Kûtherua kuuma wîyiani
13
1 “Ntugû înu gûkeegua kûrî na kîthima gîa kûtheria wîyia na rûko rwa nciarwa cia Ndaundi na bara batûûraga Njerusaremu. 2 Mwathani Mwene Inya ariuga, ‘Ntugû înu, nkaabuuta mariîtwa ma ngai cia mîbuanaano kuuma nthîgûrû na matiiririkanwa kaîrî, na nkarutaruta iroria amwe na irundu biithûûku kuuma nthîgûrû. 3 Na muntû nwa ûrîkû aaroria kaîrî, îthe na gina bakamwîra, “Nwa ûkuire, n'ûntû bwa kwaria ûrongo na riîtwa rîa Mwathani.” Aaroria, aciari baake bongwa bakamûûraga.4 “ ‘Ntugû înu, wa kîra kîroria gîkeegua nthoni i kîoneki gîake kîa ûroria. Gîtiîkîra nguo ya guaya ya kîroria kaingo ateenania. 5 Na gîkauga, “Niû ntirî kîroria. Ndî mûrîmi, mbîthîrîîtwe ndî mûrîmi kuuma ûnyi bwakwa.” 6 Muntû akaaya kûmûûria, “Ironda bibu ûrî nabio mwîrî i bia mbi?” Akamûcookeria, “Biangwatîîre nyomba ya acoore baakwa.” ’ ”
Mûrîîthi akaaringwa ng'ondu nacio inyagaare
7 Mwathani wa Njûûrî ariuga,
“Ûkîîra, woû rûûyiû îgûrû rîa mûrîîthi wakwa,
na ûûrage muntû ûra arî ûcoore naani!
Ûringe mûrîîthi,
na ng'ondu nacio ikaanyagaara,
naani mbûrage tûgondu.”
8 Mwathani ariuga, “Nthîgûrû înu yonthe,
icuncî biîrî kuuma kîrî bithatû bia antû bikaathirua,
na gîcuncî kîmwe kuuma kîrî bithatû gîgaatigara ku.
9 Ngaakûrûkîîria gîcuncî gîku kîmwe kîrî bithatû mwankiini,
nkabakeemba ta bûra fetha îkeembagwa,
na mbagerie ta bûra thaabu îgeragua.
Bakaambîta na riîtwa rîakwa
naani nkabeetîga.
Nkauga, ‘N'antû baakwa,’
nabo bauge, ‘Mwathani i Ngai wetû.’ ”