Sachi ātupu lehan ankhīna
8
1 Hatuka hava suale chu Isua khopui,
khote alūt tira Pathian ram thang ahui rui tāng avahāia.
Abila azolāi Sōmleianni ngāi um a om u na.
2 Hanūk chu nupang senkhat raluain ei sūr le rikhua tin adōna ei mandam ngāi um a om u na.
Mari,
mīn Magdalini ei ti,
ama asūng āta rathasia sari pei ei masuak pe hān a oma.
3 Hanūk chu Herod ina sum āvongpu Kuza nungāk Joanna ngāi,
Susanna ngāi,
hanūk mi tei ātampa ala om u na.
Hiva nupang ngāiin ei thei u anga amāni ngāi adorbo adom
u na.
4 Hatuka mipui ātampa ahong anchun le chu hanūk chu khotin āta mipui ngāi ha Isua kōm ahong u le hiva ankhīna chong hi arila:
5 “Sachi ātupu chu sachi ātu ranga asuaka asēna.
Avatu lāi han asen chu lampui kōla achula.
Hava ha mīn athīna,
chunga vā ngāiin um ahong sāka.
6 Hanūk chu asen chu lung chunga achula,
hatuka ahong amōnga tenchu rathi ei dōn nōk sika athēma.
7 Hanūk asen chu raling bila achula,
tenchu nukhōna raling ahong ansōna hava ha adīp khapa.
8 Hanūk rēt chu asen chu philtak āsana achula,
hatuka ahong amōnga mun razakhat sapār ahong masuak,”
ati na.
Hiva chong aril lāi han anringpāna:
“Anngāina kuar adōn takin rangāi rase,”
ati na.
9 Htuka azolāi ngāiin akōma:
“Hiva ankhīna chong nei ril hi hong ti na mo?”
ati na arakel u na.
10 Amān akōm u na:
“Pathian rama chong anthup ngāi chu na kōm u na anriat sua kēng ani zei.
Tenchu atei ngāi kōma ankhīna le kēng chong kei ril,
hintin hin amānīn ei riat thei u na ranga:
‘Aen u nām ei mu thei u
nōkna ranga,
Arangāi u nām ei riat thei u
nōkna ranga,’ ”
(Isa.6:9 )
ati na amasanga.
11 Ankhīna chong a omzia chu hintin hin ani:
“Sachi chu Pathian chong ani na.
12 Hatuka lampui kōla achul ngāi ha chong arangāi u.
Tenchu diabol ahonga amānīn ei iama damna ei manthei u nōkna ranga amalung u nāta hava chong ha ahong lāk viaka.
13 Hanūk chu lung chunga achul ngāi ha chong ariat u na rāisān taka apom u.
Tenchu razung anthūk dōn u mak.
Chomo khat bak aiam u na,
nukhōna chu anthēmna ahong asuakle achul u.
14 Hanūk chu raling bila achul ngāi chu,
chong arangāi sua u le asēna tenchu anei anung ranga andonna ngāiin ahīpa,
tak chang thei u mak.
15 Tenchu philtak āsa chunga achul ngāi chu malung anzīk taka mandon āsa dōna chong anngāia azoma adōntit le adiartita mara ansua ngāi ani na.
Lēmchuangna chunga lēm
16 Tukarengin lēm aman chuanga kok korong mankhu ngāi mak,
zāmun thuaiām siak ngāi mak.
Tenchu asūnga alūt ngāiin ei mu theina ranga ei chuangna muna kēng ei manchuang.
17 Asik chu anlang lui rang itē ānthup om mak,
hanūk chu ānriat lui rang le anthup thei rang maruk itē om mak.
18 Hava sika han hontin mo chong nei rangāi u ha asa dima anrēng u ro.
Tukareng adōn tak kōma ātama anpēk inti.
Hanūk chu tukareng adōn nōk tak kōma ei dōn tukte ngal ha anpot zita anlāk inti,”
ati na.
Isua anu le aparual ngāi
19 Hatuka chu Isua anu le aparual ngāi akōma asē u na.
Tenchu mipui ei tam sabak sika han akōla sē thei u mak.
20 Hankēng mi khatin akōma:
“Na nu le na parual ngāiin nang anān tongpui rang azōt u,
apanga anding chian u,”
ati na.
21 Hatuka amān:
“Pathian chong anngaia le ātel ngāi rong kēng ka nu le ka parual ngāi,”
ati na amasanga.
Isuan phāivua amanmong
22 Nikhat chu Isuan azolāi ngāi kōma hintin hin ati na:
“Tho,
tīndīl sontiang varāla sē u rei,”
ati na.
Hatuka chu rakuang khata azolāi ngāi le achuanga asē u na.
23 Hava han anveia asē u lāi han Isua chu ain zata om.
Hava lāi tak han phāivua anrikpa tīndīla han ahonga,
rakuang sūnga tī alūt rang ani zeia.
Hatuka rathatāk sabaka a om u na.
24 Hankēng akōm asēna avamathui u na:
“Anānchūpu,
āthi rang na ni zei hile!”
ati u na.
Hatuka ahong anthui le chu phāivua le tīduar ansok chu angōna.
Hatuka alom peia amonga adāi riama.
25 Hatuka chu azolāi ngāi kōma:
“Ho mo nei iam u na ngāi?”
ati na.
Anchi le boidong chunga amāni le amāni ankel u na:
“Hiva mi hi tu mo tāk,
thīnthi le tīduar kōma ngal chong arila ahē ei tel hi!”
ati u na.
Raluain ei sūr khat
Isuan amandam
26 Hatuka chu rakuang anvei u na Galili tīndīl varāla Gadara ram avasuak u na.
27 Hankēng avasuakle nikhua sōtpa raluain ei sūr khat khua nāta ahong ha antongpuia.
Hava mi ha puan abuia sāikoronga a om ani na.
Hanūk chu inām ei om nōkna asōt ani zei.
Ama chu thāna kēng ei vaom chachak.
28 Hatuka chu Isua mēl amule ake kunga anboka anringpīna ankhēka:
“O Isua,
Chungannung khīt Pathian Nāi Pasal,
ka chunga hong mo nei thō zōt?
Na sinsak zām nō ro ba,
ati na kei na mathem,”
ati na.
29 Asik chu Isuan raluai ha asūng āta ahong asuak ranga chong ei pēk ani na.
Hava miring ha hava raluain ei sūr babang chachak.
Mīn zīngzir le thirkual lehan ankhita ei rung u ani na.
Hanum nisela ei ankhitna ngāi ha ei sata hava raluai hān philchār rama ei ruai chachak ani na.
30 Hatuka chu Isuan akōma:
“Hong mo na raming?”
ati na arakela.
Amān amasanga:
“Sipai ngāi,”
ati na.
Asik chu asūnga raluai rual khat pei a om ei ni sika.
31 Hanūk chu raluain khur thuai hek luina muna ei mansē nōkna ranga achālaka amathēm u na.
32 Hanūk chu hava muala han vok rual khat pei anvāi a om a.
Hatuka vok sūnga avalūt ranga Isua kōma amathēm u na.
Hatuka amān aphala.
33 Hatuka raluai ngāi chu hava miring sūng āta asuak u na vok rual bila avalūt u na.
Vok rual ngāi chu tīndīl rakhama avachul u na anning zit u.
34 Hanūk chu hava vok avāi ngāiin amu u na arota asē u.
Hatuka khopuia le khotena om ngāi kōma hava rui ngāi ha avamanthei u na.
35 Hatuka hong zāt mo ani zei ati na a en rang mipui ngāi asuak u na.
Isua kōm ahong asuak u le raluain ei mathān sua miring ha puan aboma,
ahian vanga mi dam anga Isua ke kunga ansuta ahong mu u na.
Hatuka arathāta sabak u na.
36 Hatuka hava amu ngāiin raluain ei sūr āta ei hong damzia ha ahonga en ngāi kōma alei mantheia.
37 Hatuka chu Gadara ram ravēla mi a om ngāiin hava thang ariat u le arathāta sabak u na.
Hava sika han,
amāni khua nāta ankhāia amāk ranga amathēm u na.
Hatuka ama chu rakuanga avachuanga akīr rēta.
38 Raluain ei sūra azōkpu ha Isua bibila asē ranga akōma amathēma.
Tenchu Isuan hintin hin amansēna:
39 “Na ina kīr tānla,
Pathianin na chunga sin alianpa ngāi ei na thō pe ha varil ro,”
ati na.
Hatuka ama chu akīra khopui sūnga Isuan atak chunga ei thō pe ngāi ha tāng avahāia.
Nupang sanāite khat
āthi le nupang khat dam lui
40 Hanūk chu Isua ahong akīr rēt le mipui ngāiin rāisān taka alei phām u na.
Asik chu alom u na alei maruang chian u ani na.
41 Hanūk chu mi angkhat araming Jaira,
ama chu Jihudi ngāi ankhōmna ina ruaitu khat ani na.
Ama chu akōma ahonga.
Hatuka Isua ke kunga ahong anboka a ina aruai ranga ahong mathēma.
42 Asik chu anāi nupangte khat dak kum sōmleianni mi adōna.
Hava nāi nupangte ha āthi rang ani zeia.
Hatuka lampui asē sūng u han mipui ngāiin Isua chunga ahong andel u na.
43 Hankēng chu nupang khat kum sōmleianni thīn ei huat dam lui khat a om a,
asum nei dōra lehan daktora anenna ranga amanga.
Hanum nisela tutēn mandam thei mak.
44 Hasika han Isua anūk tianga ahonga apuan mērte atōna anrappana athīn ei huat chu among lena.
45 Isuan akōma:
“Tu mo ana tōn?”
ati na.
Koi chu ni makung ati kiar u na.
Hatuka Peterin akōma:
“Anānchūpu,
mipui ātam sabak ani na.
Hanūk chu na chunga mīn ei na delpol ani zei.
Hanum nisela:
‘Tu mo ana tōn?’
nei la ti,”
ati na.
46 Hanum nisela Isuan:
“Tukhatin mo ana tōn a om.
Ka tak chung āta thōtheina ranak asuaka ka riat,”
ati na.
47 Hankēng hava nupang hān ei anthup thei nōk rang ei anriat sika arathāta chunga ahonga amakunga anboka.
Hatuka ei tōnna asik le anlāiseka ei hong dam len zia ha mipui ngāi matona aril zita.
48 Hatuka amān akōma:
“Ka long,
rāi man sān ro.
Nei iamna lehan na dam zei.
Phūkdāia sē ta ro,”
ati na.
49 Hankēng Isuan chong aril lāi tak han Jihudi ngāi ankhōmna ina ruaitu Jaira a in āta mi khat ahonga:
“Na nāi nupangte alei thi sua zei,
Anānchūpu manpōng lāi nō ro,”
ahong ti na.
50 Isuan hava thang ha ei riat le akōma:
“Na ratha manta nō ro,
iamtit pei ro,
adam rēt rang kēng,”
ati na amasanga.
51 Hatuka Jaira chu a in avasuak u le Peter,
Johan,
Jakob hanūk chu nāipangte anu le apa rong nōk chu tutē ina alūt ranga phal mak.
52 Hava lāi han lokī reng achapa ankhēk u na.
Isuan akōm u na:
“Chap u nō ro,
ankhēk u nō ro.
Āthi la ni mak,
tenchu a in kēng,”
ati na.
53 Tenchu āthi zei ti ei riat tatak u sika ama chu maniēro athō u na.
54 Tenchu mipui dōra amasuak zita Isuan akut asūr pena:
“Nupangte,
hong anthui ta ro,”
ati na amathuia.
55 Hatuka chu aratha chu ahong akīr rēta anrappana ahong anthuia.
Hatuka:
“Anēk asāk rang hongte mo sin pe u ro,”
ati na.
56 Anu le apa ngāi aboi adong khap u na.
Tenchu amān asin thō ngāi ha tutē kōma ril u ta ni ati na chong akhāra.