Wîrane bwa Mwathani bwa gûcookanîîria Sayuuni
8
1 Kiugo kîa Mwathani Mwene Inya kîambûyîîra kaîrî. 2 “Ûûgû i bu Mwathani wa Njûûrî akuuga, ‘Ndî na wendo bûnene kîrî Sayuuni, wendo bûra bûgûtûma nthûûra mûno n'anthû baao.’ ” 3 Mwathani ariuga ûûgû, “Ngacooka Sayuuni na ntûûre Njerusaremu gatîgatî. Rîru Njerusaremu îgeetwa taûni ya wîtîgîka, na kîrîma kîa Mwathani Mwene Inya gîîtwe Kîrîma Kîîtheru.”4 Ûûgû i bu Mwathani Mwene Inya akuuga, “Akûrû bara bakûrû na eekûrû bara ntindiri bagaakara barabaraani cia Njerusaremu kaîrî, kîra ûmwe waciao akong'etie na mûraagi n'ûntû bwa ûkûrû. 5 Twîyî na twarî tûkaûyûra barabaraani cia Njerusaremu tûkîthekanagia ku.”
6 Ûûgû i bu Mwathani Mwene Inya akuuga, “Mama monthe nwa maoneke ta mataûmbîka kîrî matigari mara matigeere ma mûgongo ûyû, îndî ga kûrî bu bûtaûmbîka kîrî niû? I bu Mwathani Mwene Inya akuuga.”
7 Ûûgû i bu Mwathani Mwene Inya akuuga, “Nkoonokia antû baakwa kuuma nthîgûrû ya uumîîro na ya ûthwîro bwa riûa. 8 Nkabacookia batûûre Njerusaremu, na bagaatuîka antû baakwa, naani ngatuîka Ngai wao. Nkeegua ndî wa ûmma na mwîtîgua kîrî bo.”
9 Mwathani Mwene Inya ariuga ûûgû, “Biû bara îîndî bûkwîgua biugo bira biariirue n'iroria, biû bara bwarî oogo rîra mûcingî wa Nyomba ya Mwathani Mwene Inya wenjagwa, ka njara cienu igîe inya kaingo Nyomba ya Mwathani yaakwa. 10 Mbere ya kagiita gaku, gûtaarî na marîi ma antû kana ma nyamû. N'ûntû bwa anthû, gûtirî we akîthi na mbere na ngûgî ciake bwega, n'ûntû i ndaarî nkûmenithania wora muntû na mûtûûri wake. 11 Îndî îîndî ntiirûthîra matigari ma antû baakwa bûra ndabarûthîîre tene. I bu Mwathani Mwene Inya akuuga. 12 N'ûntû gûkeegua kûrî na thîîrî, mbeû îgaakûra bwega, mîcabiibû îciare maciaro, nthîgûrû îrute maciaro maayo, na maame meetîge kuuma îgûrû. Nkeeyana bibi bionthe kîrî matigari ma antû baba bituîke biao. 13 Ta bûra biû bûtwîre bûrî kîonanîîria gîa kîrumi gatîgatî ka mîgongo, biû antû ba Njunda na ba Isiraeri, nkabwonokia, na bûkeegua bûrî kîthaarimo. Bûtikaamake, îndî îgîani inya.”
14 Ûûgû i bu Mwathani wa Njûûrî akuuga, “I ndaabangire kûreeta thîîna îgûrû rîenu, na ntakûbwîgua kîao, rîra biûyûûyû bienu biatûmire mbakanwa i mûthûûro. 15 Îndî îîndî mbangîîte kûrûtha bwega kîrî antû ba Njerusaremu na ba Njunda. Kwoogu bûtikaamake. 16 Mama i mo mantû mara bûkaarûtha, bwaragie ûmma muntû na ûra ûngî, na bûgiitanagîre magamba bûra kûbatîîrue kootiini kaingo kûgîa na ûkiri. 17 Muntû atikaabangîre ûra ûngî ûthûûku, na ûtikaathiîtie mûthiîtio wa ûrongo, n'ûntû inthwîre ûgu,” i bu Mwathani akuuga.
18 Kiugo kîa Mwathani wa Njûûrî kîambûyîîra kaîrî, 19 “Ûûgû i bu Mwathani wa Njûûrî akuuga, ‘Gûtîîrîra kûrîa irio n'ûntû bwa maromba kwa mweri wa îna, wa îtaano, wa mûgwanja, na wa îkûmi, bigaatuîka biatho bia gûkeneera na gûkûngwîra, na ikeegua irî thigûnkû cia nkena kîrî antû ba Njunda. Kwoogu endaani ûmma na ûkiri.’ ”
20 Mwathani wa Njûûrî ariuga ûûgû, “Ûûgû i bu gûgakarîka, antû ba mîgongo îmiingî na bara batwîre taûni inyingî bakaaya, 21 na antû ba taûni îmwe bakaathi kîrî ba taûni îra îîngî babeere, ‘Tûthiiyanie tûkarombe Mwathani, na tûcerie kwendeerwa i Mwathani wa Njûûrî. Wana niû ningwa i nthiîte.’ 22 Antû baingî na mîgongo îrî na inya, bakaaya Njerusaremu gûceria kwendeerwa i Mwathani wa Njûûrî na kûromba abathaarima.”
23 Ûûgû i bu Mwathani wa Njûûrî akuuga, “Ntugûûni inu, antû îkûmi kuuma mîgongo ya ndwaria mwanya mwanya bakaagwata nguo cia mûyaundi ûmwe bamwîre, ‘Tûthiiyanie naawe, n'ûntû itwîgîîtue Ngai arî amwe na biû.’ ”