SAKARIA
Mantû ma îbuku rîrî
Kîroria Sakaria baarî amwe na kîroria Agai gatîgatî ka Ayaundi ngiri mîrongo îtaano kuuma ûkombooni bwa Mbabironi. Mûnene Sairas nwe aatûmire acooka Njerusaremu mwankaani wa 538 MKA na mawatho ma gwaka Nyomba ya Mwathani. Ngûgî ya Sakaria ya ûroria bûra bwambîîrie mûthiani wa mwanka wa 520 MKA bwarî na mworooto wa gûûkîîria antû mantûûni ma gîkîrundu na kûbeekîra wîru barîîkia gwaka kaîrî Nyomba ya Ngai. N'ûntû bwa gwîkanîra wîru kwa Agai na Sakaria Nyomba ya Ngai n'yarîîkire gwakwa kaîrî mwankaani wa 515 MKA ruungu rwa ûtongoria bwa Serubaberi na Njosua mûthînjîri ûra mûnene wa Ngai.
Gîtûmi kîa îbuku rîrî i kûguûra mûbango wa Ngai wa ntugû ira ikaaya kîrî antû baake, mûbango ûra wekîîrîîtwe watho atî beerîre na bagwatanîre amwe na barîîkie gwaka kaîrî Nyomba ya Ngai (8:9-17). Îbuku rîa Sakaria rîrî na bioneki binaana bia kî ûroria biathingatîîrwa i ntûmwa imbiingî cia ntugû ikaaya, na rîrî na maûroria maingî îgûrû rîa Kîrîstû (kwa ngerekano, 3:8-10; 6:12-13; 9:9-10; 10:4; 11:12-13; 13:7; 14:4). Îbuku rîrî rîrigîîtie na kwarîîria mantû ma ûroria bwa gûcooka kwa Yiesû na nthîgûrû kûgiitîrwa îgamba rîa mûthia i Ngai.
Gwookubî îbuku rîrî rîkari ûûgû:
Ntûmwa cia nkaanua na wîrîgîîro (1:1-8:23)
Atûûri ba Isiraeri kûgiitîrwa îgamba (9:1-8)
Ûthii na mbere na ûkiri magiitaani mara makaaya (9:9-14:21)