Lukaw 2

Yesu huum'n cɔ̃mmã Betɩlehɛm lǝri

Gɩ̀-lǝ gɩ̀ bǝ̃ǝ̃gu, Wurɔm kumãndãgǝ̃ngãw, bà yáá bà be-yǝ wà Ogisɩtɩ, wù-lǝ wùú yáá Sesaarw, yuuntigǝ̃ngã.

Wú juo ce wà bá yal wù yiɛntaaba min yiriɛga.

2 Bà dĩ́ɛ̃lã́ ǹ-yal cwaa'n yiriɛga gùú nã-i.

Kirinisɩẁ yáá Siirii yiɛntaa'n fãngãtiiw.

3 Cwaaba min, bá ba bà kũũ bà liɛga nã, bà ga ce bá yal bà yiriɛga.

4 Yisefu yo, wú hlǝ Galile yiɛ'n lǝrii mãã bà be-dǝ wà Nasarɛtɩ lǝri, ǹ-maar Isɩrayɛl yiɛ'n yuuntii Dawudaẁ húulá gùú lǝrii mãã bà be-dǝ wà Betɩlehɛm lǝri, Suude yiɛgu.

Yisefuw, Dawuda nũɔ̃'n curo yáá.

5 Wù gǝciɛ Mariyamẁ yáá nǝ̃ kúsúugɩ-i, nǝ̃ bá kã bà min nã, bà kã bà ga ce bá yal bà yiriɛga.

6 Bà gáa ba Betɩlehɛm lǝri, Mariyam kúsúugɩ́ blǝ-yǝ.

7 Cwaabà mãã bà yáá bàa yu noraa'n wancɔm'n sùɔ́gɩ nã, bà sáa da ǹ-hyar gɩ̀ sùɔ́gɩ nã, wú huu wù blɩdĩɛ̃lw, wú ba pũmpɩrblɩ, kwasǝnɲin'n wancɔm'n sùɔ́gɩ nã, nã̀ã fuɔ caaliiw kuulanãmba nã, ǹ-mǝ̃rǝ̃ǝ̃ wù nã, kwasǝnɲin'n ɲããwuukaagu kusunã.

Mɛlɛgɛẁ waa Kortii'n huum'n cɔ̃mmã nǝ̃ wanciinããba

8 Gɩ̀ sɔhlɔnɲã nã, wanciinããbà yáá dàa bà cɔ taasǝ̃ǝ̃nǝ̃ǝ̃gu, bà cii bà kwasǝnɲinɲã nã.

9 Yitii mɛlɛgɛẃ kãã juo hillaa bà nã.

Gɩ̀-lǝ gɩ̀ nã, Yitii'n gbɩgbaamã́ juo suu bà nã.

Gbǝrsǝrɩ́ blǝ-ba, bà hiɛgá yuɔ.

10 Mɛlɛgɛẃ waa nǝ̃-ba wà: «Bláá ya gbǝrsǝrɩ́ blǝ-ɲã́ã̀, mǝ̃̀ jo nǝ̃ cɔ̃ndudwalɩm-i mǝ̃̀ ji hã-ɲã́ã̀.

Mã̀ã́ mãã mã̀ ji dwal cwaaba min nã:

11 yisuɔgɩ dɩn gúɔ́ nã, Dawuda lǝri, ɲì Kortii húulá.

Wɩ̀-i Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo, Yitiiw.

12 Gùú mãã gɩ̀ ga ce ǹ-pɩgaa-ɲã́ã̀, ɲí fǝ̃ǝ̃-yǝ gɩ̀-i nnĩĩ: ɲi ga da caaliidiɛ bàa fuɔ-yǝ kuulanãmba nã, nã̀ã mǝ̃rǝ̃ǝ̃ wù nã kwasǝnɲin'n ɲããwuukaagɩ nã.»

13 Gùú bǝ̃ǝ̃gɩ dɩngu dàa, mɛlɛgɛcindaarɩ́ hlǝ drɔgu, ǹ-juo pya wudiɛ wáá nã, bá ba bà bɩnǝ̃ǝ̃ Dũnnũw nã, bà waa wà:

14 «Drɔ-Dũnnũ yiirɩ́ bũũ, nǝ̃ hyasɩrãgǝgɩ́ ba wù yisɩnã cwaaba nã mãã cuu wáá nã!»

15 Mɛlɛgɛbà gáa ver ǹ-ta drɔkuɔlɩ nã, wanciinããbá ba bà waa nǝ̃ bà ɲĩɛ̃ wà: «Gɩ̀-lǝ gɩ̀ nã, jówà yí kã Betɩlehɛm lǝri, yi ga ne dìí nǝ̃n cíé nǝ̃ Yitiiẃ juo ba wù pɩgaa hãmĩĩ nǝ̃-dǝ.»

16 Bá suro ǹ-gǝǝraa ǹ-kã, ǹ-kãã hi Mariyamw, bá nǝ̃ Yisefuw nǝ̃ tãnkuurẁ bàa mǝ̃rǝ̃ǝ̃ wù nã kwasǝnɲin'n ɲããwuukaagɩ nã.

17 Bà gáa da-yǝ, mɛlɛgɛẁ mãã wù wáalá gàá mãã nǝ̃-ba tãnkuur wáà cɔ̃mmã nã, bá taa-ga ǹ-ja-ba.

18 Curo wo curo mãã wù nṹɔ̃́ wanciinãã'n cãwan díɛ̀, dɩ́ tugulǝǝ wù nã.

19 Mariyam-lǝ, wú ba wù ɲãl cɔ̃m mã́ã̀mã̀ min nã wù hiɛga nã, wù sáa sĩĩnǝ̃ǝ̃ mã̀ nã.

20 Mɛlɛgɛẁ yáá wùu waa-dǝ nǝ̃ wanciinããba gùú tammãã mãã, bà gáa da-dǝ gùú tammã-i.

Gùú cíé, bá ver ǹ-ba bà hyar hlãnɲã bà bɩnǝ̃ǝ̃ Dũnnũw nã bà maar.

Yesu pɩgammã Dũnnũ bũũsuɔgɩ nã Serusalɛmgu

21 Tãnkuur'n huum'n bãn nɩrsiɛlnã yuugu, bá síì-yǝ.

Nǝ̃ mɛlɛgɛẁ yáá wùu pɩgaa Mariyamw nǝ̃ gùú yiirii mãã nǝ̃ wú fǝ̃ǝ̃ ǹ-ji tuu kusuugu, bá suu-yǝ nǝ̃ gɩ̀ yiiri, wà Yesu.

22 Gùú bãnɲãã mãã Musaẁ yáá wùu kra ɲã̀ nã wù hlũũgɩ nã cahuunciɛẁ ba wù saa wú ce-ɲã, nã̀ã fǝ̃ǝ̃ ǹ-per wù hla nã, gɩ̀ bãnɲã̀ jáa suu, Yisefuba nǝ̃ Mariyamw, bá kã nǝ̃ tãnkuurw Serusalɛmgu, bà ga kra wù nã ǹ-hã Yitiiw.

23 Bà yállá-dǝ nĩĩgɩ-i Yitii'n hlũũgɩ nã wà: «Honãdĩɛ̃lũũ wo honãdĩɛ̃lũũ, gɩ-ń ba pũmpɩrblɩ nǝ̃n ba, wù saa wú kra wù dǝ-i, ǹ-hã Yitiiw.»

24 Nǝ̃ gùú siimãã mãã bà kárrá mã̀ nã gɩ̀ hlũũgɩ nã, bá kã ba ga hiil mã̀ã́ yo nǝ̃ hũɔ̃rɔ̃nãmba hǝ̃ǝ̃l.

Bà-lǝ ba-ń ba bà sáa da, bá hiil tǝbuhũɔ̃rɔ̃nãmba hǝ̃ǝ̃l.

25 Biɛdiɛẁ yáá dàa Serusalɛmgu, bà be-yǝ wà Simeyɔ̃.

Wù yáá wùu sũɔ̃l, nã̀ã ba wùu ɲǝ̃gãr Dũnnũ cɔ̃mmã nã.

Wùú mãã wù yáá wù saa wú juo hinĩɛ̃ Isɩrayɛl bluu'n ɲiɲirãmmã, wù yáá wù cii wù-lǝ wɩ̀-i.

Dũnnũ Yuflǝẃ yáá Simeyɔ̃w saa.

26 Wùú yáá wùu waa ǹ-ja Simeyɔ̃w wà wu síì ku, nã́ã́ wu sáa da Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo.

27 Dũnnũ Yuflǝẃ ce Simeyɔ̃ẃ kã Dũnnũ bũũsuɔgɩ nã.

Yesu tǝbà gáa suro nǝ̃ bà tãnkuurw wà ba kãã ce Musa hlũũ'n cɔ̃mmã,

28 Simeyɔ̃ẃ kãã hũɔ̃ tãnkuurw ǹ-blǝ-yǝ wù nãkrɔnɲã nã, nã̀ã ba wù bũũ Dũnnũw wù waa wà:

29-30 «Yitii, ǹ yáá nã̀ã pã ǹ nũɔ̃gu dìí nã mãã, ǹ jáa ce-dǝ.

Kuɔkuɔ-lǝ, mǝ̃̀ mãã mǝ̃̀ jáa da Kortiiw nǝ̃ mǝ̃̀ yinɲã, ǹ ji gbǝ̃ǝ̃ ǹ-ya mã́ã mãã ǹ mããcierw, mǝ̃́ ku fiɛya.

31 Ǹ cíé wùú mãã cwaaba min bá da ǹ-da-yǝ,

32 wɩ̀-i gbɩgbaamã, wùú mãã wù ji ce cwaaba min bá fǝ̃ǝ̃-n, nã̀ã hã ǹ bluubaa mãã Isɩrayɛl bluuba nǝ̃ yirgǝ̃ngããri.»

33 Simeyɔ̃ẁ yáá wù waa dìí mãã ǹ-kã tãnkuur'n yiɛgu, dɩ́ tugulǝǝ wù toba nǝ̃ wù ɲũw nã.

34 Simeyɔ̃ẃ cirǝ̃ǝ̃ Dũnnũw nã, wà wú piɛ wù nãkrɔfɩnfaagu bà drɔ, nã̀ã waa nǝ̃ wù ɲũ Mariyamw wà: «Ǹ tãnkuur wáà cɔ̃mmã nã, cocindɩ̀ ji duruu Isɩrayɛl yiɛgu, badaabá suro.

Dũnnũẁ ji ce wú ba kuudagǝ-i, wù tu cwaaba nã nǝ̃ Dũnnũ cɔ̃mmã, nǝ̃ bà ji hla nã̀ã ba bà car-yǝ.

35 Gùú ji ce cocin'n kãnɩmmã́ curuɔ gbɩgbaamã nã.

Nǝ̃ Mariyam, yíǹ-lǝ, mããjaamdaamã̀ ji hi-n, nã́ã́ ba flã-n nǝ̃ pugɔluɔ-i.»

36 Nǝ̃ cijaldiɛẁ yáá dàa, bà be-yǝ wà Anɩ, Dũnnũ tanhiil yáá.

Fanuwɛlw mãã Asɛr nũɔ̃ntiiw, wùú bisĩɛ̃ yáá.

Wù yáá wùu vǝ̃ǝ̃ ǹ-car.

Wù blaẁ táalá-yǝ wù plǝsǝrɩ nã, bá ce bii nɩrhǝ̃ǝ̃l nã̀ã fǝ̃ǝ̃ ǹ-ku.

37 Anɩẃ ba wù sáa hũɔ̃ ǹ-jiraa nǝ̃ blanĩĩdiɛ hlo, fuwɔ ǹ-ji da bii jiɛtuu nǝ̃ gà nnǝ̃ǝ̃.

Wú ba wù sǝ̃n hal Dũnnũ bũũsuɔgɩ nã.

Nã̀ã ba wù bũũ Dũnnũw, wù cirǝ̃ǝ̃ wù nã, nã̀ã ba wù dii sũũw fɩraa.

38 Wùú yo, wù kã́ã́ ǹ-ga hi gùú bǝ̃ǝ̃gɩ-i, ǹ-kãã da Simeyɔ̃ waa cãwandi.

Wú fǝ̃ǝ̃ ǹ-ba wù fyãn Dũnnũw, nã̀ã ba wù waa tãnkuur'n cɔ̃mmã, nǝ̃ bàá mãã bà cii wà Dũnnũẃ juo hiil Serusalɛm taaba nãkrɔnɲã nã.

Yesu tǝbà ver bà kã nǝ̃-yǝ Nasarɛtɩ lǝri, Galile yiɛgu

39 Bà gáa ce Yitii'n hlũũ'n cɔ̃mmã min ǹ-tã, bá ver nǝ̃ Yesu ǹ-maar ǹ-kũũ Nasarɛtɩ lǝri, Galile yiɛgu.

40 Tãnkuur-lǝ, wú ba wù vǝ̃ǝ̃, nǝ̃ wù yigagɩ́ ba gɩ̀ kaalaa.

Nǝ̃ Dũnnũ nãkruɔ yo gɩ́ ba wù drɔ.

Yesu bii nũɔ̃sɔ̃nãw nã, bá kã nǝ̃-yǝ Dũnnũ bũũsuɔgɩ nã

41 Blɩ wo blɩ, Yesu tǝbà yáá ba-ń ce bá kã Serusalɛmgu, ǹ-kãã ce Yahudyabà paaruuguu mãã bà ko tũmblɩw gɩ̀ nã, bà be-gǝ wà Ta-n-maa paaruugu

42 Yesu bii nũɔ̃sɔ̃ nǝ̃ gà hǝ̃ǝ̃lnã blɩri, bá kã paaruu gúɔ́ nã, bìi'n dɩgaliɛ tammã.

43 Nǝ̃ paaruu'n yunɲã̀ gáa suu, bá ver ǹ-ba bà kũũ.

Yàá Yesuẁ bla dàa Serusalɛmgu, nǝ̃ wù tǝbà sáa fǝ̃ǝ̃.

44 Bà yáá bà ne wà Yesuw nàa cwaaba sǝ̃ǝ̃nã.

Bá wáà bǝ̃ǝ̃ntãwaali nã̀ã ga fǝ̃ǝ̃ ǹ-ba bà caa-yǝ bà cwanããba nǝ̃ bà fǝ̃ǝ̃taaba sǝ̃ǝ̃nã.

45 Bà sáa ga da-yǝ, bá naa bá ver ǹ-kã ǹ-kãã ba bà caa-yǝ bà kã Serusalɛmgu.

46 Bãnɲã siɛlnã yuugu, bá kãã caa ǹ-da-yǝ Dũnnũ bũũsuɔgɩ nã, yà jiraa Musa hlũũ'n yuntaaba sǝ̃ǝ̃nã, wù nɔ̃ bà cãwanĩɛ̃ga, nã̀ã ba wù yugurǝǝ bà nã.

47 Cwaaba min mãã bà yáá bà nɔ̃ wù cãwanĩɛ̃ga, nǝ̃ wù mãã wù yáá wù siɛ-ba nǝ̃ gùú cɔ̃nfǝ̃ǝ̃gǝguu mãã, dɩ́ tugulǝǝ ba nã.

48 Wù tǝbà gáa da-yǝ, bà kusunɲã́ cu.

Wù ɲũẃ fǝ̃ǝ̃ ǹ-waa nǝ̃-yǝ wà: «Biɛ, danii ń ce-yáà nnĩĩ-lǝ?

Yí ba yì caa-n gùú bǝ̃ǝ̃gu dìi, yi nǝ̃ ǹ tǝw, yì cãnĩɛ̃gà ji hyãl.»

49 Wú fǝ̃ǝ̃ ǹ-siɛ-ba wà: «Ɲi caa-m bincɔ̃m nã-i?

Ɲi sáa fǝ̃ǝ̃ wà mǝ̃ saa mǝ̃́ ba mǝ̃̀ Tǝ suɔgɩ nã-ì?»

50 Nǝ̃ Yesu tǝbà sáa fǝ̃ǝ̃ wù cãwanĩɛ̃ gáàgà tam.

51 Wú fǝ̃ǝ̃ ǹ-kã bá ta bà min nã Nasarɛtɩ lǝri.

Wù yáá wù nɔ̃ wù hã-ba, nǝ̃ wù ɲũẃ ba wù ɲãl cɔ̃m mã́ã̀mã̀ min nã wù hiɛga nã.

52 Yesuẃ ba wù vǝ̃ǝ̃, wù yiga yo, gɩ́ ba gɩ̀ kaalaa.

Nǝ̃ wù cɔ̃mmã́ ba mã̀ dwal Dũnnũw nã nǝ̃ cwaa yo, bà nã.