Mwathani akaaya na aathane
14
1 Ntugû ya Mwathani n'îyîîte, rîra into bira biatairwe kuuma kwenu bikaagaîrwa gatîgatî keenu.2 Nkeethîrania mîgongo yonthe taûni ya Njerusaremu kaingo mîgongo înu îrûa na taûni înu. Taûni înu îkaathûkua, nyomba iburuncwe into bionthe bira birî ku na aka bagwatwe na inya. Nucu ya antû ba taûni înu bakaagwatwa mîgwate, îndî babu bangî bagûtigara batiirutwa taûniini înu.
3 Rîru Mwathani akaumagara athi akarûe na mîgongo înu, wa ta bûra arûaga ntugû ya ndûa. 4 Ntugû înu magûrû maake makaarûngama îgûrû rîa kîrîma kîa Mîceituuni, mbarî ya uumîîro bwa riûa ya Njerusaremu. Nakîo kîrîma kîa Mîceituuni gîatûke kuuma mbarî ya uumîîro bwa riûa mwanka mbarî ya ûthwîro bwa rîo, kûgîe na mûguuru ûmûnene. Nucu ya kîrîma îthi mbarî ya neegûrû na nucu îra îîngî îthi mbarî ya naiti. 5 Bûgaatoorokera kîbondeeni gîku gîa kîrîma n'ûntû kîbonde gîku ûkeegua kîthiîte mwanka Aseri. Na bûgaatorooka wa ta bûra bwatorookire mwinainio wa nthî îgiita rîa mûnene Usia wa Njunda. Rîru Mwathani Ngai wakwa akaaya, arî na bara batheru bonthe.
6 Ntugû înu gûtiîgua kûrî na werû, mpîo kana mbaraabu. 7 Na îkeegua îrî ntugû ya mwanya, îra yiiyîkeene i Mwathani. Gûtiîgua kûrî na mûthenya kana ûtugû, îndî ûgoro bwakinya gûkaagîa na werû.
8 Ntugû înu rûûyî rûrî mwoyo rûkauma Njerusaremu, nucu yaru îthi mbarî ya uumîîro bwa riûa ya îria na nucu îra îîngî îthi mbarî ya ûthwîro bwa riûa ya îria. Gûgaakarîka ûgu îgiita rîa kîathû na rîa mpîo.
9 Mwathani n'we akeegua arî mûnene wa nthîgûrû yonthe. Ntugû înu gûkeegua kûrî na Mwathani ûmwe na riîtwa rîake rîkeegua rîrî rîonka.
10 Nthîgûrû yonthe îkaagarûka îtuîke îmbaranîru ta Araba kuuma Ngeba mwanka Rimoni, mbarî ya iti ya Njerusaremu. Îndî Njerusaremu îgaûkîîrua na îkare îrî îgûrû waagu îrî, kuuma Mwîrîga wa Benjameni mwanka ara Mwîrîga wa mbere warî, kûthi Mwîrîgaani wa Koona, na kuuma Kîbayooni kîa Ananeri mwanka kîbibiini kîa ndibei kîa mûnene. 11 Njerusaremu îgaatûûrwa n'antû na îtiînyangua kaîrî na îgatûûra îrî mayîîga.
12 Îndî kînyamaara gîkî i kîo Mwathani akareetera antû bonthe bara barûaga na Njerusaremu. Nyama cia mîîrî yao ikoora barûngi na magûrû maao, meetho maao makoorera nyûngûûni ciao cia meetho na ndîme ciao ciorere tûnyuani twao.
13 Ntugû înu Mwathani agaatûma antû bagwata i kîmako kîînene. Wora muntû akaumbuthûkanagia na ûra ûngî bakarûa mûno. 14 Wana kinya Njunda bakaarûa na Njerusaremu. Ûtonga bwa mîgongo îra îbathiûrûkîrîîte bûkeethîranua, Thaabu na fetha inyiingî na nguo inyiingî ikeethîranua. 15 Kînyamaara wa ta gîku gîkaayîîra mbaraathi, nyûmbû, nkamîîra na mang'ooi ma kambî inu.
16 Rîru matigari ma antû ma mîgongo îra yaruaga na Njerusaremu bageetagia wora mwanka kûgonga mûnene, Mwathani Mwene Inya na gûkûngwîra Kîatho gîa Tûganda. 17 Na gûkaaya kûgîa na antû bamwe ba nthîgûrû bara bakaarega gwîtia Njerusaremu kûgonga mûnene, Mwathani Mwene Inya, mbura îtiura kwao. 18 Na wegua antû ba Miisiri batiîtia beegua barî amwe na bara bangî, kwao gûtiîgua kûrî na mbura. Bakoona kînyamaara kîra kîonagwa i mîgongo îra îteetagia gûkûngwîra Kîatho gîa Tûganda. 19 Rîrî i rîo rîkeegua rîrî îkaanûkia kîrî antû ba Miisiri na îkanûkia kîrî mîgongo îra yonthe îteetagia gûkûngwîra Kîatho gîa Tûganda. 20 Ntugû înu nkengere cia mbaraathi ikeegua ciandîkîîtwe, “Yathûrîrîtwe Mwathani.” Na nyûngû cia kûruga ira irî Nyomba ya Mwathani ikeegua irî i ntheru wa ta tûbakûri tûra twîgagua tûrî mbere ya kîthînjîro. 21 Na wa îra nyûngû ndeeni ya Njerusaremu na Njunda îkeegua îrî mbathûrîre Mwathani Mwene Inya, bûra bara barutaga igongwana baûmba kûthûkia imwe cia cio na bakaruga nyama cia kîgongwana nacio. Na ntugû înu gûtiîgua kûrî na mûbiacaara Nyomba ya Mwathani Mwene Inya kaîrî.