MARAKI
Mantû ba îbuku rîrî
Riîtwa Maraki riugaga, “Mûtûmwa wakwa.” Maraki aandîkire ntûmwa îno kîrî antû ba Isiraeri nyuma ya antû bamwe bagûcooka kuuma Mbabironi naara baarî baagwate, îndî i mbere ya Esira na Neemia bacooka. Nyomba ya Ngai n'yarî îgwakwa kaîrî na athînjîri ba Ngai baarutaga igongwana bira antû baarutagîra Mwathani. Îndî kagiita i kaarî kaûmo, antû i baarî bakwaga wîrîgîîro bwa ûtûûro bwega Njunda. Antû na athînjîri ba Ngai, i baarî bagûtiga gûtîîya Mwathani na nyomba yake. Kinya i baarutaga igongwana bitaagîrîîte na bakarega kwathîkîra watho bwa Ngai. I bainyagîîria nkîa na bara batarî na inya na arûme bagacookia aka baao.
Maraki eeraga antû, na mûno mûno athînjîri ba Ngai, batuîke eetîgua kîrî kîrîîkanîro kîra Mwathani aarîîkanîîre na antû ba Isiraeri. Akabeera nwa mwanka batîîye Mwathani na njîra ya kûruta igongwana bia mma na kûreeta icuncî bia îkûmi kîrî Mwathani. Rîru i rîo Mwathani akaabathaarima.
Ntugû ya îgamba nîîyîte îgîakanaga ta mwanki wa îturîro, rîra antû bara bathûûku na eekumia bonthe bakaabîîthua ta rûûa; ntugû înu bakaabîîthua kûrû gûtirî wee ûgaatigara, i bu Mwathani Mwene Inya akuuga. Îndî biû bara bûntîîyaga, wagîru bûkabûmûrîkîra nabu bûkabûretera kworua. Bûgaatûûbatûûbaga ta tûyaû kîaragooni. (Maraki 4:1-2)
Gwookubî îbuku rîrî rîkari ûûgû:
Isiraeri eendwa, îndî Endomu aamenwa 1:1-5
Athînjîri batigûtîîya Ngai 1:6-14
Mwathani aakaania athînjîri 2:1-9
Njunda ti mwîtîgua kîrî Ngai 2:10-16
Ntugû ya îgamba 2:17
Mûtûmwa wa Mwathani 3:1-5
Kwiya Ngai 3:6-12
Wîrane bwa kîao 3:13-18
Ntugû ya Mwathani 4:1-6