Mãtiyew 17

Yesu yiga'n cinɩmmã

Bãn nãndien gɩ̀ furũũgɩ nã, Yesuẃ ce Piɛrw, ǹ-pya Yakuba nǝ̃ wù hǝ̃ǝ̃ Yuhanãw nã, nǝ̃ wùú nǝ̃ wù hla, bá suro ǹ-kãã yugo tãnũdɩdaalaadagǝ nã, bà dǝ.

2 Yesuẁ cínnã́ gùú sùɔ́gɩ-i bà yinɲã nã, wù yigaguu juo ba gɩ̀ caalaa nã́ã́ bǝ̃ǝ̃-i, wù kuulanãmbá juo pesǝ fuwɔ ǹ-ba bà caalaa bà blǝ yinɲã nã́ã́ siɛtɩ gbɩgbaam-i.

3 Ǹ-ji paa ǹ-ne ǹ-da Musaba nǝ̃ Eliw bá juo hillaa bà nã ǹ-kãã ba bà waa cɔ̃mmã nǝ̃ Yesuw.

4 Gɩ̀-i, Piɛrẃ fǝ̃ǝ̃ ǹ-waa nǝ̃ Yesuw wà: «Yitii, yi saa yí ba dìɛ níɛ̀-i.

Yi ji sa kuɔyaga siɛlga, dɩ̀ dɩndɩ́ ba yíi dǝlli, dɩdaarɩ́ ba Musa dǝlli, nǝ̃ dɩ̀ diindaarɩ́ ba Eli dǝlli.»

5 Cãwandɩ̀ sáa ji tã wù nũɔ̃gɩ nã, yiiluudaagɩ̀ jo ǹ-ji suu bà nã, gɩ̀ caalaa.

Cãwandaarɩ́ juo ba dɩ̀ hlǝ yiiluu gúɔ́ kusunã wà: «Mǝ̃̀ bíɛ́ cituublɩ wɩ̀-i nnĩĩ, wù cɔ̃mmã̀ dwal mǝ̃̀ nã ǹ-car.

Bláà ɲì nɔ̃ ɲì hã-yǝ!»

6 Duunãtaabà gáa nɔ̃ cãwanĩɛ̃ gáà nnĩĩ nã, gbǝrsǝrɩ́ mǝ̃gaa ǹ-blǝ-ba dugɔ, fuwɔ bà min bá duruu ǹ-curǝǝ.

7 Gɩ̀-i, Yesuẃ kuganãã bà nãã ǹ-kãã piɛ wù nãkruɔgu bà nã, nã̀ã waa wà: «Bláá ya gbǝrsǝrɩ blǝ-ɲã́ã̀; sórrà!»

8 Bá ciir bà yunɲã, ǹ-da Yesuw nǝ̃ wù dɩndɩn.

9 Bà gáa ba bà hɩr tãnũũgu, Yesuẃ fǝ̃ǝ̃ ǹ-waa nǝ̃-ba wà ba báa taa Dũnnũw jíɛ́-ba nǝ̃ dìí mãã ǹ-ja curo, fuwɔ Curonbiɛw ga nĩĩ ǹ-hlǝ kuugɩ nã!

10 Gɩ̀ sùɔ́gɩ nã, wù duunãtaaba waa wà: «Nǝ̃ danii Musa hlũũ'n yuntaabá wa Dũnnũ tanhiil Eli saa wú jo haasǝ?»^a

11 Yesuẃ siɛ-ba wà: «Sulam-i, Eli saa wú ver ǹ-jo hlo ǹ-juo ce cɔ̃mmã min mã́ saa ǹ-ba mã̀ tantammã nã.

12 Nǝ̃ mǝ̃̀ waa-dǝ nǝ̃-ɲã́ã̀: Eli júó ǹ-tã.

Wù júó, bà sáa fǝ̃ǝ̃ wà wɩ̀-i, bá blǝ-yǝ ǹ-vaa nǝ̃ bà kusuugu.

Curonbiɛ yo bà ji ce wú ywar nĩĩgɩ-i.»

13 Gùú sùɔ́gɩ-i, wù duunãtaaba fǝ̃ǝ̃ ǹ-fǝ̃ǝ̃ wà wú waa Yuhanãw mãã wù ɲĩɛ̃ cwaaba, wùú cɔ̃m-i nnĩĩ nã.

Yesuẁ buɔ tãntũɔ̃ẁ yáá wù ywar gùú pũmpɩrw

(Markaw 9.14-29 ; Lukaw 9.37-43)

14 Bà gáa hiirǝǝ tãnũũgɩ nã ǹ-juo hi cocindii mãã gùú sùɔ́gu, biɛdiɛ wáà ǹ-kuganãã, ǹ-kãã kuulǝǝ Yesu yigagɩ nã nã̀ã waa wà:

15 «Yitii, ne mǝ̃̀ bíɛ́'n hujãndi sɩndiɛkũmntii-i, mã̀ ywar-yǝ ǹ-car.

Mã-ń suro wù nã nnĩĩ, bǝ̃ǝ̃daagu, wù duruu ǹ-jãn dǝ̃ǝ̃m-i, bǝ̃ǝ̃daagu, wú duruu ǹ-jãn hũmmã nã.

16 Mǝ̃̀ júó nǝ̃-yǝ ǹ duunãtaaba nãã, nǝ̃ bà sáa gbǝ̃ǝ̃ ǹ-buɔ-yǝ.»

17 Gɩ̀-i, Yesuẃ dii ǹ-hiil wù yalli wà: «Kuɔkuɔ cobaliɛ ɲimãã, ɲi sǝ̃n gǝǝ ɲì hũɔ̃ mǝ̃̀ cɔ̃mmã.

Ɲi ne wà mǝ̃ ji hǝ̃ǝ̃sǝ ɲì sǝ̃ǝ̃nã ǹ-tuu ɲì yuunã cɔ̃mmã-ì?

Yíi jo nǝ̃ ǹ bíɛ́ẃ nhlíɛ̀ nã.»

18 Bá jo nǝ̃ pũmpɩrblɩw.

Tãntũɔ̃ yáá wù ce-yǝ nǝ̃ hlɔm mã́ã̀.

Yesuẃ nãlĩɛ̃ tãntũɔ̃w nã wà wú ta ǹ-hlǝ pũmpɩrblɩw nã.

Tãntũɔ̃ẃ fǝ̃ǝ̃ ǹ-hlǝ pũmpɩrblɩw nã, wú paa ǹ-buɔ.

19 Gɩ̀-i, duunãtaaba fǝ̃ǝ̃ ǹ-kuganãã ǹ-kãã jii ǹ-yugu Yesuw bà dǝ wà: «Bii cíé hãmĩĩ ba yi sáa gbǝ̃ǝ̃ ǹ-ɲǝ̃ǝ̃ tãntũɔ̃ wáà?»

20 Yesuẃ siɛ-ba wà: «Ɲi sǝ ɲĩ̀ĩ mǝ̃gaa ǹ-hũɔ̃ mǝ̃̀ cɔ̃mmã gùú cíé.

Yáalà mǝ̃́ waa sulammã nǝ̃-ɲã́ã̀: halle yíi mãã ǹ hũɔ̃mã-ń ba nã́ã́ fom blɩ-i yo, cɔ̃m'n síì ywar-n, ǹ ji ba nǝ̃-ń ce ń gbǝ̃ǝ̃ ǹ-waa nǝ̃ tãnũũ gúɔ̀ wà gɩ́ suro ǹ-kã yergaa, ǹ-da dìi ce-i.

21 [Nã̀ã waa tãntũɔ̃ wáà tuugu, ɲi-ń ba ɲì sáa dii sũũ nã̀ã cirǝ̃ǝ̃ Dũnnũẁ, ɲì síì gbǝ̃ǝ̃ ǹ-ɲǝ̃ǝ̃-yǝ.»]

Yesuẁ ver wù waa wù kuugu nǝ̃ wù nĩĩm'n cɔ̃mmã

(Markaw 9.30-32 ; Lukaw 9.43-45)

22 Yuudagǝ, Yesuw nǝ̃ wù duunãtaaba yáá bà waaraa Galile yiɛ'n kusuugɩ nã, Yesuẃ ba wù waa nǝ̃-ba wà: «Bà ji dii Curonbiɛw cwaa'n nãkrɔnɲã nã,

23 bá ko-yǝ.

Nǝ̃ bãnɲã siɛl wù kuu furũũgɩ nã, wu ji nĩĩ.»

Wù duunãtaabà gáa nɔ̃ dɩ̀-lǝ, bà yigasǝrɩ́ juo mǝ̃gaa ǹ-ɲǝ̃ǝ̃.

Nãn'n cɔ̃mmã

24 Bà gáa hi Kapɛrnã lǝri, bàá mãã bà hũɔ̃ Dũnnũ bũũsuɔ'n nãndi bá kuganãã ǹ-yugu Piɛrw wà: «Ɲi kaltiiẁ pã Dũnnũ bũũsuɔ'n nãndi-ì?»

25 Piɛrẃ siɛ-yǝ wà: «Ũwũũ!»

Piɛrẁ gáa ba wù jãn, Yesuẃ tuu cãwandi dĩɛ̃lãmmã nã, ǹ-ba wù waa nǝ̃-yǝ wà: «Simɔ̃, yíǹ saa, haba plã́ã̀ nãndi bà hã cuu wáà yuntaaba?

Bà tãnkuuraa plã́ã̀-dǝ dàa nǝ̃ǝ̃nĩĩtaa plã́ã̀-dǝ?»

26 Piɛrẃ waa wà: «Nǝ̃ǝ̃nĩĩtaa plã́ã̀-dǝ.»

Yesuẃ waa wà: «Gɩ̀-lǝ bà tãnkuuraa'n nũɔ̃gɩ sɩraa nãn'n pãllɩ nã; nnĩĩ sǝ-ì?

27 Nǝ̃, mǝ̃̀ sǝ̃n caa yí ce Dũnnũ bũũduu'n yigantaaba ji ver furũũ.

Kã lwaakɩnkandɩ nã n ga dii hablɩri, nǝ̃-ń blǝ gùú tɩtrodĩɛ̃lw mãã, ń gbaar wù nũɔ̃gu, ǹ ga da worblɩdarǝ, ń hiil-dǝ n ga pã mǝ̃n nãndi nǝ̃ yíi yo ǹ dǝlli.»