Kîoneki kîa muntû arî na rûrigi rwa kûthima
2
1 Rîru ndaûkîîria meetho maakwa kaîrî, ndoona muntû arî na rûrigi rwa kûthima njaraani yake. 2 Ndamûûria, “I kû wathi?” Aancookeria, “Nthiîte kûthima Njerusaremu, mbona wariî na ûraaya bwa yo.”3 Rîru mûraîka ûra aaragia naani aantiga, na mûraîka ûngî aaya kûrîîkana n'we, 4 ûra wa mbere era wa baîrî, “Ugia wîre mûthaka ûyu ûrî na rûrigi rwa kûthima, ‘Njerusaremu îgaatuîka taûni îtarî na nthingo n'ûntû bwa antû na nyamû cia ndîîthia kwingîa ku. 5 Na i niû ningwa nkeegua ndî rûthingo rwa mwanki mmîthiûrûkîrîîte,’ i bu Mwathani akuuga, ‘na nkeegua ndî ûkumio bwa yo ndeeni.’
6 “Ncûûni! Ncûûni! Kuthûkaani buume nthîgûrû ya bwa îgûrû, i bu Mwathani akuuga. N'ûntû imbûnyagaarîîtie ta nteere inya cia ruuo rwa îgûrû, i bu Mwathani akuuga. 7 Umaani Mbabironi na buugie bûcooke Sayuuni. 8 Mwathani wa ûkumio, Mwathani wa Njûûrî, N'antûmîîte mbîîra mîgongo îra yabûgwatire mîgwate, atî muntû wonthe ûra abûringithagia aringithagia kaana ka riitho rîa Mwathani. 9 Mwathani akabatura na bakagwaatwa mîgwate i bara baarî nkombo ciao. Rîru bûkaamenya Mwathani Mwene Inya n'we aantûmîîte.”
10 Mwathani ariuga, “Woû mwarî wa Sayuuni, ina na ûkene n'ûntû i mbûyîîte gûkara gatîgatî keenu.” 11 Ntugû înu, mîgongo îmiingî îkaaya kîrî Mwathani, nabo batuîke antû baake. Akaaya atûûre gatîgatî keenu na bûkaamenya Mwathani Mwene Inya n'we aantûmîîte kîrî biû. 12 Nthîgûrû ya Njunda ikeegua îrî rûgai rwa Mwathani ndeeni ya nthîgûrû îra ntheru, na akaathuura Njerusaremu kaîrî. 13 Kiraani ki mbere ya Mwathani bwinthe antû, n'ûntû n'ayîîte kuuma gîkarooni gîake kîra kîîtheru.