Baptispu Johanin lampui asāt
1
1 Pathian Nāi Pasal Isua Krista ruia thang ahui aril ei anphutna.
2 Deari lekhabūna ānziak anga:
“En ro,
ka palāi chu na
matona hong tīr ka ti.
Amān na lampui chu sin inti.”
(Mal.3:1 )
3 “Philchār rama mi hē khat
ankhēk a om a:
‘Amān Puma lam lian chu lei
sin u ro.
Alampui ngāi chu lei manzīk
u ro,’ ”
(Isa.40:3 )
ati na.
4 Havan tin anga Johan chu philchār rama ahonga āsia andualna ranga malung ansīrna baptisma ruia chong arila.
5 Hatuka chu Judia rama khua dōra le Jerusalem khopuia mi ngāi dōra akōma asē u na.
Hanūk chu āsia ei thō u ngāi dōra anpuang u na alom u na Jordan dunga akōma baptisma alāk u na.
6 Johan chu mākingkang mul puan ansila akōnga mevun kōngkhit ākhit ani na.
Hanūk chu khāi le rama khuaining ngāi ha ei sāk chachak ani na.
7 Amān hintin hin mipui ngāi kōma ati na:
“Ka nūka hin ka nēka alian khat ahong rang ani zei.
Koi chu anbūna akekok khitna ri asūt rua ngal ni makung.
8 Koi chu tī le kēng baptisma kei na pēk u,
tenchu amān Ratha Ānthiang le baptisma na hong pēk unti,”
ati na.
Isua baptisma le anthēmna
9 Hava lāi han Isua Galili rama Nazaret khua nāta ahonga Jordan dunga Johan akōma baptisma ahong lāka.
10 Hatuka tī nāta ahong asuak phingle chungvān anlonga amuna.
Hatuka chu Ratha chu vasu anga achunga ahong achuma.
11 Hatuka chungvān āta hē ahong asuaka:
“Nang hi ka Nāi Pasal madit tak na ni.
Na chunga hin achālaka ka rāi asān,”
ati na.
12 Hava ansua phingle chu Ratha hān philchār ram tianga atīr lena.
13 Hatuka hava han soitān anthēmna lehan ni sōm manli philchār rama a om a.
Rama sa ngāi bila a om le chu,
vānpalāi ngāiin ahong kiavāng u na.
Isua azolāi mānsa ngāi anpāina
14 Hatuka Johan ha ankhumna ina ankhum ranga anbetōk suale Isua chu Galili rama ahonga Pathian ram thang ahui hintin hin arila.
15 Amān:
“Hun ahong asuak rang ani zei,
Pathian ram um ahong anāi zei.
Na malung mansīr u tānla,
thang ahui iam u ta ro,”
ati na.
16 Hankēng Isua chu Galili tīndīl kōla kal achōia asē lāi han Simon le aparual Andria tīndīla lēn adēnga avamuna.
Hava ngāi ha ngāsūr miring ngal ani u na.
17 Isuan akōm u na:
“Ka nūk na hong zī u ro.
Koiin miring asūra na sin u ka ti,”
ati na.
18 Hatuka alēn u ngāi amāk rak len u na anūk avazī u na.
19 Hatuka chu havan āta asē uala,
Zabedai anāi pasal Jakob le aparual Johan chu avamuna.
Amānīm alēn anlianga rakuanga om ani u na.
20 Amāni rang hām nisela apāi lena.
Hatuka apa u Zabedai chu anlō ranga mi ei ruai u ngāi kōma rakuanga amāk u na,
ama nūk avazī u na.
Isuan raluai khat arazūl
Lk.4:31 -37
21 Hatuka chu Kapernaum khuana avalūt u na.
Hatuka Jihudi ngāi pōngansa nikhua ahong asuakle ankhōmna ina avalūta mi ngāi kōma anchū rang avaphut lena.
22 Ami manchū zia ha mi ngāi aboi adong u na.
Asik chu dānminchū ngāi anga ni mak.
Tenchu ningneina dōn sabak anga mi ei manchū ani na.
23 Hatuka hava han amāni ei ankhōm u na ina raluain ei sūr mi khat a om ha anringa ankhēka.
24 Hava mi hān:
“Nazareta Isua,
nang le koini hong mo nei anzomna?
Koini ana pei ranga ahong mo na ni?
Tu mo na ni ti ka na riat hale!
Nang chu Pathian āta hong Mi Ānthiang kēng na ni,”
ati na.
25 Tenchu Isuan:
“Dāi rek ta ro,
asūng āta hong suak ro,”
ati na angōna.
26 Hatuka hava raluain achālaka akhiaka anringpāna ankhēka asūng āta ahong asuaka.
27 Hatuka alom u na atina chang re u mak,
amāni le amāni ankel u na:
“Hiva hi hong ti na mo?
Anchūna rui athar khat kēng ani zei.
Raluai ngāi kōm um ningneina dōn chunga chong arila,
ahē ngāi atel u hile!”
ati u na.
28 Hatuka anrappa sūnga Galili ram dāma mun tina athang chu anthek zit zeia
Isuan mi tampa amandam
29 Hatuka ankhōmna in āta ei hong suak phing u le Jakob le Johan lehan Simon le Andria ngāi ina avalūt u na.
30 Simon atarpi ha rāitun atonga alei azāl ani na,
Isua kōma arui alei ril len u na.
31 Hatuka akōma asēna akut avasūra ei mathui ani na,
hatuka rāitunin amathāna amāni ranga dorbo adom lena.
32 Hava khului han ani bui suale aloma ana ngāi dōra le raluain ei sūr ngāi dōra akōma ahong ruai u na.
33 Akhua pumpui ha suakkhār kōla ahong anbūm zit u na.
34 Hatuka chu rikhua ateteia ana ngāi mi tampa amandama.
Hatuka amān raluai ātampa arazūla,
tenchu raluai ngāiin ama chu ei riat u sika achong ranga phal mak.
Isuan mibuina muna bōr azong
Lk.4:42 -44
35 Hatuka chu ārkhuan chunga khua ahong avār mān anthuia avasuaka,
mibuina mun khata asēna hava han bōr avazonga.
36 Hatuka Simon le alōm ngāi ama athūn ranga asuak u na.
37 Ama avamu u le:
“Aloma mi dōrān ei na rok sabak kēng zei sole,”
ati u na.
38 Hatuka amān akōm u na:
“Tho,
anāi ual khua ateiām sē u rei,
sovan um chong kei varil theina ranga.
Asik chu hava sik piala ahong ka ni,”
ati na.
39 Havan tin han,
Galili ram pumpuia ei ankhōm u na in tina alūta chong aril tira raluai ngāi arazūla.
Isuan aphār khat amandam
40 Hatuka aphār khat Isua kōm ahonga:
“Nang nei zōt aniten,
na na manthiang thei,”
ati na amankhūk abil chunga ahong mathēm sabaka.
41 Hatuka Isuan lungkham amuna akut asōna avatōna:
“Ka zōt,
anthiang om ta ro,”
ati na.
42 Hatuka anlāiseka ei phārna
chu anthiang pe lena ahong dama.
43 Hatuka Isuan chong ana sabaka arila ei man sē len ani na.
44 Hintin hin akōma:
“En ro,
tutē kōma varil nō ro.
Tenchu chāizūng kōma na theia sē tānla vaman mu ro.
Hatuka chu mīn ei na riatpuina ranga,
Mosi dān anga anthiangna ranga anbōlna dāli ha vadar ro,”
ati na.
45 Tenchu ama chu asuaka hava thang ha tāng avahāia avathek sabaka.
Hava sika han Isua chu mipui vāntāng kōma anlanga khopui sūnga lūt thei lāi mak.
Tenchu apanga mibuina muna avaom a.
Hanum nisela mun tina mi akōm ahong u chachaka.