SAKARIA
Mwîto wa gûcooka kîrî Mwathani
1
1 Mweriini wa înaana wa mwanka wa îîrî wa wathani bwa Ndariasi mûnene wa Pasia, kiugo kîa Mwathani kîayîîra kîroria Sakaria mwana wa Mberekia, ûyûûe wa Indo gîkiugaga, 2 “Niû, Mwathani indaathûûrire mûno i biûyûûyû bienu. 3 Kwoogu îra antû, ûûgû i bu niû, Mwathani Mwene Inya nkuuga, ‘Ncookeraani naani nkabûcookera,’ i bu Mwathani Mwene Inya akuuga. 4 Bûtigaakare ta biûyûûyû bienu bira bitaathikagîria rîra iroria bia tene biabeeraga, ‘Ûûgû i bu Mwathani Mwene Inya akuuga, “Umaani njîraani cienu inthûûku na bûtigane na mîtugo îmîthûûku.” ’ 5 Biûyûûyû bienu birîkû îîndî? Î iroria bio, anga bitakuire wo tene? 6 Îndî rî biugo na mawatho maakwa mara ndaathire aruti ngûgî baakwa iroria, mataûyûrire kîrî biûyûûyû bienu wa ta bûra ndaugire? Kwoogu baacooka beerira bakiugaga, ‘Mwathani wa Njûûrî agûtûrûthîra bûra bûtûbatîîrue kûringana na mîtugo yetû na ngûgî cietû, wa ta bûra aabaangire kûrûtha.’ ”Kîoneki kîa Mbaraathi
7 Ntugû ya mîrongo îîrî na inya ya mweri wa îkûmi na ûmwe,a mweri wa Sebati, mwanka wa îîrî wa wathani bwa Ndariasi, kiugo kîa Mwathani kîayîîra kîroria Sakaria mwana wa Mberekia, ûyûûe wa Indo. 8 I ndaroonire kîoneki ûtugû, ara ndoonire muntû ari mbere yakwa athithîîtie mbaraathi întuune. Aarûngi gatîgatî ka mîtî ya mîandasi kîbondeeni. Nyuma yake, i kwarî na mbaraathi intuune, cia rangi ya ûkûyû na injerû. 9 Ndaûria, “I mbi ino Mwathani wakwa?”
10 Rîru muntû ûyu aarûûngi gatîgatî ka mîtî ya mîandasi kîbondeeni aancookeria ambîîra, “I bo Mwathani aatûmire baaya kwona bûra gûgûkarîka nthîgûrû.”
11 Nabo bacookeria Mûraîka wa Mwathani ûra aarûûngi gatîgatî ka mîtî ya mîandasi kîbondeeni bamwîra, “Tûkûthiûrûûka nthîgûrû twaraithîîria na twona îrî na ûkiri.”
12 Rîru Mûraîka wa Mwathani auga, “Mwathani Mwene Inya, ûtûûrîîte ûthûûri i Njerusaremu na taûni cia Njunda gwa kagiita ka mîanka mîrongo mûgwanja îîndî. I rî ûkaabeegîîrua kîao?” 13 Kwoogu Mwathani aaria biugo biega na bia kûbooreria kîrî mûraîka ûra aaragia naani. 14 Rîru mûraîka ûra aaragia naani ambîîra, mbugîîrie ûûgû nainya nkiugaga, “Ûûgû i bu Mwathani Mwene Inya akuuga, ‘Wendo bwakwa kîrî Njerusaremu na Sayuuni i bûûnene mûno. 15 Îndî inthûûri mûno i mîgongo îra îîngî îîgagua îrî na ûkiri na îkari bwega. Ndathûûri bûûkai, îndî boongeera thîîna.’
16 “Kwoogu, ûûgû i bu Mwathani akuuga, ‘Ngûcooka Njerusaremu kaîrî nkîbeegagîîrua kîao. Nyomba yakwa îgaakwa ku kaîrî. Rûrigi rwa kûthima rûgaatambûrûkua îgûrû rîa Njerusaremu.’ ” I bu Mwathani Mwene Inya akuuga.
17 Ambîîra nthi na mbere na kuugîîria kaîrî, “Mwathani wa Njûûrî ariuga, ‘Taûni cia Njerusaremu kaîrî ikaunûka ûtonga na Mwathani akabooreria Sayuuni kaîrî na athuure Njerusaremu.’ ”
Kîoneki kîa ngoci inya na aturi bana
18 Rîru ndaûkîîria meetho maakwa ndoona ngoci inya. 19 Ndaûria mûraîka ûra aambaragîria, “I mbi ino?” Aancookeria ambîîra, “Ngoci ino irûngamîîrîîte mîgongo îra yanyagaariirie Njunda, Isiraeri na Njerusaremu.”
20 Rîru Mwathani aambonia aturi bana. 21 Ndaûria, “N'ata baba bayîîte kûrûtha?” Aancookeria, “Ngoci ino n'ira cianyagaariirie Njunda kaingo gûteegua kûrî nwa ûmwe wao akwinia kîongo, îndî aturi baayîîte gûcimakia na gûturania nthî ngoci ino cia mîgongo îra yaûkîîrie ngoci ciao kîrî nthîgûrû ya Njunda, kûnyagaaria antû baayo.”