Chongphutna
1
1 Koini kāra rui ahong asuak rachi ngāi anziak ranga mi tamtakin ei hong pūt ani u na.
Hava rui ngāi koinīn nei iam tatak ani na.
2 Hatuka chu hava ngāi ha aphut len āta mita āmu le chong aril dorbōndom ngāiin hava rachi anril ngāi ha koini kōma ei na betōk u ani na.
Hasika han amāni ngāi ei na ril u anga kei hong maziak ani na.
3 O Theophila alian tak,
anphut len āta alom peia adōn tēna asa dima hiva rachi ngāi hi kei hong riat ani na.
Hasik han hiva ngāi hi na ranga anziak hi āsa ati na kei mandon ani na.
4 Asik chu māna mīn ei na ril le ei na manchū ngāi ha ādik tatak ani ti nei riat ngēt theina ranga na ranga kei maziak.
Baptispu Johan anzirna rang aphāmān āta alei anril rui
5 Judia rama rēng Herod ahun lāia chāizūng Abija ngāi tianga mi chāizūng khat a om a araming chu Zakaria ani na.
Hanūk chu anungāk araming Elizabet ha Aaron akhūka mi ani na.
6 Anīn u na Pathian mitmuna mi dik tak Puma chongpēk ngāi le adān ngāi dōra chu demna buia ātel ani u na.
7 Hanum nisela Elizabet chu āching ei ni sika nāi nei u mak.
Hanūk chu anīn u akum ātam sabak mi ani u zeia.
8 Hankēng chu chāizūng mi ngāiin ei thō u babang dān anga ni khat chu adōn achuka Pathian makunga chāizūnga avāndinga.
9 Hatuka hava lāi han,
chāizūng dān anga adōn achuka Puma biak ina marim ahui ahāl ranga avalūta.
10 Hatuka marim ahui avahāl lāi tak han mipui ngāi dōra chu apanga bōr alei zong u na.
11 Hankēng Puma vānpalāi khat marim ahui hālna maichām chang tiang andinga akōm ahong anlanga.
12 Hatuka Zakarian amu le chu anlāiraka anchīm ei achi ani na.
13 Hanum nisela vānpalāiin akōma:
“Zakaria āchi nō ro,
asik chu na bōrzongna Pathianin ana lei rangāi pe kēng ani zei.
Na nungāk Elizabet ha nāi pasal mazir inti,
araming chu Johan ati na phuan nati.
14 Hatuka aphāma na rāisān inti.
Ama ei anzir sika hin mi tamtak rāisān inti.
15 Asik chu ama chu Puma mit muna alian nīntia,
zu le anrīna chi atei itē reng ne pial nō ni.
Hanūk chu anzir len āta Ratha Ānthianga abita om inti.
16 Israel mipui tamtak Puma a Pathian u kōma hong kīr rēt unti.
17 Hatuka pa ngāi malung chu nāi ngāi tianga ei makhīr rēt theina rang.
Hanūk chu hē tel lui ngāi dikna lampui tianga andonna Puma ata ranga mipui ansin sua diam Elija arilru le asinthōtheina anput chunga Puma matona kal manchōi inti,”
ati na.
18 Zakarian vānpalāi kōma arakela:
“Hava ha ei ni rang ti hontin mo koiin kei riat thei rang?
Ka tar sua zei hile?
Hanūk chu ka nungāk umatarsabak sua kēng ani zei hile?”
ati na.
19 Vānpalāiin akōma amasanga:
“Koi hi Gabriel ka ni,
Pathian makunga anding ka ni na.
Nang na kōma chong aril rang le hiva thang ahui antung ranga Pathianin ei na hong tīr ka ni na.
20 En ro,
ka chong ril ngāi ahun taka ahong atung ranga nei iam nōk sika hava ngāi honga kip māseng chu chong thei luia adāireka om in na ti,”
ati na.
21 Mipuiin Zakaria chu alei ngāk chian u na.
Hatuka biak in sūnga ichanga mo asōtpa ei vaom ani zei ati na aboi alei dong u na.
22 Hatuka chu ahong asuak le chu akōm u na hong chong thei lāi mak.
Amāni hān biak in sūnga anrālna kēng ei mu ani zei ti ariat thei u na.
Asik chu akōm u na akut le ei hong chong ani na,
tenchu chong thei luia han ei om chian ani na.
23 Hatuka adorbo andomna hun ahek le a ina ei kīra ei sē ani na.
24 Hava suale chu anungāk Elizabet nāi avonga tha rangā pei anthup chiana a om a.
25 Hatuka amān ati na:
“Miring ngāi kāra ka māi mōkna ana pei pe ranga hiva huna ka ranga ei na thō pe hi alungkhamna ei hong manlang kēng,”
ati na.
Isua anzirna rang
aphāmān āta alei anril rui
26 Hatuka tharuk changna han Pathianin vānpalāi Gabriel chu Galili rama Nazaret khuana atīra.
27 Hava han nungākte ānthiang khat kōma ahong atunga.
Hava nungāk ha David akhūka pasal khat araming Joseph ranga anbiak sua ani na.
Hava nungāk ānthiang raming ha Mari ani na.
28 Akōma vānpalāi chu asēna:
“Chibai!
Andit aruaina na kōm ahong atung zei.
Asik chu Puma na kōma a om kēng.
Nupang ngāi dōr āta nang chu bōrsāng atung kēng na ni zei,”
ati na.
29 Tenchu vānpalāi achongril ngāi sika achālaka andonna adōna.
Hanūk chu:
“Hong zāt ti na chibai mo tāk!”
ati na amalunga andonna adōna.
30 Tenchu vānpalāiin akōma:
“Mari,
na ratha manta nō ro.
Nang chu Pathian lungkhamna achang sua kēng na ni.
31 En ro,
nangin nāi vong in na ti,
nāi pasal khat mazir in na ti.
Ama raming chu ISUA ati na nei phua rang.
32 Ama chu ālian hong chang inti.
Chungannung khīt Nāi Pasal ei anti rang.
Puma Pathianin achipui David arēng changna chōmphāng chu akōma pēk inti.
33 Hatuka Jakob akhūka tāituana ruiril inti.
Hanūk chu arēng changna nikhua ei hekna om nō ni,”
ati na.
34 Marīn vānpalāi kōma:
“Hava ngāi ha hontin mo ei hong om thei rang?
Asik chu pasal le ngal anriatna la dōn makung hile?”
ati na.
35 Vānpalāiin akōma amasanga:
“Ratha Ānthiang chu na chunga hong om inti.
Chungnung anlal khīt rātna hān na hong athuam inti.
Hava sika nāite ānthiang nei mazir rang ha Pathian Nāi Pasal ei anti rang ani na.
36 Hanūk chu en ro,
na unāi nu Elizabet umatarsua nūka nāi pasal avong zei.
Mīn āchingnu ei ti ha atun hin tharuk ei changna ani zei.
37 Pathian kōma chu ni thei ngāi mak itē reng om thei mak,”
ati na.
38 Hankēng Marīn:
“Enta,
Puma suak ka ni,
nang na chong anga ka tak chunga hong tung rase,”
ati na.
Hatuka chu vānpalāiin amāka asēna.
Marīn Elizabet avapan
39 Hava sua lehan Mari chu ansina anrarapa Judia rama khua angkhata asēna.
40 Hava han Zakaria ina avalūta Elizabet rang chibai avathō na.
41 Hatuka Elizabetin Mari chibai thō chu alei riat le avonsūnga nāite chu sīng alei ansa na.
Hankēng Elizabet chu Ratha Ānthianga ahong abita.
42 Hatuka anringa ankhēka:
“Nupang ngāi lim kāra nang chu bōrsāng atung kēng na ni.
Na sūngrīla nāi nei vong um bōrsāng atung kēng.
43 Tenchu koi hotuk ravān āsa mo kei anlō ani na.
Asik chu ka Puma anu ngētin ka kōma ei hong mantung hi!
44 Enta,
ka kuarin na chibai thō ei riat viai le ka vonsūnga nāite rāisāna antōma sīng alei ansa zei.
45 Nang alei iamnu chu bōrsāng atung na ni,
asik chu Puma chong ril ngāi dōra na kōma ei la hong kip rang,”
ati na.
Marīn anpākna la thō
46 Hatuka chu Marīn la athōna:
“Ka sūngrīlin Puma ei
manpāk.
47 Ka ratha hīn ka Sandampu
Pathian chunga arāi
amansāna.
48 Asik chu koi asuaknu kei
annuai zia chu ana muna.
En u ro,
atun āta akhūk
akhūkin,
Mi dōrān bōrsāng atungnu
na ti unti.
49 Asik chu Ranak Anei khītin
ka chunga asin thōtheina
alian tak chu ei na hong
manlang pe.
Ama raming chu Ānthiang
ani na.
50 Ama lalchi athō ngāi dōra
chunga alungkhamna
chu akhūk akhūka
a om kēng.
51 Akut arāt lehan sin alianpa
ngāi ahong zuia.
Amalung mandona
chongpāk ansal ngāi chu
chei anvāia asiaka.
52 Rui arilpu ngāi chu arēng
sutmun āta amasuma.
Annuaia om ngāi chu
chung ansanga asiaka.
53 Anchām ngāi chu neinun āti
lehan amankhopa.
Anchong ngāi chu kut
koronga ama khīra.
54 Alungkham dōn ei riattit
sika
Asuak Israel kōma sanna
apēk chachaka.
55 Koini na chipui ngāi kōma,
Abraham le achi ngāi
kōma tāituana
Alungkhamna anlang ranga
achongtin sika,”
ati na.
56 Hatuka Mari chu Elizabet ina thānthum dām a om a.
Hava suale chu ama ina akīra ei sē rēt ani na.
Baptispu Johan anzirna rui
57 Elizabet ha nāi anei rang ahun ahong asuaka nāi pasal khat amazira.
58 Akhua atī mi ngāi le aphung aunāi ngāi dōrān Puma alungkham muna achunga anlang ti ariat u na,
ama bila rāi aman sānpui u na.
59 Hatuka ni riat changna han nāitete serantanna rang nikhua ahong asuaka.
Hatuka apa Zakaria raming anputa araming aphua rang ati u na.
60 Tenchu anūn:
“Hava ha ni mak,
araming rang chu Johan kēng,”
ati na.
61 Hatuka amānīn:
“Enta,
na unāi ngāi bila tutē hiva ang raming anphua la om ngāi mak hile!”
ati u na.
62 Hatuka apa kōma han akut le achongpui u na:
“Hong mo araming nei phua zōt?”
ati u na.
63 Hankēng amān anziakna lungpēk khat azonga:
“Araming chu Johan,”
ati na amaziaka.
Hava sika han alom u na achang adong sabak u na.
64 Hatuka amūr anlong pena amalei sīngansa pe lena Pathian anpāk chunga ei hong chong thei ani zei.
65 Akōla akhua ati mi ngāi chu arathāta sabak u na.
Hanūk chu hava rui ha Judia ram kho dāma mi ngāi dōrān aril susup u na.
66 Hatuka hava ruia ariat dōra pei chu amalunga andonna adōn chip u na.
Hatuka amānīn ati u na:
“Hanle hava nāitete ha imo ei hong ni rang tāk?”
ati u na.
Asik chu Puma akut achunga om kēng ani zei.
Zakarian anpākna la thō
67 Hatuka apa Zakaria chu Ratha Ānthianga abita hiva deari chong hi alei hong rila:
68 “Puma,
Israel ngāi Pathian
chu anpāka om rase.
Asik chu ama ei honga ami
ngāi ei hong ratan ani na,
69 Asuak David sūngkua
nāta Sandampu arāt
khīt angkhat ahong
masuak zei.
70 Tian lāi āta deari ānthiang
ngāi mūr āta chong alei
hong puang ang taka ei
hong om ani na.
71 Koini anadui ngāi le anān
mumāk ngāi dōra kōm āta
amān ana hong mazōka.
72 Havan tin han koini na
chipui ngāi kōma
alungkham muna chu
ahong anlang rang
le adān khit athar
ānthiang chu ei riattit
theina ranga.
73 Hiva hi ani ama akhomāk
ansamna,
koini na chipui
Abraham kōma achongtin,
74 Anadui ngāi kut āta ei na
ratana anchina buia
ama dorbo nei dom
theina ranga.
75 Hanūk chu koinīn ānthiang
e adik lehan na
damsūnga ama dorbo
nei dom theina ranga.
76 Hanūk chu nang ka nāi
pasal,
Chungnung anlal khīt
deari antīn na ti.
Asik chu ama alampui
aleia sin ranga Puma
matona alei asē rang
kēng na ni.
77 Sandamna ruia anriatna
chong apēk ranga hanūk
chu ami ngāi āsia nāta
andualna pēk ranga.
78 Koini na Pathian asūngrīl
lungkhamna zāra
chungvān āta ni suak
avār ei hong anlang
anga ei na hong thīra.
79 Azīng kāra a om ngāi le
hīna ralīma ansut ngāi
a ēl rang le phūkdāina
lampuia ana ruai rang
kēng,”
ati na.
80 Hatuka chu nāitete chu ahong aliana,
ratha tianga ansōn tira.
Israel mipui ngāi bila ei anlangna nikhua asuak māseng pei chu philchār rama a om a.