Mwathani aakaania athînjîri
2
1 Mwathani arîîra athînjîri ata rî, I biû bwetwe watho bûbû. 2 Nthikîîriani bwîgue bûra nkûbwîra. Tîîyagaani riîtwa rîakwa, I bu Mwathani Mwene Inya akuuga. Wegua bûtiirûtha ûgu, nkabûruma. Nkaagarûra ithaarimo bienu bituîke irumi. Mwanka agu îîndî i ndûthîîte ûgu, n'ûntû bûtikwîgua bûra nkuuga. 3 Ngakaanûkia nciarwa cienu. Ngakaanda moothiû meenu na thunthuna ya nyamû ira bûthînjaga rîra bûrî na biatho, na bûgaateeyanîrua amwe n'yo.4 Rîru i rîo bûkaamenya mbwete watho bûbû kaingo kîrîîkanîro gîakwa na Arawia gîgaatûûra, I bu Mwathani Mwene Inya augîîte. 5 Kîrîîkanîro gîakwa na Arawi kîarî gîa kûreeta mwoyo na ûkiri, na nwa bio ndaabeere, kaingo bantîîya. I bantîîyire na baankuthûka. 6 Baarutanire antû ûrutani bwa mma na bataaragia mabîtia. Baatûûraniirie naani na ûkiri na mma na baarûtha wa bûra ndaabeerîîte barûthe. N'ûntû bwoogu, i baatûmire antû baingî batigana na meeyia. 7 Mûthînjîri abatîîrue amenyeera na arutana antû mantû ma mma ma Ngai. Antû bathiiyaga kwîrutana kuumania n'we n'ûntû mûthînjîri i mûtûmwa wa Mwathani Mwene Inya. 8 Îndî biû athînjîri i buumîîte njîraani ya mma. I bûtûmîîte antû baingî babîtia kuumania na ûrutani bwenu. I bwînyangîîtie kîrîîkanîro gîakwa na antû ba mwîrîga wa Rawi! I bu Mwathani Mwene Inya augîîte. 9 Na kwoogu, ngaatûma antû bonthe babûbûthîîria na babûcambia n'ûntû bûtiathîkagîra kwenda wakwa, na rîra bwakinya agûtaûra watho, bûtirûthagîra antû mantû nganaano.
Njunda ti mwîtîgua kîrî Ngai
10 Twinthe tûrî aana ba îthe ûmwe. Ngai woyu n'we aatûûmbire. Aabu i kî îndî n'ûntû tûkûrega gûtuîka eetîgua kîrî muntû na ûra ûngî na tûkarega gûtîîya kîrîîkanîro kîra biûyûûyû bietû biagwatanîîre na Ngai? 11 Antû ba Njunda i beenyangîîtie mawîrane maao na Ngai. I barûthîîte ûntû bûrî na njici nthîgûrû yao na Njerusaremu. I baaregire gûtîîya Nyomba ya Ngai îra Mwathani eendeete, na antû arûme ba Njunda baagûra aka bara bagoongaga ngai iingeni. 12 Ûra wonthe akaarûtha mabîtia ta mamu wana kinya akaaya kûrutîra Mwathani Mwene Inya biewa, Mwathani aroomwathûrana na antû ba Isiraeri.
13 Kûrî bûngî bûrûthaga, nabu i bûbû. Bûriindaga kîthînjîro kîa Mwathani na meethori meenu. Bûrîraga na bûkaminûka, n'ûntû Mwathani naregaga biewa bira bûmûrutagîra na atikenagua i bira bûmûreetagîra. 14 Nwaka bûûragia, “I mbi?” I bu, n'ûntû Mwathani noonaga bûra warûthagîra mwekûrû ûra wagûrire ûrî nthaka. Nwenyangiirie wîrane bwaku n'we, wana kinya ûkeegua aarî mwekûrû waku na nwamwîrîîte ûkeegua ûrî mwîtîgua kîrî we. 15 Gûtirî we wenda kûrûtha ûgu wana arî muntû wa mathûgaania maaniini. Ga kûrî we ateendaga kwîgua arî na aana baiyî Ngai? Kûrî ûtaûri buugaga, “Ngai aûmbire aka na arûme batuîka gîntû kîmwe kîîmwîrî na gîîkîrundu n'ûntû n'aarî na gîtûmi. Aarûthire ûgu kaingo beegagua barî na aana baiyî Ngai.” Kwoogu îîmenyeere wîgue ûrî mwîtîgua kîrî mwekûrû waku. 16 I meneete mantû ma gûcookia mûka. N'ûntû, muntû ûra ûcookagia mûka, akari ta muntû ûra ûcwaga ûgîti. Ûgu i bu Mwathani Mwene Inya augîîte. Kwoogu îîmenyeere wîgue ûrî mwîtîgua kîrî mwekûrû waku.
Ntugû ya îgamba
17 I bûnogeetie Mwathani na ndwaria cienu. Na bûkaûria, “I mbi tûmûnogeetie n'yo?” Bwarûthire ûgu rîra bwaugaga, “Mwathani oonaga muntû wonthe ûra arûthaga mantû mathûûku n'ûmwega, na nakenagua n'we.” Kana rîra bûûragia, “Arîkû Ngai ûra agiitaga îgamba bûra kûbatîîrue?”