Mwîto wa kwîrira
2
1 Îî woû mûgongo ûtarî nthoni,îîcookanîîrie,
2 mbere Mwathani agûkaanûkia ta bûra abangîîte,
ririkana ntugû irîkûrûka ta maûngû magûrûkîîtue i ruuo,
mbere mûthûûro wa Mwathani ûmûnene ûkûûyîîra,
mbere ya ntugû ya mûthûûro wa Mwathani îgûkinyîîra.
3 Garûkîraani Mwathani, biû bwinthe bara,
bwînyiîtie biû bwathîkagîra maathana maake.
Rûthaani bûra kûbatîîrue na bwînyiie mbere ya Mwathani,
kwaûmbîka bûkoonokera ciarera
ntugû îra Mwathani akoonania mûthûûro wake.
Îkaanûkia kîrî nthî ira ithiûrûkîîrîîte Isiraeri
Firisitia
4 Gasa îgaatigwa îtarî muntû,
Asikeroni îtigwe îrî îganjo
na antû ba Asindondi bakeengatua mûthenya îkira nyoni
na Ekironi îgaakûûrwa na marindo meene.
5 Bûkoona thîîna biû bûtwîre rûteere rwa îria biû Akerethi.a
Mwathani n'abûgiitîrîîte îgamba biû Kanaani nthîgûrû ya Afirisiti.
Nkabûthiria, na gûtirî nwa ûmwe agaatigara.
6 Nthî îra yenu îrî akubî na îria îgaatuîka rûriî
rûûyûri tûnyomba twa arîîthi
na biaga bia mbûri na ng'ondu.
7 Matigari ma antû ba Njunda bagaatûûra ku,
bakarîîthia ûrîîthi bwao ku,
na bamaamage nyomba cia Asikeroni.
Mwathani Ngai wao akabamenyeera
na akabacookeria ûtonga bwao.
Moabu na Amoni
8 Mwathani Mwene Inya Ngai wa Isiraeri ariuga,
I mbîgîîtue antû ba Moabu na Amoni
bakîruma na kûnyûrûnta antû baakwa,
na gwîkumia bakiugaga bakabatuunya nthî yao.
9 Wa ta bûra ndî Ngai ûra atwîre mwoyo, Mwathani wa Njûûrî
inkûthiîtia atî Moabu na Amoni
bakaathirua ta Sondomu na Ngomoora.
Gûgaatuîka gûntû kwa marinya ma mwonyo na maganjo ma tene na tene,
na makunîkwe i mantuuyia.
Matigari ma antû baakwa makabatuunya nthîgûrû yao.
10 Ûûgu i bu antû ba Moabu na Amoni bagaakaanûkua
n'ûntû bwa wîkumia na kûnyûrûnta
antû ba Mwathani Mwene Inya.
11 Mwathani akabaguayia,
akanyiia ngai cia nthîgûrû yao mwanka ithiranie,
na i rîo mîgongo yonthe îkamûgonga,
wora mûgongo ûrî kwao.
Akusi
12 Wana biû Akusi bûkaathirua
na rûûyiû rwakwa.
Asîîria
13 Mwathani agaakaanûkia antû ba n'egûrû
na athirie antû ba Asîîria
agatûma taûni ya Ninebe îtuîka îganjo,
ng'aarû îtarî rûûyî.
14 Îgaatuîka bantû ara nyamû cia mîthemba yonthe
ya kîthaka ikaamaamaga,
ntuundu igatûûra maganjooni maao ikîaragia irî ndîrîcaani
nkûngûrû igakûyaga irî mwîrîgaani,
Na mîtî ya mîangua îra yaakîîte nyomba ciao yaathirire.
15 Ûgu i bu gûgaakarîka kîrî taûni îra îîkumagîria inya yaayo,
na îkîthûgaanagia îrî mayîîga,
antû baayo bathûgaanagia taûni yao n'yo nene mûno nthîgûrû yonthe,
îndî îgaatuîka îganjo bantû ara nyamû cia kîthaka ikaanogokaga,
ûra wonthe agaakûrûkagîîra oogo,
akaabathekagîîra na mûnaanûko.b