Yuhanãw 6

Yesuẁ hã cohuɔgu nǝ̃ wuuri, bá wuu ǹ-ye

(Mãtiyew 14.13-21 ; Markaw 6.30-44 ; Lukaw 9.10-17)

Gɩ̀ furũũgɩ nã, Yesuẃ huɔl Galile yiɛ'n lwaakɩnkandi mãã, bà be-mã wà Tɩberiyadɩ lǝ'n lwaakɩnkan.

2 Cohuɔdaagɩ̀ gáa da wù mãã wù ce gùú cɔ̃mmãã mãã mã̀ pɩgaa Dũnnũ fãngããgu, wù buɔ hlɔnããba nnĩĩ nã, bá ba bà duu wù nã.

3 Yesubá kãã jiraa tãmblɩdarǝ drɔ nǝ̃ wù duunãtaaba.

4 Gɩ̀-lǝ gɩ̀ bǝ̃ǝ̃gu, Yahudyabà paaruuguu mãã bà be-gǝ wà Ta-n-maa paaruu, gɩ̀ yáá gùu piɛ nã ǹ-tã.

5 Yesuẃ ne, ǹ-da cohuɔdaagɩ̀ jo wù nãã.

Wú yugu Filipɩw wà: «Yi ji gbǝ̃ǝ̃ ǹ-da wuuri haa-i, ǹ-sǝ̃ǝ̃ ǹ-hã cwaa báà min bá wuu?»

6 Wù yáá wùu fǝ̃ǝ̃ wù diicerǝdi, nǝ̃ wù yáá wùu wa wú dǝ̃ǝ̃ Filipɩw ǹ-fǝ̃ǝ̃ wù mãã wù ji waa dìí mãã.

7 Filipɩẃ waa nǝ̃-yǝ wà: «Halle nǝ̃-ń tuu curo'n hyarsǝ nɩrhǝ̃ǝ̃l mããcem'n jin-i yo, ǹ-sǝ̃ǝ̃ burw wà n buruɔ wù nã fiyãã fiyãã ǹ-hã-ba, bà min bà síì da.»

8 Wù duunãtii mãã Simɔ̃ Piɛr hǝ̃ǝ̃w bà be-yǝ Ãndre, wù-lǝ wú waa nǝ̃-yǝ wà:

9 «Burbiiga nìɛ pũmpɩrblɩdiɛ saa níɛ́ nã, ǹ-pya tɩtraaba hǝ̃ǝ̃lba nã.

Nǝ̃ ɲã̀ã́ mãã nnĩĩ, ɲã̀ ji pyar bii dugɔ-i cocin díɛ̀ dũlli saa?»

10 Yesuẃ waa nǝ̃-ba wà: «Cíyà bà min bá jarnãã.»

Sɔhlaa gúɔ̀ nã, hĩɛ̃gɩ̀ yáá dàa dugɔ.

Cwaabá jarnãã.

Bibyanããbaa nǝ̃n yáá dàa gɩ̀ sùɔ́gɩ nã, bàá dɩn, bà yáá bà ji hi cwa tonnũɔ̃sɔ̃ trãngwaahǝ̃ǝ̃l bà ndii (5 000)^a tuugu.

11 Yesuẃ tuu burbiiga ǹ-dũũ kwayaw Dũnnũw nã, nã̀ã buruɔ gà nã ǹ-hã-ba, nã̀ã fǝ̃ǝ̃ ǹ-hã-ba nǝ̃ tɩtraa yo gùú tammã dɩnmã-i, nã́ã́ bà yáá bà caa-ba nĩĩguu mãã.

12 Bà gáa wuu ǹ-ye ǹ-tã gùú bǝ̃ǝ̃guu mãã, wú waa nǝ̃ wù duunãtaaba wà: «Bíɛrìɛ wuur'n dɩgaliɛ nǝ̃n yanãã, kuu'n báa da ǹ-vaalaa.»

13 Bá biɛriɛ burbiiga ndii gáà dɩgaliɛw nã, ǹ-dii nugoyiin nũɔ̃sɔ̃ nǝ̃ ɲã̀ hǝ̃ǝ̃l.

14 Cwaabà gáa da Yesuẁ yà ce cɔ̃m mã́ã̀ ǹ-pɩgaa-ba, bá ba bà waa wà: «Dũnnũ tanhiilw nǝ̃n yáá wù saa wú jo cuuw nã, wùú júó nnĩĩ nã, sulammã nã.»

15 Yesuẃ fǝ̃ǝ̃ wà ba ga juo blǝ-yǝ fãngããgɩ nã ǹ-ce-yǝ yuuntiiw; wú ta ǹ-hal bà tuɔra ǹ-ver ǹ-kã nǝ̃ wù dɩn tãmblɩri drɔ.

Yesuẁ waa wù ta hũmmãã drɔ

(Mãtiyew 14.22-23 ; Markaw 6.45-52)

16 Bǝ̃ǝ̃gɩ̀ jáa blariɛ gùú bǝ̃ǝ̃gu, wù duunãtaabá hɩr ǹ-kã lwaakɩnkandɩ nã,

17 ǹ-kãã tuu viigǝdagǝ ǹ-ba bà huɔl bà kã Kapɛrnã lǝ'n yiɛgu.

Bǝ̃ǝ̃gɩ́ ga juo tã nǝ̃ Yesuẁ sáa hi ǹ-kã bà nãã yugo.

18 Salkaardiɛẃ juo suro ǹ-ba wù ce lwaakɩnkan'n hũmmã́ ba mã̀ mũũ.

19 Bà gáa wa ba ji sɔ̃ culoba ndii, culo nãndienẁ sùɔ́ wo sùɔ́, bá ne ǹ-da Yesuw bà tuɔra, wù wáà wù ta hũmmãã drɔ wù jo.

Gbǝrsǝrɩ́ paa ǹ-blǝ-ba.

20 Yesuẃ fǝ̃ǝ̃ ǹ-waa nǝ̃-ba wà: «Bláá ya gbǝrsǝrɩ́ blǝ-ɲã́ã̀, mǝ̃n-lǝ mã́ã-i nǝ̃ mǝ̃̀ hla!»

21 Bá wa ba jǝ̃ǝ̃lǝ̃ǝ̃ ǹ-tuu-yǝ, ǹ-paa ǹ-ne ǹ-da bàa hi bà kãl'n sùɔ́gɩ nã.

Wuurii mãã dɩ̀ hã cwaaba nǝ̃ nũmǝ̃nãsǝri

22 Bahɛrugɩ nã, wù duunãtaabà gáa ba bà maar viigǝgɩ dɩndɩn dɩn yáá dàa hũm'n nũɔ̃gɩ nã.

Bá tuu-gǝ ǹ-ta nǝ̃ Yesuẃ ba.

Gɩ̀ taakaalgu, cocindii nǝ̃n yáá dàa bɩmblaadaagɩ nã, bà sáa fǝ̃ǝ̃ Yesuw tíɛ́ gùú sùɔ́gu.

23 Nǝ̃ bá ne ǹ-da viindaɲã kwaagɩ nã, ɲã̀ã hlǝ Tɩberiyadɩ lǝri ǹ-jo ǹ-ji hiraa Yitiiẁ yáá wùu dũũ kwayaw Dũnnũw nã, nã̀ã hã-ba nǝ̃ burw gùú sùɔ́guu mãã, gɩ̀ tuɔra.

24 Bà mãã bà sáa da Yesuw nǝ̃ wù duunãtaaba, bá fǝ̃ǝ̃ ǹ-jãn viin ɲã́ã̀ nã, ǹ-ba bà huɔl bà kã Kapɛrnã lǝ'n yiɛgu bà ga caa-yǝ.

25 Bà gáa huɔl ǹ-kãã da-yǝ, bá yugu-yǝ wà: «Kaltii, ǹ júó bii bǝ̃ǝ̃-i níɛ́ nã?»

26 Yesuẃ siɛ-ba wà: «Yáalà mǝ̃́ waa sulammã nǝ̃-ɲã́ã̀: mǝ̃n cíé gùú cɔ̃mmãã mãã mã̀ pɩgaa Dũnnũ fãngããgu nnĩĩ, gɩ̀ sáa ce nã́ã́ ɲi fǝ̃́ǝ̃lã́ mã̀ yuugɩ-i, ɲí ba ɲã̀ caa-m dɛ, nǝ̃ mǝ̃n hlã-ɲã́ã̀ nǝ̃ wuuri ɲí wuu dɩ́ ywar-ɲã́ã̀, gùú cíé ɲí ba ɲì caa-m.

27 Bláá ba ɲì ce mããcemmã ɲì caa wuurii mãã dɩ̀ bǝ̃ǝ̃lǝ̃ǝ̃, nǝ̃ ɲi saa ɲí ba ɲì ce ɲì caa wuurii mãã dɩ̀ hǝ̃ǝ̃sǝ-i, nǝ̃-ń wuu-dǝ, ń da fɩraa nũmǝ̃nãsǝri.

Curonbiɛẁ hã cwaaba nǝ̃ dɩ̀-i.

Yì Tǝ Dũnnũw nǝ̃ wù hla wùú pɩ́garà wà wú hlã-yǝ nǝ̃ wù fãngããgu.»

28 Bá yugu-yǝ wà: «Gùú mããcemmãã mãã Dũnnũẁ caa yí ba yì ce-mã, yi saa yí ba yì ce-mã tam hamã-i?»

29 Yesuẃ siɛ-ba wà: «Dũnnũw mãã wù caa ɲí ba ɲì ce dìí mãã, dɩ̀-i ɲí hũɔ̃ wù tĩ́ɛ̃lã́ wùú mãã, wù cɔ̃mmã.»

30 Bá waa wà: «Ǹ ji ce cɔ̃m hamã-i ǹ-pɩgaa-yáà, yí da ǹ-hũɔ̃ ǹ cɔ̃mmã?

Ǹ ji ce hamã-i?

31 Yì tǝvũnvãnããbà yáá jerkwaarɩ nã, bà yáá bà da wuurii mãã dɩ̀ hlǝ drɔkuɔlɩ nã bà wuu ǹ-vaa nǝ̃ dɩ̀ yállá nĩĩgu mãã wà: “Wù cíé wuurɩ́ hlǝ drɔkuɔlɩ nã ǹ-hã bá wuu.”»

32 Yesuẃ waa nǝ̃-ba wà: «Yáalà mǝ̃́ waa sulammã nǝ̃-ɲã́ã̀: bláá ba ɲì ne wà fíí wuurii mãã dɩ̀ hlǝ́rá drɔkuɔlɩ nã Musaẁ hlã-ɲã́ã̀ nǝ̃-dǝ, Musa sǝ dɛ!

Mã́ã Tǝ hlã́ã̀-ɲã́ã̀ nǝ̃ wuurhuhordǝdii mãã dɩ̀ hlǝ́rá drɔkuɔlɩ nã.

33 Dũnnũw mãã wù hã yì min nǝ̃ gùú wuuri, dɩ̀-lǝ dìí hlǝ́rà drɔkuɔlɩ nã, nã̀ã ba dɩ̀ hã cuu cwaaba nǝ̃ nũmǝ̃nãsǝri.»

34 Wù gáa waa dɩ̀-lǝ, bá fǝ̃ǝ̃ ǹ-waa wà: «Yitii, ba ǹ hã-yáà nǝ̃ gùú wuurɩ-i yí ba yì wuu bǝ̃ǝ̃ wo bǝ̃ǝ̃.»

35 Yesuẃ waa nǝ̃-ba wà: «Mǝ̃n-lǝ mã́ã-i nũmǝ̃nãsǝ'n wuuri.

Gùú tii nǝ̃n jo mǝ̃̀ nãã, nũmmã̀ síì jaa-yǝ ǹ-da, nǝ̃ wùú nǝ̃n hũɔ̃ mǝ̃̀ cɔ̃mmã, hũnɲũɔ̃sǝrì síì blǝ-yǝ ǹ-da.

36 Mǝ̃̀ wáalá-dǝ nǝ̃-ɲã́ã̀ ǹ-ta ǹ-tã, wà ɲí díɛ́-m nǝ̃ ɲì yinɲã, nǝ̃ ɲi sáa hũɔ̃ mǝ̃̀ cɔ̃mmã.

37 Nǝ̃ mǝ̃̀ Tǝw-ń hã-m nǝ̃ bàá mãã bà min, bà ga jo mǝ̃̀ nãã.

Curow mãã wù jo mǝ̃̀ nãã, mǝ̃n síì hla-yǝ ǹ-da.

38 Hamã nã-i?

Mǝ̃n sáa hlǝ drɔkuɔlɩ nã ǹ-jo mǝ̃̀ ji ce mǝ̃̀ kusunã cɔ̃m sǝ, nǝ̃ wùú nǝ̃n tĩ́ɛ̃lã́-m, mǝ̃̀ júó mǝ̃̀ ji ce wù-lǝ wùú kusunã cɔ̃m-i.

39 Nǝ̃ wùú nǝ̃n tĩ́ɛ̃lã́-m, wù kusuu sǝ, wù hlã-m nǝ̃ bàá mãã, wù dɩnẃ vaalaa bà sǝ̃ǝ̃nã.

Wù caa cuu tãl'n yuugu, mǝ̃́ pĩĩ-ba.

40 Sulammã nã, mǝ̃̀ Tǝ kusuugɩ-i, bàá nǝ̃n ba bà ne wù bíɛ́w, nã̀ã hũɔ̃ wù cɔ̃mmã, bá da fɩraa nũmǝ̃nãsǝri, nǝ̃ mǝ̃́ pĩĩ-ba cuu tãl'n yuugu.»

41 Yesuẁ mãã wù wáalá wà wɩ̀-i nũmǝ̃nãsǝ'n wuurii mãã dɩ̀ hlǝ́rá drɔkuɔli nnĩĩ nã, Yahudyabá fǝ̃ǝ̃ ǹ-ba bà hugɔ̃nãã.

42 Bá ba bà waa wà: «Níyà!

Yisefu bíɛ́ Yesuw sǝ-ì?

Yi fǝ̃ǝ̃ wù tǝw, nã̀ã ba yì fǝ̃ǝ̃ wù ɲũ yo, nǝ̃ gɩ̀ ba danii wú juo ba wù waa nǝ̃-yáà wà wù-lǝ wu hlǝ́rá drɔkuɔl nã-i.»

43 Yesuẃ waa nǝ̃-ba wà: «Bláá ba ɲì hugɔ̃nãã nǝ̃ ɲì ɲĩɛ̃.

44 Curo'n síì gbǝ̃ǝ̃ ǹ-jo mǝ̃n nãã, nã́ã́ mǝ̃̀ Tǝẁ mãã wù tĩ́ɛ̃lã́-m, wùú sáa fa ǹ-jo nǝ̃ gɩ̀ tiiw.

Wùú nǝ̃n jo mǝ̃̀ nãã, cuu tãl'n yuugu, mǝ̃̀ ji pĩĩ gɩ̀ tiiw.

45 Dɩ̀ yállá Dũnnũ tanhiilaa'n sɛbɛba nã wà: “Dũnnũẁ ga kal bà min.”

Wùú nǝ̃n nɔ̃ mǝ̃̀ Tǝ cãwandi nã̀ã hũɔ̃ wú kal-yǝ, gɩ̀ tiiẁ ga jo mǝ̃̀ nãã.

46 Gɩ̀ sáa ce nã́ã́ curow díɛ́ mǝ̃̀ Tǝw ǹ-da-i!

Dìí sǝ.

Wùú nǝ̃n hlǝ́rá Dũnnũw nãã ǹ-jo, wùú díɛ́-yǝ nǝ̃ wù dɩn pe.

47 Yáalà mǝ̃́ waa sulammã nǝ̃-ɲã́ã̀: wùú nǝ̃n hũɔ̃ mǝ̃̀ cɔ̃mmã, gɩ̀ tiiẁ díɛ́ fɩraa nũmǝ̃nãsǝri.

48 Mǝ̃n-lǝ mã́ã-i nũmǝ̃nãsǝ'n wuuri.

49 Ɲì tǝvũnvãnããbà wúulá wuuri jerkwaarɩ nã fufodii, nǝ̃ bà kúrǝ́ǝ.

50 Nǝ̃ gùú wuurii mãã dɩ̀ hlǝ́rá drɔgu, wùú nǝ̃n wuu dɩ̀-lǝ, gɩ̀ tiiẁ síì ku.

51 Mǝ̃n-lǝ mã́ã-i nũmǝ̃nãsǝ'n wuurii mãã dɩ̀ hlǝ́rá drɔkuɔlɩ nã ǹ-jo.

Wùú nǝ̃n wuu-dǝ gɩ̀ tiiẁ ga da fɩraa nũmǝ̃nãsǝri.

Mǝ̃̀ mãã mǝ̃̀ ji hã cuu cwaaba nǝ̃ gùú wuurii mãã bá da ǹ-da nũmǝ̃nãsǝri, dɩ̀-i, mǝ̃n hla'n cãnkũɔ̃mã.»

52 Wù gáa waa dɩ̀-lǝ dɩ́ jãn Yahudyaba nã, bá ba bà fa bà ɲĩɛ̃ nã wà: «Biɛ wáà wa wu hã-yáà nǝ̃ wù kũɔ̃m-i yí ba yì wuu, wù hã-yáà nǝ̃-mã tam hamã-i?»

53 Yesuẃ fǝ̃ǝ̃ ǹ-waa nǝ̃-ba wà: «Yáalà mǝ̃́ waa sulammã nǝ̃-ɲã́ã̀: ɲi-ń ba ɲì sáa wuu Curonbiɛ kũɔ̃mã nã̀ã ɲũɔ̃ wù twammã, ɲi síì da nũmǝ̃nãsǝri.

54 Wùú nǝ̃n wuu mǝ̃̀ kũɔ̃mã, nã̀ã ɲũɔ̃ mǝ̃̀ twammã, wù ji da fɩraa nũmǝ̃nãsǝri.

Cuu tãl'n yuugu, mǝ̃̀ ga pĩĩ gɩ̀ tiiw, ǹ-hiil-yǝ kuugɩ nã.

55 Mã́ã cãnkũɔ̃mã-i wuurhuhordǝdi, nǝ̃ mǝ̃̀ twammã́ ba guuɲũɔ̃kuhuhorgǝgu.

56 Wùú nǝ̃n wuu mǝ̃̀ kũɔ̃mã, nã̀ã ɲũɔ̃ mǝ̃̀ twammã, gɩ̀ tiiẁ ɲǝ̃́gãrã́ mǝ̃̀ nã, nǝ̃ mã́ã yo, mǝ̃́ ɲǝ̃gãr gɩ̀ tiiw nã.

57 Mǝ̃̀ Tǝw mãã wù tĩ́ɛ̃lã́-m, nũmǝ̃nãsǝrɩ́ nǝ̃ wùú saa-i.

Wùú hlã mã́ã̀ nǝ̃ nũmǝ̃nãsǝ díɛ̀; gɩ̀-lǝ gɩ̀ nã, gùú tii nǝ̃n wuu mǝ̃̀ cãnkũɔ̃mã, mǝ̃̀ ji hã gɩ̀ tiiw nǝ̃ nũmǝ̃nãsǝ díɛ̀.

58 Wuurii mãã dɩ̀ hlǝ́rá drɔkuɔlɩ nã ǹ-jo, dɩ̀-i díɛ́.

Ɲì tǝvũnvãnããbà wúulá dìí mãã fufodii, nã̀ã kurǝǝ, dɩ̀ sǝ dìí tam sǝ.

Yíi nǝ̃n wuu wuur díɛ̀, ǹ ji da fɩraa nũmǝ̃nãsǝri.»

59 Yesuẁ kállá cwaaba nǝ̃ dɩ̀-i Kapɛrnã lǝri, Yahudyaba tɩgim'n duugɩ nã.

Yesu cãwan'n hũɔ̃mã̀ ca ca

60 Yesuẁ gáa waa-dǝ gɩ̀-lǝ gɩ̀ tammã, wù duunãtaacindɩ́ waa wà: «Cãwan díɛ́dɩ tuugɩ̀ gbǝ̃́ǝ̃lã́; halii ji gbǝ̃ǝ̃ ǹ-hũɔ̃-dǝ.»

61 Yesuẃ fǝ̃ǝ̃ wà wù duunãtaabá nàa bà hugɔ̃nãã, wú yugu-ba wà: «Cãwan díɛ̀ ji naa dɩ́ ce ɲí ver furũũ-ì?

62 Nǝ̃ ɲi-ń ji da Curonbiɛ yuguraa wù maar wù wanjiracũncurɔmmã nã, ɲi ji wa danii?

63 Curo nǝ̃ ǹ yukwaagu, ǹ síì gbǝ̃ǝ̃ ǹ-ce cɔ̃m, nǝ̃ Dũnnũ Yuflǝ-lǝ, wùú hlã́ã̀ cwaaba nǝ̃ nũmǝ̃nãsǝri.

Mǝ̃n wáalá gùú cãwanĩɛ̃gaa mãã nǝ̃-ɲã́ã̀, gà-lǝ gàá hlã́ã̀-ɲã́ã̀ nǝ̃ Dũnnũ Yuflǝw, nǝ̃ nũmǝ̃nãsǝri,

64 nǝ̃ badaabá nìɛ ɲì sǝ̃ǝ̃nã bà sáa hũɔ̃ mǝ̃̀ cɔ̃mmã.»

Sulammã nã, bàá nǝ̃n mãã bà sáá bàa hũɔ̃-mã, Yesuw fǝ̃́ǝ̃lã́-ba gɩ̀ dullɩ nã dìi, nã̀ã ba yà ver ǹ-fǝ̃ǝ̃ wùú mãã wù yáá wù ga hlǝ wù furũũgɩ nã.

65 Wù gáa waa dɩ̀-lǝ, wú waa nǝ̃-ba wà: «Gɩ̀-lǝ gùú cíé mǝ̃́ waa nǝ̃-ɲã́ã̀ wà curo'n síì gbǝ̃ǝ̃ ǹ-jo mǝ̃̀ nãã nã́ã́ Tiiyǝw sáa hã-yǝ nǝ̃ hlũũgu.»

66 Ǹ-tuu gɩ̀-lǝ gɩ̀ yuugu, wù duunãtaacindɩ́ ver ǹ-ba bà sǝ̃n duu wù nã hlo.

67 Yesuẁ gáa da-dǝ nnĩĩ nã, wú yugu Nũɔ̃sɔ̃nǝ̃bahǝ̃ǝ̃lba nǝ̃n yáá dàa wà: «Ɲimãã yo, ɲi caa ɲí ver mǝ̃̀ furũũgɩ nã-ì?»

68 Simɔ̃ Piɛrẃ siɛ-yǝ wà: «Yitii, fɩraa nũmǝ̃nãsǝ'n cãwandɩ nǝ̃ yíi saa-i; yi ver yíǹ furũũgɩ nã nã̀ã kãã ba yì duu halii nã-ì?

69 Yi hṹɔ̃lã́ ǹ cɔ̃mmã, nã̀ã ba yìi fǝ̃ǝ̃ wà Dũnnũw níé ǹ-hiil yíi-i ǹ-tĩɛ̃-n.»

70 Yesuẃ fǝ̃ǝ̃ ǹ-waa wà: «Nũɔ̃sɔ̃nǝ̃ɲihǝ̃ǝ̃l ɲimãã, halii níé ǹ-hiil-ɲã́ã̀?

Mǝ̃n-lǝ mã́ã sǝ-ì?

Nǝ̃ Sɩtãn curoẃ nìɛ ɲì sǝ̃ǝ̃nã.»

71 Wù yáá wù ja Simɔ̃ Isɩkariyɔtɩ bíɛ́ Sudasɩ wɩ̀-i nĩĩgu, wù-lǝ wùú yáá wù ga hlǝ Yesu furũũgɩ nã ǹ-dii-yǝ nãkrɔnɲã nã, nã̀ã da wù yáá dàa Nũɔ̃sɔ̃nǝ̃bahǝ̃ǝ̃lba sǝ̃ǝ̃nã.