Isua zolāi mānsa ngāi ei pāina
5
1 Nikhat chu mipui ngāi ama kōma ahong u na an-ep sabak chunga Pathian chong arangai u na.
Hava lāi han ama chu Genesaret tīndīl rakhama andinga.
2 Hanūk chu amān tī rakhama rakuang anni a om
amu na.
Tenchu hava ha ngāsūr ngāi arakuang u amāka alēn avān sūk u ani na.
3 Hankēng hava anni ngāi bila angkhat Simon arakuanga achuanga,
tāng āta ankār uala achōi ranga amathēma.
Hatuka rakuang chunga ansuta mipui ngāi kōma anchūna chong arila.
4 Hatuka chong aril ansuale amān Simon kōma:
“Tī anthūkna tianga rakuang chōi ro.
Hatuka chu ngā nei manna ranga na lēn dēng ro,”
ati na.
5 Hatuka Simonin akōma amasanga:
“Anānchūpu,
zān asōtpa na dēnga itē man mak me tenchu nang na chonga lēn dēng rēt ka ti,”
ati na.
6 Hantin han athō u le chu ngā tampa aman u na,
alēn u āchet rang athōna.
7 Hankēng rakuang ateia alōm ngāi ahong āsan u ranga akut le azāp u na.
Hatuka ahong u na rakuang aninīn aman bit u na anning rang athōna.
8 Hava ngāi ha Simon Peterin ariata,
Isua ke kunga anboka:
“Puma,
ka kōm āta nānkhāi pe ro,
asik chu mi salui kēng ka ni,”
ati na.
9 Asik chu lēna ngā tampa ei man u sika ama le alōm changpui ngāi aboi adong sabak u na.
10 Simon alōm changpui ngāi Zabedai anāi Jakob le Johan ngāi um hantin han aboi adong u na.
Hankēng Isuan Simon akōma:
“Āchi nō ro,
atun āta miring kēng nei sūr rang ani zei,”
ati na.
11 Hatuka arakuang u ngāi tāng kōla ahong chōi u na,
aloma amāk kiara anūk azī u na.
Isuan aphār khat amandam
12 Hatuka en ro,
ni khat chu ama ha khua khata a om lāi han mi khat apumpuia aphār a oma.
Amān Isua amu na anbok laka amōka:
“Puma,
nei zōt ani anten,
na manthiang ro ba,”
ati na amathēma.
13 Isuan akut abāna atōna:
“Ka zōt,
anthiang len ta ro,”
ati na.
Hatuka ei phārna ha anlāiseka asāi pe vang lena.
14 Hatuka amān akōma:
“Tutē kōma ril nō ro.
Tenchu na theia chāizūng kōma sē tānla vān en ro.
Hatuka mīn nang ei na riatpuina ranga Mosi dān anga anthiangna ranga anbōlna dāli vadar ro,”
ati na.
15 Tenchu ama arui atāng chu anthang riama mi tampa achong anngāi rang le arikhua u nāta adam ranga mipui ahong anbūm u na.
16 Tenchu ama chu mibuina mun khata asēna bōr avazonga.
Isuan āzeng khat amandam
17 Nikhat chu amān mi amanchū lāi han Pharisi le Dān mīnchū ngāi akōla ansut u na.
Amāni ngāi ha Galili le Judia rama khotin le Jerusalem khopui āta ahong u ani na.
Hatuka ana ngāi ei mandam theina ranga Puma rātna achunga a oma.
18 Hatuka enta,
āzeng khat hi azālmun lehan ahong razōn u na.
Hanūk chu asūnga avalūtpuia amakung taka āsiak ranga aval u na.
19 Tenchu mi tampa kāra alūtpuina lampui ei man u nōk sika in chung tiang akalpui u na.
Hatuka in chung alīka azālmun len le mi malāi tak Isua makunga amasum u na.
20 Isuan ei iam u zia amu na akōma u na:
“O miring,
nei masial ngāi dōra andual zei,”
ati na.
21 Hatuka Pharisi le Dān mīnchū ngāi chu andon u na:
“Hiva mi hi tu ngal mo hi,
hin tina Pathian siat ei ril hi?
Pathian rong nōk chu tu mo āsia andual thei?”
ati u na.
22 Isuan amandon u ngāi alei riata amāni kōma amasanga:
“Na malung u na ichang mo hantin han andonna nei dōn u?
23 Hova mo abei ual?
Nei masial ngāi andual sua zei ati mo?
Ole anthui tānla kal chōia sē ro,
ati mo?
24 Tenchu maniapura āsia andual theina chu Miring Nāi Pasal rong kēng adōn ti nei riat thei u na ranga kei ti,”
ati na.
Amān āzeng kōma:
“Kei na ti ani zei,
anthui tānla na zālmun dianga na ina sē ro,”
ati na.
25 Hankēng amakung u na anthui lena azālmun adianga Pathian anpāk chunga a ina asēna.
26 Hatuka chu alom u na aboi adonga Pathian aman pāk u na.
Hatuka chu ratha tāk chunga:
“Avian hin tichang abui om khat kēng nei mu ani zei hile!”
ati u na.
Isuan Levi apāi
Mt. 9:9 -13 Mk.2:13 -17
27 Hava suale Isua asuak rēta,
siachōi ansuang khat a oma,
araming chu Levi.
Ama chu siachōi ina ansut avamuna.
Akōma:
“Ka nūk na hong zī ro,”
ati na.
28 Hatuka Levi anthui lena aloma amāk zita anūk azīna.
29 Hankēng Levi hān a ina Isua aruaia bu nēkna alianpa khat amansūka.
Amāni bila siachōi ansuang ngāi ātampa le mi atetei ngāi um ansut u na.
30 Tenchu Pharisi le Dān mīnchū ngāi bila mi hān azolāi ngāi tak chunga bāi aman kham u na:
“Ichang mo siachōi ansuang ngāi le mi salui ngāi bila bu nei nēk u?”
ati u na.
31 Isuan amāni kōma amasanga:
“Ādam ngāi ranga ni mak daktor ei nāng,
tenchu dam lui ngāi kēng anāng.
32 Mi dik ngāi apāi ranga ahong ni makung,
tenchu mi salui ngāi malung ansīr ranga ahong ka ni,”
ati na.
Bungoi ruia Isua kōma ankelna
33 Hatuka mi senkhatin ama kōma:
“Johan azolāi ngāi chu bungoia bōr azong u chachaka,
hanūk chu Pharisi ngāi zolāi um athō u chachak.
Tenchu ichang mo na zolāi ngāi le ei nēk len u chachak?”
ati u na.
34 Hatuka Isuan amasanga:
“Mākpa abil u na a om sūnga mui anruaina anchel alōm ngāi bungoia mo a om ngāi?
Om thei mak.
35 Tenchu hun ahong asuak rang ani zei,
hava tika chu mākpa abil u nāta anruai viak tika chu bungoia la om unti,”
ati na.
Puan le savun
būr ruia ankhīna
36 Hatuka hiva ankhīna chong hi amāni kōma arila:
“Tutēn puan athar anchēpa puan maruana diba thō ngāi mak.
Hava ha mīn athō ten,
puan athar um maset inti.
Asik chu puan maruana puan athar diba thō anngoi mak.
37 Hanūk chu tutēn gerep zu athar hi savunbūr maruana thāl ngāi mak.
Havan tin han mīn athāl ten gerep zu atharin savunbūr ha makhui inti.
Hatuka savunbūr ha kui intia zu chu ei anpei rang ani na.
38 Tenchu gerep zu thar chu savun būr athara kēng mīn athāl ngāi.
39 Hanūk rēt chu tutēn gerep zu marua anēk suale gerep zu thar anēk ranga phut len
ngāi mak.
Asik chu mīn:
‘Gerep zu marua hi kēng āti ual ei ti,’ ”
ati na.