Ûmma na kîao birî gîtûmi
7
1 Mwankaani wa îna wa wathani bwa mûnene Ndariasi, ntugû ya inya ya mweri wa kenda,a mweri ûra wetagwa Kisirebu, kiugo kîa Mwathani kîayîîra Sakaria. 2 Antû ba Betheri i baarî bagûtûma Sareseri na Regemu-Mereki amwe na antû baao bathi kûromba kwendeerwa i Mwathani abeegîîrua kîao. 3 Kinya kûûria athînjîri ba Nyomba ya Mwathani Mwene Inya na iroria, “Itûbatîîrue twîthikîîra na gûtîîrîra kûrîa irio n'ûntû bwa maromba mweriini wa îtaano, ta bûra tûrûthîîte kwa mîanka îmiingî mûno?”4 Rîru kiugo kîa Mwathani Mwene Inya kîambûyîîra, 5 “Ûria antû bonthe ba nthîgûrû na athînjîri ba Ngai ata rî, ‘Rîra bwatîîragîra kûrîa irio na bûkarîra mweri wa îtaano na wa mûgwanja gwa kagiita ka mîanka mîrongo mûgwanja rî, wabu bwatîîragîra kûrîa irio n'ûntû bwakwa? 6 Na rîra bwarîîyaga na bûkanyua rî, tika bwebaithagia bwingwa? 7 Anga biugo bibi ti bio Mwathani aariirie gûkûrûkîîra iroria bia tene, rîra Njerusaremu na taûni ira imîthiûrûkîîrîîte ciarî na ûtonga, na rîra Negebu na mîaranthî ya irîma mbarî ya ûthwîro bwa riûa ciaturirwe?’ ”
8 Kiugo kîa Mwathani kîayîîra Sakaria kaîrî, 9 “Ûûgû i bu Mwathani Mwene Inya akuuga, ‘Gamba îgamba na ûmma, onaniani kîao na wendo kîrî wora ûmwe wa cienu. 10 Bûtikainyîîrie ntigwa kana twana tûkîa, mûgeni kana mûthîîni. Bûtikaathûgaanîrie bara bangî mantû mathûûku nkorooni cienu.’
11 “Îndî antû baarega kûnthinkîîria, bambuthatîria mûgongo na baakunîka matû maao kaingo bateegua. 12 Baûmia nkoro ciao ta iiga, batikeegue mawatho na biugo bîra Mwathani Mwene Inya aatûmîîte kîrundu gwake gûkûrûkîîra iroria bia tene. Kwoogu Mwathani Mwene Inya aathûûra mûno, 13 auga, ‘Nkûbeeta, batanthikîîria, kwoogu beetana, ntibathikîîria.’ I bu Mwathani Mwene Inya akuuga. 14 Ndaabanyagaariirie na kîbuubani gatîgatî ka mîgongo yonthe, naara baatûûraga ta mbûyi. Nthîgûrû yatigirwe îrî îganjo, na gûtirî we aathûngagîra kana auma ku. Ûûgû i bu baatuîkithiirie nthîgûrû înu nthongi îganjo.”