Yuhanãw 5

Yesuẁ buɔ hlɔnĩĩdiɛ

Dɩ̀-lǝ dɩ̀ furũũgɩ nã, Yahudyabá ba bà ce bà paaruudagǝ Serusalɛmgu.

Yesu yo, wú kã paaruu gúɔ́ nã.

2 Serusalɛm lǝ'n wanjãnɩmdaamã̀ yáá dàa bà be-mã wà tũmãm'n dũndɔ̃l.

Dũndɔ̃l díɛ́ tuɔra, bà yáá bàa mǝ̃gaa hũm'n sùɔ́dagǝ, nã̀ã ce huɔnɲã ndii mã̀ nũɔ̃gɩ nã, bà be gɩ̀ sùɔ́gu Hebru tammã nã wà Bɛtɩsata.

3-4 [Mɛlɛgɛdiɛ yáá wu-ń ce wú juo saaraa hũm mã́ã́ nã.

Wù mãã wu-ń saaraa mã̀ nã nnĩĩ nã, nǝ̃ gùú hlɔnĩĩẃ gbǝ̃ǝ̃ ǹ-jãn mã̀ nã dĩɛ̃lãmmã nã, wù hlɔmmã-ń ba danii danii yo, wù paa ǹ-buɔ gbɩla-i.]

Gùú yáá gùu ce, hlɔnããcindɩ́ kã ǹ-ga ba dàa mǝ̃rãmmã nã huɔn ɲã́ã̀ nã [bà cii hũm'n saarammã.]

Yɩrnǝ̃ǝ̃ba, kasarnãba, wuulaa yo bà yáá dàa bà sǝ̃ǝ̃nã.

5 Hlɔnĩĩdiɛ yáá dàa bà sǝ̃ǝ̃nã, wù dúrúu hlɔmmã nã wù bii gur nǝ̃ nũɔ̃sɔ̃ nǝ̃ nɩrsiɛlnãẁ yáá blɩ díɛ́ nã.

6 Yesuẁ gáa kãã da wùu mǝ̃rǝ̃ǝ̃ nnĩĩ nã, nã̀ã ba yà fǝ̃ǝ̃ wà wu hǝ̃́ǝ̃sǝ́ hlɔmmã nã, wú yugu-yǝ wà: «Ǹ caa ń suro kwelle-ì?»

7 Hlɔnĩĩẃ siɛ-yǝ wà: «Yitii, hũmmã-ń ba mã̀ saaraa, mǝ̃̀ síì da curoẃ dii-m.

Mǝ̃n wa mǝ̃ ji jãn gùú bǝ̃ǝ̃gu, ǹ-da wudiɛ yà ta ǹ-jãn mǝ̃n yiga nã-i.

Mǝ̃̀ ji ce-dǝ danii?»

8 Yesuẃ waa nǝ̃-yǝ wà: «Suro ń tuu ǹ cĩĩnũũgu ń maar.»

9 Gùú sùɔ́gɩ dɩngu dàa, biɛẃ paa ǹ-buɔ.

Wú suro ǹ-tuu wù cĩĩnũũgu ǹ-ba wù wáà.

Yàá yuu gúɔ̀ yáá gùu vaa nǝ̃ Yahudyaba fiisaa'n yuu-i.

10 Yahudyaba yuntaabà díɛ́ wùu tuu cĩĩnũũgu nnĩĩ nã, bá ba bà waa nǝ̃-yǝ wà: «Ǹ sáa fǝ̃ǝ̃ wà jimããgu fiisaa'n yuu-ì?

Gɩ̀ sáa saa curoẃ tuu cĩĩnũũgu ǹ-ba wù wáà wù ta jimããgu.»

11 Biɛẃ waa nǝ̃-ba wà: «Wùú nǝ̃n sórrá-m wùú wáalá wà mǝ̃́ tuu mǝ̃̀ cĩĩnũũgu ǹ-maar.»

12 Bá fǝ̃ǝ̃ ǹ-yugu-yǝ wà: «Halǝmblǝ wáalá ń tuu cĩĩnũũgu fiisaa'n yuugu?»

13 Nǝ̃ biɛẁ sáá yà fǝ̃ǝ̃ gùú tii nǝ̃n cíé wú buɔ.

Cocindɩ̀ mãã dɩ̀ yáá dàa gɩ̀ sùɔ́gɩ nã, Yesuẃ vaalaa bà sǝ̃ǝ̃nã.

14 Gɩ̀ furũũgɩ nã, Yesuẃ juo da biɛw Dũnnũ bũũsuɔgɩ nã.

Wú waa nǝ̃-yǝ wà: «Ne ǹ jáa buɔ ǹ-ba kwelle!

Nǝ̃-ń ba ǹ sǝ̃n caa dɩdaarɩ́ hi-n ǹ-maa díɛ́di, báa ce diicĩɛ̃rǝdi hlo.»

15 Biɛẃ kã ǹ-kãã waa nǝ̃ Yahudyaba yuntaaba wà Yesu sórrá-yǝ wù hlɔmmã nã.

16 Yahudyaba yuntaabá suro gɩ̀-lǝ gùú nã-i ǹ-ba bà cuɔl Yesuw, wà wu bla danii nã̀ã suro hlɔnĩĩw fiisaa'n yuugu.

17 Yesuẃ waa nǝ̃-ba wà: «Mǝ̃̀ Tǝẁ ce mããcemmã bǝ̃ǝ̃ wo bǝ̃ǝ̃, mã́ã yo, mǝ̃́ nìɛ mããcemmã nã.»

18 Wù gáa waa dɩ̀-lǝ, Yahudyaba yuntaabá juo huulaa bà hiɛga nã, ǹ-ba bà ne wà ba nã́ã̀ da bá ko-yǝ, wà wu sáa bũũ fiisaa'n yuugu nã̀ã ver ǹ-waa wà Dũnnũ yo, wù hla'n Tǝ-i, wà gɩ̀-lǝ gɩ̀ tammã, wu kã bá vaa nǝ̃ Dũnnũ-i.

19 Gɩ̀ sùɔ́gɩ nã do, Yesuẃ waa nǝ̃-ba wà: «Yáalà mǝ̃́ waa sulammã nǝ̃-ɲã́ã̀: Biɛnĩĩẁ síì gbǝ̃ǝ̃ ǹ-ce cɔ̃m nǝ̃ wù hla.

Wù ne Tiiyǝ wɩ̀-i nã̀ã ba wù ce.

Tiiyǝw mãã wù ce gàá mãã, Biɛnĩĩ yo wù ce gà-i.

20 Biɛnĩĩ'n cɔ̃mmã̀ mãã mã̀ dwal Tiiyǝw nã, gùú cíé wú ba wù pɩgaa-yǝ nǝ̃ wù mããcemmã min.

Wù ji pɩgaa-yǝ nǝ̃ gadaga, gàá mãã gàa maa gáága gá da ǹ-tugulǝǝ ɲì nã.

21 Tiiyǝẁ mãã wù pĩĩ cugutaaba gùú tammãã mãã wù hã-ba nǝ̃ nũmǝ̃nãsǝri, Biɛnĩĩw-ń ba wù caa wú hã gùú tii mãã nǝ̃ nũmǝ̃nãsǝri, wù hã-yǝ nǝ̃-dǝ nnĩĩ-i.

22 Nǝ̃ Tiiyǝẁ sǝ̃n jar curo'n sugol, wù nǝ̃nǝ̃ǝ̃ sugojaryuugɩ nã ǹ-hã Biɛnĩĩ wɩ̀-i,

23 cwaaba da ǹ-ba bà bũũ-yǝ, nã́ã́ bà mãã bà bũũ Tiiyǝw gùú tammãã mãã.

Wùú mãã wu-ń ba wù sǝ̃n bũũ Biɛnĩĩw, gɩ̀ ba nã́ã́ gɩ̀ tiiẁ sǝ̃n bũũ Tiiyǝw mãã wù tĩ́ɛ̃lã́-yǝ-i.

24 Yáalà mǝ̃́ waa sulammã̀ nǝ̃-ɲã́ã̀: wùú nǝ̃n nɔ̃ mǝ̃̀ cãwandi, nã̀ã hũɔ̃ wùú mãã wù tĩ́ɛ̃lã́-m wù cɔ̃mmã, gɩ̀ tiiẁ díɛ́ fɩraa nũmǝ̃nãsǝri ǹ-tã.

Sugollɩ̀ sɩga blǝ gɩ̀ tiiw.

Gɩ́ nǝ̃ nã́ã́ gɩ̀ tiiẁ hlǝ́rá kúúgɩ nã ǹ-jãn fɩraa nũmǝ̃nãsǝrɩ nã ǹ-tã.

25 «Yáalà mǝ̃́ waa sulammã nǝ̃-ɲã́ã̀: bǝ̃ǝ̃daagɩ́ nàa gɩ̀ jo, Dũnnũ Bíɛ́ẁ ji waa cɔ̃mmã nǝ̃ bàá mãã fɩraa nũmǝ̃nãsǝ díɛ́dɩ́ sǝ bà nã, gɩ̀ bǝ̃ǝ̃gɩ̀ híí yo sa.

Wùú nǝ̃n nɔ̃ wù yalli, gɩ̀ tiiẁ ga ba nũmǝ̃nãw.

26 Nũmǝ̃nãsǝrɩ mãã Tiiyǝẁ saa gùú tammã, wú ba wù hã cwaaba nǝ̃-dǝ, wù hlã Biɛnĩĩẁ nǝ̃-dǝ nnĩĩ-i wú ba wù hã-ba.

27 Nã̀ã hã Biɛnĩĩw nǝ̃ hlũũgu wú ba wù jar sugolli, wà wɩ̀-i Curonbiɛw.

28 Bláá ya gà-lǝ gà min gá cu ɲì kusunɲã.

Sulammã nã, yuugɩ́ nàa yuu nã, Curonbiɛẁ ga waa cɔ̃mmã nǝ̃ bàá mãã bà jã́nnã́ hlɔ̃mmã nã ǹ-tã.

29 Wu-ń ga waa cɔ̃mmã nǝ̃-ba, bà ga hlǝ fuurunɲã nã.

Bàá nǝ̃n yáá bà ce mããfɩnfamma, Dũnnũẁ ga pĩĩ-ba, bá da nũmǝ̃nãsǝri, nǝ̃ bàá nǝ̃n yáá bà ce diibɩblaari, wú pĩĩ-ba, bá ba sugojaruugɩ nã.

30 «Mǝ̃n síì gbǝ̃ǝ̃ ǹ-ce cɔ̃m nǝ̃ mǝ̃̀ hla.

Dũnnũw-ń wa mǝ̃́ jar sugolli gùú tammã, mǝ̃̀ jar-dǝ nnĩĩ-i.

Nǝ̃ mǝ̃̀ sugojaruugɩ̀ sṹɔ̃lã́.

Hamã nã-ì?

Mǝ̃̀ sǝ̃n ce mǝ̃̀ kusunã cɔ̃m sǝ, nǝ̃ wùú nǝ̃n tĩ́ɛ̃lã́-m, mǝ̃̀ ce wùú mǝ̃gãm-i.

31 Gɩ nã́ã̀ ce nã́ã́ mã́ã dɩndɩn bla mǝ̃̀ waa mǝ̃̀ cɔ̃mmã, mǝ̃̀ cãwandɩ nã́ã̀ dɩ̀ sáa ba sulam.

32 Nǝ̃ wudiɛ nìɛ wù waa-mã, nǝ̃ mǝ̃̀ fǝ̃́ǝ̃lã́ mǝ̃ wa wù mãã wù waa dìí mãã mǝ̃̀ cɔ̃mmã nã, wà sulam-i.

33 Ɲimãã tĩ́ɛ̃lã́ cwaaba Yuhanãw nãã, wà bá kãã yugu mǝ̃̀ cɔ̃mmã.

Bà gáa kã, Yuhanãẁ wáalá sulam'n cɔ̃m-i nǝ̃-ba.

34 Wù wáalá dìí mãã nǝ̃-ba mǝ̃̀ cɔ̃mmã nã, dɩ̀ pɛ ɲimãã nã-i, dɩ̀ sǝ̃n pɛ mǝ̃n nã.

Mǝ̃n wáalá dɩ̀-lǝ Dũnnũẃ da ǹ-kor ɲimãã-i.

35 Yuhanãẁ yáá nã́ã́ lampa-i ɲì sǝ̃ǝ̃nã.

Ɲi hṹɔ̃lã́ wù gbɩgbaamã, mã́ dwal ɲì nã bãnɲã hǝ̃ǝ̃l dɩn-i.

36 Mǝ̃n cíé gàá mãã, gà máalá Yuhanãẁ wáalá gàá mãã mǝ̃̀ cɔ̃mmã nã.

Mǝ̃̀ Tǝẁ hlã-m nǝ̃ gùú mããcemmãã mãã, wà mǝ̃́ ce ǹ-faal-mã, mã̀-lǝ mã̀ã́ pɩ́garà mǝ̃̀ cɔ̃mmã, nã̀ã ba mã̀ pɩgaa wà mǝ̃̀ Tǝ tĩ́ɛ̃lã́-m.

37 Ǹ-pya dɩ̀-lǝ dɩ̀ nã, mǝ̃̀ Tǝw mãã wù tĩ́ɛ̃lã́-m, wù wáalá sulammã mǝ̃̀ cɔ̃mmã nã.

Nǝ̃ ɲimãã sáa hi ǹ-nɔ̃ wù yallɩ nã ǹ-da, ɲi sáa hi ǹ-da-yǝ nǝ̃ ɲì yinɲã ǹ-da.

38 Ɲi mãã ɲi sáa hũɔ̃ wù tĩɛ̃tii'n cɔ̃mmã, wù-lǝ wù cãwanĩɛ̃gà síì gbǝ̃ǝ̃ ǹ-ba ɲì hiɛga nã.

39 Ɲi fǝ̃́ǝ̃lã́ wà fɩraa nũmǝ̃nãsǝrɩ da Dũnnũ cãwan'n sɛbɛba nã-i, gùú cíé ɲí ba ɲì kugɔr-ba dugudugu nnĩĩ tammã.

Nã̀ã da gùú Dũnnũ cãwandii wáalà mǝ̃n cɔ̃mmã,

40 nǝ̃ ɲi ba ɲì sǝ̃n caa ɲí duu mǝ̃̀ nã, ǹ-da ǹ-da nũmǝ̃nãsǝ díɛ̀.

41 Mǝ̃n sǝ̃n caa cwaa'n buusammã.

42 Mǝ̃̀ fǝ̃́ǝ̃lã́-ɲã́ã̀, wà Dũnnũ cɔ̃mmã sǝ̃n dwal ɲì nã.

43 Mǝ̃̀ júó mǝ̃̀ Tǝ jol-i, nǝ̃ ɲi ba ɲì hla-m.

Nǝ̃ wudiɛw-ń jo wù hla'n jolli, ǹ-da ɲí suro ǹ-jǝ̃ǝ̃lǝ̃ǝ̃ ǹ-hũɔ̃ wù cɔ̃mmã nãkrɔnɲã hǝ̃ǝ̃l-i.

44 Ɲimãã, ɲi-ń ba ɲì caa ɲi ba ɲì bɩnǝ̃ǝ̃ ɲì ɲĩɛ̃ nã, nã̀ã ba ɲì sǝ̃n caa Dũnnũẃ bɩnǝ̃ǝ̃ ɲì nã, ɲi ji ce danii nã̀ã hũɔ̃ mǝ̃̀ cɔ̃mmã?

45 Bláá ne wà fíí mǝ̃n-lǝ mã́ã ga hã-ɲã́ã̀ nǝ̃ yuɔrɔmmã mǝ̃̀ Tǝw tuɔra, mã́ã sǝ.

Ɲi mãã ɲì piɛ ɲì nãkruɔgu gùú Musaw nã mãã, wù-lǝ wùú ga hã-ɲã́ã̀ nǝ̃ yuɔrɔmmã.

46 Musa yállá mã́ã cɔ̃mmã-i.

Gɩ nã́ã̀ ce nã́ã́ ɲi hṹɔ̃lã́ wù cɔ̃mmã, ɲi nã́ã̀ ɲĩ̀ĩ hũɔ̃ mã́ã yo mǝ̃̀ cɔ̃mmã.

47 Nǝ̃ ɲi mãã ɲì sáa hũɔ̃ wù yállá mã̀ã́ mãã, ɲi ji ce danii nã̀ã gbǝ̃ǝ̃ ǹ-hũɔ̃ mǝ̃̀ cãwandi?»