Ûkumio bwa Nyomba yaimbia ya Ngai
2
1 Ntugû ya mîrongo îîrî na îmwe mweriini wa mûgwanja, Mwathani aanenkera kîroria Agai ntûmwa îno: 2 Arîria Serubaberi mwana wa Searitieri ngabana wa Njunda na Njosua mwana wa Njeosandaki, mûthînjîri ûra mûnene wa Ngai, na matigari ma antû ûbaûrie ûûgû; 3 N'ûû ûtigeere gatîgatî keenu ûra wonire nyomba yakwa îra yarî na mwago ûra wa mbere? Ûkîbuanaania mwago ûyu wa mbere na wa îîndî rî, tika ûyû wa îîndî ûkari ta gûtarî kîo kîrî oogo? 4 Na ûûgû i bu Mwathani akuuga, Îndî îîndî îgîa na inya Serubaberi, na woû Njosua, mwana wa Njeosandaki, mûthînjîri ûra mûnene wa Ngai; na biû bwinthe antû ba nthî îno. Na bûrute ngûgî; n'ûntû ndî amwe naabi, ûûgû i bu Mwathani Mwene Inya akuuga. 5 Kûringana na bûra ndaarîîkanîîre naabi rîra bwaumîîte Miisiri, Kîrundu wakwa akaraga gatîgatîîni keenu. Kwoogu bûtikaamake. 6 Mwathani Mwene Inya ariuga ûûgû: Gatigeere kagiita kaniini mbinainie îgûrû na nthîgûrû, îria na kinya nthî îmbûmo kaîrî. 7 Na nkainainia mîgongo yonthe, kaingo ûtonga bwa mîgongo yonthe bûûya aaga, na mbûyûrie nyomba yakwa na mwago, i bu Mwathani Mwene Inya akuuga. 8 Fetha na thaabu i ciakwa, i bu Mwathani Mwene Inya akuuga. 9 Mwago wa nyomba îno yakwa ûkeegua ûrî mûnene kîrî wa îra ya mbere; Na ûkeegua kûrî na mûtûûrîre ûmwega na ûkiri, i bu Mwathani Mwene Inya akuuga.10 Ntugû ya mîrongo îîrî na inya ya mweri wa kenda, mwankaani wa îîrî wa Ndariasi, Mwathani aneenkera kîroria Agai ntûmwa îno: 11 Ûgu i bu Mwathani Mwene Inya akuuga; Ûriani athînjîri ba Ngai bacookie kîûria gîkî: 12 Muntû ageekîra nyama întheru îthatwani na îthatwa rîru rîgatongithia mûgaate kana mboka, ndibei kana maguta kana irio bia mûthemba woora ûkeegua ûrî rî, ga into bibu bigaatuîka biitheru? Athînjîri ba Ngai nabo baacookia bauga, “Arî.” 13 Agai aacooka aûria, “Muntû arî na mûgiro n'ûntû bwa gûtongithia kiimba, agatongithia gîntû nwa kîmwe kîa bibu rî, ka gîntû gîku gîkaagîa mûgiro?” Na athînjîri ba Ngai baacookia bauga, “Îî gîkaagîa mûgiro.” 14 Rîru Agai aacookia auga, Ûgu i bu antû baba bakari, na i bu antû ba mûgongo ûyû bonthe bakari mbere yakwa, na into bira biumanagia na ngûgî cionthe ira barutaga, na biewa bira bionthe barutaga birî na mûgiro, i bu Mwathani akuuga.
Mwathani aapa antû baake wîrane atî akabathaarima
15 Na îîndî thûgaaniani bwega kuuma îmunthî, thûgaanîriani bûra gwakari mbere Nyomba ya Mwathani yanjîîria gwakwa. 16 Ntugûûni inu, muntû aathiiyaga kîrî kîthûmba kîa irio akîîrîgagîîra nkunia mîrongo îîrî îndî akeethîra îkûmi, na i rîo muntû aathiiyaga kîrî kîbibi kîa ndibei kûruta mîtûngi mîrongo îtaano îndî akaruta mîtûngi mîrongo îîrî. 17 Indaabûtûmîîre ruuo rwa mwathû, mîrimo, na mbura ya maiga, bienyangia imera bienu. Îndî bûteerira meeyia meenu, i bu Mwathani akuuga.
18 Îîndî thûgaaniani bûra gûgaakarîka kuuma ntugû îra mûcingi wa Nyomba ya Mwathani wanjîîrue, ntugû îno ya mîrongo îîrî na inya ya mweri wa kenda. Ta raithaani bwone bûra gûgaakarîka. 19 Îîndî gûtirî na irio makûmbîîni: mîcabiibû, mîkûyû, mîkûkûmanga, na mîceituuni îtigûciara. Kuuma îîndî kûthi na mbere nkabûthaarima.
Wîrane bwa Ngai kîrî Serubaberi
20 Ntûmwa ya Mwathani yaakinyîra Agai kaîrî ntugû ya mîrongo îîrî na inya ya mweri wooyu wa kenda, îkiugaga: 21 Aria na Serubaberi ngabana wa Njunda ûmwîre, i nkuinainia îgûrû na nthîgûrû, 22 na ngaatuunya mîgongo îra îbuinyagîîria mainya maao. Na nkurumanie nkaarî cia ndûa na acikaarî bara baitwete. Mbaraathi na acikaarî bakaagwa nthî, na baûragane bongwa na mpiû. 23 Ntugû înu, ngakûthûkia woû Serubaberi mûruti ngûgî wakwa, mwana wa Searitieri, na ngagûtuîkithia ta mbetea ya watho bwakwa wathanaga riîtwani rîakwa n'ûntû i nkûthuurîîte, i bu Mwathani Mwene Inya akuuga.