Kîoneki îgûrû rîa gîtugî gîa gûcuuria taa na mîceituuni îîrî
4
1 Mûraîka ûra aaragia naani aaya kaîrî aambûkia ta bûra muntû aûkagua kuuma torooni. 2 Aambûûria, “I mbi ûkwona?” Ndacookia, “Ndîona gîtugî gîa kwaigîîra taa kîa thaabu kîrî na mbakûri ya maguta na taa mûgwanja îgûrû rîakîo. Wa îmwe ya taa inu mûgwanja îrî na ntaambi mûgwanja. 3 Na kinya kûrî na mîceituuni îîrî akubî nakîo. Ûmwe rûteere rwa njara ya ûrîo na ûra ûngî rûteere rwa njara ya ûmotho.”4 Rîru ndaûria mûraîka ûyu, “Ûûgû i ta kuuga ata mwathi wakwa?” 5 Aancookeria, “Ûtikûmenya i ta kuuga ata?” Ndamûcookeria, “Arî, ntiiyî mwathi wakwa.” 6 Rîru ambîîra, “Gîkî i kiugo kîa Mwathani kîrî Serubaberi, ‘Ti gûkûrûkîîra inya ya ûnene kana inya yaku wengwa, îndî i gûkûrûkîîra Kîrundu wakwa, i bu Mwathani Mwene Inya akuuga.’
7 “Irigîîria biinene ta irîma bira birî mbere yaku Serubaberi bikaaranîrua. Ûgaaka Nyomba ya Ngai kaîrî, na ûgîîkîra iiga rîa mûthia, antû bakaugîîria bauge, ‘Ngai aroomîthaarima! Ngai aroomîthaarima!’ ”
8 Rîru, kiugo kîa Mwathani kîambûyîîra, 9 “Serubaberi n'we aanjîîrie mûcingi wa Nyomba îno ya Ngai, na nwa we akaamîaka amîrîîkie.”
Rîru bûkaamenya i Mwathani Mwene Inya antûmîîte kîrî biû.
10 Mwathani aathi na mbere kuuga, “N'ûû ûûmba kûbûthîîria ntugû ya mwanjîîrio ûmûkai? N'ûntû antû bagaakena rîra bakoona kabirû njaraani cia Serubaberi.
“Taa ino mûgwanja i meetho ma Mwathani, mara moonaga nthîgûrû yonthe.”
11 Rîru ndaûria mûraîka ûyu, “Mîceituuni înu îîrî îrî nteere cia gîtugî gîa kwaigîîra taa îriuga ata?” 12 Ndamûûria kaîrî, “Mpong'i ino ciîrî cia mîceituuni nacio, irî nteere cia mîbaibû îîrî ya thaabu îra îrutaga maguta ma thaabu îriuga ata?”
13 Aambûûria, “Ûtikûmenya ino i mbi?” Ndamûcookeria, “Arî mwathi wakwa.”
14 Kwoogu ambîîra, “Baba i baîrî bara Mwathani wa nthîgûrû yonthe aathuurire abeetûûrîria maguta bamûtûmîkîra.”