Kîoneki îgûrû rîa Njosua mûthînjîri ûra mûnene wa Ngai
3
1 Rîru aambonia Njosua mûthînjîri ûra mûnene wa Ngai arûûngi mbere ya Mûraîka wa Mwathani, na Saitaani arûûngi rûteere rwa mûraîka ûyu njara ya ûrîo amûthitaanga. 2 Mwathani eera Saitaani, “Mwathani arookûgondokera, woû nkoma! Mwathani ûra athuurîîte Njerusaremu arookûgondokera woû Saitaani! Muntû ûyû akari ta kamûtî ga kûbîa katharîîtwe kuuma mwankiini.” 3 Kagiitani gaku Njosua aarûngi mbere ya mûraîka eekîrîîte nguo ciarî na rûko. 4 Mûraîka eera antû bara baarûûngi agu, “Mûruteeni nguo inu eekîrîte irî na rûko.” Rîru eera Njosua, “Ngûkûrutarutîra wîyia bwaku bûra ûkûrî nabu na ngakûnenkera nguo ciaimbia gwîkîre.” 5 Abeera bamwoge kîremba kîîtheru kîongo. Kwoogu bamwoga kîremba kîîtheru na bamwîkîra nguo Mûraîka wa Ngai arûûngi waagu.6 Mûraîka wa Mwathani eera Njosua, 7 “Mwathani Mwene Inya ariuga ûûgû, ‘Wathingata njîra ciakwa na waathîkîra mawatho maakwa, rîru ûgaatuîka mûnene wa Nyomba yakwa, na waathane biaragooni biayo, na ngakûûmbithia kûthûngîra ngûgîîni yakwa wa ta baba barûûngi aaga.
8 “ ‘Thikîîria, woû Njosua mûthînjîri ûra mûnene wa Ngai na biû athînjîri bara bangî bûrutaga ngûgî n'we, biû bûrî rwano rwa mantû meega mara makaaya, n'ûntû nkaareeta mûruti ngûgî wakwa ûgwîtwa “Rwong'i.” 9 Raitha wone, nkwaiga iiga rîa goro mbere ya Njosua, iiga rîru rîmwe rîrî na nteere mûgwanja. Na ngaatema maandîko îgûrû rîarîo, na nkaarutaruta meeyia ma antû ba nthîgûrû îno na ntugû îmwe. I bu Mwathani Mwene Inya akuuga. 10 Ntugû înu, woora ûmwe wa cienu akaagwata mûtûûri wake ûgeni bakare ruungu rwa mûcabiibû kana mûkûyû. I bu Mwathani Mwene Inya akuuga.’ ”