AGAI
Mantû ma îbuku rîrî
Riîtwa Agai riumanîîtie na mûgambo ûra uugaga “Kîatho.” Na kwoogu waûmba kwîgua aaciarirwe îgiita rîa kîatho. Aaroragia îgiita rîra antû ba Isiraeri baarî bagûcooka kuuma naara baarî mîgwate Mbabironi. Rîru i rîo Serubaberi aarî ngabana wa Njunda na Njosua arî mûthînjîri ûra mûnene wa Ngai. Iroria bingî bira biaroragia îgiitaani rîru i Sakaria na Maraki.
Îbuku rîrî, rîrî na moororia mana. I rîonanîîtie bwega ntugû yongwa, mweri na mwanka wa moororia mama monthe rîra Ndariasi aarî mûnene wa Pasia.
Kîrî ntûmwa ya mbere Ngai n'akûgondokera antû n'ûntû bwa gwaka nyomba ciao kaîrî, îndî Nyomba ya Ngai yoo nwaka îrî mbombokanu. Na gîku i kîo gîtûmi mînda yao îkuuma maketha maakai. Kwoogu Ngai arîbeera nwa mwanka banjîîrie gwaka nyomba yake kaîrî. Serubaberi, Njosua na antû bonthe baathîka na banjîîria gwaka Nyomba ya Ngai kaîrî.
Kîrî ntûmwa ya ciîrî, Ngai arîîra Serubaberi na Njosua batigaakue nkoro. Ngai wengwa akoona into bionthe bira biega kuuma mîgongooni îra îngî yonthe bikûûya na akaûyûria nyomba yake na ûkumio. Ûkumio bwa nyomba îno yake ûkeegua bûrî bûnene nkûrûki ya bwa îra ya mbere.
Na kîrî ntûmwa ya ithatû Ngai arîîra antû atî igongwana bira bamûrutîrîîte birî na mûgiro. Na i kîo maketha maao meegagua marî maakai. Îndî n'ûntû ibanjîîrîîtie gwaka Nyomba ya Mwathani kaîrî, Ngai akabathaarima abaneenkere maketha maingî.
Kîrî ntûmwa ya inya na ya mûthia, Ngai arîarîria Serubaberi ngabana wa Njunda. Ngai ariuga akeenyangia anthû ba Serubaberi na n'amûthuurîîte aathana riîtwani rîake.
Îbuku rîa Agai rîrîtûrutana wa ta bûra Yiesû aarutanîre arutwa baake atî, “Îgûrû rîa mantû monthe ceriani ûnene bwa abaagu ûra arî îgûrû na rûthagaani kwenda wake, rîru bira bingî bionthe bûrî bata na bio akabwa.” (Mathayo 6:33)
Gwookubî îbuku rîrî rîkari ûûgû:
Mwathani aathana nyomba yake yaakwe kaîrî 1:1-9
Agai aaromba athînjîri ba Ngai ûkûrû 1:10-11
Antû baathîkîra Ngai 1:12-15
Ûkumio bwa Nyomba ya Ngai 2:1-14
Mwathani aapa antû baake wîrane atî akabathaarima 2:15-19
Wîrane bwa Ngai kîrî Serubaberi 2:20-23