Kîoneki îgûrû rîa îbuku rîbuurûkîîte
5
1 Ngûcûûba kaîrî ndoona îbuku rîbuurûkîîte ruooni.2 Ambûûria, “I mbi ûkwona?” Ndamûcookeria ndamwîra, “Ndîona îbuku rîbuurûkîîte ruooni, rîa ûraaya bwa biiti mîrongo îthatû na wariî bwa biiti îkûmi na itaano.”
3 Na ambîîra, “Îbuku rîrî i kîrumi kîra kîthiîte nthîgûrû yonthe. Rûteere rûmwe kwandîkîîtwe, ‘mwamba wonthe akeengatua aume nthîgûrû,’ na rûteere rûra rûngî kwandîkîîtwe, ‘bonthe bara bathiîtagia ûrongo kinya bo bakeengatua.’ 4 Mwathani Mwene Inya ariuga, ‘Ngaatûma kîrumi gîku, na gîkaathûngîra mûciî wa mwamba, na woora wonthe athiîtagia na riîtwa rîakwa agîtûmagîra ûrongo. Gîgaatûûra mûciî wake na gîcuthirie, amwe na mbaaû ciau na maiga maau.’ ”
Kîoneki îgûrû rîa mûka arî gîkabûûni
5 Rîru mûraîka ûra aaragia naani aaya mbere, ambîîra, “Cûûba îgûrû wone i mbi înu yîyîîte.” 6 Ndaûria, “I mbi yoo?” Ambîîra, “I gîkaabû gîa kûthima irio na kîûyûri meeyia ma antû ba nthîgûrû yonthe.” 7 Rîru nkunîki yakûnûrwa, na gûku gîkabûûni mûka n'aakari ku! 8 Mûraîka ûyu auga, “Mûka ûyu i ta kuuga, ûthûûku.” Rîru aatiindîkîîria mûka ûyu gîkabûûni na agîkunîka gîaita.
9 Ndaraitha ndoona eekûrû baîrî babuurûkîîte baayîîte naara ndaarî barî na mathabu maarî na inya ta ma ntûnda rûkiingo. Nabo baathûkia gîkaabû gîku baburûûka nakîo.