Gûtuîrwa îgamba kwa anthû ba Isiraeri
9
1 Kiugo kîa Mwathani i gîkûgambithia nthîgûrû ya Andirakina kîrî kîînyume na Ndamasiki,
n'ûntû meetho ma antû na mîîrîga yonthe ya Isiraeri
maraithîîte Mwathani.
2 Na kinya îgûrû rîa Amathi, îra yankeene n'yo,
na îgûrû rîa Turo na Sindoni,
bara barî waara mûno.
3 Turo n'îîbakîrîîte rûthingo rûnene,
na yethîrania fetha ta tîîri,
na thaabu ta rûko rwa barabara.
4 Îndî Mwathani akamîtuunya ûtonga bwa yo
na agere ûtonga bwa yo îriani,
na îkaabîîthua na mwanki.
5 Taûni ya Asikeroni îkoona ûgu na îguaye,
Gasa îkaagwatwa i kîmako kîînene
wana kinya Ekironi n'ûntû wîrîgîîro bwa yo bûkaathira.
Mûnene wa Gasa akaûragwa,
na Asikeroni n'yo îgaatiganîrua.
6 Taûni ya Asindondi îgaatûûrwa i mbûyi,
na nkaathiria wîkumia bwa Afirisiti.
7 Nkabakaania kûrîa nyama irî na nthakame,
na irio birî na mûgiro.
Bara bagaatigara bagaatuîka ba Ngai wetû
na batuîke atongoria Njunda,
na antû ba Ekironi bakare ta Anjebusi.
8 Îndî nkaarigîîria Nyomba yakwa,
na ntiîtîgîîria njûûrî îthûngîra ndeeni.
Gûtirî we akoroainyîîria antû baakwa,
n'ûntû îîndî imbaraithîrîte.
Kûûya kwa mûnene wa Sayuuni
9 Kenaani mûno, antû ba Sayuuni!
Ûkîîriani tûyû, biû antû ba Njerusaremu!
Raitha, mûnene wenu n'aayîîte kîrî biû,
arî na wagîru na wonokio.
N'ûmûbooreeru na atwete îng'ooi îgûrû,
îgûrû ya kayaû ka îng'ooi.
10 Nkaaruta nkaarî cia ndûa kuuma Eburaimu,
na mbaraathi cia ndûa kuuma Njerusaremu,
na mbunange nta cia ndûa.
Mûnene wenu akaugîîria ûkiri kîrî mîgongo.
Waathani bwake bûgaataamba kuuma îria mwanka îria,
na kuuma muuro wa Yufîrîti kûthi mîthia ya nthîgûrû.
11 Îndî woû, n'ûntû bwa nthakame ya kîrîîkanîro gîakwa naawe,
ngakûûra agwate baaku kuuma kîrinyaani gîtarî rûûyî.
12 Cookaani wîbithooni bwenu, biû agwate bûrî na wîrîgîîro,
n'ûntû îmunthî nkabûthaarima maita maîrî.
13 Ngatûmîra Njunda ta ûta bwakwa,
na Eburaimu ta mîgwî yakwa.
Ngatûmîra nthaka cienu, biû antû ba Sayuuni,
kûrûa na nthaka cia Angiriki,
na mbûtuîkithie ta rûûyiû rwa ncamba ya ndûa.
14 Rîru Mwathani akabaumîîra,
mîgwî yake îkeenia ta rweni.
Mwathani Mwene Inya akaaringa karumbeta,
akaathi akarî ta kîbuubani kîa rûteere rwa naiti.
15 Mwathani Mwene Inya n'we akabamenyeera.
Bakathiria anthû baao na babaûmbe na nkomango cia gîkûtha.
Bakaagondoka ndûani ta banyuîte ncoobi,
bakaûyûra nthakame ta mbakûri
îra îtûmagîrwa kûminca nthakame koonaani cia kîthînjîro.
16 Mwathani Ngai wao akaboonokia ntugû înu,
ta bûra mûrîîthi atuunyûkagia ng'ondu ciake.
Bakaayicayica nthîgûrû yake
ta maiga ma goro marî nthûmbîîni.
17 N'ata ûkeegua marî mathongi!
Irio bigaatûma nthaka ikûra,
na aarî nabo n'ûntû bwa ndibei yaimbia.