Meeyia ma Njerusaremu na gûkûûrwa kwayo
3
1 Njerusaremu îkoona thîîna,taûni ndemi na ya rûko îra iinyagîîria antû baayo bongwa.
2 Gûtirî we îthikagîîria,
îtirî nkaanua,
îtiîtîgagia Mwathani
kana îthengeera Ngai wayo.
3 Anene baayo
bakari ta cimba îkûgondoka,
agambithania baayo barî na îtanûka ta ncûûgi îrî na yûûra,
îra îrîîyaga gantû konthe ûkeegua rûkîîrî ûtiîthîra nwa kaîndî.
4 Iroria i ndagi na n'arongo,
athînjîri beekagîra Nyomba ya Ngai mûgiro
na bagakoombia watho bwa Ngai kaingo beeteethia.
5 Mwathani ûra arî taûni înu n'ûmûtheru;
atirûthaga mabîtia.
Wa kîra ntugû n'agiitaga îgamba bûra kûbatîîrue,
na gûtirî ntugû atarûthaga ûgu,
Îndî wana gûkari ûgu,
antû bara batarî batheru bakaraga bakîrûthaga bûra gûtaagîîrîte na batiîgagua nthoni.
6 Mwathani ariuga ata rî,
I nthirîîtie mîgongo,
i mbomboranîtie nthingo ira ciirigîrîîte taûni ciao
amwe na ibayo biacio,
tûbarabara natu i tûûru;
gûtirî we ûkûrûkagîîra tu,
taûni niimbomboranie,
na gûtirî we ûtigeere.
7 Ndauga, “Na mma Njerusaremu îgaantîîya
îîtîgîîrie kûrûngwa kaingo
ûkaro bwa yo bûteenyangua
kana îkaanûkia rîakwa rîmîîyîîra.”
Îndî yaagîa na mpwî cia kûthi na mbere
na mûkarîre woora mûthûûku.
8 Mwathani ariuga, kwoogu mbeteeraani,
eteera ntugû îra nkaaya kûthitanga mîgongo.
I mbangîîte kwîthîrania mîgongo na moonene,
kaingo mbonoreria mûthûûro wakwa;
mûthûûro wakwa ûra ûgwankana ta mwanki,
n'ûntû nthîgûrû yonthe îkaathirua i mwanki wa mûthûûro wakwa wa rûriitho.
9 Rîru nkarûngaria rwaria rwa antû kaingo
antû bonthe beeta riîtwa rîa Mwathani
na bamûtûmîkîra beekîrîîte mûtî gîturo kîmwe.
10 Kuuma ngongo cia miuro ya Kusi,
bara bangoongaga, antû baakwa bara banyageere,
bakaandetera igongwana.
11 Ntugû înu, bûtiigîa îgi,
n'ûntû bwa mantû mara bûrûthîîte bwauna maathana maakwa,
nkaarutaruta muntû wonthe ûra mwîkumia
na ûra mûng'entu aume oogo,
na bûtikooro bwîkumîria kîrîmaani gîakwa kîîtheru.a
12 Îndî ngaatigaria antû bara benyiîtie na babooreeru,
bara baayaga kwîbitha kîrî niû.
13 Matigari ma antû ba Isiraeri batiibîtanagîria,
batiirongoanagia na batienanagia,
bakaathi na mbere bwega mûtûûrîreeni wao
na bakaarîîyaga bakamaama banogokeete,
gûtarî we akûbaguayia.
Rwîmbo rwa nkena
14 Inaani antû ba Sayuuni,
bûkîîrie tûyû twenu i gîkeno biû antû ba Isiraeri!
Kenaani na bûgwîrue mûno, biû antû ba Njerusaremu!
15 Mwathani n'akûrutarutîrîte îkaanûkia oogo,
n'arutarutîte anthû baaku bonthe oogo.
Mwathani, mûnene wa Isiraeri, arî gatîgatî keenu,
îîndî gûtirî na gîtûmi gîa gûkuthûka.
16 Ntugû înu antû bakeera antû ba Njerusaremu,
bûtigaakue nkoro, biû antû ba Sayuuni!
Bûtikaamake bwaga inya!
17 Mwathani Ngai wenu arî gatîgatî keenu,
arî na inya ya kûbwonokia,
Mwathani akabûkeneera,
akabûkirakiria na wendo bwake,
akaina na akene n'ûntû bwenu.
18 Nkeebîthîranîria antû bara barî na kîeba
n'ûntû batiûmbaga gûkûngûîra biatho biithuure Njerusaremu,
n'ûntû i beenu na i bainyagîîrua
n'ûntû antû ibabanyûrûûntaga i bûra baregaga kûthi biathooni bibu.
19 Îgiitaani rîru, ngakaanûkia bara babuinyagîîria,
ngaatuunyûkia bionje na mbîthîranie bara banyageere,
nkabaa ûkumio na gîtîîyo gûntû kunthe kûra baarogîa îgi.
20 Îgiitaani rîru, nkabwîthîrania amwe;
na îgiitaani warîru nkabûcookia mûciî;
Nkabwaa gîtîîyo na ûkumio
gatîgatî ga antû bonthe ba nthîgûrû,
bûkeebonera bwingwa bûra ngaatûma mantû meenu mabua,
ûgu i bu Mwathani akuuga.