SEFANIA
Ntugû ya îgamba ya Mwathani
1
1 Îno n'yo ntûmwa îra Mwathani anenkeere Sefania mwana wa Kusi, Kusi mwana wa Ngendaria, Ngendaria mwana wa Amaria, Amaria mwana wa Esekia, kagiitaani kara Njosia mwana wa Amoni aarî mûnene wa Njunda.2 Mwathani ariuga ata rî,
I nthiîte kûthiria gîntû kîonthe kîrî nthîgûrû;
3 antû bonthe na nyamû,
nyoni na makûyû.
Ngaatûma mwîyia agwa.
Nkaathiria antû bonthe nthîgûrû, i bu Mwathani akuuga.
4 Ngaakaanûkia Njunda
na antû bonthe ba Njerusaremu.
Nkaathiria matigari monthe meegiî kûgonga kwa Mbaari.
Na gûtirî nwa ûmwe ûkaaririkana athînjîri ba ngai cia ûrongo bara baigongaga.
5 Nkaathiria ûra wonthe arî gûrûgûrû ya nyomba
akîgonga riûa, mweri na nthata.
Nkaathiria kinya bara baangongaga na bakathiîtia na riîtwa rîakwa,
na bagacooka bakathiîtia na riîtwa rîa Moreku.a
6 Nkaathiria bara bagarûkîîte na baatiga kûnthiingata,
bara bataayaga kîrî niû kana bambûûria mbatongoria.
7 Kiraani ki mbere ya Mwathani Mwene Inya
n'ûntû ntugû ya Mwathani îrî akubî.
Mwathani n'akûthuuranîra kûruta antû baake kîgongwana.
Na n'athuurîîte antû bara bakathînja kîgongwana gîku,b
n'akwîthuuranîra kûruta kîgongwana
na n'athuurîîte ageni bara eetîîte
Kîgongwana n'antû baake,
na ageni bara eetîîte, n'anthû baao bara bakaaya kûbakaanûkia.
8 Mwathani ariuga, ntugû înu ya kîgongwana,
ngakaanûkia atongoria na aana ba anene,
na bara bonthe beerutanîîte mîtugo îmîgeni.c
9 Ngakaanûkia bara bonthe baunangaga rwinci bara baiyaga
na bakaûragana kaingo baûyûria nyomba cia aathani baao na into bia gûtaa.
10 Mwathani ariuga, ntugû înu,
bûkeegua kîrîro mwîrîgaani wa Njerusaremu ûra wîtagwa wa Makûyû,
bûkeegua mûkayanîro Mbarî înu ya Ciîrî ya Njerusaremu,
na mûrurumo wa kûthandîkaanga tûrîmaani.
11 Kayaani na bûrîre, biû bara bûtwîre Moritari,
n'ûntû abiacaara beenu bara banene bagaakua
na bara bataraga mbiad bakeenyangua!
12 Kagiitaani gaku nkaathûkia taa mmûrîke Njerusaremu,
ngaakaanûkia antû bara bakari nthî bakîîbîgagua baganîrîîtwe meeyiani,
bara beebîîraga,
gûtirî bu Mwathani agaatûrûtha,
bwega kana bûûthûûku!
13 Ûtonga bwao bûgaatawa,
na nyomba ciao ciomboranue.
Batikooro batûûra nyomba ira bagwaka
kana banyua ndibei kuuma mîndaani ya mîcabiibû îra bakwanda.
14 Ntugû înene ya Mwathani îrî akubî mûno
na îîyîîte na kîrugutû!
Înu îkeegua îrî ntugû ya kînyamaara,
n'ûntû wana acikaarî bara barî ûcamba bakaarîra i kwaga wîrîgîîro.
15 Îkeegua îrî ntugû ya marûrû,
ntugû ya thîîna na gûkua nkoro,
ntugû ya kwomborania na kwînyangia,
ntugû ya mwindu na kûnyamaara,
ntugû îîndumanu. Îkunîkîtwe i matu.
16 Ntugû înu gûkeeguîka tûrumbeta na nkururo cia ndûa cia acikaarî
baithûkîrîîte taûni imbirigîre
na nthingo cia maiga na ciakîrwa ibayo.
17 Mwathani ariuga atarî, Nkaareetera antû kînyamaara mwanka bondaondie ta ntûngi,
i bambîyîîtie,
na îîndî nthakame yao îgeetîga ta rûûyî,
na mainto maao ma nda manyagaarue naagu ta mai!
18 Ntugû îra Mwathani akoonania mûthûûro wake,
fetha na thaabu ciao itiboonokia,
nthî yonthe îkaathirua i mwanki wa rûriitho rwake.
Agakinyithia mûthia nthûti îmwe kîrî kîra ûmwe ûtwîre nthî.