Mûtûmwa wa Mwathani
3
1 Ngaatûma mûtûmwa wakwa mbere nkinya aandûthîre njîra. Warîo, Mwathani ûra bûgûcwa akaaya nyomba yake. Mûtûmwa wakwa wa kîrîîkanîro ûra bûkwenda akaaya. I bu Mwathani Mwene Inya akuuga. 2 Îndî n'ûû akaûmîîria ntugû ya kûûya kwa Mwathani? N'ûû we akaûmîîria kûrûngama baraithana n'we ûthiû kwa ûthiû rîra akoonekana?N'ûntû we akeegua akari ta mwanki ûra ûtheragia thaabu kana sabuni îra îrî inya ya kûtheria nguo îrî rûko. 3 Agaakara nthî gîtîîni wa ta bûra muntû ûra atheragia fetha na mwanki arûthaga. Akaatheria antû ba Rawi ta thaabu kana fetha. Rîru i rîo bakaarutîra Mwathani biewa bira biagîrîîte. 4 Agaakeneera biewa bia kuuma kîrî antû ba Njunda na ba Njerusaremu, wa ta bûra aarûthaga mbereeni.
5 Rîru i rîo nkaaya na mbûgambithie. Nkeegua ndî na mpwî cia kûruta ûkûûyî îgûrû rîa arogi, athûngîîri, na bara bathiîtagia bakîaragia ûrongo, bara bainyagîîria aruti ngûgî baao na aka ba ntigwa, tûkea, na ageni. Na antû bonthe bara bataantîîyaga. I bu Mwathani Mwene Inya akuuga.
Kwiya Ngai
6 I niû Mwathani, na ntigarûkaga. Iimbaigîîte kîrîîkanîro gîakwa naabi. Gîku i kîo gîtûmi biû nciarwa cia Njakubu bûtaathira. 7 Kuuma îgiita rîa biûyûûyû bienu, bûtaiga mawatho maakwa na bûmaathîkîra. Ncookeraani naani nkabûcookera, i bu Mwathani Mwene Inya augîîte. Îndî naabi bûrîûria, “N'ata tûûmba gûgûcookera?” 8 Muntû nabatîîrue aiya Ngai gîntû? Îndî biû i bûmbiyaga. Bûgacooka bûkaûria, “N'ata tûkuiyîîte?” I bûmbiyîîte n'ûntû bûtiindutagîra biewa na icuncî bia îkûmi bûra bwagîrîtwe. 9 Kwoogu bûrî na kîrumi, n'ûntû antû ba nthîgûrû yenu bonthe i bambiyîîte. 10 Reteeni icuncî bienu bia îkûmi bionthe îkûmbîîni kaingo nyomba yakwa îîgua îrî na irio bia kûgana. Nthimaani na ûgu bwone, nkaarugûra ndirica cia îgûrû n'ûntû bwenu mbwonoreerie ithaarimo na bwage bantû a kûbiîkîra. I bu Mwathani Mwene Inya akuuga. 11 Ngaakaania tûtong'o tûtikeenyagie imera bienu, mîcabiibû itiibororia kaîrî, i bu Mwathani Mwene Inya augîîte. 12 Antû ba mîgongo yonthe bakabûîtaga baathaarime, n'ûntû bûkeegua bûrî na nthîgûrû înthongi, i bu Mwathani Mwene Inya augîîte.
Wîrane bwa kîao
13 Mwathani augîîte, I bwarîîtie mantû mathûûku mûno îgûrû rîakwa. Îndî nwaka bûkûûria, “Ga tuugîîte ata bûûthûûku îgûrû rîaku?” 14 Buugîîte, “Gûtirî gîtûmi gîa gûtûmîkîra Ngai. Gûtirî wega bûrîo kwathîkîra mawatho maake na kwîrira kîrî Mwathani Mwene Inya n'ûntû bwa bûra twarûthire. 15 Kwoogu tûthûgaanagia eekumia barî na gîkeno. Antû bara barûthaga mantû maathûûku i bo bakari bwega. Bo bageragia Ngai na gûtirî bu barûthagwa.”
16 Rîru bara baatîîyaga Mwathani baaranîria bongwa, Mwathani abathikîîria na abeegua. Mariîtwa ma bara baakuthûkaga Mwathani barî na gîtîîyo maandîkwa îbukuuni rîa mûririkana meethooni ma Mwathani. 17 Mwathani Mwene Inya augîîte, Bakeegua barî antû baakwa, ntugû înu mbaangîîte yongwa bakeegua barî antû baakwa kanyiinyari. Wa ta bûra mûciari eegagîîrua mwana ûra amûtûmîkagîra kîao, nwabu Nkeegîîrua antû baakwa kîao. 18 Na kaîrî i rîo bûkoona mûkûûrani wa antû beega na bathûûku, na bara batûmîkagîra Ngai na bara batamûtûmîkagîra.