MARAKI
Isiraeri eendwa, îndî Endomu aamenwa
1
1 Îno i ntûmwa ya Mwathani îra aatûmire kîroria Maraki n'yo eera antû ba Isiraeri. 2 Mwathani auga, Mbîgagua mbwendeete. Îndî naabi bûrîûria, “N'ata ûtwendangîîte?” Mwathani abacookeria abeera, Anga Esaû na Njakubua ti muntû na mûruagina? Îndî i ndeendire Njakubu, 3 ndaamena Esaû. Ndeenyangia nthîgûrû yake ya irîma yatuîka rwanda rwa gûkaraga mbwe. 4 Antû ba nthîgûrû ya Endomu, rûrîîyo rwa Esaû, nwa bauge, “I twomboraniirue, îndî tûgacooka gwaka maganjo.” Îndî Mwathani Mwene Inya ariuga, Wana wegua bagaaka kaîrî, nkaboomborania. Antû bageeta Endomu, nthîgûrû ya meeyia. Mwathani akaraga athûûri n'ûntû bwao. 5 Bûkoona mantû mama bwingwa na meetho meenu. Na buuge, “Mwathani n'ûmûnene, inya yake nîgûkinya nkûrûki ya mîanka ya Isiraeri!”Athînjîri batigûtîîya Ngai
6 Mwathani Mwene Inya ariuga, “Mwana atîîyaga îthe, na mûruti ngûgî n'we agatîîya mûnene wake. Niû ndî abaagu. Aabu i mbi n'ûntû bûtagûntîîya? Na i mbi n'ûntû bûtagûmpa gîtîîyo na ndî mûnene? Biû athînjîri bûtigûûmpa gîtîîyo. Îndî nwaka bûkûûria, ‘N'ata tûtagûgûtîîya?’ 7 Bûtigûntîîya n'ûntû bûreetaga irio birî na mûgiro kîthînjîrooni gîakwa. Îndî naabi bûrîûria, ‘I mbi îgûtûma biîgua birî na mûgiro?’ Ti bitheru n'ûntû i bûkûbûthîîria kîthînjîro kîa Mwathani. 8 Rîra bûkûreeta igongwana bia nyamû îrî nthongo rî, mamu ti mabîtia? Î rîra bûkûreeta bionje na nyamû imbayie rî, wana mamu ti mabîtia? Ta geriani kûnenkera ngabana nyamû ta inu. Agaakena i biû? Akabûîtîgîîria?” Ûgu i bu Mwathani Mwene Inya akûûria.
9 Îîndî ndombaani mbîgîîrue antû baakwa kîao. Îndî rî, nkeegua maromba meenu bûrî na igongwana ta bibu? I bu Mwathani Mwene Inya akûûria.
10 Ûtakîîgua kûrî ûmwe wacienu ainga mîrango ya nyomba yakwa kaingo bûtabua mîanki ya ûtheri kîthînjîrooni gîakwa! Bûtigûnkenia na ntiîtîgîîria biewa bienu. 11 Riîtwa rîakwa i rîtîîyagwa n'antû ba nthîgûrû ciingî kuuma uumîîroni mwanka ûthwîrooni bwa riûa. Wa kîra bantû onthe antû i bareetaga macoco na igongwana biitheru n'ûntû bwa gûkumia riîtwa rîakwa. Na riîtwa rîakwa rîkaanenea ndeeni ya nthîgûrû inyingî. I bu Mwathani Mwene Inya augîîte. 12 Îndî bûregaga gûûntîîya rîra buugaga kîthînjîro gîakwa nwa kîgwatithue mûgiro, na antû nwa barute kîgongwana irio bitarî na gîtûmi. 13 Bûgacooka bûkauga, “I tûkûnoga i kûruta ngûgî îno!” Na bûkamîbûthîîria. Bûrîndutîra kîgongwana nyamû cia kwiya, imboonju na imbayie. Bûrîthûgaania ngeetîgîîria igongwana ta bibu kuuma kîrî biû? I bu Mwathani Mwene Inya akuuga. 14 Kîrumi i kîrî mûûrongo ûra augaga akaarutîra Mwathani ntûrûme îtarî kagi kuuma ng'onduuni ciake, îndî agacooka akaruta îîngî îrî na mbeeni. I niû mûnene nkûrûki, na i nkuthûkîîtwe n'antû ba mîgongo yonthe, I bu Mwathani Mwene Inya augîîte.