Kînyamaara kîa anthû ba Isiraeri
11
1 Woû Rebanoni, rugûra mîrango yaku,kaingo mwanki ûrûngûria mîthithinda yaku.
2 Rîra, woû mîthithinda, n'ûntû mûtarakwa ûkûgwa,
mîtî îra îrî ûkumio n'înyangîîtue!
Rîraani, biû mîpuru ya Mbasani,
n'ûntû mûthitû ûra mûnene n'ûûngîîtwe.
3 Thikîîria kîrîro kîa arîîthi,
N'ûntû ûtonga bwao i bwînyangîîtue!
Thikîîria mûrurumo wa cimba,
n'ûntû mûthitû wa Njorondani n'wînyangîîtue!
Mîthemba yîîrî ya arîîthi
4 Ûûgû i bu Mwathani Ngai wakwa akuuga, “Rîîthia ng'ondu ira ciathûrîîtwe irî cia kûthînja. 5 Bara bacigûraga bacithînjaga na batikaanûkagua. Bara baciendagia baugaga, ‘Mwathani arookumua, ndî ûmûtongu!’ wana arîîthi baacio baticiîgagua kîao. 6 N'ûntû ntiîgîîrua antû ba nthîgûrû îno kîao kaîrî, i bu Mwathani akuuga. Nkaanenkanîra wora muntû njaraani cia mûtûûri na mûnene wake. Bakeenyangia nthîgûrû, na ntibatuunyûkia kuuma njaraani ciao.”
7 Rîru ndaatuîka mûrîîthi wang'ondu ira ciathûrîîtwe cia kûthînjwa n'athînji. Rîru ndaathûkia mîraagi îîrî na ndeeta ûmwe “Kîao,” ûra ûngî ndacuîta “Ngwatanîro,” na ndaarîîthia ng'ondu, 8 na ndarutaruta arîîthi babu baao bathatû oogo gwa kagiita ka mweri ûmwe. I ndaaremirwe i kûûmîîria arîîthi babu n'ûntû bataambendaga. 9 Kwoogu ndaciîra, “Ntiituîka mûrîîthi wenu kaîrî. Îra îgaakua, nîkue. Ira ikaûragwa, i ciûragwe, na ira igaatigara nirîîyane ciongwa.”
10 Rîru ndaathûkia mûraagi ûra ndeetîîte “Kîao” ndacuunania, kwonania nkwînyangia kîrîîkanîro kîra ndaigîîte na mîgongo yonthe. 11 Kîaunangwa ntugû înu, na kwoogu abiacaara ba ng'ondu, bara baandaithîîte, baamenya atî bûra ndaarûthire bwarîîtue i Mwathani.
12 Ndabeera, “Bwona i bwega, nnenkeraani mûcaara wakwa, îndî bwona ti bwega, nûkare.” Kwoogu baneenkera icuncî mîrongo îthatû bia thaabu. 13 Na Mwathani ambîîra, “Cigerere mûûmbi wa nyûngû.” Ûgûri bûbu bwega bandîire! Kwoogu ndaathûkia icuncî bibu mîrongo îthatû bia fetha na ndabigera ndeeni ya Nyomba ya Mwathani kîrî mûûmbi wa nyûngû.
14 Rîru ndaunania mûraagi ûra ûngî wakwa wetagwa “Ngwatanîro,” kwonania nkwînyangia ûrûmwe gatîgatî ka Njunda na Isiraeri. 15 Rîru Mwathani ambîîra, “Thûkia kaîrî into bia mûrîîthi kîaa. 16 N'ûntû îîndî ndîûkîîria mûrîîthi ndeeni ya nthîgûrû ûra atakîmenyeera ng'ondu ira ciûrîîte, kana aceria ira niini, kana araithîra ira ngurarie, kana arîîthia ira irî thîîria. Îndî n'akaarîa ira noru, na acikûûre ncûûga.
Anthû ba Njerusaremu bakeenyangua
17 Akoona thîîna mûrîîthi kîaa,
ûra atiganagîria ng'ondu!
Rûûyiû rûrootema njara yake na riitho rîake rîa njara ya ûrîo!
Njara yake îroonyaara kûrû,
riitho rîa njara yake ya ûrîo rîrootûrîka nthongo!”