Kîoneki îgûrû rîa nkaarî inya cia ndûa
6
1 Rîru ndaacûûba îgûrû kaîrî na ndoona nkaarî inya cia ndûa ikiuma gatîgatî ka irîma biîrî. Na irîma bibu biarî irîma bia yûmba rîa rûthuku. 2 Nkaarî ya mbere yakururîîtue i mbaraathi intuune, ya ciîrî i mbaraathi i njirû, 3 ya ithatû i mbaraathi injerû, na ya inya n'yo i mbaraathi irî rûthanga. 4 Ndaûria Mûraîka ûyu aaragia naani, “Mwathani wakwa, n'ata ino ikuuga?”5 Mûraîka aancookeria, “Bibi n'irundu bina bia îgûrû, biumagarûkîîte ara bikûrûngi mbere ya Mwathani wa nthîgûrû yonthe. 6 Nkaarî înu ya ndûa îkururîîtue i mbaraathi i njirû îthiîte bwa mbarî ya neegûrû, înu îrî na mbaraathi injerû îthiîte bwa mbarî ya ûthwîro bwa riûa na înu îngî îrî na rûthanga îthiîte rûteere rwa iti.”
7 Rîra mbaraathi ino ciarî na inya ciaumîîre, i ciarî na wîru mûno kûthi kwona bûra gûgûkarîka nthîgûrû yonthe. Mûraîka aciîra, “Îthiini nthîgûrû yonthe bûkoone n'ata gûgûkarîka.” Kwoogu ciathi nthîgûrû yonthe.
8 Rîru ambîîra, “Mbaraathi ira ciathiire bwa neegûrû icigwîrîrîîtie mûthûûro wa Kîrundu wa Mwathani nthîgûrû înu.”
Gwîkîrwa nthûmbî kwa Njosua
9 Kiugo kîa Mwathani kîambûyîîra gîkiugaga, 10 “Thûkia fetha na thaabu kuuma kîrî atae Erindai, Tobia na Njendaya, bara bakinyîîte kuuma ûkombooni Mbabironi. Ntugû wa înu, ûthi nyomba ya Njosia mwana wa Sefania. 11 Ûthûkie thaabu na fetha ûrûthe nthûmbî, na ûmîîkîre kîongo kîa mûthînjîri ûra mûnene, Njosua mwana wa Njeosandaki. 12 Ûmwîre, Mwathani Mwene Inya ariuga ûûgû, ‘N'ûyû muntû ûra eetagwa Rwong'i. Akaarama kuuma ara arî na agaaka Nyomba ya Mwathani. 13 N'we agaaka Nyomba ya Mwathani, na akeewa gîtîîyo na akaathana arî mûnene gîtîîni gîake kîa ûnene. Ûkeegua kûrî na ngwatanîro gatîgatî kaao barî baîrî.’ 14 Nthûmbî înu îkaigwa Nyomba ya Ngai îrî ûntû bwa kûririkanaga Eremu, Tobia, Njendaya na Eni mwana wa Sefania.” 15 Antû ba kuuma kûraaya bakaaya bateetheerie gwaka Nyomba ya Mwathani. Rîru i rîo bûkaamenya atî i Mwathani Mwene Inya antûmîîte kîrî biû. Gûgaakarîka ûûgû wegua bûkaathîkîra Mwathani Ngai wenu bwega.