Isua athi nāta anthui rēt
28
1 Jihudi ngāi pōngansa nikhua suale hapta nikhua mānsana ārkhuan chunga Magdalini Mari le Mari atei rēt ha thānkhur avaen ranga asē u na.
2 Hankēng nīnu anrikpa anlāiseka ahong raka,
asik chu Puma palāi khat anvān āta ahong achuma thān bāikua nāta lung akhāia achunga ansuta.
3 Amēl chu khuanlek aphuazeka hatuka apuan ngāi chu arial anga avār sabak ani na.
4 Hatuka chu ama ha ei chi u sika arung ngāiin anbok laka amōk u na athi anga azāl u na.
5 Vānpalāiin nupang ngāi kōma:
“Āchi u nō ro,
asik chu nangnīn ha krosa antār Isua ha kēng nei ravān u ti ka riat,
ama chu hiva hin om lāi mak.
6 Asik chu amān ei om rang ei ti anga han anthui rēt zei.
Hong u ro,
ama ei ansiakna mun chu hong en u ro.
7 Hatuka anrapa sē u tānla azolāi ngāi varil u ro,
ama chu athi ngāi bil āta anthui rēt zei.
Hatuka nangni na māna Galili rama alei sē zei,
nangnīn sova son vamu un na ti.
En u ro,
hiva chong ngāi hi kei na ril u,”
ati na.
8 Hatuka hava nupang ngāi ha anrarapa thānkhur āta asuak u na,
anchi sabak le rāisān chunga azolāi ngāi kōma hiva thang avaril ranga atān chian
ngāi ha aril ranga asē u lāi tak Isuan antongpuia chibai athōna.
Hatuka amānīn avapan u na ake avasūra anbok laka amōk u na.
10 Hankēng Isuan akōm u na:
“Āchi u nō ro.
Tenchu sē u tānla ka parual ngāi kōma Galili rama asē ranga varil u ro.
Amānīn sova son na vamu unti,”
ati na.
Thānkhur arung ngāi chongril
11 Hatuka hava nupang ngāi ha asē u lāi tak han arung ngāi bila senkhat khopuia asē u na chāizūng alian ngāi kōma rui asuak ngāi dōra avamanthei u na.
12 Hankēng chāizūng alian ngāi chu pātar ngāi lehan anlopa chong amansūk u na sipai ngāi kōma sum ātampa apēk u na.
13 Amānīn ati u na:
“Nangnīn ti u ro,
na in lāi tak zāna azolāi ngāi ahong u na ama chu ahong maruk viaka achōi u zei,
ti u ro do.
14 Hiva rui hi ram oppu kuara avatung ten koinīn mathēm bō mani,
hatuka antakna nei tēng u rang āta na huai bō mani,”
ati u na.
15 Hatuka ārung ngāi chu sum alāk u na chāizūng alian ngāiin ei manchū u anga athō u na.
Hiva ruia rachi hi Jihudi ngāi kāra antheka avian ten peia
ala om a.
Chongpēk alian khīt
16 Hatuka zolāi somleikhat ngāi chu Galili rama asē u na,
Isuan ei ruatna muala han avakal u na.
17 Hatuka ama chu amu u le anbok laka amōk u na,
tenchu amāni bila senkhat chu malung song ankharna adōn u na.
18 Hankēng Isua chu amāni kōma asēna:
“Anvān le maniapūra aloma ningneina dōra chu Pathianin ka kōma ana pēk zei.
19 Hasika han nangni sē u tānla aloma nam tin chi tin mi ngāi chu zolāi manchang u ro.
Pa,
Nāi Pasal le Ratha Ānthiang raminga baptisma vape u ro.
20 Chong kei na pēk u ngāi aloma ātel ranga manchū u ro.
En u ro,
hun ei hek tenpei na bil u na a om chian ka ni,”
ati na.
Amen.