Gûkûûrwa kwa Njerusaremu
12
1 Gîkî i kiugo kîra Mwathani aguûrire îgûrû rîa Isiraeri. Mwathani ûra ataambûrûkiirie îgûrû, ûra aigire mûcingi wa nthîgûrû, na ûra aûmbire kîrundu kîa muntû ndeeni yake, ariuga, 2 “Ngaatuîkithia Njerusaremu ta gîkombe kîa ndibei kîra gîgaatûma antû ba mîgongo yonthe îra îbathiûrûkîrîîte batogoona. Na rîra Njerusaremu îgaakîîmbwa, kinya Njunda amwe na taûni ira ingî ciayo igaakîîmbwa. 3 Ntugû înu, ngaatuîkithia Njerusaremu ta iiga rîîrito kîrî mîgongo yonthe. Bonthe bara bakaageria kûrîûkîîria bakeeguraria bongwa. Antû ba mîgongo yonthe ya nthîgûrû bakaagwatana amwe barûe na Njerusaremu. 4 Ntugû înu, nkaaringa wa îra mbaraathi na ûguaya na mûthiithia wayo mûrute nkoma,” i bu Mwathani akuuga. “Riitho rîakwa rîgaakara rîraithîrîte Njunda, îndî ngaatuîkithia mbaraathi cionthe cia mîgongo ntûngi. 5 Rîru atongoria ba Njunda bakauga nkorooni ciao, ‘Antû bara batûûraga Njerusaremu barî na inya, n'ûntû Mwathani Mwene Inya i Ngai wao.’6 “Ntugû înu, ngaatuîkithia atongoria ba Njunda ta mwanki ûrî mûthitûûni, kana ta kîmonjo kîa mwanki kîrî maringaani ma rûûa. Bakaabîîthia antû ba mîgongo yonthe îra îrî mbarî ya ûrîo na ya ûmotho îndî antû ba Njerusaremu batienyeenyua.
7 “Mwathani akoonokia ikaro bia Njunda mbere, kaingo gîtîîyo kîa nyomba ya Ndaundi na bara batwîre Njerusaremu gîtikooneke kîrî kînene nkûrûki ya kîa Njunda. 8 Ntugû înu Mwathani akaarigîîria bara batwîre Njerusaremu, kaingo ûra atarî na akwaga inya gatîgatîîni kaao akeegua arî na inya ta Ndaundi, na nyomba ya Ndaundi îkeegua îkari ta Ngai, ta Mûraîka wa Mwathani athiîte arî mbere yao. 9 Ntugû înu nkeenyangia mîgongo yonthe îra îkaarûa na Njerusaremu.
Kîîthikîîro n'ûntû bwa ûra baamuuntire na îtumo
10 “Nkonoreeria antû ba mûciî wa Ndaundi na bara batwîre Njerusaremu kîrundu wa kîao na maromba. Bakandaitha, baraithe ûra baamuntire na îtumo, na bakamûrîrîra ta bûra muntû arîragîra kaana gaake ga kîmoomwe. Bamûrîrîre na ûrûrû ta muntû akîrîra akuîrîîtwe i kaana gaake ka mbere ga kaîyî. 11 Ntugû înu kîrîro kîra gîkeegua kîrî Njerusaremu gîkeegua kîrî kîînene mûno, ta kîra kîarî Andandi-Rimoni rûtunguruuni rwa Megindo. 12 Nthîgûrû îkaarîra, wora mwîrîga na bwau, na eekûrû baao na bwao. Mwîrîga wa mûciî wa Ndaundi na eekûrû baao, mwîrîga wa mûciî wa Nathani na eekûrû baao. 13 Mwîrîga wa mûciî wa Rawi na eekûrû baao, mwîrîga wa Simei na eekûrû baao, 14 na mîciî yonthe îra îtigîîtwe, woora mûciî na bwa uu, na eekûrû baao na bwao.