AGAI
Mwathani aathana nyomba yake yaakwe kaîrî
1
1 Ntugû ya mbere ya mweri wa îthanthatû,a mwankaani wa îîrî wa mûnene Ndariasi, Mwathani aatûma kîroria Agai kîrî Serubaberi ngabana wa Njunda, na kîrî Njosua, mûthînjîri ûra mûnene wa Ngai. Serubaberi aarî mwana wa Searitieri na Njosua aarî mwana wa Njeosandaki. Ntûmwa înu yaugaga ata rî:2 Ûgu i bu Mwathani Mwene Inya akuuga, antû baba baugaga, “Kagiita ga gwaka Nyomba ya Mwathani kaîrî ti gakinyu.”
3 Kiugo kîa Mwathani kîaya gûkûrûkîîra kîroria Agai kaîrî gîkîûragia ata rî: 4 I Kagiita keenu biû bwingwa gûtûûra nyomba ira nthongi, rîra nyomba îno ya Ngai îrî mbombokanu?
5 Kwoogu îîndî Mwathani Mwene Inya ariuga ûûgû: Tathûgaaniani bwone bûra mantû meenu magûkara. 6 I bwandire mbeû inyingî, îndî bwaketha bûûkai; bûrîîyaga, bûtabae, bûkanyua, bûtabûûtûge; bûgeekîra nguo, na bûteegue mûrugutîra; na ûra athûkûmaga, athûkûmaga ageekîra mbia mûbukooni ûrî na marumu.
7 Mwathani Mwene Inya ariuga ûûgû: Tathûgaaniani bwone bûra mantû meenu magûkara. 8 Îtiani irîmaani bûreete mîtî na bwake nyomba yakwa kaingo mîkeneera na ngoongwa, i bu Mwathani akuuga. 9 Bwaceriirie bwîrîgîîrîîte into biingî, îndî bwona biikai; na rîra bwabireetire mûciî, ndabibua na mîruke biaûra. I mbi îndî n'ûntû ndûthaga ûgu? Mwathani Mwene Inya ariuga, n'ûntû bwa bûra nyomba yakwa îrî mbombokanu na biû woora muntû augagîria mantû ma nyomba yake.
Agai aaromba athînjîri ba Ngai ûkûrû
10 Gîku i kîo gîtûmi mbura îtaura na nthî n'yo îtaagîa na maciaro. 11 Indaareetire mwathû îgûrû rîa nthîgûrû na irîma. Mwathû ûyu watûma bwaga irio, ndibei, maguta na into bionthe bira biumaga nthîgûrû. Na n'ûntû bwoogu, biû na nyamû cienu bûkaagwa i yûûra. Na ngûgî cienu igaatuîka cia ûtheri.
Antû baathîkîra Ngai
12 Rîru Serubaberi mwana wa Searitieri, na Njosua mwana wa Njeosandaki, mûthînjîri ûra mûnene wa Ngai, na matigari monthe ma antû baathîkîra mûgambo wa Mwathani Ngai wao na biugo bia kîroria Agai, ta bûra Ngai aamûtûmîîte. Na antû baakuthûka Mwathani. 13 Rîru Agai mûtûmwa wa Mwathani, airîra antû ntûmwa îno ya Mwathani îkiugaga, ndî amwe naabi, i bu Mwathani akuuga. 14 Kwoogu Mwathani eekîra nkoro ya Serubaberi mwana wa Searitieri, ngabana wa Njunda, na nkoro ya Njosua mûthînjîri ûra mûnene wa Ngai, na nkoro cia matigari monthe ma antû wîru. Baaya na baaruta ngûgî Nyomba ya Mwathani Mwene Inya, Ngai wao. 15 Na ngûgî yanjîîria ntugû ya mîrongo îîrî na inya mweriini wa îthanthatû wa mwanka wa îîrî wa mûnene Ndariasi.