ba ǹ waa cɔ̃mmã nǝ̃ cijal wáà?

Ǹ wa wú ce bii ǹ-hã-n?»

28 Cijalẃ ya wù gbãmũɔ̃gɩ́ ba, nã̀ã gbãl ǹ-kã lǝ'n kusuugɩ nã ǹ-ga ba wù waa nǝ̃ cwaaba wà:

29 «Jówà yí kã ɲi ga ne, mǝ̃n sórrá ǹ-ce mã̀ã́ mãã ǹ-ta, mã̀ min, biɛdiɛ wáalá-mã nǝ̃-m.

Gɩ́ nǝ̃ nã́ã́ Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo, wùú júó.»

30 Wù gáa waa nnĩĩ nã, cwaabà fǝ̃ǝ̃ ǹ-hlǝ lǝ'n kusuugɩ nã ǹ-kã Yesuw nãã.

31 Yàá gɩ̀-lǝ gɩ̀ bǝ̃ǝ̃gu, Yesu duunãtaabà yáá bà cirǝ̃ǝ̃ wù nã wà wú ce kukuɔya nã̀ã wuu wuuri.

32 Nǝ̃ wú fǝ̃ǝ̃ ǹ-waa nǝ̃-ba wà: «Mǝ̃́ nǝ̃ wuurdarǝ mǝ̃̀ wuu-dǝ, dìí mãã ɲimãã sǝ̃n fǝ̃ǝ̃-dǝ.»

33 Duunãtaabá ba bà yugu bà ɲĩɛ̃ wà: «Gɩ báa ce nã́ã́ curodiɛ júó nǝ̃ wuuri ǹ-ji hã-yǝ-ì?»

34 Yesuẃ siɛ-ba wà: «Wùú nǝ̃n tĩ́ɛ̃lã́-m, mǝ̃-ń ba mǝ̃̀ nɔ̃ mǝ̃̀ hã-yǝ, nã̀ã ba mǝ̃̀ ce wù kusunã cɔ̃mmã, mǝ̃̀ wuurɩ-i nĩĩgu.

35 Ɲi sǝ ɲi-ń ce ɲí ba ɲì waa wà nǝ̃-n dũũ dũmmã mã́ ce hyarsǝrɩ nnǝ̃ǝ̃-i, nǝ̃ bá fǝ̃ǝ̃ tɩgii mã-ì?

Yáalà mǝ̃́ tu nǝ̃-ɲã́ã̀, mǝ̃́garà ɲí ne dũmmã huhorɩmmã nã, mã̀ vã́nã́ã, nã̀ã ba mã̀ã hi tɩgim yo mã̀ nã.

36 Wùú nǝ̃n bǝ́rrá dũmmã wù díɛ́ wù fuflɔ̃rũɔ̃'n solli ǹ-tã.

Dũmmã-i cwaaba.

Gɩ̀ tii tɩgii cwaa báàbá da ǹ-da fɩraa nũmǝ̃nãsǝri.

Gɩ̀-lǝ gɩ̀ tammã, wùú mãã wù dṹũlã́ dũmmã, nǝ̃ wùú nǝ̃n tɩ́gɩrǝ́-mã, bà dudwalɩmmã̀ ba sùɔ́gɩ dɩn-i.

37 Nǝ̃-ń da bà waa wà: “Wudiɛẁ dṹũlã́ dũmmã, nǝ̃ wudiɛẁ tɩgii-mã”, bà sáa bǝr kwasǝri.

38 Ɲi sáa da, mǝ̃̀ tĩ́ɛ̃lã́ ɲí kãã ba ɲì tɩgii gùú dũmmãã mãã, ɲi sáa kɔ̃-mã.

Badaabaa kṹɔ̃́-mã ǹ-ywar nǝ̃ ɲimãã kãã ba ɲì tɩgii-mã.»

39 Cijalẁ túú nǝ̃ cwaaba wà wu sórrá ǹ-ce gàá mãã gà min, Yesuw wáalá-ga nǝ̃-yǝ, Samari yiɛntaacindɩ́ hũɔ̃ Yesu cɔ̃mmã lǝ díɛ́ nã.

40 Gɩ̀-i, bà gáa juo da-yǝ, bá cirǝ̃ǝ̃ wù nã wà wu jiraa nǝ̃-ba.

Yesuẃ jiraa nǝ̃-ba ǹ-ce bãnɲã hǝ̃ǝ̃l,

41 ǹ-waa cɔ̃mmã nǝ̃-ba nǝ̃ wù hla.

Wù cíé dɩ̀-lǝ cocindɩ́ ver ǹ-hũɔ̃ wù cɔ̃mmã ǹ-pya nã.

42 Nã̀ã fǝ̃ǝ̃ ǹ-ba bà waa nǝ̃ cijalw wà: «Gɩ̀ sáa ce nã́ã́ yíi cãwanĩɛ̃ dɩn cíé yí hũɔ̃ wù cɔ̃mmã, nǝ̃ yi mãã yì júó ǹ-ji nɔ̃ wùú nǝ̃ wù hla nũɔ̃nãcãwanĩɛ̃ga, gɩ̀-lǝ gùú cíé yí fǝ̃ǝ̃ dɩ́ kaalaa wà wɩ̀-i cuu Kortiiw.»

Yesuẁ suro cogǝ̃ngãdiɛ bíɛ́w

43 Yesuẁ cíé bãnɲã hǝ̃ǝ̃l-i Siikar lǝri, nã̀ã suro, wà wu car nǝ̃ wù hlũũguu ǹ-ba wù maar Galile yiɛgu.

44 Nã̀ã da wùú nǝ̃ wù hla wùú wáalá-dǝ wà: «Bà sǝ̃n bũũ Dũnnũ tanhiilw wù hla'n yiɛgu.»

45 Galile yiɛntaa yo, bà yáá bàa kã Serusalɛmgu bà ga ce Ta-n-maa paaruugu, Yesuẁ yáá wùu ce gàá mãã gà min paaruu gúɔ́ nã, bá da-ga.

Gɩ̀-i, wù gáa kã Galile yiɛgu, bá mǝ̃gaa ǹ-blǝ-yǝ.

46 Yesuẃ hiirǝǝ Kanã lǝrɩ-i, Galile yiɛgu, wù yáá wùu cin hũmmã́ ba ɛrsɛ̃ kwãmmã gùú sùɔ́gɩ-i.

Yàá fãngãtiidiɛ yáá dàa, wù bíɛ́ẁ jaa Kapɛrnã lǝri.

47 Wù gáa nɔ̃ wà Yesuw hlǝ́rá Suude yiɛgu ǹ-jo Galile yiɛgu, wú kã wù nãã ǹ-kãã ba wù jiɛriɛ nǝ̃-yǝ wà wu ce kukuɔya nã̀ã kã bá hɩr ǹ-kã Kapɛrnã lǝri, ǹ-ga suro wù bíɛ́w ǹ-hã-yǝ, wà wú nàa wù ku wù hũɔ̃ nũgɔ.

48 Yesuẃ waa wà: «Mǝ̃-ń ba mǝ̃̀ sáa ce cɔ̃mdamã ǹ-pɩgaa-ɲã́ã̀ yindagǝ nã ǹ-ce cɔ̃ntugulǝmmã, ɲi sǝ̃n hũɔ̃ mǝ̃̀ cɔ̃mmã!»

49 Biɛẃ waa wà: «Yitii, kukuɔya báa yiilǝǝ.

Nǝ̃-ń yiilǝǝ, mǝ̃̀ bíɛ́ẁ ga ku.»

50 Yesuẃ waa nǝ̃-yǝ wà: «Ver ń kũũ, ǹ bíɛ́ẁ ga suro.»

Biɛẃ hũɔ̃ Yesu cãwanĩɛ̃ga, nã̀ã ver ǹ-ba wù kũũ.

51 Wù gáa hi sɔhlaadagǝ nã, wú jal nǝ̃ wù mããcieraaba, bà duu wù nã.

Bá waa nǝ̃-yǝ wà wù bíɛ́ẁ búɔlá wà ba yáá bà kã bà ga waa mã̀-i nǝ̃-yǝ.

52 Wú yugu-ba wà: «Gɩ̀ búɔlá wù nã bii bǝ̃ǝ̃-i?»

Bá siɛ-yǝ wà: «Wù hlɔmmã̀ hlǝ́rá wù nã daabǝ̃ǝ̃'n bǝciigǝ-i.»

53 Tiiyǝẃ paa ǹ-ne ǹ-da gùu vaa nǝ̃ gùú bǝ̃ǝ̃guu mãã Yesuẁ yáá wùu waa nǝ̃-yǝ wà wù bíɛ́w ga suro.

Dɩ̀ cíé nnĩĩ nã, biɛ wáà nǝ̃ wù suɔntaaba min bá paa ǹ-hũɔ̃ Yesu cɔ̃mmã.

54 Yesuẁ hlǝ́rá Suude yiɛgu ǹ-ver ǹ-kã Galile yiɛgu, wù cíé dɩ̀-i dɩ́ ba wù cɔ̃mmã hǝ̃ǝ̃lnãw ǹ-pɩgaa gɩ̀ sùɔ́gɩ nã.