Lukaw 1

Lukaw

Yesu cɔ̃ndudwalɩmmãã mãã Lukaẁ yállá-mã

Luka sɛbɛ yalɩm'n yuugu

Gùú cɔ̃mmãã nǝ̃n cíé nìɛ, mǝ̃̀ yal mã̀-i mǝ̃̀ hã-n.

Cocindɩ̀ yállá gɩ̀ cɔ̃mmã ǹ-ta ǹ-tã.

2 Bàá nǝ̃n díɛ́ Yesu mããcem mã́ã̀mã̀ dullɩ nã dìi nǝ̃ bà yinɲã, nǝ̃ Dũnnũẃ juo ce bá ba bà tu wù cãwandɩ nã bà ja cwaaba, bà-lǝ bà táalá-dǝ ǹ-ja-yáà gùú tammã, dɩ̀ yaltaa yo, bà yállá-dǝ gùú tammã-i.

3 Yigantii Tewofil, gùú cíé mã́ã yo, mǝ̃́ ce yugummã, ǹ-tuu-dǝ dɩ̀ yuugɩ nã.

Mǝ̃̀ gáa tiisǝ dɩ́ kuu gùú nã, mǝ̃́ ne wà gɩ sáalá, mǝ̃́ yal-dǝ, dɩ́ duu dɩ̀ ɲĩɛ̃ nã, ǹ-hã-n,

4 ń da ǹ-fǝ̃ǝ̃ dɩ́ kaalaa wà ba kállá-n nǝ̃ dìí mãã Yesu cɔ̃mmã nã, wà dɩ̀ min sulam-i.

Mɛlɛgɛẁ waa Yuhanã huum'n cɔ̃mmã

5 Cɔ̃m mã́ã̀mã̀ dul'n bǝ̃ǝ̃gu, Erodɩ yáá Suude yiɛntaa'n jãmãtigiw.

Yahudyaba puruɔntiidiɛẁ yáá dàa gɩ̀ sùɔ́gɩ nã, bà be-yǝ wà Jakarɩja.

Wù hlǝ́rá Isɩrayɛl puruɔntii Abiya nũɔ̃ nã-i.

Abiyaẃ hlǝ Isɩrayɛl puruɔntaa'n yuuntiigǝ̃ngã Arɩnã nũɔ̃gɩ nã.

Jakarɩja ciɛ Elisabɛtɩ yo, wù hlǝ́rá Arɩnã nũɔ̃ nã-i.

6 Jakarɩjaba nǝ̃ wù ciɛ Elisabɛtɩw, bà yáá bàa sũɔ̃l Yitii Dũnnũ hlũũgɩ nã, ǹ-ba bà nɔ̃ bà hã-yǝ, nã̀ã ba bà wáà wù hlũũgu tǝmm.

7 Bà yáá bàa vãnãã ǹ-tã, nǝ̃ Elisabɛtɩẁ mãã wù yáá wùu ĩɛ̃, bà sáa da tãnkuur.

8 Dũnnũ jãnũũgɩ́ juo finǝ̃ǝ̃ ǹ-hi Abiya nũɔ̃ntaaba.

9 Yahudyaba puruɔntaabá jãn Dũnnũ bũũsuɔgɩ nã ǹ-ce bà tammã nã, ǹ-dii trãgá blǝ Jakarɩjaw, wà wùú ji jãn ǹ-ga tii wusunããw duu'n kusuugɩ nã.

10 Wù mãã wù yáá wù saa wú tii wusunããw gùú bǝ̃ǝ̃guu mãã, gɩ̀ bǝ̃ǝ̃gɩ̀ jáa hi, wú jãn kusuugɩ nã, nǝ̃ cocindɩ́ ba gǝ̃ǝ̃w nã, bà cirǝ̃ǝ̃ Dũnnũw nã.

11 Gùú nã-i, Yitii'n mɛlɛgɛẃ juo caalaa Jakarɩja nã, ǹ-juo hiraa kuuguu mãã bà tii wusunããw gɩ̀ drɔ, gɩ̀ nãdĩĩyiɛgu.

12 Jakarɩjaẁ gáa da gɩ̀ mɛlɛgɛw, wù hiɛgá gaala nã, gbǝrsǝrɩ́ blǝ-yǝ.

13 Mɛlɛgɛẃ fǝ̃ǝ̃ ǹ-waa nǝ̃-yǝ wà: «Jakarɩja, báa ya gbǝrsǝrɩ́ blǝ-n, Dũnnũẁ hṹɔ̃lã́ ǹ cirǝ̃mmã.

Ǹ ciɛ Elisabɛtɩẁ ji huu pũmpɩrblɩ ǹ-hã-n, ń suu wù yiiri wà Yuhanã.

14-15 Wù honãã'n cɔ̃mmã̀ ji ce dudwalɩmmã́ ba ǹ hiɛga nã, ń ba ǹ ce kweyi-kweyiw, nã̀ã ce mã́ ba cocin'n hiɛ yo gà nã.

Wù ji ba cogǝ̃ngã-i Yitii saa.

Wù síì piɛ ɛrsɛ̃ kwãmmã wù nũɔ̃gɩ nã.

Nǝ̃ wù síì hi ǹ-huu, nǝ̃ Dũnnũẃ fɩr wù kusuugu, nã̀ã hã-yǝ nǝ̃ wù Yuflǝw.

16 Wù ji ce Isɩrayɛl taacindɩ́ ver ǹ-ba dɩ̀ nɔ̃ dɩ̀ hã Yitiiw, bà Dũnnũw.

17 Gɩ̀ bǝ̃ǝ̃'n Dũnnũ tanhiil Eliẁ yáá wù ce mããcemmã nǝ̃ gùú Yuflǝw mãã, Dũnnũẁ ga tĩɛ̃ wú jo nǝ̃ gùú yuflǝ fãngããgɩ-i, wà wú juo yɔ tiibaba nǝ̃ bà tãnkuuraaba.

Wù ji ce hlataabá ba bà kãn cosũɔ̃lba'n tammã, nã̀ã ce cwaabá tɩgɩnǝ̃ǝ̃ ǹ-ba bà cii Yitiiw.»

18 Nǝ̃ Jakarɩjaẃ fǝ̃ǝ̃ ǹ-waa nǝ̃ mɛlɛgɛw wà: «Bii ji ce mǝ̃́ fǝ̃ǝ̃ wà dɩ ji gbǝ̃ǝ̃ ǹ-ce?

Mã́ã, nǝ̃ mǝ̃̀ ciɛw, yi vã́nã́ã ǹ-tã.»

19 Mɛlɛgɛẃ fǝ̃ǝ̃ ǹ-siɛ-yǝ hlo wà: «Mã́ã-i Jibirw, mǝ̃̀ hiraa Dũnnũw tuɔra, mǝ̃̀ ce wù tĩɛ̃yaga.

Wùú tĩ́ɛ̃lã́-m wà mǝ̃́ juo waa cɔ̃mmã nǝ̃-n, nã̀ã pɩgaa-n nǝ̃ cɔ̃ndudwalɩm mã́ã̀.

20 Nǝ̃ ǹ sáa hũɔ̃ mǝ̃̀ cãwandi.

Gùú ji ce ǹ nũɔ̃gɩ ji blǝ, ǹ síì ba ǹ-gbǝ̃ǝ̃ ǹ-waa cɔ̃mmã hlo, fuwɔ gùú yuuguu mãã cɔ̃m mã́ã̀, mã̀ ji ce.

Sulammã nã, mǝ̃̀ wáalá gùú cãwandi ǹ-ja-n, dɩ̀ yuugɩ-ń hi, dɩ̀ ji ce.»

21 Gɩ̀-lǝ gɩ̀ bǝ̃ǝ̃gu, cwaabà yáá dàa bà cii Jakarɩjaw gǝ̃ǝ̃w nã.

Wù gáa hǝ̃ǝ̃sǝ kusuugɩ nã, bà hiɛgá ba gà hlǝ, wà bincɔ̃m gáa ce wú hǝ̃ǝ̃sǝ nĩĩgu?

22 Wù gáa hlǝ gùú nã, wù nũɔ̃gɩ́ blǝ.

Bá paa ǹ-fǝ̃ǝ̃, wà Dũnnũw pɩ́gará-yǝ nǝ̃ kuu wù bũũm'n duuguu kusunã, wú fǝ̃ǝ̃ ǹ-ba wù hǝ̃gãã-ba nǝ̃ wù nãkrɔnɲã, ǹ-ba wù síì gbǝ̃ǝ̃ ǹ-waa cɔ̃m nǝ̃-ba hlo.

23 Jakarɩja mããcem'n yunɲã̀ jáa suu, wú ver ǹ-maar ǹ-kũũ.

24 Dɩ̀ furũũgɩ nã, wù ciɛ Elisabɛtɩẃ juo tuu kusuugu, nã̀ã ba wù jiraa nǝ̃-gǝ suɔgɩ nã, fuwɔ ǹ-ji da hyarsǝrɩ ndii.

Nã̀ã ba wù waa wà:

25 «Yitiiẁ cíé díɛ̀-i ǹ-hã-m: wù jáa ne mǝ̃̀ yiɛgu ǹ-hiil ciiri mǝ̃̀ yigagɩ nã.»

Mɛlɛgɛẁ waa Yesu huum'n cɔ̃mmã

26 Elisabɛtɩ kúsúu'n hyarsǝ nãndiennãw nã, Dũnnũẃ tĩɛ̃ mɛlɛgɛ Jibirẃ kã busuldiɛ nãã, Galile yiɛ'n lǝdarǝ, bà be-dǝ wà Nasarɛtɩ lǝri.

27 Busul wáà, bà yáá bà be-yǝ wà Mariyam.

Yisefu gǝciɛ yáá, nǝ̃ wù sáa hi ǹ-fǝ̃ǝ̃ bibiɛ.

Isɩrayɛl yiɛ'n yuuntiiw mãã bà yáá bà be-yǝ wà Dawuda, wù-lǝ wù nũɔ̃ntii yáá nǝ̃ Yisefuw.

28 Mɛlɛgɛẁ gáa hi Mariyam kuugɩ nã, wú fyãn-yǝ nã̀ã waa nǝ̃-yǝ wà: «Mariyam, ba ń ɲã!

Yitiiẃ nǝ̃ ǹ saa.

Wù píɛlá wù nãkrɔfɩnfaagu ǹ drɔ.»

29 Mariyam hiɛgá gaala nã ǹ-car, wú ba wù kãn wù kusuugɩ nã wà bii fyãnuu'n plǝ-i nǝ̃ díɛ̀-lǝ?

30 Mɛlɛgɛẃ fǝ̃ǝ̃ ǹ-waa nǝ̃-yǝ wà: «Mariyam, báa ya gbǝrsǝrɩ́ blǝ-n, Dũnnũ nãkruɔgɩ́ nǝ̃ ǹ drɔ.

31 Ǹ ji tuu kusuugu, ǹ-huu pũmpɩrblɩ, ń suu wù yiiri wà Yesu.

32 Wù ji ba cogǝ̃ngã-i, bà ji ba bà be-yǝ wà Drɔ-Dũnnũ Bíɛ́.

Yitii Dũnnũẁ ji ce wú ba yuuntiiw, wù tǝvũnvũɔ̃ Dawuda tammã.

33 Wù ji ba Yakuba taa'n yuugɩ nã fɩraa, wù yuuntasǝrɩ̀ síì tã ǹ-da.»

34 Mariyamẃ fǝ̃ǝ̃ ǹ-waa nǝ̃ mɛlɛgɛw wà: «Dɩ̀-lǝ dɩ̀ ji gbǝ̃ǝ̃ ǹ-ce danii?

Mǝ̃n sáa hi ǹ-fǝ̃ǝ̃ bibiɛ ǹ-da.»

35 Mɛlɛgɛẃ fǝ̃ǝ̃ ǹ-waa nǝ̃-yǝ wà: «Dũnnũ Yuflǝẁ ga jo nǝ̃ wù fãngããgu, ǹ-juo suu ǹ nã nǝ̃ wù husumũũgu.

Gùú cíé tãnkuurw mãã wù ji huu, bà ji ba bà be-yǝ wà Dũnnũ Bíɛ́.

36-37 Ǹ cwanĩĩ Elisabɛtɩ yo, nǝ̃ wù vũnvãnsǝrɩ min, wú nàa nǝ̃ kúsúu, wù ga huu pũmpɩrblɩ.

Cɔ̃mdamã mãã mã̀ sǝ̃n ywar Dũnnũẁ sǝ, bà yáá bà ne wà wùú mãã wù ĩ́ɛ̃lã́, wù kúsúu'n hyarsǝ nãndiennã wɩ̀-i nnĩĩ.»

38 Gùú nã-i, Mariyamẃ fǝ̃ǝ̃ ǹ-waa wà: «Mǝ̃n-lǝ, mǝ̃́ nǝ̃ Yitii'n tasǝ nã-i.

Ǹ wáalá-dǝ gùú tuugu, Dũnnũẃ ya dɩ́ ce nĩĩgu.»

Mɛlɛgɛẃ fǝ̃ǝ̃ ǹ-ta.

Mariyamẁ kã wù ga dǝ̃ǝ̃ Elisabɛtɩw

39 Gɩ̀-lǝ gɩ̀ bãnɲã nã, Mariyamẃ gǝǝraa ǹ-maar Sude lǝdarǝ nã, tãnũnɲã sǝ̃ǝ̃nã.

40 Wù gáa hi, wú kãã jãn Jakarɩja suɔgu, nã̀ã fyãn Elisabɛtɩw.

41 Elisabɛtɩẁ gáa nɔ̃ Mariyam fyãnuugɩ nã, wù tãnkuurẃ jor ǹ-ɲãnãã wù kusuugɩ nã.

Dũnnũ Yuflǝẃ ce Elisabɛtɩẃ

42 dii ǹ-hiil wù yalli wà: «Dũnnũẁ píɛlá wù nãkrɔfɩnfaagu ǹ drɔ, ǹ-ɲǝ̃ǝ̃ canããba min, nã̀ã piɛ-gǝ ǹ tãnkuurw mãã ǹ kúsúu yo, gɩ̀ nã!

43 Mã́ã tuuguu mãã nnĩĩ, Yitii'n ɲũẃ ba wù jo mã́ã nãã?

44 Ǹ sáa da?

Mǝ̃̀ nṹɔ̃́ ǹ fyãnuugɩ nã, dudwalɩmmã́ ce tãnkuurẃ jor ǹ-ɲãnãã mǝ̃̀ kusuugɩ nã.

45 Yíi mãã ǹ hṹɔ̃lã́ wà Yitiiw wáalá dìí nǝ̃-n, wà dɩ ji ce, ǹ yuugɩ̀ dwállá!»

Mariyamẁ hyar hlǝ̃ǝ̃gu wù bũũ Dũnnũw

46-49 Mariyamẃ fǝ̃ǝ̃ ǹ-ba wù waa wà: «Mǝ̃̀ bũũ fãngããgɩmintiiw nǝ̃ mǝ̃̀ hiɛga min, mǝ̃̀ sǝ cwaa'n tam, mǝ̃́ nǝ̃ wùú tasǝ nã-i, nǝ̃ wú hla nã̀ã ne mǝ̃̀ yiɛgu.

Gùú cíé mǝ̃̀ Kortii Dũnnũ cɔ̃ndudwalɩmmã́ yu mǝ̃̀ hiɛga.

Wù cíé cɔ̃ngǝ̃ngãm, ǹ-hã-m, mǝ̃́ ba mǝ̃̀ bũũ Yitiiw nǝ̃ mǝ̃̀ hiɛga min nã.

Díɛ̀ dɩ̀ furũũgɩ nã, gùú brǝnnɔ̃nɲã mãã ɲã ga, ɲã ji ba ɲã waa wà mǝ̃̀ yuugɩ̀ dwállá.

Wù-lǝ wɩ̀-i Dũnnũw.

50 Bàá nǝ̃n mãã bà sɔ̃ Dũnnũw nã, wù diifɩnfaarɩ̀ síì tã bà nã ǹ-da.

51 Wù cíé cɔ̃ngǝ̃ngãm ǹ-pɩgaa cwaaba.

Bàá nǝ̃n mãã bà ne bá buɔ bà hla nã, wú ce bá ba bà sáa hi cɔ̃m nã.

52 Wù sórrá yuntaaba bà wanjirammã nã, nã̀ã kra bàá mãã bà sǝ̃n buɔ bà hla nã, nũɔ̃sǝn sɔnɲã nã.

53 Wù hlã nũmnããba nǝ̃ nũɔ̃sǝn ɲinɲã, nã̀ã ya gbaalaabá ver nãkwasǝri.

54-55 Dũnnũẁ plã wù nũɔ̃gu nǝ̃ yì vũnvãnããbaa mãã Ibramãw nǝ̃ wù furũntaaba, wù kusufɩnfaa'n cɔ̃mmã nã fɩraa, wù sáa sĩĩnǝ̃ǝ̃ dɩ̀ nã.

Gùú cíé wú jo ǹ-ji pɛ wù mããcieraa Isɩrayɛl bluuba nã.»

56 Mariyamẃ ba dàa Elisabɛtɩ kuugɩ nã, nã́ã́ hyarsǝrɩ siɛl-i, nã̀ã ga fǝ̃ǝ̃ ǹ-ver ǹ-kũũ.

Yuhanã huum'n cɔ̃mmã

57 Elisabɛtɩ huumã̀ jáa hi, wú huu pũmpɩrblɩ.

58 Wù jirataaba nǝ̃ wù cwanããbà gáa nɔ̃ wà Yitiiw cíé-yǝ nǝ̃ wù diifɩnfaari piyɛ̃, bá kã, bá kãã ba bà ce kweyi-kweyiw.

59 Wù honãã'n bãn nɩrsiɛlnã yuugu, bá kãã síì tãnkuurw, nã̀ã wa bá suu-yǝ nǝ̃ wù tǝ Jakarɩja yiiri.

60 Wù ɲũẃ hla, nã̀ã waa wà: «Yi ji ba yì be-yǝ wà Yuhanã.»

61 Cwaabá waa nǝ̃-yǝ wà: «Curo'n sǝ nǝ̃ yir díɛ̀dii ɲimãã nũɔ̃gɩ nã.»

62 Nã̀ã ba bà hǝ̃gãã tiiyǝw nǝ̃ bà nãkrɔnɲã, wà wù-lǝ wu caa bá suu tãnkuurw danii?

63 Jakarɩjaẃ ce bá hã-yǝ nǝ̃ guuyalkuudagǝ, wú fǝ̃ǝ̃ ǹ-yal gɩ̀ drɔ wà: «Wù yir-i, Yuhanã.»

Dɩ́ tugulǝǝ bà min nã.

64 Gùú bǝ̃ǝ̃gɩ dɩngu dàa Jakarɩja nũɔ̃gɩ́ fɩr, wú ba wù waa cɔ̃mmã, nã̀ã ba wù bũũ Dũnnũw.

65 Gbǝrsǝrɩ́ blǝ bà jirataaba min, nǝ̃ Suude yiɛ'n tãnũn'n liɛntaa yo, bà min bá ba bà taa-dǝ bá ja bà ɲĩɛ̃.

66 Bàá nǝ̃n nṹɔ̃́ cãwan díɛ̀, bà min bá ɲãl dɩ̀ nã bà hiɛga nã, nã̀ã ba bà waa wà: «Tãnkuur wáà, wù ji ba bii codũl-i?»

Sulammã nã, Yitii'n nãkruɔgɩ̀ yáá wù drɔ.

Jakarɩjaẁ ba wù hiil Dũnnũ tammã nã

67 Dũnnũ Yuflǝẃ juo dii cãwanĩɛ̃ gáà, tãnkuur'n tǝ Jakarɩja nũɔ̃gɩ nã wà:

68 «Jówà yí bũũ Yitiiw, Isɩrayɛl Dũnnũw, wù mãã wù júó wù ji pɛ wù bluuba nã, nã̀ã hũɔ̃-ba ǹ-nǝ̃nǝ̃ǝ̃.

69 Wù tĩ́ɛ̃lã́ Kortiigǝ̃ngãdiɛ, wú hlǝ wù mããcier Dawuda nũɔ̃gɩ nã, wú ba wù ji hillaa yì nã.

70 Dũnnũẁ yáá wùu ta wù tanhiilaaba nã fufodii, bàá mãã wùu hiil-ba bà dǝ, ǹ-juo tu dɩ̀-lǝ dɩ̀-i,

71 wà wu ji hũɔ̃ yì min yì ɲããtaaba saa, nǝ̃ yì cɔ̃mmã̀ mãã mã̀ã bla bàá nã, wú hiil-yáà bà nãkrɔnɲã nã.

72-73 Nǝ̃ Dũnnũ ɲinɲã mãã wù yáá wùu ɲũɔ̃ twammã nǝ̃ yì vũnvũɔ̃ Ibramãẁ ɲã̀ cɔ̃mmã nã, wù sáa sĩĩnǝ̃ǝ̃ ɲã̀ nã, wù júó ǹ-ji ba wù ce ɲã̀-i, ǹ-ba wù pɩgaa yì vũnvãnããba nǝ̃ wù kusufɩnfaagu.

Wù yáá wùu waa dɩ̀-i wà:

74 “Wù ji hiil yì min yì ɲããtaa'n nãkrɔnɲã nã, yí da ǹ-ba yì ce mããcemmã yì hã-yǝ yì hiɛ nã,

75 ǹ-ba wùú saa yì dǝ, nã̀ã ba yì wáà sũɔ̃lɩmmã nã Dũnnũ hlũũgɩ nã, fuwɔ ǹ-ji ta ǹ-ga ku.”»

76 Jakarɩjaẃ ba wù waa hlo wà: «Tãnkuurblɩ yíi mãã ǹ húulá nnĩĩ, ǹ ji ta Yitii yiga nã, ǹ-ga ba ǹ-tɩgɩnǝ̃ǝ̃ wù hlũũgɩ nã.

Gùú cíé, bá ba bà ji ba bà be-n wà Drɔ-Dũnnũ tanhiil.

77 Nǝ̃ ǹ ji pɩgaa ǹ-ja wù bluuba wà wú naa wù jo wù ji ce bà gaacĩɛ̃ya'n dũndɔw, ǹ-da ǹ-kor-ba.

78 Yì Dũnnũ hujãn'n sɔ̃lli, nǝ̃ wù kusufɩnfaaguu cíé wú ba wù ji tĩɛ̃ gbɩgbaamã́ hlǝ drɔguu ǹ-juo suu yì nã, nã́ã́ bǝ̃ǝ̃'n pal-i,

79 ǹ-juo hiil gbɩgbaamã ǹ-hã bàá nǝ̃n mãã bàa jiraa dudũũmã nã, nã̀ã ba kúú'n gbǝrsǝrɩ nã.

Nã̀ã fǝ̃ǝ̃ ǹ-dii yì min hyasɩrãgǝ'n hlũũgɩ nã.»

80 Tãnkuur-lǝ, wú ba wù vǝ̃ǝ̃, wù yigagɩ́ ba gɩ̀ kaalaa.

Wú juo maar ǹ-kãã ba jerkwaarɩ nã, fuwɔ ǹ-ji hi gùú yuuguu mãã wù jáa pɩgaa wù hla, ǹ-ja Isɩrayɛl bluuba.