Mãtiyew 16

Farisĩɛ̃bà waa nǝ̃ Yesuw wà wú ce cɔ̃nnuromdamã ǹ-ja-ba

Yuudagǝ, Farisĩɛ̃daba nǝ̃ Saduusɩbà yáá bàa suro ǹ-kã Yesuw nãã wà ba kãã dǝ̃ǝ̃-yǝ.

Bà gáa kã, bá waa nǝ̃-yǝ wà: «Ce cɔ̃mdamã́ hlǝ Dũnnũw nãã, mã̀ã́ mãã mã̀ pɩgaa wù fãngããgu yí ne.»

2 Yesuẃ waa wà: «[Bǝ̃ǝ̃gɩ-ń ba gɩ̀ jãn gùú bǝ̃ǝ̃gu mãã, ɲi-ń ne Dũnnũ yigagu ǹ-da-gǝ ciyɛ̃, ɲí waa wà: Dũnnũẁ síì nɔ̃, kuu'n yigagɩ̀ ji saa.

3 Nǝ̃ ɲi-ń suro taajãlũũ'n nũɔ̃gɩ nã, ǹ-da Dũnnũ yigagu blĩĩ, ɲí waa wà: Dũnnũẁ ji nɔ̃ jimããgu.

Bii cíé ɲí ba ɲì fǝ̃ǝ̃ Dũnnũ yigagu ɲì buruɔ gɩ̀ nã, nǝ̃ ɲi sǝ̃n fǝ̃ǝ̃ dìí mãã dɩ̀ ce kuɔkuɔgu.]

4 Kuɔkuɔtaabà blárá ǹ-car, bà sǝ bàa ba yalntaaba nǝ̃ Dũnnũw!

Bà caa mǝ̃́ ce cɔ̃mdamã ǹ-pɩgaa-ba.

Nǝ̃ cɔ̃m'n síì ce ǹ-pɩgaa-ba nã́ã́ Dũnnũ tanhiil Sonasɩ cɔ̃mmã̀ cíé gùú tuugu sǝ.»

Wù gáa waa dɩ̀-lǝ, wú ta nǝ̃ bá ba.

Farisĩɛ̃ba nǝ̃ Saduusɩba leviirw

(Markaw 8.14-21)

5 Yesu duunãtaabà gáa ba bà huɔl bà maar lwaakɩnkan'n huɔlɩmmã nã, bá sĩĩnǝ̃ǝ̃ bà sáa tuu burw.

6 Yesuẃ fǝ̃ǝ̃ ǹ-waa nǝ̃-ba wà: «Níyà!

Mǝ̃́garà ɲí blǝ ɲì hla nã nǝ̃ Farisĩɛ̃ba nǝ̃ Saduusɩba leviirw.»

7 Wù duunãtaabá fǝ̃ǝ̃ ǹ-ba bà waa nǝ̃ bà ɲĩɛ̃ wà: «Yi mãã yì sáa tuu burw gùú júó nǝ̃ díɛ̀dɩ min.»

8 Yesuẁ gáa fǝ̃ǝ̃ dɩ̀ nã, wú waa nǝ̃-ba wà: «Ɲì cɔ̃nhũɔ̃gǝgɩ̀ kóllá ǹ-car.

Danii ɲi ba ɲì waa-dǝ nǝ̃ ɲì ɲĩɛ̃ gɩ̀-lǝ gɩ̀ tammã wà ɲi mãã ɲi sáa tuu burw?

9 Ɲi sáa fǝ̃ǝ̃ dɩ̀ yuugu yugo yugo-ì?

Ɲi búrúɔ gùú burbiiga ndiiga nã mãã ǹ-hã cwa tonnũɔ̃sɔ̃ trãngwaahǝ̃ǝ̃l bà ndiiba^a (5 000), ɲi sĩ́ĩnǝ̃́ǝ̃ gà cɔ̃mmã nã-ì?

Nǝ̃ ɲi túulá gùú nugoyiinɲãã mãã ǹ-ta gɩ̀ yuugu, ɲi sĩ́ĩnǝ̃́ǝ̃ ɲã̀ cɔ̃mmã nã-ì?

10 Ǹ-pya nã, ɲi búrúɔ gùú burbii nɩrhǝ̃ǝ̃lw nã ǹ-hã cwa tonnũɔ̃sɔ̃ trãngwaahǝ̃ǝ̃l bà nnǝ̃ǝ̃ba^b (4 000), ɲi sĩ́ĩnǝ̃́ǝ̃ wù cɔ̃mmã nã-ì?

Nǝ̃ ɲi túulá gùú gaayiinɲãã mãã ǹ-ta gɩ̀ yuugu, ɲi sĩ́ĩnǝ̃́ǝ̃ ɲã̀ cɔ̃mmã nã-ì?

11 Ɲi cíé danii nã̀ã ba ɲì sáa fǝ̃ǝ̃ wà mǝ̃n sǝ̃n waa bur cɔ̃m sǝ nǝ̃-ɲã́ã̀.

Mǝ̃́garà ɲí blǝ ɲì hla nã nǝ̃ Farisĩɛ̃ba nǝ̃ Saduusɩba leviirw!»

12 Gɩ̀ sùɔ́gɩ nã, wù duunãtaabá fǝ̃ǝ̃ ǹ-fǝ̃ǝ̃ wà wu sǝ̃n wa bá blǝ bà hla nǝ̃ bur leviir sǝ, nǝ̃ wú wa bá blǝ bà hla nã nǝ̃ Farisĩɛ̃ba nǝ̃ Saduusɩba kalɩm-i.

Piɛrẁ waa wà Yesuw-i Kɩrsaw

(Markaw 8.27-30 ; Lukaw 9.18-21)

13 Yesubà yáá bàa kã gɩdagǝ nã Filipɩ lǝ'n yiɛguu mãã bà be-gǝ wà Sesaare yiɛ.

Wú kãã yugu wù duunãtaaba wà: «Cwaabà wa halǝmblǝ-i nǝ̃ Curonbiɛ mã́ã̀?»

14 Bá siɛ-yǝ wà: «Badaabà wa Yuhanãw mãã wù yáá wù ɲĩɛ̃ cwaa-i, badaabà wa, Dũnnũ tanhiil Eli-i, badaaba wa Dũnnũ tanhiil Seremi-i, badaaba-lǝ bà wa Dũnnũ tanhiildiɛ-i nǝ̃-n.»

15 Yesuẃ waa wà: «Nǝ̃ ɲimãã-lǝ, ɲi wa halii nǝ̃-m?»

16 Simɔ̃ Piɛrẃ waa wà: «Yíǹ-lǝ yíi-i Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo, nã̀ã ver ǹ-ba Dũnnũw mãã nũmǝ̃nãw, wù bíɛ́w.»

17 Yesuẃ waa wà: «Sonasɩ bíɛ́ Simɔ̃ yíì, ǹ yuugɩ̀ dwállá, nã̀ã wa ǹ wáalá dìí mãã nnĩĩ, curo'n blɩ'n sáa pɩgaa-n nǝ̃-dǝ nǝ̃ mǝ̃̀ Tǝ Drɔ-Dũnnũw pɩ́gará-n nǝ̃-dǝ.

18 Piɛr mǝ̃n waa nǝ̃-n wà ǹ yir'n yuugɩ-i wà tɩntãn.

Mǝ̃̀ ji fũũ Igɩlisɩ taa'n kuruɔgu, gùú tɩntãndi drɔ-i.

Nǝ̃ kúú'n fãngããgɩ̀ síì gbǝ̃ǝ̃ ǹ-hi bà nã.

19 Mǝ̃̀ ji hã-n nǝ̃ Dũnnũ yuuntasǝ'n kanɩgabiiga: nǝ̃-ń hla dìí mãã ɲũũrũũgu níɛ́ nã, bà ga hla-dǝ drɔgu; nǝ̃-ń hũɔ̃ dìí mãã ɲũũrũũgu níɛ́ nã, bà ga hũɔ̃-dǝ drɔgu.»

20 Nã̀ã waa dɩ́ gbǝ̃ǝ̃ nǝ̃-ba wà ba báa waa-dǝ nǝ̃ curo wà wɩ̀-i Kortiiw mãã Dũnnũẁ plã wù nũɔ̃gu wà wu ga tĩɛ̃ wú jo.

Yesuẁ waa wù kuugu nǝ̃ wù pĩĩm'n cɔ̃mmã

(Markaw 8.31–9.1 ; Lukaw 9.22-27)

21 Ǹ-du nã gɩ̀-lǝ gɩ̀ bǝ̃ǝ̃gu, Yesuẃ du nã ǹ-ba wù waa nǝ̃ wù duunãtaaba wà gɩ saa wú kã Serusalɛmgu, nǝ̃ vũnvãnããba nǝ̃ Yahudyaba puruɔntaa'n yuntaaba nǝ̃ Musa hlũũ'n yuntaabá ywar-yǝ piyɛ̃, nã̀ã ko-yǝ wú ku.

Nǝ̃ gɩ̀ bãnɲã siɛlnã yuugu, wu ji nĩĩ.

22 Gɩ̀-i, Piɛrẃ fǝ̃ǝ̃ ǹ-ce bá jii ǹ-hiraa bà dǝ, ǹ-ba wù gãnãã nǝ̃-yǝ wà: «Yitii, Dũnnũw báa ya dɩ̀-lǝ dɩ́ ce; talalla, dɩ̀-lǝ dɩ̀ síì hi-n ǹ-da.»

23 Nǝ̃ Yesuẃ yiil ǹ-waa nǝ̃ Piɛrw wà: «Sɩtãn yíì, ba ǹ hal mǝ̃̀ nãã!

Ǹ caa ń ce mǝ̃́ ver furũũ-i.

Nã̀ã wa ǹ kãnɩmmã sǝ sùɔ́gɩ dɩn nǝ̃ Dũnnũ mǝ̃gãmmã, ǹ kãn cwaa'n tam-i.»

24 Gɩ̀ furũũgɩ nã, Yesuẃ waa nǝ̃ wù duunãtaaba wà: «Wùú nǝ̃n ba wù caa wú duu mǝ̃̀ nã, wú ya wù hla'n cɔ̃mmã́ ba, nã̀ã hũɔ̃ ywaruugu, nã́ã́ gùú tiiw mãã wùu tuu wù gbǝl'n daagu ǹ-ba wù duu mǝ̃̀ nã.

25 Sulammã nã, gùú tiiw nǝ̃n ba wù kaal wù hla'n yuugɩ nã, wùú kuuguu ji guu nã.

Nǝ̃ gùú tiiw mãã wu-ń hũɔ̃ kuugu mã́ã cɔ̃mmã nã, wùú ga da fɩraa nũmǝ̃nãsǝri.

26 Curow-ń da cuu ɲinɲã min, nǝ̃ wù yuugɩ guu nã, gɩ̀-lǝ gɩ̀ ji pyar bii dugɔ-i wù saa?

Curo yíǹ ji gbǝ̃ǝ̃ ǹ-sǝ̃ǝ̃ ǹ yuugu nǝ̃ bii Dũnnũw saa?

27 Curonbiɛẁ ga jo nǝ̃ wù mɛlɛgɛba wù Tǝ yuuntasǝ'n gbɩgbaamã nã.

Wu-ń jo, wù ji pã curo wo curo ǹ-vaa nǝ̃ wù mããcemmã.

28 Yáalà mǝ̃́ waa sulammã nǝ̃-ɲã́ã̀, ɲimãã mãã dìɛ kuɔkuɔgu, dɩ̀ káaláa badaabà síì hi ǹ-kurǝǝ, nã́ã́ ba sáa da Curonbiɛẁ jo wù yuuntasǝrɩ nã.»