Jerusalem biak
in ei siat rang rui
24
1 Hava suale Isua chu biak in āta ahong asuaka kal achōi lāi han azolāi ngāiin biak in ei ansinna anmu ranga akōma ei hong u.
2 Tenchu Isuan amāni kōma amasanga:
“Nangnīn le hiva ngāi hi mu u mak che mo?
Kei na ril tatak ani u zei,
hiva muna lung angkhat hi hanūk lung angkhat chunga ankam nō ni,
aloma thuaia la chul zit inti,”
ati na.
Hun ahekna ranga
sinsiana ngāi
3 Hava suale ama chu Maruan muala avān sut le azolāi ngāi chu adāi riama akōma ahong u na:
“Hiva ngāi dōra hi itik mo ei om rang?
Hanūk chu nang nei hongna rang le hun ahek sinsiana chu imo ei ni rang?
Na man thei ro ba,”
ati u na.
4 Isuan amāni kōma amasanga:
“En u ro,
tutēn na huang ving u ni.
5 Asik chu mi tampa ka raming arila hong unti.
Hatuka ‘Koi hi hava Krista ka ni zei,’
ei hong anti rang.
Hanūk chu mi tampa ei la hong huang rang ani na.
6 Hanūk chu nangnīn anduina rahu riat un na ti,
tenchu na ratha manta u nō ro.
Asik chu hava ngāi ha ei om rang ngal kēng,
tenchu hadōr han anzui la ni mak.
7 Asik chu nam le nam,
ram le ram,
andui inti,
hanūk chu mun tina māitām,
rikhua le nīnu hong inti.
8 Tenchu hava ngāi dōra ha antak ei phutna duai kēng ala ni.
9 Hava tika han mīn ansinsak rang le athat ranga na betōk unti.
Hanūk chu ka raming sika nam tinin ei na la mumāk u rang.
10 Hanūk chu hava tika han tamtak chu achulna man unti.
Angkhatin angkhat chunga betōk intia hanūk angkhatin angkhat chunga mumāk inti.
11 Hanūk chu deari rothol tamtak hong suak inti mi tamtak la hong huang unti.
12 Hanūk chu dān anrakānna ei ansōn riam sika mi tamtak anditna chu hong dāi inti.
13 Tenchu tukareng ahek ten pei angīrtita a om tak chu zōkna man inti.
14 Hanūk chu nam tin ama kōma ariatpui ranga arama hiva thang ahui hi maniapūr pumpuia anrila om inti.
Hava tika han hun ahek chu hong suak inti.
15 Hava sika han deari Danielin ei ril anga,
matīr aruai neinun annimpu ha mun ānthianga ansiaka na mu u tik,
han Judia rama om ngāi chu mual ansāng tiang rot u rase.
17 Tukareng in chunga om chu in sūng āta neinun alāk ranga chum nō rase.
18 Hanūk chu tukareng phāia om chu apuan alāk ranga anūk kīr nō rase.
19 Hava hun tika chu anrāi le nāitenu ngāi chang rang chu chapna om rang ba!
20 Bōrzong u ro,
nei rot u na hun nūdin le pōngansa nikhuana ei chuk nōkna ranga.
21 Asik chu ha tika antakna lian,
maniapūr anphut len āta la om pial ngāi mak.
Na matona om um pial lāi nō ni.
22 Hanūk chu hava nikhua ngāi ha antōmna chang abui ten nuk anei itē azōk thei rang om nō ni.
Tenchu anthang sua ngāi ranga chu hava nikhua ha antōmna chang om inti.
23 Hasik han tukarengin,
enta,
hava Krista ha hiva hin a om,
sova son a om,
na ti u nām iam u nō ro.
24 Asik chu Krista rothol le deari rothol ngāi hong suak unti na,
sinsiana lianpa ngāi le tichang abui sin ngāi na man mu unti.
Athei ten,
hava lehan anthang sua mi ngāi um la huang unti.
25 En u ro,
aphā mān āta kei na ril kēng ani u zei.
26 Hasika han mīn nangni ngāi rang en u ta,
ama chu mi buina rama om ana ti u le apanga suak u nō ro.
Hanūk chu en u ta,
ama chu in sūnga om ana ti u nām,
iam u nō ro.
27 Asik chu khuanlek,
sualam āta tāklam ten pei ei anlek anga,
koi Miring Nāi Pasal hi hong ka ti.
28 Ruak ei omna tak,
sarakuru om inti.
29 Hanūk chu hava tika han antakna ahek phing le chu:
‘Ani zīng intia,
tha ēl nō ni,
Anvān āta ārsi ngāi chul inti.
Chungvāna thōtheina adōn
dōra annīk inti,’
ati na.
30 Hava tik han Miring Nāi Pasal sinsiana chu anvāna mu thei u na ti.
Hava tik han maniapūr nam tin dōra chapa ankhēk unti.
Hatuka chu Miring Nāi Pasal ha chungvāna sūmmoi bila arāt le anlalna dōra le ahonga mu un na ti.
31 Hanūk chu totorōt maring le ka palāi ngāi hong tīr ka ti.
Amānīn ramual ei hekna le ei hekna kōlkil manli nāta ama ami thang sua ngāi chu man būm inti.
32 Theichang kung āta ankhīna hi anchū u ro.
Abāk ahong annuia abua ahong ancher ten,
pāmsāl anāi zei ati na na lei riat thei u.
33 Han tin anga nangnīm hava rui ngāi na mu u le koi chu anāi ka ni zei,
makot ten pei ka suak zei ati na lei riat u ro.
34 Na kōm u na taktaka kei na ril ani u zei,
hiva rui ngāi dōra akip zit sua māseng chu hiva huna mi ngāi hi anpei pial u nō ni.
35 Chungvān le maniapūr anpei inti,
tenchu ka chong ngāi anpei pial nō ni.
Tutēn anikhua le
ahunbi ariat om mak
36 Tenchu hava nikhua le hava hun chu tutēn re thei mak.
Chungvāna palāi ngāiin um re u mak,
koi Nāi Pasalin um re makung,
Pa rong kēng ariat.
37 Nova ahun lāia ei om anga Miring Nāi Pasal kei hong um han tin dēn han ei om rang.
38 Asik chu tilian sāng ahong mān rakuanga Nova alūt nikhua ten pei mīn ei nēk ei sāk,
in ei neia ruathar ei lāk u.
39 Hatuka tiliansāng ahonga alom u na anning zit māseng mīn riat thei mak.
Han tin anga Miring Nāi Pasal chu hong ka ti.
40 Hava tik han pasal anni phāia om inti,
angkhat anruai intia angkhat anmāk inti.
41 Nupang anni busuk untia angkhat anmāka angkhat anruai inti.
42 Hasik han lei menga om u ro,
asik chu hova nikhua mo na Puma ei hong rang re u mak chena.
43 Tenchu hiva hi re u ro.
Marusa hova huna mo ei hong rang,
hava ha in pumapān riat sela chu a-ina manlūt nō ni.
44 Hava sika han nangni ngāi um ansin u ro.
Asik chu nangnīn nei iam u nōk hun taka Miring Nāi Pasal chu hong ka ti.
45 Atun chu hava anngampuirua le suak ahian apumapān asuak ngāi chunga ei phun ahun taka amāni ranga sāk apēk thei ha tu mo ei ni rang?
46 Apumapa ahong le havan tina āthō ei hong mu suak chu ravān āsa kēng.
47 Koiin tataka kei na ril ani u zei,
amān anei anung ngāi dōra chunga avongpu manchang inti.
48 Tenchu suak āsa nōk ha amalulunga ka pumapa ei hongna rang chu ala sōt rang kēng ati na.
49 Hatuka alōm ngāi azēma,
hanūk chu mi anri le anhāi ngāi bila alei om a.
50 Hatuka alei ngāk nōk nikhua le alei iam nōk hun taka hava suak apumapa chu hong inti.
51 Hanūk chu ama ha bong anni hong manchang intia,
achang āi rang ha phuazekām ngāi bila atet inti.
Hava muna han chapna le rakam anrialna om inti,”
ati na.