Mwathani akaamenyeera Njunda
10
1 Rombaani Mwathani abuurithîrie mbura îgiita rîayo,I Mwathani ûrûthaga matu ma mbura.
Anenkagîra antû mbura ya manyunyuû,
na agakûria imera mîndaani ya antû bonthe.
2 Ngai cia mîbuanaano i cia ûrongo,
ariingia boonaga bioneki bia ûrongo,
bakaaroota irooto bia ûrongo,
na kwoogu bakabooreerania mana.
Kwoogu antû i bakwanga ta ng'ondu,
bainyîîrîkîîte n'ûntû bwa kwaga mûrîîthi.
3 Mûthûûro wakwa n'ûgwankana n'ûntû bwa arîîthi,
na ngakaanûkia atongoria
n'ûntû Mwathani Mwene Inya akaamenyeera
ng'ondu ciake, nyomba ya Njunda,
na abatuîkithie ta mbaraathi yake îrî inya ndûani.
4 Kuuma mwîrîgaani wa Njunda gûkauma iiga rîa koona,
na rwambo rwa îrema kuuma ku,
na kuume ûta bwa ndûa,
na kuume aathani bonthe.
5 Bakeegua bakari ta ncamba cia ndûa ndûani,
bagîkinyangaga anthû baao ta ntaga.
Na n'ûntû Mwathani arî amwe nabo,
bakaarûa na bature athiithia ba mbaraathi.
6 “Ngeekîra mwîrîga wa Njunda inya,
na mbonokie nyomba ya Njosebu.
Nkabacookanîîria
n'ûntû inkûbeegua kîao.
Bagaakara taka ntaabaregeete,
n'ûntû ndî Mwathani Ngai wao
na nkabacookeria maromba maao.
7 Antû ba Eburaimu bagaakara ta ncamba cia ndûa,
na nkoro ciao igaakena taka banyuîte ndibei.
Aana baao bakoona mantû mama na bakene,
nkoro ciao igakeneera Mwathani.
8 Nkabaringîra rûgoci,
na mbeethîranie amwe.
Ûmma nkabakûûra,
na bakoongereka wa ta mbereeni.
9 I Ndaabanyagaariirie gatîgatî ka mîgongo,
na barî naagu i bandirikanire.
Bo na aana baao bagaatûûra mwoyo,
na bagaacooka.
10 Nkabacookia kuuma Miisiri
na mbeethîranie kuuma Asîîria.
Nkabareeta Ngiriandi na Rebanoni,
mwanka baage bantû a kûganîra.
11 Bagaakûrûkîîra îriani rîa thîîna,
mîkumbîîrî ya îria îgaakirua
na muuro wa Naero ûkaabwa.
Wîkumia bwa Asîîria bûkaanyithua
na wathani bwa Miisiri bûkinye mûthia.
12 Nkabeekîra inya
na bakangonga na bambathîkagîre,” i bu Mwathani akuuga.