Yuhanãw 7

Yesu hãmbà waa nǝ̃-yǝ wà wu hlǝ ǹ-pɩgaa wù hla

Gɩ̀ furũũgɩ nã, Yesuẃ ba wù waaraa Galile yiɛgɩ nã, wù sáá wù caa wú kã Suude yiɛgu, wà Yahudyaba yuntaaba yáá bà caa bá ko-yǝ.

2 Nǝ̃ Yahudyaba paaruuguu mãã bà be-gǝ kuɔbii'n paaruu, gɩ̀ yáá gùu piɛ nã ǹ-tã gɩ̀-lǝ gɩ̀ bǝ̃ǝ̃gu.

3 Yesu hãmbá waa nǝ̃-yǝ wà: «Ǹ saa ń kã Suude yiɛgu.

Nǝ̃-ń kã, ǹ duunãtaabà mãã dàa gɩ̀ sùɔ́gɩ nã, bà ga da ǹ gaaciega.

4 Curo nǝ̃-n ba ǹ caa bá fǝ̃ǝ̃-n, ǹ sáalá ń hlǝ ǹ-pɩgaa ǹ hla.

Yíǹ cíé cɔ̃nnurommãã mãã nnĩĩ, ǹ sáalá ń hlǝ cwaaba min bá da-n.»

5 Sulammã nã, Yesu hãmbà sáá bàa hũɔ̃ wù cɔ̃mmã.

6 Yesuẃ waa nǝ̃-ba wà: «Ɲimãã saa, ɲi-ń da bǝ̃ǝ̃ hagɩ-i hagɩ-i wo, gɩ́ nǝ̃ gùu saa ɲì saa, nǝ̃ mǝ̃n saa, gɩ̀ bǝ̃ǝ̃ sǝ kuɔkuɔ.

7 Ɲimãã cɔ̃mmã̀ síì gbǝ̃ǝ̃ ǹ-bla cuu cwaaba nã, mǝ̃n-lǝ mã́ã cɔ̃m-i mã̀ã bla bà nã.

Hamã nã-ì?

Mǝ̃̀ mãã mǝ̃̀ fɩrǝǝ bà gaabɩbliɛga nã.»

8 Nã̀ã waa wà: «Ɲimãã máarà paaruu'n sùɔ́gɩ nã, nǝ̃ mǝ̃n-lǝ mǝ̃̀ síì kã.

Mǝ̃̀ bǝ̃ǝ̃gɩ̀ sáa hi ǹ-hi.»

9 Wù wáalá dɩ̀-i nǝ̃-ba, nã̀ã ver ǹ-jiraa Galile yiɛgu.

Yesuẁ cwaa'n kalɩm'n tammã́ cu Yahudyaba kusunɲã

10 Yesu hãmbà gáa ta paaruugɩ nã, wùú yo, wú suro ǹ-ŋmã ǹ-yuguraa ǹ-kã Serusalɛmgu, wù sáa ya curoẃ da-yǝ.

11 Bà gáa du paaruugɩ nã, Yahudyaba yuntaabá ba bà caa-yǝ, bà sáa da-yǝ.

Bá ba bà waa wà: «Nǝ̃ wù sáa jo-ì?»

12 Wùú cɔ̃mmãã yáá cocin'n nũɔ̃gɩ nã.

Badaabá wa cofɩnfayǝ-i, badaabá wa kwasǝ-i wà wu vuu cocin nã-i.

13 Nǝ̃ bà yáá bà sɔ̃ Yahudyaba yuntaaba nã, gùú cíé bà sáa siɛ ǹ-ba bà waa cãwan díɛ̀ gbaa.

14 Bà yáá bà ce paaruu gúɔ̀ bãn nɩrhǝ̃ǝ̃l-i.

Gɩ̀ jáa hi sǝ̃ǝ̃gu gùú nã mãã, Yesuẃ kã Dũnnũ bũũsuɔgɩ nã ǹ-kãã ba wù kal cwaaba nǝ̃ Dũnnũ cãwandi.

15 Wù yáá wù kal cwaaba nǝ̃ gùú cãwanĩɛ̃gaa mãã, gá cu Yahudyaba kusunɲã.

Bá ba bà waa wà: «Biɛ wáà sáa kal ǹ-hal, nǝ̃ wù cíé danii nã̀ã ba wù fǝ̃ǝ̃ Dũnnũ cãwandìi torrɩ nnĩĩ?»

16 Yesuẃ siɛ-ba wà: «Mǝ̃̀ kállá-ɲã́ã̀ nǝ̃ mã̀ã́ mãã, mã̀ sáa hlǝ mã́ã nã sǝ, nǝ̃ wùú nǝ̃n tĩ́ɛ̃lã́-m, mã̀ hlǝ́rá wùú nã-i.

17 Gùú tiiw mãã wù caa wú ce Dũnnũ kusunã cɔ̃mmã, gɩ̀ tiiẁ ga fǝ̃ǝ̃ mǝ̃̀ kállá-ɲã́ã̀ nǝ̃ mã̀ã́ mãã, mã-ń ba mã̀ hlǝ́rá mã́ã nã nǝ̃n ba yindagǝ nã mã-ń ba hlǝ́rá Dũnnũ nã nǝ̃n ba.

18 Gùú tii mãã wù waa wù hla'n cɔ̃mmã, gɩ̀ tiiẁ caa bá ba bà bũũ-yǝ-i.

Nǝ̃ wùú mãã wù caa bá ba bà bũũ gùú tii mãã wù tĩ́ɛ̃lã́-yǝ, gɩ̀ tiiẃ nǝ̃ wùu sũɔ̃l, wu sáa cĩɛ̃.

19 Mǝ̃́ wa Musaw yáá wùu hã-ɲã́ã̀ nǝ̃ hlũũgu, nǝ̃ bii cíé curo'n sǝ̃n wáà gɩ̀ hlũũgu ɲì sǝ̃ǝ̃nã.

Ɲi ba danii nã̀ã ba ɲì caa ɲí ko-m?»

20 Cocindɩ́ siɛ-yǝ wà: «Tãntɔ̃nããntii-i nǝ̃-n!

Halii cáalà wú ko-n?»

21 Yesuẃ siɛ-ba wà: «Mǝ̃̀ cíé cɔ̃mmã dɩn dɩn-i nǝ̃ mã́ cu ɲì kusunɲã.

22 Bibyanãã'n síìmã̀ sáa du nã Musa bǝ̃ǝ̃ sǝ, mã̀ dúú yì vũnvãnãã bǝ̃ǝ̃-i.

Nǝ̃ Musaẁ wáalá ɲí ba ɲì síì-ba.

Gɩ̀-lǝ gɩ̀ nã, halle gɩ-ń ba fiisaa'n yuu-i yo, ɲi hũɔ̃ ǹ-síì curow-i.

23 Ɲimãã, ɲi-ń ba ɲì siɛ ɲì síì cwaaba fiisaa'n yuugu, ǹ-da ǹ-ba ɲì wáà Musa hlũũgu, nǝ̃ gɩ̀ ba danii mǝ̃n buɔ cokukuuw fiisaa'n yuugu ɲí suro wà hǝrrɩ?

24 Bláá ba ɲì tũɔ̃l cɔ̃mmã drɔgu, ɲi-ń wa ɲí tũɔ̃l mã̀ã́ mãã, tṹɔ̃lã̀-mã sũɔ̃lɩmmã nã.»

Nã́ã́ Yesu wɩ̀-i Kortii wɩ̀-ì?

25 Yesuẁ gáa wanãã nnĩĩ, Serusalɛmtaadaabá ba bà waa wà: «Bà yáá bà caa bá ko gùú biɛw mãã, wùú sǝ nnĩĩ-ì?

26 Níyà, wu-ń wanãã nǝ̃ cwaaba gbaa, bá ba ciyɛ̃ ciyɛ̃ nã̀ã ba bà ne-yǝ.

Gɩ báa ce nã́ã́ yì yuntaabá kãn wà fíí wɩ̀-i Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo-ì?

27 Nǝ̃ Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo, wù jollɩ nã, curo'n síì fǝ̃ǝ̃ wù wanhlǝm'n sùɔ́, nǝ̃ biɛ wáà-lǝ, yi fǝ̃ǝ̃ wù wanhlǝm'n sùɔ́gu.»

28 Yesuẁ bla wù kal cwaaba Dũnnũ bũũsuɔgɩ nã nnĩĩ, wú hiil wù yalli wà: «Ɲi sǝ wa ɲi fǝ̃́ǝ̃lã́-m nã̀ã ver ǹ-fǝ̃ǝ̃ mǝ̃̀ wanhlǝm'n sùɔ́gu-ì?

Ɲi saa ɲi fǝ̃ǝ̃ wà mǝ̃̀ sáa jo mǝ̃̀ hla'n jol sǝ; gùú tiiw nǝ̃n tĩ́ɛ̃lã́ mǝ̃́ jo, wù sṹɔ̃lã́, mǝ̃̀ fǝ̃́ǝ̃lã́ wà ɲi sǝ̃n fǝ̃ǝ̃-yǝ.

29 Mǝ̃n-lǝ, mǝ̃n fǝ̃ǝ̃-yǝ.

Gùú nǝ̃n cíé mǝ̃́ ba mǝ̃̀ fǝ̃ǝ̃-yǝ, gɩ̀-i nnĩĩ: mǝ̃̀ hlǝ́rá wùú nãã-i ǹ-jo, nǝ̃ wù-lǝ wú ver ǹ-tĩɛ̃ mã́ã̀.»

30 Gɩ̀-i bá ba bà caa bá blǝ-yǝ nǝ̃ bà sáa ga blǝ-yǝ: wù bǝ̃ǝ̃gɩ̀ sáá gùu hi ǹ-hi.

31 Nǝ̃ cocin díɛ̀ sǝ̃ǝ̃nã, cindɩ́ hla nã̀ã hũɔ̃ wù cɔ̃mmã, nã̀ã ba bà waa nǝ̃ bà ɲĩɛ̃ wà: «Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo, wu-ń ga jo, wù ga juo ce cɔ̃m hamã-i mã̀ã́ mãã mã̀ pɩgaa Dũnnũ fãngããgu ǹ-ɲǝ̃ǝ̃ biɛ wáà?»

Bà tĩɛ̃ Dũnnũ bũũsuɔ'n mããcieraadaba wà bá kãã blǝ Yesuw

32 Cocindɩ̀ bla dɩ̀ tɔ̃nãã dɩ̀ waa Yesu cɔ̃mmã nnĩĩ, Farisĩɛ̃bá juo nɔ̃-dǝ.

Bà jáa nɔ̃-dǝ, bá suro nǝ̃ Yahudyaba puruɔntaa'n yuntaaba ǹ-tĩɛ̃ Dũnnũ bũũsuɔ'n mããcieraadaba wà bá kãã blǝ-yǝ.

33 Yesuẃ waa wà: «Mǝ̃̀ ji jiraa nǝ̃-ɲã́ã̀ ǹ-ce bãndaɲã hlo, nã̀ã fǝ̃ǝ̃ ǹ-ver ǹ-kã wùú nǝ̃n tĩ́ɛ̃lã́-m, wù nãã.

34 Mǝ̃n mãã mǝ̃̀ ji kã gùú sùɔ́gu, ɲimãã síì gbǝ̃ǝ̃ ǹ-kã gɩ̀ sùɔ́gɩ nã.

Gɩ̀-lǝ gɩ̀ nã, ɲi ji caa-m nǝ̃ ɲi síì da-m.»

35 Yahudyabá ba bà yugu bà ɲĩɛ̃ wà: «Wù kã haa-ì?

Nã̀ã waa yi síì gbǝ̃ǝ̃ ǹ-da-yǝ!

Nã́ã́ wu sǝ̃n caa wú kã, Yahudyabaa mãã niɛriɛ'n yiɛgu bà nãã, wù ga kal Grɛkɩba nǝ̃ Dũnnũ cãwandi sǝ-ì?

36 Nǝ̃ wù mãã wa wù-lǝ wu mãã wù kã gùú sùɔ́gu, yi síì gbǝ̃ǝ̃ ǹ-kã, wà gɩ̀-lǝ gɩ̀ nã, yi ji caa-yǝ, yi síì da-yǝ, wù caa wú wa danii, gɩ̀-lǝ gɩ̀ tammã?»

Yesuẁ waa Dũnnũ Yuflǝ cɔ̃mmã

37 Kúɔ́bii'n paaruu'n tãl'n yuugɩ̀ yáá yugǝ̃ngãã-i.

Yuu gúɔ̀gɩ̀ jáa hi, Yesuẃ hiraa cwaa'n yigagɩ nã nã̀ã haar wù yalli ǹ-waa wà: «Hũnɲũɔ̃sǝrɩ-ń ba dìi blǝ gùú tiiw, gɩ̀ tiiẃ juo ɲũɔ̃ mã́ã nãã.

38 Gùú tiiw-ń hũɔ̃ mǝ̃̀ cɔ̃mmã, Dũnnũ cãwan'n sɛbɛbà wáalá wà: nũmǝ̃nãsǝ'n hũmmã ji ba mã̀ ta wù kusuugɩ nã nã́ã́ lwaa-i.»

39 Yesuẁ yáá wù waa dɩ̀-lǝ wù ja Dũnnũ Yuflǝ wɩ̀-i.

Bàá nǝ̃n hṹɔ̃lã́ wù cɔ̃mmã, bà yáá bà ji da gɩ̀ Yuflǝw, nǝ̃ gɩ̀-lǝ gɩ̀ bǝ̃ǝ̃gu, Yesuẁ mãã wù sáá wùu hi ǹ-yuguraa ǹ-ga jiraa wù yuuntasǝ'n guujirakuugu drɔ, Yuflǝ wáà sáá wùu hi ǹ-jo.

Cwaabà sǝ̃n gbǝ Yesu cɔ̃mmã nã

40 Yesuẁ jáa wanãã nnĩĩ nã, badaabá ba bà waa cocindi sǝ̃ǝ̃nã wà: «Sulammã nã, biɛ wáà wɩ̀-i Dũnnũ tanhiil wáà.»

41 Badaabá wa: «Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo, wù-lǝ wɩ̀-i!»

Badaabá wa Kortii wáà ji ce danii wú ba Galile yiɛntii?

42 Dũnnũ cãwan'n sɛbɛbà sáa waa wà Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo, wu ji ba Dawuda furũntii-ì?

Nã̀ã ver ǹ-waa wà wu ji huu Betɩlehɛm lǝ-i, Dawuda lǝrɩ nã-ì?

43 Dɩ̀ cíé nĩĩgu, cocindɩ́ buruɔ Yesu cɔ̃mmã nã.

44 Badaabá ba bà caa bá blǝ-yǝ, nǝ̃ curo'n sáa ga jĩɛ̃ wù nã.

Yahudyaba yuntaabà hla Yesu cɔ̃mmã

45 Dũnnũ bũũsuɔ'n mããcieraabà gáa ver ǹ-jo Yahudyaba puruɔntaa'n yuntaaba nǝ̃ Farisĩɛ̃ba nãã, bà-lǝ bá yugu-ba wà: «Dɩ̀ gáa ce tam hamã-i, nǝ̃ ɲi sáa ga blǝ ǹ-jo nǝ̃-yǝ?»

46 Bá siɛ-ba wà: «Hãmĩĩ sórrá, yi sáa hi ǹ-nɔ̃ biɛ wáà cãwan tuugu curo'n nũɔ̃ nã ǹ-da.»

47 Farisĩɛ̃bá waa nǝ̃-ba wà: «Gɩ ba nã́ã́ ɲimãã yo ɲi yíɛ́ wú vuu-ɲã́ã̀ ǹ-tãw-i nnĩĩ-ì?

48 Ɲi nṹɔ̃́ wà yì yuuntii hawɩ-i, dàa wà Farisĩɛ̃biɛ hawu hṹɔ̃lã́ wù cɔ̃mmã?

49 Cocin díɛ̀dɩ min mãã dɩ̀ hṹɔ̃lã́ wù cɔ̃mmã nnĩĩ, bà sǝ̃ǝ̃nã curoẁ dɩn yo wù sǝ̃n fǝ̃ǝ̃ Musa hlũũgu, bà cɔ̃mmã̀ bǝ̃́ǝ̃lǝ̃́ǝ̃ pew.»

50 Farisĩɛ̃biɛdiɛ yáá dàa bà sǝ̃ǝ̃nã, bà yáá bà be-yǝ Nikodɛm; wùú yáá wùu kã Yesuw nãã yisuɔdagǝ nã.

Wù-lǝ wú waa nǝ̃-ba wà:

51 «Ɲi fǝ̃́ǝ̃lã́ wà hãmĩĩ hlũũgɩ nã nǝ̃-n ba ǹ sáa nɔ̃ curo'n nũɔ̃gu, nã̀ã fǝ̃ǝ̃ wù gaaciega, ǹ síì gbǝ̃ǝ̃ ǹ-jar wù sugolli.»

52 Bá waa nǝ̃-yǝ wà: «Yíi yo ǹ jáa ba Galile yiɛntabiɛ-ì nǝ̃-n-ì?

Kã n ga mǝ̃gaa ń kal Dũnnũ cãwandìi huhorɩmmã nã ń ne, ǹ sɩga da bàa wa Dũnnũ tanhiildiɛ hlǝ́rá Galile-i.»

53 [Bà jáa wanãã ǹ-tã, bá suro ǹ-buruɔ ǹ-kũũrǝ̃ǝ̃ bà swammã nã.